Jesús oñerreuni idisipulokuérandi Galiléape ha omanda chupekuéra peteĩ mbaʼe iñimportantetereíva. Haʼe heʼi chupekuéra: “Tapeho pemboʼe umi hénte opa tetãyguápe oiko hag̃ua chuguikuéra che disípulo. Pemboʼe chupekuéra opaite mbaʼe peaprende vaʼekue chehegui ha pevautisa chupekuéra”. Upéi opromete idisipulokuérape: “Che siémpre aiméta penendive”.

Jesús oikove jey rire, 40 día aja ojeaparese vaʼekue heta vése heta idisípulope Galiléape ha Jerusalénpe. Haʼe omboʼe chupekuéra heta mbaʼe iñimportánteva ha ojapo heta milágro. Haʼe oñerreuni vaʼekue última ves umi apóstol ndive pe sérro Olivotýpe. Péro upe mboyve Jesús heʼi vaʼekue chupekuéra: “Ani peho Jerusaléngui, pehaʼarõnte pe Túa opromete vaʼekue peẽme”.

Ijapostolkuéra nontendéi kuri la haʼe heʼi vaʼekue chupekuéra upérõ, upévare oaprovecha hikuái ha oporandu chupe: “¿Ndéiko regovernátama Israélpe?”. Jesús heʼi chupekuéra: “Jehová ndoipotái gueteri agoverna ko tiémpope. Péro en kualkiér moménto perresivíta espíritu sánto ha upéva omeʼẽta peẽme podér ha peikuaaukáta che réra. Upévare tapeho pepredika Jerusalén, Judea, Samáriape ha mombyryvehápe ko yvy tuichakuére”.

Upéi Jesús oho jey yvágape ha peteĩ arai omoʼã chupe ha idisipulokuéra opyta omaña hese odesaparese peve.

Jesús disipulokuéra osẽ pe sérro Olivotýgui ha oho jey Jerusalénpe. Upépe haʼekuéra oñembyaty ha oñemboʼe jepi voi peteĩ ógape pe koty yvateguápe. Upérõ haʼekuéra ohaʼarõ Jesús oikuaauka chupekuéra hetave mbaʼe.

“Ha koʼã marandu porã oñeʼẽva Ñandejára Rréinore oñemombeʼúta oparupiete ko yvy ape ári, ojekuaa hag̃ua opa tetãrupi, ha upéi og̃uahẽta pe ára pahaite” (Mateo 24:14).