Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Mbaʼépa añetehápe omboʼe la Biblia?

 KAPÍTULO 2

La Biblia: Peteĩ lívro oúva Ñandejáragui

La Biblia: Peteĩ lívro oúva Ñandejáragui
  • Mbaʼérepa la Biblia ndaikatúi oñembojoja mbaʼeveichagua lívrore?

  • Mbaʼéichapa ikatu la Biblia ñanepytyvõ ñambohovái hag̃ua umi provléma jaguerekóva?

  • Mbaʼérepa ikatu jaguerovia umi profesía oĩva la Bíbliape?

1, 2. Mbaʼérepa la Biblia haʼe peteĩ rregálo iporãitereíva oúva Ñandejáragui?

IKATÚPA nemanduʼa rerresivírõ guare peteĩ rregálo iporãva peteĩ ne amígo rehayhúvagui? Oiméne upéva nembovyʼa ha remombaʼe avei. Pe rregálo ohechauka ndéve haʼe omombaʼeha ne amista. Ha katuete reagradeséneraʼe chupe pe rregálo iporãitévare.

2 Upéicha avei, la Biblia haʼe peteĩ rregálo omeʼẽva ñandéve Ñandejára, ha jaagradesevaʼerã chupe. Ko lívro añoite ohechauka heta mbaʼe ndaikatumoʼãiva jaikuaa ótro hendápe. Pór ehémplo, omombeʼu mbaʼéichapa ojejapovaʼekue pe yvága henyhẽva estréllagui, ko Yvy jaikoha, ha avei pe kuimbaʼe ha kuña ypykue. La Biblia oguereko avei umi konsého iporãva ñanepytyvõtava ñambohovái hag̃ua umi provléma ha jepyʼapy jaguerekóva. La Biblia omyesakã avei mbaʼéichapa Ñandejára okumplíta ipropósito ha omoporãta ko Yvy. Ajépa iporãite ko rregálo!

3. Mbaʼépa ohechauka Jehová omeʼẽvo ñandéve la Biblia, ha mbaʼérepa upéva opoko ñane korasõre?

3 La Biblia haʼe peteĩ rregálo opokóva ñane korasõre, ohechaukágui mbaʼeichaguápa Jehová, pe rregálo apohare. Haʼe omeʼẽ ñandéve la Biblia oipotágui jaikuaa porã chupe. Upéi charõ, ko lívro ñanepytyvõ ñañemoag̃ui hag̃ua Jehováre.

4. Mbaʼépa nde rehecharamove la Biblia ñemosarambígui?

4 Heta oĩ oguerekóva la Biblia, ha ikatu nde voi reguereko peteĩ. La Biblia ojejapóma kompléto térã peteĩ párte heta ñeʼẽme. Ha ohasáma dos mil trescientos idióma. Avei ohasáma noventa por ciento umi tapicha oĩva ko múndope ikatúva oguereko la Biblia. Ha káda semána oñemosarambi un millón ári. Ojejapóma hetaiterei Biblia, tahaʼe kompléto térã peteĩ párte. Upévare ndaipóri ótro lívro oñembojojáva hese.

Pe ‘Traducción del Nuevo Mundo de las Santas Escrituras’ ojeguereko heta idiómape

5. Mbaʼérepa ojeʼe la Biblia oĩha “inspiráda Ñandejárare”?

5 Avei, la Biblia “oĩ inspiráda Ñandejárare” (2 Timoteo 3:16). Mbaʼéichapa haʼe ojapo upéva? Pe apóstol Pedro okontesta: “kuimbaʼekuéra uvei oñeʼẽvaʼekue Ñandejáragui ojegueraha rupi espíritu sántore” (2 Pedro 1:21). Haʼetévaicha peteĩ kuimbaʼe ojapoukáva peteĩ kárta isekretáriape. Pe kártape oñemoĩta pe kuimbaʼe opensáva ha oipotáva. Upévare pe kárta imbaʼe, ndahaʼéi isekretária mbaʼe. Upéicha avei, la Bíbliape oĩ Ñandejára mensáhe, ndahaʼéi umi  oskrivivaʼekue mbaʼe. Upévare la Biblia haʼe “Ñandejára ñeʼẽ” (1 Tesalonicenses 2:13).

PETEĨ LÍVRO HEʼÍVA AÑETEGUA HA NDOJOAVÝIVA

6, 7. Mbaʼérepa ñamombaʼe la Biblia ndojoavyiha mbaʼevetépe?

6 La Biblia ojehaivaʼekue 1600 áño pukukue aja. Umi kuimbaʼe oskrivivaʼekue ndoikói oñondivepa peteĩ tiémpope. Haʼekuéra ombaʼapovaʼekue heta mbaʼépe, oĩ umi ombaʼapóva kokuépe, opeskáva ha oñangarekóva ovecháre. Ha oĩ avei proféta, hués ha rréi. Lucas haʼevaʼekue doktór, ohaivaʼekue pe lívro ogueraháva héra. Oguerekóramo jepe opaichagua tembiapo koʼã ohaivaʼekue, la Biblia ndojoavýi mbaʼevetépe. *

7 Pe primer lívro oĩva la Bíbliape omombeʼu mbaʼéichapa oñepyrũvaʼekue yvyporakuéra provléma. Ha pe último lívro ohechauka mbaʼéichapa oikóta ko Yvýgui peteĩ paraíso, térã hardín. Umi mbaʼe la Biblia omombeʼúva oikovaʼekue miles de áño aja, ha ñanepytyvõ ñantendeve hag̃ua mbaʼéichapa oñekumpli ohóvo Ñandejára propósito. La Biblia ndojoavýi mbaʼevetépe, ha upéicha vaʼerã oúramo Ñandejáragui.

8. Emombeʼu mbaʼépepa la Biblia ndojoavýi umi sientífiko heʼíva ndive.

8 La Biblia heʼíva ndojoavýi avei umi sientífiko heʼíva ndive. Heta mbaʼe omombeʼúva ndojekuaaivaʼekue upe tiémpope. Pe lívro hérava Levíticope, jatopa umi léi oñemeʼẽvaʼekue umi isrraelítape. Umíva apytépe oĩ pe léi heʼíva oñemohaʼeñovaʼerãha umi hasývape (oñehenóiva cuarentena), ha oĩ avei heʼíva mbaʼéichapa ipotĩvaʼerã hikuái. Umi tetã oĩva upérupi ndoikuaaivaʼekue umi mbaʼe. Avei peteĩ tiémpope ndojekuaaporãivaʼekue mbaʼe fórmapa oguereko  ko Yvy, péro la Biblia heʼimavaʼekue ijapuʼaha (Isaías 40:22). La Biblia heʼi porã vaʼekue avei ‘ko yvy osaingoha mbaʼeve ári’ (Job 26:7). Añete, la Biblia ndahaʼéi peteĩ lívro siénsia rehegua. Péro oñeʼẽ jave umi mbaʼére ndojavýi. Ha upéicha vaʼerã peteĩ lívro oúva Ñandejáragui, ajépa?

9. a) Mbaʼépa ohechauka la Biblia ndojoavyiha pe istória heʼíva ndive? b) Mbaʼérepa umi oskrivivaʼekue la Biblia noñomíri mbaʼeve?

9 La Biblia ndojoavýi avei pe istória heʼíva ndive ha ikatu jaguerovia. Omombeʼu umi mbaʼe oikohagueichaite. Ha nomombeʼúi umi hénte réra añónte, omombeʼu avei mbaʼéichapa heravaʼekue umi ijypykue. * Umi istóriagui ohaíva pyʼỹi nomombeʼúi umi mbaʼe vai oikovaʼekue hetãme, péro umi oskrivivaʼekue la Biblia noñomíri umi mbaʼe vai haʼekuéra térã hetã ojapovaʼekue. Pór ehémplo, pe lívro hérava Númerospe, Moisés omombeʼu tuicha ojavyhague ha mbaʼéichapa Jehová omongavaju chupe upévare (Números 20:2-12). Koʼã mbaʼe nameméi oñemombeʼu pe istóriape, péro jatopa la Bíbliape haʼégui peteĩ lívro oúva Ñandejáragui.

PETEĨ LÍVRO OMEʼẼVA KONSÉHO IPORÃVA JAIPORU HAG̃UA ÑANDE REKOVÉPE

10. Mbaʼérepa ndajahecharamoivaʼerã la Biblia haʼeha peteĩ lívro iporãva jaiporu hag̃ua ñande rekovépe?

10 Jaikuaa Ñandejára oinspirahague la Biblia. Upévare “iporã ñamboʼe hag̃ua, ñañemoñeʼẽ mbarete hag̃ua, ñamyatyrõ hag̃ua oñekotevẽhápe” (2 Timoteo 3:16). Upeichaite, la Biblia heʼíva iporã jaiporu hag̃ua ñande rekovépe. Ohechauka porã mbaʼépa yvyporakuéra oñandu. Upéva ndajahecharamoivaʼerã oúgui Ñandejára Jehovágui, ñande Apohare. Haʼe oikuaa porãve ñandehegui mbaʼépa ñapensa ha ñañandu. Jehová avei oikuaa mbaʼépa ñaikotevẽ javyʼa hag̃ua. Ha oikuaa avei mbaʼépa naiporãi jajapo.

11, 12. a) Mbaʼe mbaʼéguipa oñeʼẽvaʼekue Jesús pe Sermón del Móntepe? b) Mbaʼéguipa oñeʼẽ avei la Biblia, ha mbaʼérepa umi konsého omeʼẽva siémpre iporã?

 11 Jahechami mbaʼépa Jesús heʼivaʼekue pe Sermón del Móntepe, jatopáva Mateo kapítulo 5 guive 7 peve. Ko ñemoñeʼẽ ijojahaʼỹvape Jesús oñeʼẽvaʼekue heta mbaʼégui: mbaʼépa jajapovaʼerã javyʼa hag̃ua, mbaʼéichapa ikatu ñasolusiona jajoavýramo ñande rapichándi, mbaʼéichapa  ñañemboʼevaʼerã ha mbaʼéichapa jahechavaʼerã umi mbaʼerepy jaguerekóva. Umi mbaʼe Jesús heʼivaʼekue iporã ha ikatu ojeporu koʼág̃a peve.

12 La Biblia oguereko avei umi konsého jaiporu hag̃ua ñande rogapýpe, ñane mbaʼapohápe ha jajogueraha porã hag̃ua ñande rapichándi. Koʼã konsého enterovépe g̃uarã, ha katuete ojapo porã. Pe arandu jatopáva la Bíbliape ohechauka porã pe Ñandejára heʼivaʼekue Isaíaspe: “Che hína Jehová, nde Jára, Upe nemboʼéva reho porã hag̃ua” (Isaías 48:17).

PETEĨ LÍVRO PROFESÍA REHEGUA

Pe proféta Isaías heʼivaʼekue Babilonia oñehunditaha

13. Mbaʼe mbaʼépa Jehová heʼivaʼekue Isaías rupive oikotaha Babilóniare?

13 La Bíbliape oĩ heta profesía, ha umíva apytépe hetáma oñekumpli. Jahechami peteĩ ehémplo. Setecientos áño ñande ára mboyve, Jehová heʼivaʼekue iproféta Isaías rupive oñehunditaha pe táva guasu Babilonia (Isaías 13:19; 14:22, 23). Ha heʼi avei mbaʼéichapa oikovaʼerã ko mbaʼe. Heʼi ouvaʼerãha umi ehérsito ombohypátava pe rrío ohasáva Babilonia rupi ha oiketaha pe távape oñorairõʼỹre. Ha ndahaʼéi upéva añónte. Isaías heʼivaʼekue avei mbaʼéichapa héra pe rréi ojagarrátava Babilonia: Ciro (Isaías 44:27-45:2).

14, 15. Mbaʼéichapa oñekumpli umi mbaʼe Isaías heʼivaʼekue Babilóniare?

14 Ohasa rire doscientos áño rupi, pe áño 539 ñande ára mboyve, peteĩ ehérsito ou opyta Babilonia ypýpe. Upéva oikovaʼekue pe 5 ha 6 de octubre pyharépe. Ha mávapa omoakã pe ehérsito? Peteĩ rréi Persiaygua hérava Ciro. Upéicha oĩmbaitéma oñekumpli hag̃uáicha pe profesía guasu. Péro ikatúnepa oike Ciro ehérsito Babilóniape oñorairõʼỹre, pe profesía heʼihaguéicha?

15 Upe pyharépe umi vavilónio oĩjoa peteĩ fiestahápe ha ndokyhyjéi mbaʼevégui, pórke pe táva oguereko umi murálla ijyvatetereíva. Upe aja, katupyrýpe Ciro ombodesvia pe rrío ohasáva pe táva rupi. Pe y oguejy pyaʼe ha umi  kuimbaʼekuéra ikatúma oguata pe rrío osyryha rupi ha oñemoag̃ui pe murállare. Péro mbaʼéichapa ikatúta ohasa hikuái pe murálla? Upe pyharépe, ndojekuaái mbaʼérepa, pe táva rokẽ ojeheja nandi!

16. a) Mbaʼéichapa heʼivaʼekue Isaías opytataha Babilonia? b) Mbaʼéichapa oñekumplirakaʼe pe Isaías heʼivaʼekue Babilonia opytataha nandi?

16 Babilóniare ojeʼevaʼekue: “Arakaʼeve ndojeikomoʼãvéi upépe, ndaiporimoʼãvéi oikóva ipype. Upépe pe Arabiaygua nomoĩmoʼãi hóga kárpa, ha ndaiporimoʼãi umi pastór ohejáva ijovechakuéra oñeno upépe” (Isaías 13:20). Ko profesía omombeʼu mbaʼépa oikóta pe távagui hoʼa rire. Omombeʼu avei Babilóniape ndojeikomoʼãveitaha arakaʼeve. Upéva ikatu jahecha oñekumplihague. Babilonia tapere opyta 80 kilómetro jahávo súr gotyo pe táva Bagdádgui, oĩva Irákpe. Upépe avave ndoikói, ha upéva ohechauka oñekumplihague Jehová heʼivaʼekue Isaías rupive: Aitypeíta chupe pe typycha oporohundívape (Isaías 14:22, 23). *

Babilonia tapere

17. Mbaʼérepa omombarete ñande fe umi profesía oñekumplivaʼekue?

 17 Jahecha rire ikatuha jaguerovia umi profesía oĩva la Bíbliape, ñande fe imbareteve, ajépa? Ñandejára Jehová okumpli umi promésa ojapovaʼekue. Upévare ikatu jaguerovia ojapotaha ko Yvýgui peteĩ paraíso (Números 23:19). Ha jaguereko “esperánsa jeikove opaʼỹvagui, Ñandejára, ikatuʼỹva ijapu, oprometevaʼekue ymaiterei guivéma” (Tito 1:2). *

“ÑANDEJÁRA ÑEʼẼ OIKOVE”

18. Mbaʼéichapa omombaʼevaʼekue apóstol Pablo pe “Ñandejára ñeʼẽ”?

18 Umi mbaʼe jahecháva koʼág̃a peve ohechauka ñandéve ndaiporiha peteĩ lívro ombojojáva la Bíbliape. La Biblia ña mombaʼe ndojoavýigui mbaʼevetépe, ni umi sientífiko ha pe istória heʼíva ndive. Ñamombaʼe avei, omeʼẽgui konsého iporãva ha oguerekógui profesía oñekumplíva. Péro ndahaʼéi umi mbaʼére añónte. Pe apóstol Pablo ohaivaʼekue: “Ñandejára ñeʼẽ oikove, ha ipuʼaka, ha haimbeve peteĩ espáda haimbe jováivagui, ha oikéva ombojaʼo peve álma ha espíritu, ha ñane kangue joajuha ha ikaraku, ha ohechakuaa pe jaguerekóva ñane akãme ha ñande pyʼapýpe” (Hebreos 4:12).

19, 20. a) Mbaʼéichapa ñanepytyvõ la Biblia jajepyʼamongeta hag̃ua ñandejehe voi? b) Mbaʼéichapa rehechaukáta remombaʼeha la Biblia, pe rregálo ijojahaʼỹva omeʼẽva Ñandejára?

19 Jaleéramo Ñandejára “ñeʼẽ” oĩva la Bíbliape ikatu okambia ñande rekove. Ñanepytyvõta jajepyʼamongeta porã hag̃ua ñandejehe voi. Ikatu jaʼe jahayhuha Ñandejárape, péro upe jajapóva la Biblia heʼívagui ohechaukáta mbaʼépa ñapensa ha mbaʼépa jaguereko ñane korasõme.

20 La Biblia haʼe pe lívro oúva Ñandejáragui ha upévare jalee, jastudia ha jahayhuvaʼerã. Rehechaukáta remombaʼeha Ñandejára rregálo resegíramo restudia pe heʼíva. Upéicha rejapóramo rentende porãta Ñandejára propósito yvyporakuérape g̃uarã. Pe kapítulo oúvape jahecháta mbaʼépa ko propósito ha mbaʼéichapa oñekumplíta.

^ párr. 6 Oĩramo jepe heʼíva la Biblia oguerekoha párte ojoavyha, ndaikatúi ohechauka upéva. Upéva rehecháta pe lívro La Biblia... ¿la Palabra de Dios o palabra del hombre? kapítulo 7-pe, omosarambíva testigos de Jehová.

^ párr. 9 Ikatu jahechapaite mávapa Jesús ypykue Lucas 3:23-38-pe.

^ párr. 16 Reikuaavéta umi profesía Bíbliape oĩvagui pe folléto héravape Un libro para todo el mundo páhina 27-29-pe, omosarambíva testigos de Jehová.

^ párr. 17 Pe Babilóniape ojehuvaʼekue haʼe peteĩ ehémplo oñekumpliha umi profesía Bíbliape oĩva. Jahecha avei upéva Tiro ha Nínive oñehundírõ guare (Ezequiel 26:1-5; Sofonías 2:13-15). Avei pe proféta Daniel omombeʼuvaʼekue umi império mundiál ogovernátava Babilonia rire. Umíva apytépe oĩvaʼekue Medopersia ha Grecia (Daniel 8:5-7, 20-22). Ko lívro opahápe, ehecha pe informasión oĩvéva hérava: “Jesucristo, pe Mesías oñeprometevaʼekue”, retopáta heta profesía Mesías rehegua oñekumplivaʼekue Jesucrístore.