Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Eaprende umi istória oĩvagui la Bíbliape

 LEKSIÓN 62

Pe yvyramáta osoña vaʼekue Nabucodonosor

Pe yvyramáta osoña vaʼekue Nabucodonosor

Peteĩ pyhare Nabucodonosor osoña peteĩ mbaʼe omongyhyjetereíva chupe. Upévare ohenói umi kuimbaʼe arandúpe oexplika hag̃ua chupe mbaʼépa osignifika pe osoña vaʼekue, péro haʼekuéra ndaikatúi oexplika chupe upéva. Upémarõ pe rréi omombeʼu Daniélpe la osoña vaʼekue.

Nabucodonosor heʼi Daniélpe: “Ahecha che suéñope peteĩ yvyramáta okakuaáva ohupyty peve pe yvága. Umi lugár mombyryvehágui jepe ojekuaa upe yvyramáta. Hovyũ asy ha heta hiʼa. Umi animál opytuʼu pe isómbra guýpe ha umi guyra katu ojaitypo pe hakãre. Upéi peteĩ ánhel oguejy pe yvágagui ha heʼi: ‘Peikytĩ pe yvyramáta ha pehakãʼopa. Péro peheja pe hapo ha michĩmi pe imatakue hese. Upéi pemoĩ hese peteĩ argólla ojejapóva iérro ha kóvregui. Ikorasõ ndahaʼemoʼãvéima yvypóra korasõ síno peteĩ animál salváhe korasõ. Ohasáta siete tiémpo ha enterove ohechakuaáta Ñandejára haʼeha pe Governánte ha haʼe ikatuha omeʼẽ peteĩ goviérno haʼe omeʼẽsévape’”.

Jehová omombeʼu Daniélpe mbaʼépa osignifika pe yvyramáta osoña vaʼekue Nabucodonosor. Daniel oikuaávo upéva tuichaiterei oñemondýi ha heʼi pe rréipe: “Che ruvicha, hiʼãnte oiko umi ne enemígore pe resoña vaʼekue, péro nderehe la oikóta. Nde hína pe yvyramáta guasuete oñekytĩ vaʼekue. Ojepeʼáta ndehegui ne goviérno ha reʼúta pásto pe ñúre umi animál salváheicha. Péro pe ánhel heʼi kuri avei ojeheja hag̃ua michĩmi imatakue. Upéva heʼise upe rire oiko jeytaha ndehegui rréi”.

Un áño osoña haguépe umi mbaʼe, Nabucodonosor ojupi ipalásio terrásape ha omaña mbaʼéichapa tuicha pe siuda de Babilonia ha heʼi: “Ajépa tuichaite ko siuda ajapo vaʼekue. Ndaipóri ótro cheichagua”. Heʼi aja gueteri upéva, ohendu peteĩ vos yvágagui heʼíva: “Nabucodonosor, ojepeʼáma ndehegui ne goviérno”.

Upepete Nabucodonosor oñepyrũ itavy ha oñekomporta peteĩ animál salváheicha. Upévare omosẽ chupe hikuái pe palásiogui ha oiko umi animál ndive pe ñúre. Pe iñakãrangue umíva ipukupa ha ojogua umi ágila raguépe ha pe ipyapẽ katu ojogua umi guyra pyapẽme.

Siete áño haguépe Nabucodonosor orrekupera jey la ihuísio ha Jehová omoĩ jey chupe ogoverna hag̃ua Babilonia. Upéi Nabucodonosor heʼi: “Amombaʼeguasu Jehovápe, haʼe ningo Rréi yvágape. Koʼág̃a  ahechakuaa Jehová haʼeha pe Governánte. Haʼe okorrehi umi ijorgullósovape iñumílde hag̃ua ha haʼe ikatu omeʼẽ peteĩ goviérno haʼe omeʼẽsévape”.

“Pe oñemombaʼeguasúva, upe rire tuicha oñemotĩta, pe ijorgullósova katuete hoʼáta” (Proverbios 16:18).