Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Mbaʼépa añetehápe omboʼe la Biblia?

 KAPÍTULO 18

Pe vautísmo ñanemoag̃ui Ñandejárare

Pe vautísmo ñanemoag̃ui Ñandejárare
  • Mbaʼéichapa ojejapo pe vautísmo kristiáno?

  • Mbaʼépa tekotevẽ jajapo jajevautisa hag̃ua?

  • Mbaʼéichapa peteĩ tapicha ojededika térã oñemeʼẽ Ñandejárape?

  • Mbaʼérepa tekotevẽ jajevautisa?

1. Mbaʼérepa ojerurevaʼekue ojevautisa hag̃ua peteĩ kuimbaʼe Etiopiaygua?

‘PÉINA! Koʼápe niko oĩ y; mbaʼéiko chejoko ajevautisa hag̃ua?’. Ko mbaʼe oporanduvaʼekue peteĩ kuimbaʼe Etiopiaygua ombaʼapóva pe goviérnope g̃uarã, pe síglo primérope. Peteĩ kristiáno hérava Felipe ohechauka chupe Jesús haʼehague pe Mesías oñeprometevaʼekue.  Ha opokógui hese pe oaprendevaʼekue, ko kuimbaʼe ojerure ojevautisa hag̃ua! (Hechos 8:26-36).

2. Mbaʼérepa repensa porã vaʼerã pe vautísmo rehe?

2 Restudia porã rire umi kapítulo oĩva ko lívrope peteĩ testigo de Jehová ndive, nde ikatu reñeporandu avei: “Mbaʼépa chejoko ajevautisa hag̃ua?”. Koʼág̃a g̃uarã nde reikuaáma la Biblia heʼiha jaikotaha opa árare peteĩ Paraísope (Lucas 23:43; Revelación 21:3, 4). Reikuaáma avei mbaʼéichapa oĩ umi omanovaʼekue ha pe esperánsa oñemoingove jeytaha (Eclesiastés 9:5; Juan 5:28, 29). Oiméne rehómava testigos de Jehová rreunionhápe ha rehecha mbaʼéichapa ojapo hikuái pe rrelihión añetegua ojeruréva (Juan 13:35). Ha iporãveha, oiméne reñepyrũma rejapo umi mbaʼe oñekotevẽva reime porã hag̃ua Ñandejára Jehová ndive.

3. a) Mbaʼépa heʼivaʼekue Jesús hemimboʼekuérape ojapo hag̃ua? b) Mbaʼéichapa ojejapo pe vautísmo kristiáno?

3 Mbaʼéichapa ikatu rehechauka reserviseha Ñandejárape? Jesús heʼivaʼekue hemimboʼekuérape: ‘Tapeho [...] ha pejapo temimboʼe tapichakuéragui oĩva opa tetã rupi, ha pevautisa’ (Mateo 28:19). Ha Jesús voi oheja pe ehémplo ojevautisa rupi ýpe. Péro ndahaʼeivaʼekue ojehypýinteva ýpe térã oñeñohẽva iñakãre (Mateo 3:16). Vautísmo ou pe griégo ñeʼẽgui ha heʼise “ñapymi”. Upéicharõ, pe vautísmo kristiáno ojejapo oñemoñapymívo térã oñemoingepaitévo ýpe peteĩ tapichápe.

4. Mbaʼépa jahechauka jajevautisávo?

4 Opavave oĩ porãséva Jehová ndive ojevautisavaʼerã. Jajevautisávo jahechauka enterovépe jaserviseha Ñandejárape ha javyʼaha jajapógui haʼe oipotáva (Salmo 40:7, 8). Péro jajevautisa hag̃ua, oĩ umi mbaʼe tekotevẽva jajapo.

 OÑEKOTEVẼ KONOSIMIÉNTO HA JEROVIA

5. a) Mbaʼépa rejapo raẽ vaʼerã rejevautisa hag̃ua? b) Mbaʼérepa iñimportánte umi rreunión?

5 Nde reñepyrũma rejapo peteĩ mbaʼe oñekotevẽva. Mbaʼépa upéva? Reguereko konosimiénto térã reikuaa Ñandejára Jehová ha Jesúspe restudia rupi la Biblia (Juan 17:3). Péro reikuaavéta gueteri hetave mbaʼe. Kristianokuéra oipota Ñandejára omyenyhẽ chupekuéra ‘pe konosimiénto haʼe ojapótavagui’ (Colosenses 1:9). Ko mbaʼépe tuicha nepytyvõta umi rreunión ojapóva testigos de Jehová. Upévare nderejavyivaʼerã ni peteĩ rreunión (Hebreos 10:24, 25). Reho meméramo umi rreuniónpe reikuaavéta Ñandejárape.

Jajevautisa hag̃ua jaikuaa porã vaʼerã Ñandejára Ñeʼẽ heʼíva

6. Reikuaapavaʼerãpa la Bíbliape oĩva rejevautisa hag̃ua?

6 Natekotevẽi reikuaapaite oĩva la Bíbliape rejevautisa hag̃ua. Nemanduʼavaʼerã pe kuimbaʼe Etiopiaygua rehe. Oĩramo jepe umi mbaʼe haʼe oikuaáva, oikotevẽvaʼekue oñepytyvõ chupe oikuaa porãve hag̃ua Ñandejára Ñeʼẽ (Hechos 8:30, 31). Upéicha avei, nde reikuaáta gueteri heta mbaʼe. Ha arakaʼeve ndereikuaapamoʼãi Ñandejáragui (Eclesiastés 3:11). Péro rejevautisa hag̃ua, tekotevẽ reikuaa ha reguerovia umi mbaʼe tenondegua la Biblia omboʼéva (Hebreos 5:12). Umíva apytépe oĩ pe añetegua umi omanovaʼekuégui ha mbaʼérepa oñemombaʼevaʼerã Ñandejára réra ha Irréino.

7. Mbaʼépa reguerekovaʼerã restudia rupi la Biblia?

7 Ndahaʼéi pe konosimiénto año oñekotevẽva, pórke ‘jeroviaʼỹre ndaikatúi oñembovyʼa [Ñandejárape]’ (Hebreos 11:6). La Biblia omombeʼu umi hénte oikovaʼekue yma pe táva Coríntope, ohendúvo umi kristiáno heʼíva, ‘oguerovia ha ojevautisahague’ (Hechos 18:8). Upéicha avei, nde restudia rupi rejerovia mbaretéta la Biblia haʼeha Ñandejára Ñeʼẽ. Ko estudio avei nepytyvõta rejerovia  hag̃ua Ñandejára promésare, ha haʼe ikatuha ndesalva Jesús sakrifísio rupi (Josué 23:14; Hechos 4:12; 2 Timoteo 3:16, 17).

EMOMBEʼU NDE RAPICHÁPE MBAʼÉPA OMBOʼE LA BIBLIA

8. Mbaʼépa nemomýita reñeʼẽse hag̃ua umi mbaʼe reikuaávagui?

8 Nde jerovia imbaretevévo hasyvéta ndéve reguerokirirĩ umi mbaʼe reikuaáva (Jeremías 20:9). Ko mbaʼe nemomýita reñeʼẽse hag̃ua nde rapichakuérape Ñandejáragui ha umi mbaʼe haʼe ojapótavagui (2 Corintios 4:13).

Pe jerovia jaguerekóva ñanemomýita japredika hag̃ua ñande rapichápe

9, 10. a) Mávapepa ikatu reñepyrũ remombeʼu umi mbaʼe oĩva la Bíbliape? b) Mbaʼépa rejapovaʼerã repredikaséramo testigos de Jehová ndive?

9 Reñepyrũ hag̃ua, ñeʼẽkuaápe ikatu remombeʼu pe añetegua oĩva la Bíbliape ne pariénte, ne amígo, ne vesíno térã umi ombaʼapóvape nendive. Upe rire, katuete repredikaséta avei testigos de Jehová ndive. Rejapose vove upéva, reñeʼẽvaʼerã pe testígo nemboʼéva ndive. Ha ohecháramo nde ikatumaha resẽ repredika, peñembyatýta peñeʼẽ hag̃ua mokõi ansiáno ndive.

10 Ko mbaʼe nepytyvõta reikuaave hag̃ua umi ansiánope, oñangarekóva Ñandejára ovecha atýre (Hechos 20:28; 1 Pedro 5:2, 3). Umi ansiáno ohecháta rentende ha regueroviápa la Biblia heʼíva, reikopareína Ñandejára oipotaháicha ha reipotápa oiko ndehegui testigo de Jehová. Upéicharõ, ojeʼéta ndéve ikatumaha resẽ repredika pe notísia porã peteĩ puvlikadór ojevautisaʼỹvaramo.

11. Mbaʼépa ojapo raẽ vaʼerã umi osẽséva opredika?

11 Péro umi ansiáno ikatu ohecha oĩha gueteri umi mbaʼe tekotevẽva rejapo resẽ hag̃ua repredika. Koʼãva apytépe ikatu oĩ umi mbaʼe ojejapóva ñemihápe ha tekotevẽva ojeheja. Upévare, rejerure mboyve resẽ  hag̃ua repredika peteĩ puvlikadór ojevautisaʼỹvaramo, tekotevẽ rehejapaite umi pekádo vai, umíva apytépe pe inmoralida seysuál térã teko vai, kaʼu ha dróga jeporu (1 Corintios 6:9, 10; Gálatas 5:19-21).

ÑAÑEMBYASY HA JAJEVY

12. Mbaʼérepa tekotevẽ ñañembyasy?

12 Rejevautisa hag̃ua, oĩve umi mbaʼe rejapovaʼerã. Pe apóstol Pedro heʼivaʼekue: ‘Peñembyasýke [...] ha pejevy ojeheja rei hag̃ua peẽme pende pekádo’ (Hechos 3:19). Pe ñembyasy heʼise reñeñandu vai umi mbaʼe rejapovaʼekuére. Peteĩ heko vai vaʼekue oñembyasyvaʼerã oikohaguére péicha, péro umi heko potĩva jepe tekotevẽ oñembyasy avei. Mbaʼérepa upéva? Ndaipórigui yvypóra opekaʼỹva ha upévare ñaikotevẽ Ñandejára ñaneperdona (Romanos 3:23; 5:12). Restudia mboyve la Biblia, ndereikuaaivaʼekue Ñandejára oipotáva. Upévare ndaikatuivaʼekue reiko haʼe oipotahaichaite, ajépa? Upéicha rehecha porã tekotevẽha reñembyasy.

13. Mbaʼépa heʼise jajevy?

13 Reñembyasy rire, rejevyvaʼerã. Upéva heʼise rejevy nde rape tujágui. Ndahaʼeivaʼerã rembyasýnteva pe rejapovaʼekue, rehejaitevaʼerã katu umíva. Ha rejedesidivaʼerã rejapo iporãva koʼág̃a guive. Rejevautisa mboyve tekotevẽ rejapo mokõi mbaʼe: reñembyasy ha rejevy.

JAJEDEDIKA TÉRÃ ÑAÑEMEʼẼ ÑANDEJÁRAPE

14. Mbaʼépa tekotevẽ avei rejapo rejevautisa mboyve?

14 Oĩve peteĩ mbaʼe tekotevẽva rejapo rejevautisa mboyve: rejededika térã reñemeʼẽ Ñandejára Jehovápe.

Ndépa reñemboʼéma Ñandejárape rejededika hag̃ua chupe?

15, 16. Mbaʼépa heʼise jajededika Ñandejárape, ha mbaʼérepa jajaposéta upéva?

15 Rejededika Jehovápe heʼise reprometeha peteĩ ñemboʼe rupi readorataha chupe añoite opa árare (Deu teronomio 6:15). Mbaʼérepa rejaposevaʼerã ko mbaʼe? Reikuaa hag̃ua ikatu repensa ko mbaʼére: peteĩ kariaʼy oñepyrũ omongeta peteĩ kuñataĩme. Oikuaavévo chupe ha ohecha mbaʼeichaguápa haʼe, ko kariaʼy ohayhuve pe kuñataĩme. Ha upe rire, pe kariaʼy katuete ojeruréta chupe omenda hag̃ua hese. Añetehápe, omendávo oguerekóta hetave rresponsavilida. Péro ohayhúgui pe kuñataĩme ojapóta ko mbaʼe iñimportánteva.

16 Jaikuaávo Jehovápe ha jahayhúvo chupe, jajapose opa mbaʼe heʼíva ha ndajahejái mbaʼeve ñandejoko jaadora hag̃ua chupe. Oimeraẽ osegiséva Ñandejára Raʼy Jesucrístope, ‘ndoikoveimavaʼerã ijupe g̃uarã’ (Marcos 8:34). Jajapo upéva ndajahejáivo umi mbaʼe jajaposéva térã jahupytyséva ñandejoko jajapo hag̃ua Ñandejára oipotáva. Upéicharõ, rejevautisa mboyve, Ñandejára rembipota haʼevaʼerã pe iñimportantevéva nde rekovépe (1 Pedro 4:2).

ANI JAKYHYJE JAJAVÝRAMO G̃UARÃ

17. Mbaʼérepa oĩ umi ndojededikáiva Ñandejárape?

17 Oĩ ndojededikáiva Jehovápe okyhyjégui ojapo hag̃ua ko mbaʼe guasu. Ikatu okyhyje opensa rupi oĩtaha Ñandejára renondépe umi mbaʼe ojapovaʼekuére, haʼégui peteĩ kristiáno ojededikamavaʼekue. Haʼekuéra okyhyje ojavýramo g̃uarã ha opyta vai Jehová ndive, ha upévare iporãveha ndojededikái chupe.

18. Mbaʼépa nemomyivaʼerã rejededika hag̃ua Jehovápe?

18 Rehayhuvévo Jehovápe, hiʼãta ndéve rejededika chupe ha reñehaʼãmbaitéta rejapo upe ojeruréva ndehegui (Eclesiastés 5:4). Rejededika rire chupe, katuete reikoséta ‘Jehová oipotaháicha rembovyʼa hag̃ua chupe opa mbaʼépe’ (Colosenses 1:10). Rehayhúgui Ñandejárape, ndahasymoʼãi ndéve rejapo pe haʼe oipotáva.  Ha katuete iporãta ndéve pe apóstol Juan heʼivaʼekue: ‘Kóva heʼise pe Ñandejárape jahayhu: jajapo umi mbaʼe ojeruréva; ha umi mbaʼe ojeruréva ndaipohýiri’ (1 Juan 5:3).

19. Mbaʼérepa ndajakyhyjeivaʼerã jajededika hag̃ua Ñandejárape?

19 Natekotevẽi ñandeperfékto jajededika hag̃ua Ñandejárape. Haʼe oikuaa mbaʼépa ikatu jajapo ha ndojeruréi ñandehegui pe ikatuʼỹva (Salmo 103:14). Haʼe oipota ñasẽ porã ha ñanepytyvõta upearã (Isaías 41:10). Ha katuete jajeroviáramo hese ñandepyʼaite guive, haʼe ‘omoporãta umi ñande rape’ (Proverbios 3:5, 6).

 EHECHAUKA REJEDEDIKAHAGUE ÑANDEJÁRAPE REJEVAUTISÁVO

20. Rejededika rire Jehovápe, mbaʼépa rejapovaʼerã avei?

20 Repensáramo umi mbaʼe jahechavaʼekuére, ikatu nemomýi rejededika hag̃ua Jehovápe reñemboʼévo chupe neañohápe. Péro opa ohayhu añetéva Ñandejárape ojapovaʼerã avei ko mbaʼe ojesalva hag̃ua: omombeʼu opavavépe ijerovia (Romanos 10:10). Mbaʼéichapa ojejapo ko mbaʼe?

Pe vautísmo heʼise “ñamanoha”, térã ndajaikoveimaha ymaguaréicha ha jaikomaha jajapo hag̃ua Ñandejára oipotáva

21, 22. Mbaʼéichapa ikatu remombeʼu opavavépe nde jerovia?

 21 Remombeʼuvaʼerã pe superintendénte presidéntepe oĩva ne kongregasiónpe rejevautisaseha. Haʼe ohecháta umi ansiáno oĩva orrepasa hag̃ua nendive umi porandu la Biblia omboʼévagui. Koʼã ansiáno ohecháramo reimemaha rejevautisa hag̃uáicha, heʼíta ndéve ikatutaha rejevautisa pe asambléa oútavape. * Upe jave oñemeʼẽ jepi peteĩ diskúrso ohechauka jeýva mbaʼépa heʼise pe vautísmo. Omohuʼãvo ko diskúrso, pe oñeʼẽva ojapo mokõi porandu umi ojevautisátavape ha haʼekuéra ombohovái oñehendu hag̃uáicha. Upéicha omombeʼu opavavépe ijerovia.

22 Pe vautísmo ohechauka enterovépe rejededikamahague Ñandejárape ha oikomaha ndehegui peteĩ testigo de Jehová. Umi ojevautisávape oñemoñapymimbaite ýpe ojehechauka hag̃ua enterovépe ojededikamahague Jehovápe.

MBAʼÉPA HEʼISE NDE VAUTÍSMO

23. Mbaʼépa heʼise jajevautisa ‘Túva, Taʼýra ha espíritu sánto rérape’?

23 Jesús heʼivaʼekue hemimboʼekuéra ojevautisavaʼerãha ‘Túva, Taʼýra ha espíritu sánto rérape’ (Mateo 28:19). Kóva heʼise umi ojevautisátava ohechakuaaha pe autorida oguerekóva Ñandejára Jehová ha Jesucristo (Salmo 83:18; Mateo 28:18). Ohechakuaa avei mbaʼépa ojapo Ñandejára espíritu sánto (Gálatas 5:22, 23; 2 Pedro 1:21).

24, 25. a) Mbaʼépa ohechauka pe vautísmo? b) Mbaʼe porandúpa ñambohovaivaʼerã?

24 Péro pe vautísmo ndahaʼéi peteĩ ñemoñapymi reínte. Ohechauka peteĩ mbaʼe iñimportantetereíva.  Reñapymívo pe ýpe heʼise “remanoha” térã ndereikoveimaha ymaguaréicha. Ha resẽvo pe ýgui rehechauka upe guive reikotaha rejapo hag̃ua Ñandejára oipotáva. Nemanduʼavaʼerã avei rejededikahague Ñandejára Jehovápe, ndahaʼéi peteĩ tembiapo, peteĩ yvypóra térã peteĩ organisasiónpe. Rejededikávo Ñandejárape ha rejevautisávo reñepyrũ peteĩ amista iporãitereíva hendive ha nemoag̃uivétava chugui (Salmo 25:14).

25 Péro pe vautísmo ndeʼiséi jajesalvataha katuete. Pe apóstol Pablo heʼivaʼekue: ‘pembaʼapo meméke pene salvasión rehe kyhyje ha ryrýi pópe’ (Filipenses 2:12). Pe vautísmo haʼe ñañepyrũ hag̃uánte. Upéicharõ, ñañeporandu: mbaʼéichapa ikatu jaiko Ñandejára mborayhúpe? Pe kapítulo omohuʼãva ko lívro ohechaukáta ñandéve upéva.

^ párr. 21 Pe vautísmo ojejapo umi asambléape oguerekóva testigos de Jehová káda áño.