Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Eaprende umi istória oĩvagui la Bíbliape

 LEKSIÓN 64

Ojepoi Daniélpe umi león oĩháme

Ojepoi Daniélpe umi león oĩháme

Peteĩ kuimbaʼe medo hérava Darío ogoverna vaʼekue avei Babilonia. Haʼe ohechakuaa Daniel idiferenteha umi ótro kuimbaʼégui ha upévare omoĩ ikárgope umi kuimbaʼe iñimportantevéva oĩva upe paíspe. Upévare umíva oñepyrũ oenvidia Daniélpe ha ohecha mbaʼépa ikatu ojapo oity hag̃ua chupe ipuéstogui. Koʼã kuimbaʼe oikuaa porã Daniel oñemboʼeha Jehovápe tres vése al día, upévare heʼi hikuái Daríope: “Ore ruvicha, enohẽ vaʼerãngo peteĩ léi heʼíva ndéve añoiténte oñeñemboʼe vaʼerãha. Ha oĩramo ndojapóiva upéva, tojepoi chupe umi león oĩháme”. Daríope ogusta la idéa ha ofirma upe léi.

Daniel oikuaávo osẽha upe léi, oho oike hógape ha oñesũ pe ventána oĩháme ha oñemboʼe Jehovápe. Upévo umi kuimbaʼe iñenvidiosoitéva oho oikéntema Daniel rógape ha otopa chupe oñemboʼe hína. Upéi odipara oho heʼi hikuái Daríope: “Daniel ndorrespetái la nde eréva. Haʼe tres vése al día voi oñemboʼe Idióspe”. Darío ningo ohayhueterei Daniélpe ha ndoipotái ojejuka chupe. Upévare oñepyrũ okalkula mbaʼéichapa ikatu osalva chupe, péro ndaikatúi ojapo mbaʼeve. Ofirma jepéma upe léi ha ni haʼe ndaikatuvéima okambia upéva. Upéicha rupi omandámante ojepoi hag̃ua Daniélpe pe yvykua pypuku oĩháme umi león ñarõ.

 Upe pyharépe Darío ndaikatúi oke ojepyʼapýgui Daniel rehe. Upévare, pyharevete odipara oho ha ojayvy omaña umi león oĩháme ha heʼi: “¡Daniel! ¿Ndesalva piko raʼe nde Jára?”.

Daniel heʼi chupe: “Jehová ánhel omboty umi león juru ha ndojapói cherehe hikuái mbaʼeve”. Darío ovyʼaiterei ha omanda oñeguenohẽ hag̃ua Daniélpe upégui. Daniel osẽ upégui ha ndojekuaái hese ni oikarãiʼi hague chupe umi león. Upéi pe rréi omanda ojepoi hag̃ua umi león oĩháme umi kuimbaʼe ou vaʼekuépe ojagua Daniel rehe. Ojepoívo umi kuimbaʼépe pe yvykuápe, umi león hoʼupaite chupekuéra.

Upéi Darío onohẽ peteĩ órden heʼíva: “Enterovete perrespeta vaʼerã Daniel Járape. Haʼe osalva chupe umi leóngui”.

¿Ndépa reñemboʼe avei Jehovápe káda día ojapo haguéicha Daniel?

“Jehová oikuaa mbaʼéichapa oguenohẽta jejopy vaígui umi hénte omombaʼeguasúvape chupe” (2 Pedro 2:9).