Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Eñemoag̃ui jeýna Jehováre

 PÁRTE 4

Nde voi rejekulpa: “[Cheperdonamína], péicha chepotĩ jeýta ne renondépe”

Nde voi rejekulpa: “[Cheperdonamína], péicha chepotĩ jeýta ne renondépe”

“Che añepyrũ ambaʼapo porãiterei ha upéicha rupi roiko porã vaʼekue. Péro upearã ajapo vaʼerã kuri heta mbaʼe Jehovápe ndogustáiva. Añepyrũ afesteha umi fiésta pagána, añentremete polítikape ha iglésiape jepe aha. Añemomombyry Jehovágui 40 áñore. Ha amáske ohasa la tiémpo, apensa haʼe núnka nacheperdonamoʼãiha umi mbaʼe vai ajapóvare. Che jepe nañeperdonái, pórke aikuaa porã kuri ivaiha la ajapóva ha lomímonte ajapo.”  (Martha)

ÑAPENSÁRAMO Jehová nañaneperdonamoʼãiha ikatu japyta yvýre. Rréi David oñeñandu vaieterei vaʼekue opekárõ guare, upévare oskrivi: “Umi mbaʼe vai ajapo vaʼekue haʼete chéve peteĩ kárga ipohýiva araháva che akã ári, ha ndaikatuvéima chepuʼaka umívare” (Salmo 38:4). Oĩ ermáno oñeñandu vaietereíva ha oñedeprimíva voi opensa rupi Jehová núnka noperdonamoʼãiha chupe (2 Corintios 2:7). ¿Ndépa reñeñandu avei upéicha koʼág̃a? ¿Repensápa nde pekádo ivaietereiha ha Jehová ndaikatumoʼãiha neperdona? Ani rejepyʼapy, Jehová ningo nepytyvõse reñemoag̃ui jey hag̃ua hese.

“Pejúna pearregla pene situasión chendive”

Jehová ningo arakaʼeve nomboykemoʼãi peteĩ isiérvo oñarrepentívape ipyʼaite guive, upéva rangue oipytyvõse chupe. Jesús omoĩ vaʼekue pe ehémplo oñeʼẽva pe taʼýra ofalla vaʼekuére, haʼe heʼi oho hague hógagui ha oiko iñakãre, péro upéi kon el tiémpo odesidi ou jey. ¿Mbaʼépa oiko raʼe upérõ? La Biblia heʼi: “Oĩ aja gueteri mombyry, itúva ohecha sapyʼa chupe ha oiporiahuverekógui, odipara oho hendápe, ha hatã oañuã ha ohetũ chupe” (Lucas 15:11-20). Ko túva ningo orrepresenta hína Jehovápe, haʼe oiporiahuvereko ha ohayhueterei itaʼyrakuérape. ¿Ndépa reñemoag̃uise avei hese péro repensa ‘reĩha gueteri mombyry’ chugui? Ani repensa upéicha, reime vaʼerã segúro Jehová oipotaitereiha reñemoag̃ui jey hese.

Péro ikatu nde repensa Jehová ndaikatumoʼãiha neperdona pórke hetaiterei vésema refalla hendive térã ivaieterei rupi nde pekádo. Oiméramo upéicha, ejepyʼamongetamína ko invitasión Jehová ojapóvare: “Pejúna pearregla pene situasión chendive, ha pende pekadokuéra pytãvéramo jepe, ahejáta morotĩ asy” (Isaías 1:18). Sapyʼánte umi pekádo ñakometéva haʼete peteĩ máncha pytã oĩva peteĩ ao morotĩre ha ndaikatumoʼãvéimava ojei. Péro Jehovápe g̃uarã ndahaʼeiete upéicha, haʼe ningo ikatu operdona umi pekádo ivaietereíva jepe.

Jehová ningo ndoipotái resegi resufri rejavy haguére. Upéicharõ, ¿mbaʼépa ikatu rejapo haʼe neperdona hag̃ua ha ipotĩ jey hag̃ua ne konsiénsia? Oĩ mokõi mbaʼe ikatúva nepytyvõ. Primero, rejapo vaʼerã rréi David ojapo haguéicha, haʼe heʼi: “Amombeʼúta Jehovápe che rembiapo vaikue” (Salmo 32:5). Jehová ningo neinvita rearregla hag̃ua ne situasión hendive. Easeptána ko invitasión ha eñemboʼe chupe. Emombeʼu umi mbaʼe vai rejapo vaʼekue ha avei mbaʼéichapa reñeñandu, David ojapo haguéicha. Haʼe ojerure vaʼekue Ñandejárape: “[Eperdonamína] umi mbaʼe vai ajapo vaʼekue, péicha chepotĩ jeýta ne renondépe. Nde ningo reipota cheumílde ha añembyasy che pyʼaite guive. Aikuaa neremboykemoʼãiha peichagua sakrifísio” (Salmo 51:2, 17).

Segundo, reasepta vaʼerã pe ajúda oñemeʼẽséva ndéve. Jehová ningo ojevale vaʼekue iproféta Natán rehe omeʼẽ hag̃ua konsého Davídpe, ha haʼe oasepta vaʼekue upéva (2 Samuel 12:13). Koʼág̃arupi Jehová ojevale umi ansiánore, haʼekuéra ningo oĩ kapasitádo oipytyvõ hag̃ua peteĩ ermáno oñarrepentívape oñemoag̃ui jey hag̃ua hese. Reñemongeta vove umi ansiánondi, haʼekuéra oipurúta la Biblia omombarete jey hag̃ua nde jerovia. Avei oñemboʼéta nendive ndepyʼaguapy hag̃ua ha ani hag̃ua resegi reñeñandu vai umi mbaʼe rejapo vaʼekuére (Santiago 5:14-16).

Jehová oipota reñemoĩ porã jey hendive ipotĩ hag̃ua ne konsiénsia

“Ovyʼa pe persóna ojeheja reívape hembiapo vai”

Ikatu oime ijetuʼueterei ndéve remombeʼu hag̃ua Jehovápe nde pekádo ha reñemongeta hag̃ua umi ansiánondi. Davídpe jepe ijetuʼu vaʼekue ojapo hag̃ua upéva. La Biblia omombeʼu voi peteĩ tiémpore haʼe oñomi hague ipekádo (Salmo 32:3). Péro upéi ohechakuaa iporãveha omombeʼu la ojapo vaʼekue ha okambia oĩ porã jey hag̃ua Jehovándi.

David ningo ovyʼaiterei ikatu haguére oñemoag̃ui jey Jehováre, ha heʼi voi: “Ovyʼa pe persóna ojeheja reívape hembiapo vai, ha oñeperdonáva ipekádo” (Salmo 32:1). Upéi heʼive: “Jehová, epermitimína chéve añeʼẽ, ikatu hag̃uáicha romombaʼeguasu” (Salmo 51:15). David ipyʼaguapy opytávo ha oagradese Jehovápe operdona haguére chupe, ha upéva omomýi chupe omombaʼeguasu hag̃ua Ñandejárape umi hénte renondépe.

Ne konsiénsia nemolestáramo ningo ijetuʼúta ndéve repredika hag̃ua umi héntepe. Upévare Jehová oipota reñemoĩ porã jey hendive ipotĩ hag̃ua ne konsiénsia, péicha ndepyʼaguapýta ha ikatúta vyʼápe remombeʼu Ñandejára propósito (Salmo 65:1-4). La Biblia heʼi voi: “Peñarrepentíke ha pejevy, ikatu hag̃uáicha Jehová operdona pende pekádo ha penembopiroʼy” (Hechos 3:19).

Martha, pe ermána oñemensionáva oñepyrũvo ko artíkulo, heʼi: “Che memby ombou meme vaʼekue chéve rrevísta Ñemañaha ha ¡Despertad!, ha mbeguekatúpe añemoag̃ui jey Jehováre. La ijetuʼuve vaʼekue chéve ajerure Ñandejárape cheperdona hag̃ua. Péro upéi añemboʼe ha ajerure asy chupe ombohasa reimínte hag̃ua umi mbaʼe vai ajapo vaʼekue. Ni ndagueroviaséi ningo ohasa hague 40 áño añemoag̃ui jey hag̃ua Jehováre. Pe che ahasa vaʼekue ohechauka porã Jehová omeʼẽha ñandéve oportunida ñaime porã jeývo hendive ha ñañemoag̃uívo iñorganisasiónre, oiméramo jepe aretereíma jaheja hague chupe”.