Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Eñemoag̃ui jeýna Jehováre

 PÁRTE 1

“Che ahekáta upe okañy vaʼekuépe”

“Che ahekáta upe okañy vaʼekuépe”

Peteĩ ovecha opastea hína umi ótro ovechakuérandi, péro peichaháguinte okañyete oñemeʼẽʼỹre enkuénta. Koʼág̃a ndohechavéima umi ótro ovechápe ni ipastórpe. Oime vaʼerã okyhyjeterei, opyta anga haʼeñoite. Hiʼarive pytũma ohóvo ha umi animál ñarõ ikatu oataka chupe. Péro upeichaháguinte ohendu sapyʼa ipastór ohenóirõ chupe. Mbaʼeichaitépa oiméne ovyʼa ha ipyʼaguapy ohechávo ipastór odiparaha oúvo hendápe, ohupi chupe ijyva ári, okuvri chupe ijaópe ha ogueraha chupe hógape.

JEHOVÁ pyʼỹinte oñekompara peteĩ pastór rehe. Iñeʼẽme haʼe heʼi: “Chete voi aháta aheka umi che ovechami okañy vaʼekuépe ha añangareko porãta hesekuéra” (Ezequiel 34:11, 12).

“Añangarekóta umi che ovechamíre”

¿Mávapa hína Jehová ovechakuéra? Entéro umi ohayhu ha oadoráva chupe. La Biblia heʼi voi: “Peju jaadora ha ñamombaʼeguasu Jehovápe, ñañesũ ñande Apohare renondépe. Haʼe hína Ñandejára ha ñande hína pe puévlo operteneséva chupe, umi ovecha haʼe oñangarekoha” (Salmo 95:6, 7). Peteĩ ovecha iñeʼẽrenduháicha ipastórpe, umi omombaʼeguasúva Jehovápe iñeʼẽrendu avei chupe. Péro sapyʼánte okañy térã oho ótro tapérupi, ha upéicha rupi ndaikatuvéi osegi Ipastórpe (Ezequiel 34:12; Mateo 15:24; 1 Pedro 2:25). Upéicharõ jepe, Jehová ndohejareíri umi oñemomombyrývape chugui ni ndeʼíri hesekuéra naipohãveimaha.

Aníkena ñapensa Jehová ndokuidamoʼãveimaha ñanderehe ñañemomombyrýramo, haʼe ningo heta hendáicha ohechauka haʼeha ñande Pastór. Jahechamína mbohapy ehémplo.

Ñanemongaru. Jehová omombeʼu mbaʼéichapa okuida ijovechakuérare. Haʼe heʼi: “Umi pásto iporãvévape agueraháta umi che ovechamíme amongaru hag̃ua chupekuéra [...]. Amombytuʼu ha ambopasteáta chupekuéra umi lugár iporãvehápe” (Ezequiel 34:14). Jehová ningo siémpre omeʼẽ ñandéve hiʼoraitépe umi mbaʼe ñaikotevẽva ñamombarete hag̃ua ñande jerovia. Epensamína, ¿oĩmapa raʼe algún artíkulo, diskúrso o vidéo haʼetévaicha voi ojejapóva ndéve g̃uarãite? Umícha jave, ¿reñandúpa mbaʼéichapa Jehová oñeinteresa nderehe?

Ñandeprotehe ha ñanepytyvõ. Jehová opromete: “Pe okañývape agueru jeýta chendive, pe oñelastimávape aipohãnóta ha pe ikangývape amombarete jeýta” (Ezequiel 34:16). Jehová ningo omombarete umi ovecha kangymi oñeñandu vaívape hetaitereígui iprovléma. Avei mborayhúpe oipohãno umi oñeñandu vaívape ótro ermáno ofalla haguére hendive. Ha oho avei oheka umi okañy vaʼekuépe ha ojekulpáva umi mbaʼe vai ojapo vaʼekuére.

Oho ñandereka ñakañýramo. Jehová heʼi ijovechakuérare: “Aháta aheka umi lugár isarambi haguépe hikuái ha arreskata jeýta chupekuéra”. Ha upéi opromete: “Che ahekáta upe okañy vaʼekuépe” (Ezequiel 34:12, 16). Jehová ningo opilla peteĩ ijovechánte jepe okañýramo, ha ndeʼíri hese naipohãveimaha, síno pyaʼe voi oho oheka chupe. Ha otopávo hese ovyʼaiterei (Mateo 18:12-14). Jehová heʼi voi isiervokuérare: “Che añangarekóta umi che ovechamíre” (Ezequiel 34:15). Ha nde haʼe avei hína Jehová ovechami.

Jehová nopensái umi ovecha okañy vaʼekue naipohãveimaha. Haʼe ovyʼaiterei peteĩ ovecha ou jeýrõ

“Orepytyvõmína roiko porã jey hag̃ua yma guaréicha”

¿Ndépa reikuaa mbaʼérepa Jehová oipota reñemoag̃ui jey hese? Oipotágui revyʼa. Haʼe ningo opromete ovendesitaha ijovechakuérape (Ezequiel 34:26). Upéva ndahaʼéi peteĩ promésa reínte, síno peteĩ rrealida. Nde voi oiméne rehechakuaáma heta hendáicha Jehová nevendesiha.

Epensamína mbaʼéichapa reñeñandu vaʼekue reikuaavévo rehóvo Ñandejárape. Por ehémplo, reaprende heraha Jehová ha oguerekoha peteĩ propósito ko yvýpe g̃uarã. ¡Ajépa revyʼámi vaʼekue avei remombeʼúrõ guare nde rapichakuérape umi notísia porã oĩva la Bíbliape! ¡Ha mbaʼeichaitépa ne korasõ rory vaʼekue reime jave asambleahápe ermanokuérandi!

Ñandejára siervokuéra yma guare ningo ojerure vaʼekue Jehovápe: “Oregueru jeýna ne rendápe, ha ore roñemoag̃ui jeýta nderehe. Orepytyvõmína roiko porã jey hag̃ua yma guaréicha” (Lamentaciones 5:21). Jehová ohendu pe ñemboʼe ha oipytyvõ chupekuéra, upévare ipuévlo oservi jey chupe vyʼápe (Nehemías 8:17). Upéicharõ, nde avei ikatu revyʼa jey Jehová servísiope, ha haʼe voi nepytyvõta rehupyty hag̃ua upéva.

Upéicharõ jepe, hetápe ijetuʼu oñemoag̃ui jey hag̃ua Jehováre. Jahechamína mbaʼérepa oiko jepi upéva ha mbaʼépa ikatu rejapo pono mbaʼeve ndejoko reñemoĩ porã jey hag̃ua Jehovándi.