Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Mbaʼépa añetehápe omboʼe la Biblia?

 KAPÍTULO 5

Pe rreskáte: Pe rregálo iporãvéva omeʼẽva Ñandejára

Pe rreskáte: Pe rregálo iporãvéva omeʼẽva Ñandejára
  • Mbaʼépa pe rreskáte?

  • Mbaʼéichapa omeʼẽrakaʼe Ñandejára pe rreskáte?

  • Mbaʼe venefísiopa ikatu ogueru ñandéve?

  • Mbaʼéichapa ikatu jahechauka ñamombaʼeha?

1, 2. a) Mbaʼeichagua rregálopa nde remombaʼeve? b) Mbaʼérepa pe rreskáte haʼe pe rregálo iporãvéva ikatúva oñemeʼẽ ñandéve?

MBAʼÉPA pe rregálo iporãvéva oñemeʼẽvaʼekue ñandéve? Peteĩ rregálo natekotevẽi hepy iñimportánte hag̃ua. Ha ñamombaʼe peteĩ rregálo ndahaʼéi hepýgui katuete. Jahayhu pe rregálo ñanembovyʼágui térã ñaikotevẽgui upe mbaʼe.

2 Tahaʼe haʼéva umi rregálo oñemeʼẽva ñandéve, oĩ peteĩ iñimportantevéva. Upéva haʼe Ñandejára rregálo yvyporakuérape g̃uarã. Jehová omeʼẽ ñandéve heta mbaʼe, péro pe rregálo iporãvéva haʼe pe rreskáte, pe Itaʼýra Jesucristo sakrifísio (Mateo 20:28). Ko kapítulope jahecháta pe rreskáte haʼeha pe rregálo iporãvéva ikatúva jaguereko, pórke omeʼẽkuaa ñandéve vyʼa ijojahaʼỹva ha umi mbaʼe añetehápe ñaikotevẽva. Pe rreskáte avei ohechauka mbaʼeichaitépa Jehová ñanderayhu.

MBAʼÉPA PE RRESKÁTE?

3. Mbaʼépa pe rreskáte, ha mbaʼépa ñantende raẽ vaʼerã ñamombaʼe hag̃ua ko rregálo ijojahaʼỹva?

3 Pe rreskáte haʼe pe mbaʼe Jehová oiporúva ñande peʼa térã ñandesalva hag̃ua pekádo ha ñemanógui (Efesios 1:7). Ñantende hag̃ua mbaʼépa la Biblia omboʼe ko mbaʼégui, ñanemanduʼavaʼerã mbaʼépa oiko pe hardín de Edénpe. Ha ñantende porã vaʼerã mbaʼépa Adán operde opekárõ guare. Upéicharõ añoite ñamombaʼéta pe rregálo ijojahaʼỹva, haʼéva pe rreskáte.

4. Mbaʼéichapa rakaʼe Adán iperfékto rupi?

4 Jehová ojapórõ guare Adánpe, omeʼẽ chupe peteĩ mbaʼe iporãitereíva, pe tekove iperféktova. Epensamína mbaʼépa heʼise ko mbaʼe Adánpe g̃uarã. Iperfékto rupi hete ha iménte, haʼe ndahasymoʼãi, ndaitujamoʼãi ha nomanomoʼãi arakaʼeve. Avei oguereko peteĩ rrelasión espesiál Jehová ndive. La Biblia heʼi Adán haʼehague peteĩ “Ñandejára raʼy” (Lucas 3:38). Upéicharõ Adán oguerekovaʼekue peteĩ rrelasión iporãva Ñandejára Jehová ndive, oguerekoháicha peteĩ túva ohayhúva itaʼýrape. Upévare, Jehová oñeʼẽvaʼekue ko itaʼýra ndive, omeʼẽ chupe umi tembiapo iporãva ha heʼi avei mbaʼépa ohaʼarõ chugui (Génesis 1:28-30; 2:16, 17).

5. Mbaʼépa heʼise la Biblia heʼívo Adán ojejapohague “Ñandejára joguahárõ”?

5 Adánpe ojejapovaʼekue “Ñandejára joguahárõ” (Génesis 1:27). Upéva ndeʼiséi Adán ojoguaha haʼangápe Ñandejárape. Ñaaprendékuri ko lívro kapítulo 1-pe, Jehová haʼeha peteĩ espíritu ikatuʼỹva ojehecha (Juan 4:24). Upéicharõ Jehová ndahetéi ñandéicha, ñanderoʼo ha ñanderuguýva. Ojejapo Adánpe Ñandejára joguahárõ heʼise Adán oguerekoha umi kualida Ñandejára oguerekóva. Umíva apytépe oĩ mborayhu, arandu, hustísia ha podér. Adán ojogua avei Itúvape ko mbaʼépe: oguereko liverta oiporavo hag̃ua pe ojapótava. Upévare Adán ndahaʼéi peteĩ mákinaicha, ojapóva peteĩ mbaʼénte. Haʼe ikatu odesidi pe ojapótava, iporãva térã ivaíva. Ha iñeʼẽ rendúrire Ñandejárape, oikovaʼerãmoʼã opa ára g̃uarã pe Paraísope ko Yvy ape ári.

6. Mbaʼépa operde Adán naiñeʼẽrendúigui Ñandejárape, ha mbaʼépa upévare ohupyty itaʼyrakuéra?

6 Adán naiñeʼẽrendúi Ñandejárape ha upévare omano, ha upéicha hepyeterei opaga pe ojapovaʼekuére. Opeka rupi operde pe rregálo, pe tekove perfékto ha umi mbaʼe porã oúva hendive (Génesis 3:17-19). Ha upéicha Adán operde pe tekove iporãitéva, ndahaʼéi ijupe g̃uarãnte, síno avei itaʼyrakuérape g̃uarã. Ñandejára Ñeʼẽ heʼi: “oikehaguéicha pe pekádo ko múndope peteĩ kuimbaʼe [Adán] rupínte, ha pekádo rupi oike ñemano, ha upéicha pe ñemano ohasa opa yvypórape opavave opekahaguére” (Romanos 5:12). Upéicha, enterove jahupyty pe pekádo Adángui. Upévare la Biblia heʼi haʼe ‘oñemeʼẽhague’ itaʼyrakuéra ndive esklávoramo pe pekádo ha ñemanóme (Romanos 7:14). Ndaiporivaʼekue esperánsa Adán ha Évape g̃uarã pórke haʼekuéra naiñeʼẽrenduséi Ñandejárape. Péro mbaʼépa oikóta itaʼyrakuéragui, ha ñandehegui avei?

7, 8. Mbaʼépa heʼise pe rreskáte?

7 Jehová omeʼẽ yvyporakuérape esperánsa pe rreskáte rupive. Mbaʼépa peteĩ rreskáte? Pe rreskáte heʼise mokõi mbaʼe. Primero, rreskáte haʼe pe présio ojepagáva ojejogua jey hag̃ua peteĩ mbaʼe térã ojepoi hag̃ua peteĩ prisionérogui. Segundo, la Bíbliape peteĩ rreskáte haʼe pe présio ojepagáva peteĩ mbaʼe vai ojejapovaʼekuére. Pór ehémplo peteĩ persóna ojapóramo peteĩ aksidénte, opagavaʼerã umi mbaʼe ombyaivaʼekuére.

8 Mbaʼéichapa ikatúta ojepaga ko kuénta tuichaite Adán ohejavaʼekue enterovépe ha upéicha jajei pe pekádo ha ñemanógui? Koʼág̃a jahecháta mbaʼépa pe  rreskáte Jehová omeʼẽvaʼekue ha mbaʼépa heʼise ñandéve g̃uarã.

MBAʼÉICHAPA JEHOVÁ OMEʼẼ PE RRESKÁTE

9. Mbaʼeichagua rreskátepa oñekotevẽrakaʼe?

9 Pe ojeperdevaʼekue haʼe pe yvypóra rekove perfékto, ha ñane imperfékto rupi ndaipóri ikatúva ojogua jey pe tekove (Salmo 49:7, 8). Tekotevẽ ojepaga peteĩ rreskáte ojojáva hepykuépe pe ojeperdevaʼekue ndive. Upéva oĩ porã pe Ñandejára heʼívare ha jatopáva Iñeʼẽme: “Álma oñemeʼẽvaʼerã álma rehe” (Deuteronomio 19:21). Upéicharõ, mbaʼéichapa ojepagáta pe álma térã tekove perfékto Adán operdevaʼekue rehe? Oñekotevẽ peteĩ yvypóra rekove perfékto ojepaga hag̃ua pe ‘rreskáte opavave rehehápe’ (1 Timoteo 2:6).

10. Mbaʼéichapa omeʼẽvaʼekue Jehová pe rreskáte?

10 Mbaʼéichapa omeʼẽrakaʼe Jehová pe rreskáte? Haʼe ombou ko Yvy ape ári peteĩ itaʼýra espirituál iperféktova. Péro Jehová nombouivaʼekue oimeraẽvape rei. Haʼe ombou Itaʼýra ohayhuvéva, pe Itaʼýra ypykue (1 Juan 4:9, 10). Ko Taʼýra kyreʼỹme ohejavaʼekue hóga yvagapegua (Filipenses 2:7). Ñaaprendehaguéicha pe kapítulo jahasavaʼekuépe, peteĩ milágro rupi Jehová oguerovavaʼekue Itaʼýra rekove María retepýpe. Ñandejára espíritu sánto rupive, Jesús onasevaʼekue peteĩ yvypóra perféktoicha, ha upévare noĩrivaʼekue pe pekádo poguýpe (Lucas 1:35).

Jehová omeʼẽ Itaʼýra ypykue peteĩ rreskáteramo ñanderehehápe

11. Mbaʼéichapa ikatu peteĩ kuimbaʼe orreskata hetaitereípe?

11 Mbaʼéichapa ikatúta peteĩ kuimbaʼe orreskata hetaiterei yvypórape? Ha mbaʼéichapa pe pekádo ohupyty opavave yvyporakuérape? Ñanemanduʼavaʼerã pe pekádo rupi, Adán operdehague pe mbaʼe porãite oguerekovaʼekue: pe tekove perfékto. Ha upévare ndaikatúi  ombohasa peichagua tekove itaʼyrakuérape. Upéva rangue haʼe ombohasa pe pekádo ha ñemano. La Biblia ohenói Jesúspe ‘pe último Adán’, oguerekógui pe tekove perfékto ha ndopekáigui arakaʼeve (1 Corintios 15:45). Upéicharõ, Jesús oñemoĩ Adán rekovia, ñandesalva hag̃ua. Haʼe omeʼẽ hekove perfékto ha iñeʼẽrenduvaʼekue Ñandejárape opa mbaʼépe, ha upéicha opaga Adán pekádore. Upéva ojapohaguére Jesús omeʼẽ esperánsa Adán raʼykuérape (Romanos 5:19; 1 Corintios 15:21, 22).

12. Mbaʼépa ohechauka Jesús umi mbaʼe vai ohasavaʼekuére?

12 La Biblia omombeʼupaite mbaʼéichapa Jesús ohasa asy vaʼekue omano mboyve. Oñenupã vai rire chupe, oñemoĩ peteĩ yvyráre ha upépe omano asy (Juan 19:1, 16-18, 30, ikatu rehecha informasión oĩvéva hérava: “Oipuruvaʼerãpa kristianokuéra pe kurusu?”). Mbaʼérepa tekotevẽvaʼekue hetaite ohasa asy Jesús? Jahechataháicha peteĩ kapítulo oútavape, Satanás heʼivaʼekue ojejopy vaíramo yvyporakuérape ndaiporimoʼãiha ni peteĩ ifiélva Ñandejárape. Oaguantávo Jesús umi mbaʼe vaiete ohasavaʼekue ombohovái pe Satanás heʼivaʼekue. Jesús ohechauka peteĩ kuimbaʼe perfékto oguerekóva liverta oiporavo hag̃ua ikatuha ifiél Ñandejárape, tahaʼe haʼéva umi jehasa asy omoĩva Satanás. Mbaʼeichaitépa oiméne ovyʼáraʼe Jehová ohechávo Itaʼýra ifielha! (Proverbios 27:11.)

13. Mbaʼéichapa ojepaga pe rreskáte?

13 Mbaʼéichapa ojepaga pe rreskáte? Pe 14 de Nisán, áño 33-pe, Jehová oheja ojejuka pe Itaʼýra perfékto. Upérõ Jesús omeʼẽ hekove perfékto “peteĩ jevy opa ára g̃uarã” (Hebreos 10:10). Tres día Jesús omano rire, Jehová omoingove jey chupe peteĩ espírituicha. Ha yvágape, Jesús ogueraha Ñandejárape hekove perfékto repykue, pe omeʼẽvaʼekue rreskáteramo Adán raʼykuérare  (Hebreos 9:24). Jehová oasepta pe Jesús sakrifísio repykue peteĩ rreskáteramo, oñekotevẽva ojepeʼa hag̃ua yvyporakuérape pekádo ha ñemanógui (Romanos 3:23, 24).

MBAʼÉICHAPA IKATU ÑANEVENEFISIA PE RRESKÁTE?

14, 15. Mbaʼépa jajapovaʼerã ‘oñeperdona hag̃ua ñandéve ñande pekádo’?

14 Ñaneimperféktoramo jepe, ikatu jahupyty umi vendisión iporãitereíva pe rreskáte rupive. Jahecháta umi mbaʼe porã ikatúva jahupyty, koʼág̃a ha tenonderã, pe Ñandejára rregálo iporãitéva rupive.

15 Oñeperdona ñande pekádo. Ñanaségui pe imperfeksión reheve ijetuʼu ñandéve jajapo pe iporãva. Enterove japeka térã jajavy umi mbaʼe jaʼéva térã jajapóvape. Péro Jesús sakrifísio rupive ikatu “oñeperdona ñandéve ñande pekádo” (Colosenses 1:13, 14). Jahupyty hag̃ua pe perdón, ñañembyasyvaʼerã añetehápe umi mbaʼe vai jajapovaʼekuére. Ha ñaneumildevaʼerã jajerure hag̃ua Jehovápe ñaneperdona hag̃ua. Upéva jajapovaʼerã jajeroviágui Jesús sakrifísio rehe (1 Juan 1:8, 9).

16. Mbaʼérepa ikatu jaadora Ñandejárape konsiénsia potĩ reheve, ha mbaʼépa jahupyty ñane konsiénsia potĩ rupi?

16 Ñane konsiénsia ipotĩ Ñandejára renondépe. Ikyʼáramo ñane konsiénsia ikatu japyta esperansaʼỹre ha ñañandu ndajavaleiha mbaʼeve. Péro pe rreskáte rupive, Jehová ñaneperdona ha imbaʼeporãgui oheja jaadora chupe konsiénsia potĩ reheve, ñane imperféktoramo jepe (Hebreos 9:13, 14). Upévare ikatu ñañeʼẽ Jehovápe térã ñañemboʼe chupe jakyhyjeʼỹre (Hebreos 4:14-16). Avei ñane konsiénsia ipotĩ rupi jaguereko pyʼaguapy, ñañeñandu porã ha javyʼave.

17. Mbaʼépa ikatu jahupyty Jesús omano rupi ñanderehehápe?

17 Pe esperánsa jaikove hag̃ua opa ára g̃uarã peteĩ  paraísope ko Yvy ape ári. “Pe pekádo repykue haʼe ñemano” heʼi Romanos 6:23. Ha heʼi avei: “péro pe jopói omeʼẽva Ñandejára haʼe jeikove opaʼỹva Karai Jesucristo rupi”. Ko lívro, kapítulo 3-pe jahechámakuri umi mbaʼe porã oĩtava pe Paraísope ko Yvy ape ári (Revelación 21:3, 4). Omano rupi Jesús ñanderehehápe ikatu jahupytypaite umi mbaʼe porã ha jaiko opa ára g̃uarã tesãime. Jahupyty hag̃ua umi mbaʼe porã ñamombaʼevaʼerã pe rregálo oñemeʼẽva ñandéve: pe rreskáte.

MBAʼÉICHAPA IKATU JAHECHAUKA ÑAMOMBAʼEHA PE RRESKÁTE?

18. Mbaʼérepa jaagradesevaʼerã Jehovápe pe rregálore haʼéva pe rreskáte?

18 Mbaʼérepa jaagradesevaʼerã Jehovápe pe rreskáte rehe? Peteĩ rregálo ñamombaʼeve jahecháramo mbaʼéichapa pe omeʼẽva oiporu itiémpo térã ipláta ñanderehehápe. Upéva opoko ñane korasõre pórke pe rregálo ohechauka pe omeʼẽva ñanderayhuha. Pe rreskáte haʼe pe rregálo iporãvéva, pórke Ñandejára ojapo pe sakrifísio tuichavéva omeʼẽ hag̃ua ñandéve. Juan 3:16-pe heʼi: “ohayhuetereígui Ñandejára ko múndope  omeʼẽvaʼekue Itaʼýra peteĩme”. Upévare, pe rreskáte haʼe pe mbaʼe tuichavéva ohechaukáva Jehová ñanderayhuha. Ohechauka avei mbaʼéichapa Jesús ñanderayhu, pórke kyreʼỹme omeʼẽvaʼekue hekove ñanderehehápe (Juan 15:13). Upéicharõ, pe rregálo oñemeʼẽva pe rreskáte rupive, ohechauka mbaʼeichaitépa Jehová ha Itaʼýra ñanderayhu (Gálatas 2:20).

Ñañehaʼãvo jaikuaave Jehovágui jahechauka ñamombaʼeha Ñandejára rregálo, pe rreskáte

19, 20. Mbaʼéichapa ikatu jahechauka ñamombaʼeha Ñandejára rregálo, pe rreskáte?

19 Ha mbaʼéichapa ikatu jahechauka ñamombaʼeha Ñandejára rregálo, pe rreskáte? Primero, ñañehaʼãvaʼerã jaikuaave Jehovágui, pe rreskáte Meʼẽha (Juan 17:3). Upéva jajapo hag̃ua ñanepytyvõta jastudiáramo la Biblia ko lívro ndive. Ha jaikuaavévo Jehovápe, jahayhuvéta chupe, ha jajaposéta haʼe heʼíva (1 Juan 5:3).

20 Jajeroviavaʼerã pe rreskáte rehe. Jesús heʼivaʼekue: “Pe ojeroviáva Taʼýrare oguereko jeikove opaʼỹva” (Juan 3:36). Mbaʼéichapa ikatu jahechauka jajeroviaha Jesús rehe? Ndahaʼeivaʼerã jaʼénteva jajeroviaha hese. “Pe jerovia omano ndoguerekóiramo tembiapo” heʼi Santiago 2:26-pe. Upéicha, pe fe añeteguáva ojehecha “tembiapo” rehe, térã umi mbaʼe jajapóvare. Ha jahechaukáta jajeroviaha Jesús rehe ñañehaʼãmbaitéramo jajapo haʼéicha, ñane ñeʼẽme ha ñane rembiapópe (Juan 13:15).

21, 22. a) Mbaʼérepa jahavaʼerã káda áño pe Cena del Señor ojejapohápe? b) Mbaʼépa oñemyesakãta umi kapítulo 6 ha 7-pe?

21 Jahavaʼerã káda áño pe Cena del Señor ojejapóvape. Upe 14 de Nisán pyhare, pe áño 33-pe, Jesús omoñepyrũvaʼekue peteĩ mbaʼe ipyahúva ojejapo hag̃ua, la Bíbliape oñehenóiva “cena del Señor” (1 Corintios 11:20; Mateo 26:26-28). Kóvape oñehenói avei Conmemoración Cristo ñemano rehegua. Jesús omoñepyrũvaʼekue upéva ijapostolkuérape ha entéro kristiáno  añeteguápe imanduʼa hag̃ua ko mbaʼére: omeʼẽhague hekove perfékto rreskáteramo. Kóvare Jesús heʼivaʼekue avei: “Pejapo meméke ko mbaʼe penemanduʼávo cherehe” (Lucas 22:19). Pe Conmemoración ñanemomanduʼa pe mborayhu tuichaitéva ohechaukavaʼekue Jehová ha Jesús omeʼẽvo pe rreskáte. Ikatu jahechauka ñamombaʼeha pe rreskáte jahávo káda áño pe Conmemoración ojejapóvape Jesús ñemanóre. *

22 Ko rreskáte Jehová omeʼẽvaʼekue ñanderehehápe haʼe peteĩ rregálo ijojahaʼỹva (2 Corintios 9:14, 15). Ko rregálo haʼe avei peteĩ mbaʼe porã umi omanovaʼekuépe g̃uarã. Umi kapítulo 6 ha 7-pe oñemyesakãta ñandéve upéva.

^ párr. 21 Reikuaavéta mbaʼépa heʼise pe Cena del Señor, ehecha pe informasión oĩvéva hérava: “Cena del Señor: Pe manduʼa omombaʼeguasúva Ñandejárape”.