Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Mbaʼépa añetehápe omboʼe la Biblia?

 INFORMASIÓN OĨVÉVA

Mbaʼépa pe “Babilonia Guasu”?

Mbaʼépa pe “Babilonia Guasu”?

PE LÍVRO hérava Revelación, térã Apocalipsis, heʼi heta mbaʼe nañantendeivaʼerã heʼihaichaite (Revelación 1:1). Pór ehémplo, oñeʼẽ peteĩ kuña reko vaígui oguerekóva isyváre pe téra “Babilonia Guasu”. Heʼi avei oguapyha ‘umi aty ha tetãnguéra’ ári (Revelación 17:1, 5, 15). Ndaipóri peteĩ kuña ikatuvaʼerã ojapo ko mbaʼe, upévare Babilonia Guasu ojeporúnte orrepresenta hag̃ua peteĩ mbaʼe. Upéicharõ, mbaʼépa orrepresenta ko kuña reko vai?

Revelación 17:18-pe ojeʼe ko kuña haʼeha ‘pe táva guasu oisãmbyhýva umi rréi oĩva ko Yvy ape ári’. Koʼápe ‘táva’ heʼise peteĩ hénte aty oĩva organisádo. Avei, ko ‘táva guasu’  oguereko ipoguýpe ‘umi rréi oĩva ko Yvy ape ári’. Upévare Babilonia Guasu haʼevaʼerã peteĩ organisasión oguerekóva tuicha podér opárupi. Upéicharõ ikatu jaʼe hese haʼeha peteĩ império guasu, heʼiséva oguerekoha hetápe ipoguýpe. Mbaʼeichagua impériopa? Peteĩ império rrelihióso. Jahechami mbaʼéichapa Revelación ohechauka upeichaha.

Ikatu oĩ império polítiko, komersiál, térã rrelihióso. Ñandejára Ñeʼẽ ohechauka ko kuña hérava Babilonia Guasu ndahaʼeiha peteĩ império polítiko. Upéva jahecha heʼígui ‘umi rréi yvy arigua’ [umi goviérno polítiko] ojeheʼaha hendive heko vaípe. Upéva heʼise avei ojeheʼaha umi governantekuéra ndive, ha upévare jahecha mbaʼérepa oñehenói chupe ‘pe kuña reko vai’ (Revelación 17:1, 2; Santiago 4:4).

Babilonia Guasu ndahaʼéi avei peteĩ império komersiál. Upéva jahecha ojeʼégui umi ‘komersiánte yvy arigua’ ojaheʼoha hese oñehundi vove. Avei umi téysto heʼi umi rréi ha komersiantekuéra opytaha omaña mombyry guive Babilonia Guasúre (Revelación 18:3, 9, 10, 15-17). Upévare, ikatu jaʼe Babilonia Guasu ndahaʼeiha peteĩ império polítiko térã komersiál, síno rrelihióso.

Jaikuaa avei Babilonia Guasu haʼeha peteĩ império rrelihióso ko mbaʼére: ojeʼe hese ombotavyha opa tetãnguérape umi paje térã espiritísmo ojapóvare (Revelación 18:23). Opaichagua espiritísmo oĩva ou rrelihióngui ha umi demóniogui. Upévare ndajahecharamói la Biblia ohenoiha Babilonia Guasúpe ‘umi demoniokuéra oĩha’ (Revelación 18:2; Deuteronomio 18:10-12). Avei jahecha mbaʼéichapa ko império oñemoĩ mbarete pe rrelihión añeteguáre, opersegi rupi ‘umi proféta ha umi sánto’ (Revelación 18:24). Añetehápe, Babilonia Guasu ndaijaʼéi pe rrelihión añeteguáre, upévare opersegi mbarete ha ojuka avei ‘Jesús testigokuérape’ (Revelación 17:6). Upéicharõ, jahecha porã Babilonia Guasu haʼeha pe império guasu rrelihión fálsa rehegua, ha upépe oike opaichagua rrelihión oñemoĩva Ñandejára Jehováre.