Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Eaprende umi istória oĩvagui la Bíbliape

 LEKSIÓN 91

Jesús oikove jey

Jesús oikove jey

Jesús omano rire, peteĩ kuimbaʼe ipláta hetáva hérava José, ojerure permíso Pilátope omboguejy hag̃ua Jesús retekue pe yvyrágui. Upéi José olia Jesús retekue umi téla de líno iporãvape, omoĩ hese umi mbaʼe hyakuã asýva ha omoĩ chupe peteĩ sepultúra pyahúpe. Haʼe omanda oñemboty hag̃ua pe sepultúra entráda peteĩ ita guasúpe. Umi saserdóte oho Pilato rendápe ha heʼi chupe: “Rokyhyje Jesús disipulokuéra omondárõ g̃uarã ág̃a hetekue ha upéi oiko heʼi upérupi haʼe oikove jey hague”. Upémarõ Pilato heʼi chupekuéra: “Peasegura porã pe sepultúra entráda ha pemoĩ guárdia ovihila hag̃ua upépe”.

Tres día rire, unos kuánto kuña oho pyharevete pe sepultúrape ha otopa ojepeʼa hague pe ita ombotýva pe sepultúra entráda. Pe sepultúra ryepýpe katu oĩ peteĩ ánhel. Pe ánhel heʼi chupekuéra: “Ani pekyhyje. Jesús oikove jeýma. Tapeho peje idisipulokuérape oho hag̃ua Galiléape ojotopa hag̃ua hendive upépe”.

María Magdalena odipara oho Pedro ha Juan rendápe ha heʼi chupekuéra: “Jesús retekue ojegueraha pe sepultúragui”. Upévo Pedro ha Juan odipara oho pe sepultúra oĩhápe ha ohechávo ndaiporiveimaha Jesús retekue oho jeýnte hikuái hógape.

María oho jey pe sepultúra oĩhápe ha upépe ohecha mokõi ánhelpe ha heʼi chupekuéra: “Ndaikuaái ningo moõpa ojegueraha Jesúspe”. Upéi ohecha peteĩ kuimbaʼépe ha oimoʼã haʼeha pe hardinéro, upémarõ heʼi chupe: “Karai, eremíntena chéve moõpa remoĩ Jesús retekue”. Pe kuimbaʼe heʼi chupe: “¡María!”, ha upépe haʼe opilla upe kuimbaʼe haʼeha Jesús ha heʼi chupe: “¡Mboʼehára!”, ha oañua chupe. Jesús heʼi Maríape: “Eho emombeʼu che ermanokuérape cherecha hague”. María odipara voi oho omombeʼu umi disípulope ohecha hague Jesúspe.

Tardemie upe díape, mokõi disípulo oho hína kuri Jerusaléngui Emaúspe. Upéi peteĩ kuimbaʼe oñemboja ha oguata ohóvo hendivekuéra ha oporandu chupekuéra mbaʼérehepa oñeʼẽ hína hikuái. Haʼekuéra heʼi chupe: “¿Ndereikuaái piko la oiko vaʼekue? Ojapo tres día umi saserdóte ojukauka hague Jesúspe ha koʼág̃a oĩ unos kuánto kuña heʼíva haʼe oikove jeymaha”. Pe kuimbaʼe oporandu chupekuéra: “¿Peẽ piko ndapegueroviái mbaʼe umi proféta ohai vaʼekue? Haʼekuéra ningo ohai vaʼekue pe Cristo omano  vaʼerãha ha upéi oikove jeytaha”. Upéi pe kuimbaʼe osegi oexplika chupekuéra heta mbaʼe Ñandejára Ñeʼẽgui. Og̃uahẽvo hikuái Emaúspe, umi mokõi disípulo ojerure pe kuimbaʼépe opyta hag̃ua hendivekuéra. Upéi osenáta jave hikuái ojerure chupe oñemboʼe hag̃ua pe pan rehe. Upépe umi disípulo ohechakuaa pe kuimbaʼe haʼeha Jesús. Upe javete Jesús odesaparese.

Umi mokõi disípulo odipara oho Jerusalénpe. Og̃uahẽvo hikuái pe óga oĩháme umi apóstol, omombeʼupaite chupekuéra la oiko vaʼekue. Haʼekuéra oĩ aja pe óga ryepýpe, Jesús ojeaparese chupekuéra. Ñepyrurã umi apóstol ndoroviaséi haʼeha Jesús. Péro haʼe heʼi chupekuéra: “Pemañántena che póre ha pepoko cherehe pehecha hag̃ua che haʼeha Jesús. Umi proféta ningo ohai vaʼekue voi pe Cristo opuʼãtaha umi omanóva apytégui”.

“Che hína pe tape, pe añetegua, ha pe jeikove. Che rupive añoite ikatu oñeg̃uahẽ pe Túa rendápe” (Juan 14:6).