Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Eaprende umi istória oĩvagui la Bíbliape

 LEKSIÓN 9

Ifamília sapyʼa hikuái

Ifamília sapyʼa hikuái

Abrahán ha Sara aréma omenda hague. Haʼekuéra oiko vaʼekue Úrpe, péro oheja hikuái pe hóga porãite orekóva upépe ha oho oiko óga kárpape. Péro Sara arakaʼeve ndojekehái upévare pórke haʼe ojerovia Jehováre ipyʼaite guive.

Sara ningo oipotaiterei vaʼekue la mitã, upévare heʼi Abrahánpe: “Nde ha che sirviénta Agar perekóramo peteĩ mitã, arekóta peteĩ che membyrã”. Upéi Agar hyeguasu ha oreko peteĩ mitãkuimbaʼe ha ombohéra hikuái Ismael.

Heta tiémpo rire, Abrahán orekópe 99 áño ha Sara 89, tres persóna ou ovisita chupekuéra. Abrahán ombohasa chupekuéra opytuʼu hag̃ua peteĩ yvyraguýpe ha upéi oinvita chupekuéra opyta hag̃ua okaru hendivekuéra. ¿Reikuaápa mávapa rakaʼe umi mbohapy persóna? Haʼekuéra ningo ánhel ha Jehová omondo chupekuéra heʼi hag̃ua Abrahánpe: “Koʼã fécharupi pe áño oúvape ne rembireko Sara imembýta peteĩ mitãkuimbaʼe”. Sara ojapysaka hína kuri hesekuéra koty guive ha ohendúvo upéva opuka ha heʼi ipyʼapýpe: “Mbaʼéiko che chemembyvéta cheg̃uaig̃ui rire”.

Upéi al áño sigiénte Sara orekóma peteĩ mitã Jehová ánhel heʼi hagueichaite chupe. Abrahán ombohéra itaʼyraʼípe Isaac. Upe téra heʼise “opukáva”.

 Isaac orekórõ guare cinco áñorupi, Sara ohecha mbaʼéichapa Ismael oñembohory hese. Sara ningo hakateʼỹeterei Isaac rehe ha upévare heʼi Abrahánpe: “Emosẽ koʼágui Agar ha Ismaélpe”. Ñepyrũrã Abrahán ndojaposéi upéva, péro Jehová heʼi chupe: “Ejapo la Sara heʼíva pórke Isaac rupive akumplíta hína pe apromete vaʼekue ndéve. Ha ani ejepyʼapy Ismael rehe, che akuidáta hese”.

“Sara ojerovia rupi, oñemeʼẽ vaʼekue chupe podér hyeguasu hag̃ua [...]. Upéva oiko Sara oikuaágui ikatuha ojerovia upe opromete vaʼekuére chupe” (Hebreos 11:11).