Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Mbaʼépa añetehápe omboʼe la Biblia?

 KAPÍTULO 4

Mávapa Jesucristo?

Mávapa Jesucristo?
  • Mbaʼe posisión iñimportántevapa oguereko Jesús?

  • Moõguipa ou?

  • Mbaʼeichagua persónapa rakaʼe Jesús?

1, 2. a) Mbaʼérepa ñahendu peteĩ ifamósovagui ndeʼiséi jaikuaa porãha chupe? b) Ndoikuaaporãigui Jesúspe, mbaʼépa heʼi la hénte hese?

HETA oĩ ifamósova ko múndope. Oĩ umi ojekuaáva hóga jerere, ipuévlope térã hetãme. Ha oĩ avei umi ojekuaáva opárupi ko múndope. Péro jaikuaa peteĩ famóso réra ndeʼiséi jaikuaa porãha chupe. Ndajaikuaái heta mbaʼe chugui, moõguipa ou ha mbaʼeichaguápa haʼe.

2 Opárupi ko múndope heta oĩ ohendúmava Jesucrístogui, ojapómaramo jepe dos mil áño rupi haʼe oikohague ko Yvy ape ári. Upéicharõ jepe heta ndoikuaaporãi mávapa haʼe. Oĩ heʼíva haʼehague peteĩ kuimbaʼe ipyʼaporãvante. Ótro katu heʼi hese haʼehague peteĩ proféta reínte. Ha oĩ umi ogueroviáva Jesús haʼeha Ñandejára ha oadora chupe. Iporãpa ojejapo upéva?

3. Mbaʼérepa iñimportánte reikuaa pe añetegua Jesúsgui?

3 Iñimportánte reikuaa pe añetegua Jesúsgui. Mbaʼérepa? Pórke la Biblia heʼi: “Kóva heʼise jeikove opaʼỹva, toguerekove ohóvo hikuái konosimiénto ndehegui, Ñandejára añetegua peteĩetéva, ha upe nde rembouvaʼekuégui, Jesucristo” (Juan 17:3). Upeichaite, jaikuaáramo pe añetegua Ñandejára Jehová ha Jesucrístogui, ikatu jaguereko pe tekove opaʼỹva pe paraísope, oĩtava ko Yvy ape ári (Juan 14:6). Avei Jesús ohechauka porã vaʼekue mbaʼéichapa jaiko ha jatratavaʼerã ñande rapichakuérape (Juan  13:34, 35). Pe kapítulo omoñepyrũvape ko lívro, ñaaprendékuri pe añetegua Ñandejáragui. Ha koʼág̃a ñaaprendéta mbaʼépa añetehápe omboʼe la Biblia Jesucrístogui.

PE MESÍAS OÑEPROMETEVAʼEKUE

4. Mbaʼépa heʼise umi título Mesías ha Cristo?

4 Heta tiémpo Jesús onase mboyve, la Biblia heʼimavaʼekue Ñandejára omboutaha pe Mesías térã Cristo. Pe título Mesías (oúva pe evréo ñeʼẽgui) ha Cristo (pe griégo ñeʼẽgui) heʼise “Ungido”. Upéva heʼise Ñandejára oiporavohague chupe oguereko hag̃ua peteĩ posisión espesiál. Umi kapítulo oúvape ñaaprendevéta mbaʼérepa pe Mesías iñimportánte oñekumpli ha g̃ua umi Ñandejára promésa. Ñaaprendéta avei ikatuha jahupyty koʼág̃ama voi umi mbaʼe porã Jesús omeʼẽva. Jesús onase mboyve, oiméne heta oĩ oñeporanduvaʼekue: “Mávanepa pe Mesías?”.

5. Mbaʼépa ogueroviaitereivaʼekue Jesús remimboʼekuéra?

5 Pe síglo primérope, Jesús de Nazaret remimboʼekuéra ogueroviaitereivaʼekue Jesús haʼeha pe Mesías ojeʼevaʼekue outaha (Juan 1:41). Umíva apytégui, peteĩ hérava Simón Pedro, heʼi porã vaʼekue Jesúspe: “Nde hína pe Cristo” (Mateo 16:16). Mbaʼérepa hemimboʼekuéra ogueroviaitevaʼekue Jesús haʼeha pe Mesías oñeprometevaʼekue? Ha mbaʼérepa ikatu ñande avei jaguerovia?

6. Mbaʼérepa ikatu ñambojoja pe ñepytyvõ omeʼẽvaʼekue Jehová umi ifiélvape oikuaa hag̃ua pe Mesíaspe?

6 Jesús onase mboyve, umi Ñandejára proféta heʼimavaʼekue heta mbaʼe pe Mesíasgui. Koʼã mbaʼe oipytyvõ ojekuaa hag̃ua chupe. Upe oikovaʼekue ikatu ñambojoja ko mbaʼére: ojejeruréramo ndéve reho hag̃ua umi míkro térã trén opytahápe, térã pe aeropuértope reheka hag̃ua peteĩ tapicha ndereikuaáivape, ajépa nepytyvõta retopa hag̃ua hese oñemombeʼúramo ndéve mbaʼeichaguápa haʼe? Upéicha avei iproféta rupive Jehová omombeʼu heta mbaʼe pe Mesíasgui, umi mbaʼe ojapótava ha ohasátava. Upéicha oñekumpli vove koʼã mbaʼe, umi tapicha ifiélva ikatúta oikuaa porã mávapa pe Mesías.

7. Mbaʼe mokõi profesíapa oñekumplivaʼekue Jesús rehe?

7 Jahechami mokõi ehémplo. Primero: setecientos áño rupi oiko mboyve, pe proféta Miqueas heʼi pe Oñeprometevaʼekue onasetaha Belénpe, peteĩ puevloʼi opytáva Judápe (Miqueas 5:2). Ha moõpa onase Jesús? Upe puevloitépe voi! (Mateo 2:1, 3-9). Segundo: heta síglo oñekumpli mboyve, Daniel 9:25-pe ojeʼemavaʼekue pe  Mesías ouvaʼerãha pe áño 29-pe. * Koʼã mbaʼe ha hetave profesía oñekumplivaʼekue ohechauka Jesús haʼeha pe Mesías oñeprometevaʼekue.

Ojevautisárõ guare, Jesúsgui oiko pe Mesías térã Cristo

8, 9. Mbaʼéichapa ojehecha porã vaʼekue Jesús haʼeha pe Mesías ojevautisárõ guare?

8 Opa mboyvemi pe áño 29 ojehecha porãvéntema Jesús haʼeha pe Mesías. Upe áñope Jesús ohovaʼekue Juan el Bautista rendápe ojevautisa hag̃ua pe rrío Jordánpe. Jehová oprometevaʼekue Juánpe ohechaukataha chupe mávapa pe Mesías, ha upéva oiko Jesús ojevautisárõ guare. La Biblia omombeʼu mbaʼépa oiko: “Ojevautisapávo Jesús, osẽ pe ýgui; ha péina!, pe yvága ojeavri ha haʼe ohecha oguejývo hiʼári Ñandejára espíritu peteĩ palómaicha. Péina! Oĩ avei peteĩ ñeʼẽ yvága guive heʼíva: ‘Kóva hína che Raʼy ahayhuetéva, che aiporavovaʼekue’” (Mateo 3:16, 17). Ohecha ha ohendu rire pe oikóva, Juan ohechakuaa añetehápe Ñandejára ombouhague Jesúspe (Juan 1:32-34). Upe árape, oñeñohẽrõ guare hese pe Ñandejára espíritu, oiko chugui pe Mesías, térã Cristo, pe ojeporavovaʼekue haʼe hag̃ua Mburuvicha ha Rréi (Isaías 55:4).

9 Umi profesía oñekumplivaʼekue ha pe Ñandejára heʼivaʼekue hese ohechauka porã Jesús haʼeha pe Mesías oñeprometevaʼekue. Péro la Biblia ombohovái avei mokõi porandu iñimportánteva Jesúsgui: Moõguipa ou? Ha mbaʼeichagua persónapa rakaʼe?

MOÕGUIPA OU JESÚS?

10. Mbaʼépa omboʼe la Biblia Jesús rekovégui ou mboyve ko Yvy ape ári?

10 La Biblia omboʼe Jesús oikohague yvágape ou mboy ve ko Yvy ape ári. Miqueas heʼivaʼekue pe Mesías onasetaha Belénpe péro avei heʼi haʼe oĩmahague “ymaiterei guive” (Miqueas 5:2). Heta vése Jesús heʼivaʼekue haʼe oĩmahague yvágape onase mboyve yvypóraicha (Juan 3:13; 6:38, 62; 17:4, 5). Pe yvágape Jesús haʼevaʼekue peteĩ espíritu oguerekóva peteĩ rrelasión espesiál Jehová ndive.

11. Mbaʼéichapa ohechauka la Biblia Jesús haʼeha pe Taʼýra Ñandejára ohayhuvéva?

11 Heta mbaʼére Jesús haʼe pe Taʼýra Ñandejára ohayhuvéva. Chupe oñehenói “pe taʼýra ypykue, ojejapovaʼekue opa mbaʼe mboyve”, Ñandejára ojapo raẽ haguére chupe * (Colosenses 1:15). Ha avei ko Taʼýra ndaijojahái pórke haʼe pe ‘Taʼýra peteĩ’ (Juan 3:16). Upéva heʼise chupe añoite Ñandejára voi ojapohague. Avei haʼe añoite oipytyvõvaʼekue Ñandejárape ojapo hag̃ua opa mbaʼe oĩva (Colosenses 1:16). Jesúspe avei oñehenói “pe Ñeʼẽ” (Juan 1:14). Upéva heʼise oñeʼẽhague Itúva rérape omombeʼu hag̃ua Ñandejára raʼykuérape, tahaʼe espíritu térã yvypórape, mbaʼépa ojapovaʼerã hikuái.

12. Mbaʼérepa jaikuaa pe Taʼýra ypykue ndahaʼeiha peteĩcha Itúva ndive?

12 Haʼépa pe Taʼýra ypykue peteĩcha Ñandejára ndive, ojegueroviaháicha sapyʼánte? La Biblia nomboʼéi upéva. Jahechahaguéicha angete, Ñandejára ojapovaʼekue pe Taʼýrape. Upéicharõ Jesús oguerekovaʼekue ñepyrũ. Péro Jehová ndoguerekói ñepyrũ ni ndopamoʼãi (Salmo 90:2). Pe Taʼýra peteĩetéva nopensaivaʼekue arakaʼeve haʼeha peteĩcha Itúva ndive. La Biblia omombeʼu porã pe Túva tuichaveha pe Taʼýragui (Juan 14:28; 1 Corintios 11:3).  Jehová añoite haʼe “Ñandejára Ipuʼakapáva” (Génesis 17:1). Upévare, ndaipóri oñembojojáva hese. *

13. Mbaʼépa heʼise la Biblia heʼívo pe Taʼýra haʼeha “pe Ñandejára ojehechaʼỹva raʼanga”?

13 Jehová ha Itaʼýra ypykue oikomavaʼekue vyʼápe oñondive millones de áño rehe, heta tiémpo ojejapo mboyve umi estrélla ha avei ko Yvy. Upévare oiméne ojoayhuete hikuái! (Juan 3:35; 14:31). Ko Taʼýra ojoguaiterei Itúvape. Upévare la Biblia heʼi hese haʼeha “pe Ñandejára ojehechaʼỹva raʼanga” (Colosenses 1:15). Peteĩ taʼýra ikatu ojoguaiterei itúvape heta mbaʼépe. Upéicha avei pe Taʼýra yvagapegua ojogua Itúvape, ojehechágui hese mbaʼeichagua persónapa Itúva, ha umi kualida oguerekóva.

14. Mbaʼéicha rupípa onase yvypóraicha pe Taʼýra peteĩ ?

14 Pe Taʼýra peteĩ Jehová oguerekóva ohejavaʼekue kyreʼỹme pe yvága ha ou oiko hag̃ua ko Yvy ape ári. Péro oiméne reikuaase: “Mbaʼéichapa ikatu peteĩ espíritu onase peteĩ yvypóraicha?”. Ko mbaʼe oiko hag̃ua Jehová ojapo peteĩ milágro. Haʼe oguerova Itaʼýra ypykue rekove yvágagui peteĩ vírhen hudía retepýpe, hérava María. Upévare noñekotevẽivaʼekue peteĩ yvypóra ituvarã. Ha upéicha María imemby peteĩ mitã perfékto, ha ombohéra Jesús (Lucas 1:30-35).

MBAʼEICHAGUA PERSÓNAPA RAKAʼE JESÚS?

15. Mbaʼéichapa jaikuaa porãve Jehovápe Jesús rupive?

15 Umi mbaʼe Jesús heʼi ha ojapovaʼekue oĩrõ guare ko Yvy ape ári, ñanepytyvõ jaikuaa porã hag̃ua chupe. Ha upéicha Jesús rupive jaikuaa porãvéta Jehovápe avei. Mbaʼérepa? Ñanemanduʼavaʼerã pe Taʼýra ojoguaitereiha Itúvape. Upévare Jesús heʼivaʼekue peteĩ hemimboʼépe: “Chéve cherecháva ohecha che Rúpe avei” (Juan 14:9). La  Bíbliape oĩ cuatro lívro oñehenóiva Evangelio, umíva haʼe Mateo, Marcos, Lucas ha Juan. Koʼã lívro omombeʼu heta mbaʼe Jesús rekovégui, umi mbaʼe haʼe ojapovaʼekue ha umi kualida oguerekóva.

16. Mbaʼéguipa oñeʼẽ meme vaʼekue Jesús, ha mávaguipa ou pe omboʼéva?

16 Jesúspe oñehenoivaʼekue opárupi “Mboʼehára” (Juan 1:38; 13:13). Mbaʼépa omboʼevaʼekue haʼe? Haʼe omboʼe meme vaʼekue pe “marandu porã Rréino rehegua”, térã umi notísia porã Ñandejára Rréinogui. Upéva hína pe goviérno yvagapegua oisãmbyhýtava ko Yvy tuichakue ha oguerútava mbaʼe porã opaʼỹva yvyporakuéra iñeʼẽrendúvape g̃uarã (Mateo 4:23). Ha mávapa omboʼe chupe? Jesús voi heʼivaʼekue: “Pe amboʼéva ndahaʼéi chembaʼe, haʼe uvei pe chembouvaʼekue mbaʼe”, ha upéva hína Jehová (Juan 7:16). Jesús oikuaavaʼekue Itúva oipotaha yvyporakuéra ohendu pe notísia porã Rréino rehegua. Pe kapítulo 8-pe ñaaprendevéta Ñandejára Rréinogui ha umi mbaʼe ojapótavagui.

17. Moõpa omboʼevaʼekue Jesús ha mbaʼérepa hetaite oñehaʼãvaʼekue upe mbaʼére?

17 Moõpa omboʼevaʼekue Jesús? Omboʼevaʼekue opa hénte oĩha rupi, umi ñu, táva guasu, puévlo, merkádo ha ogaha rupi. Jesús nohaʼarõivaʼekue umi hénte ou hendápe, haʼe ohovaʼekue haʼekuéra oĩháme (Marcos 6:56; Lucas 19:5, 6). Mbaʼérepa Jesús hetaite oñehaʼã ha oiporuvaʼekue itiémpo opredika ha omboʼe hag̃ua? Pórke Ñandejára oipota haʼe ojapo upéva. Ha Jesús ojapo meme vaʼekue Itúva oipotáva (Juan 8:28, 29). Péro haʼe opredikavaʼekue avei ko mbaʼére: oiporiahuverekógui umi hénte oúva hendápe (Mateo 9:35, 36). Koʼãvape umi rrelihión omoakãva oheja rei vaʼekue, nomboʼéi chupekuéra pe añetegua Ñandejára ha ipropósitogui. Ha Jesús oikuaavaʼekue mbaʼeichaitépa oikotevẽ ohendu hikuái pe notísia Rréino rehegua.

18. Mbaʼe kualida Jesús oguerekóvapa remombaʼeve?

 18 Jesús haʼevaʼekue peteĩ kuimbaʼe ipyʼaporã ha oporohayhukuaáva. Otrata porã ha hory vaʼekue enterovéndi, ha mitãnguéra jepe ovyʼa hendive (Marcos 10:13-16). Jesúspe g̃uarã enterove peteĩchante. Haʼe ndaijaʼeivaʼekue mbaʼe vai ha inhustísiare (Mateo 21:12, 13). Upérõ kuñanguérape noñemombaʼéi, péro Jesús omombaʼevaʼekue chupekuéra (Juan 4:9, 27). Jesús iñumildevaʼekue añetehápe. Peteĩ árape ombojepyheivaʼekue ijapostolkuérape, peteĩ tembiapo oñemeʼẽva jepi umi esklávope.

Jesús opredikavaʼekue opa hénte oĩha rupi

19. Mbaʼe ehémplopa ohechauka Jesús oiporiahuverekohague umi ohasa asývape?

19 Jesús ohechakuaavaʼekue mbaʼépa oikotevẽ umi hénte. Ko mbaʼe ojehecha porã vaʼekue omonguerárõ guare umi hasývape, Ñandejára espíritu rupive (Mateo 14:14). Jahechami peteĩ ehémplo: Peteĩ kuimbaʼe hasýva lépragui ou Jesús rendápe ha heʼi chupe: “Nde reipotáramo, ikatu chemopotĩ”. Jesús oñandu ikorasõme pe kuimbaʼe ohasá va. Ha oiporiahuverekógui opoko hese ha heʼi: “Aipota. Tanepotĩ”. Ha pe kuimbaʼe okuera (Marcos 1:40-42). Oiméne ovyʼaitéraʼe pe kuimbaʼe, ajépa?

IFIÉL OMANO MEVE

20, 21. Mbaʼérepa Jesús omoĩ pe ehémplo iporãvéva ileál ha iñeʼẽrendu rupi Ñandejárape?

20 Jesús iñeʼẽrendu ha ileál rupi Ñandejárape oheja pe ehémplo iporãvéva. Haʼe ifielvaʼekue Itúva yvagapeguápe opa mbaʼépe, ojepersegi térã ohasa asýramo jepe. Jesús noñemeʼẽivaʼekue umi tentasión Satanás omoĩvape (Mateo 4:1-11). Peteĩ tiémpope, ihentekuéra apytépe jepe oĩvaʼekue umi ndogueroviáiva chupe, ha heʼi hese “oĩ vaíma iñakãgui” (Marcos 3:21). Péro Jesús ndohejái ko mbaʼe oguapy hese, ha osegi ojapo pe tembiapo Ñandejára omeʼẽvaʼekue chupe. Oñeñeʼẽramo jepe hese ha ojetrata vai, Jesús ojejoko ha ndojapói mbaʼeve ivaíva umi ndaijaʼéivare hese (1 Pedro 2:21-23).

 21 Jesús ifielvaʼekue omano meve. Umi iñenemígo heta oñembosarái hese ojuka peve (Filipenses 2:8). Jahechami mbaʼépa ohasa haʼe pe último día omano mboyve. Umi mburuvicha ojagarra chupe, umi testígo japu oñeʼẽ vai hese, ha umi hués ñaña okondena chupe. Oĩ hénte oñembohorýva hese ha umi soldádo katu oñembosarái hese. Oñemoĩ peteĩ yvyráre, ha omano mboyve heʼi: “Oikopáma” (Juan 19:30). Péro tres día Jesús omano rire, Itúva yvagapegua omoingove jey chupe peteĩ espírituicha (1 Pedro 3:18). Ha mbovymi semána ohasa rire, haʼe oho jey yvágape. Upépe haʼe “oguapy Ñandejára deréchape” ha ohaʼarõ oñemeʼẽ meve chupe podér ogoverna hag̃ua (Hebreos 10:12, 13).

22. Mbaʼépa ojehupyty Jesús ifiél rupi omano meve?

22 Mbaʼépa ojehupyty Jesús ifiél rupi omano meve? Upéva rupi ikatu jaiko opa ára g̃uarã ko Yvy ape ári peteĩ paraísope, Jehová oipotahaguéicha. Pe kapítulo oúvape jahecháta mbaʼéichapa ojehupytýta upéva Jesús ñemano rupi.

^ párr. 7 Reikuaáve hag̃ua, ehecha pe informasión oĩvéva pe párte héravape: “Pe profesía ohaivaʼekue Daniel heʼi pe Mesías og̃uahẽtaha”, omyesakãva mbaʼéichapa oñekumpli Jesús rehe pe Daniel heʼivaʼekue.

^ párr. 11 Jehovápe oñehenói Túva haʼégui ñande Apohare (Isaías 64:8). Ha Jesúspe oñehenói Ñandejára Raʼy, pórke Ñandejára ojapovaʼekue chupe. Upévare avei oñehenói Ñandejára raʼy umi espíritupe, ha Adán pe kuimbaʼe ypykuépe avei (Job 1:6; Lucas 3:38).

^ párr. 12 Reikuaáve hag̃ua, ehecha pe informasión oĩvéva pe párte héravape: “Pe añetegua Túva, Taʼýra ha espíritu sántogui”, ohechaukáva mbaʼérepa pe Taʼýra ypykue ndahaʼéi peteĩcha Ñandejára ndive.