Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Eaprende umi istória oĩvagui la Bíbliape

 LEKSIÓN 96

Jesús oiporavo Sáulope

Jesús oiporavo Sáulope

Saulo haʼe vaʼekue peteĩ siudadáno romano onase vaʼekue Társope. Saulo ningo fariséo vaʼekue ha oikuaapaite umi léi judía, péro ndochaʼeiete umi kristiánore. Haʼe mbaretépe onohẽ umi héntepe hógagui, tahaʼe kuimbaʼe térã kuñáme, ha oraha omoinge chupekuéra kárselpe. Peteĩ jey opyta voi oñemboʼy ha omaña mbaʼéichapa peteĩ hénte aty iñañaitereíva ojapi itápe ojuka peve peteĩ disípulo héravape Esteban.

Péro Saulo noñekontentái umi kristiáno Jerusalenguápente opersegi ha omoinge haguére kárselpe. Upévare ojerure permíso pe saserdóte prinsipálpe oho hag̃ua avei Damáscope opersegi umi kristiánope. Saulo og̃uahẽmbotávo Damáscope, peteĩ mbaʼerendy omimbipa ijerére ha haʼe hoʼa yvýpe. Upévo ohendu peteĩ heʼíva chupe: “Saulo, ¿mbaʼéreiko chepersegi hína?”. Saulo oporandu chupe: “¿Máva piko nde?”. Ha pe vos okontesta chupe: “Che hína Jesús. Tereho Damáscope ha upépe ojeʼéta ndéve la rejapo vaʼerã”. Upepete Saulo opyta siégo ha ojegueraha chupe ipógui upe siudápe.

Damáscope oĩ vaʼekue peteĩ kristiáno iñeʼẽrendúva hérava Ananías. Jesús heʼi chupe peteĩ visiónpe: “Tereho Judas rógape, pe kálle héravape Recta ha eheka Sáulope”. Ananías heʼi Jesúspe: “Che Ruvicha, che ningo ahendu ko kuimbaʼe ojapoha heta mbaʼe vai ha omoingeha hína kárselpe nde disipulokuérape”. Péro Jesús heʼi chupe: “Tereho katu hendápe, pórke che aiporavo Sáulope opredika hag̃ua heta tetãrupi umi notísia porã oúva Ñandejáragui”.

Upémarõ Ananías oho Saulo rendápe ha heʼi chupe: “Saulo, che ermáno, Jesús chembou ne rendápe ikatu hag̃uáicha rehecha jey”. Upepete Saulo ohecha jey. Saulo oaprende heta mbaʼe Jesúsgui ha oiko chugui idisípulo. Saulo ojevautisa ha oñepyrũ opredika umi ótro kristiánondi umi sinagógape. Epensamíntena mbaʼépa oiméne opensa raʼe umi judío ohechávo chupe omboʼeha hína la  héntepe Jesúsgui. Umi judío oñeporandu voi: “¿Ndahaʼéi piko kóva raʼe pe kuimbaʼe opersegími vaʼekue Jesús disipulokuérape?”.

Tres áño Saulo opredika umi héntepe Damáscope. Péro umi judío ndochaʼéi hese ha ohecha voi mbaʼéichapa ikatu ojuka chupe. Umi ermáno oikuaárõ guare upéva, oipytyvõ Sáulope osẽ hag̃ua pe siudágui. Haʼekuéra omboguejy chupe peteĩ kanásto guasúpe pe siuda murálla ventánarupi.

Saulo ohórõ guare Jerusalénpe, oñehaʼã oñeʼẽ umi ermáno upepeguándi, péro haʼekuéra okyhyje chugui. Upémarõ peteĩ ermáno ivuenoitereíva hérava Bernabé oraha Sáulope umi apóstol rendápe ha oipytyvõ chupekuéra oguerovia hag̃ua Saulo okambiáma hague. Upéi Saulo oñembyaty umi ermáno oĩvandi Jerusalénpe ha kyreʼỹme opredika hendivekuéra umi notísia porã oúva Ñandejáragui. Tiémpo rire Sáulope oñehenói Pablo.

“Cristo Jesús ou ko múndope osalva hag̃ua umi pekadórpe. Umíva apytégui che hína pe ipekádo hetave vaʼekue” (1 Timoteo 1:15).