Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Mbaʼépa añetehápe omboʼe la Biblia?

 KAPÍTULO 12

Jaiko Ñandejára oipotaháicha

Jaiko Ñandejára oipotaháicha
  • Mbaʼéichapa ikatu oiko ñandehegui Ñandejára amígo?

  • Mbaʼéichapa ñanderupyty pe desafío ojapovaʼekue Satanás?

  • Mbaʼeichagua tembiapópa Jehová ndoipotái jajapo?

  • Mbaʼéichapa ikatu jaiko Ñandejára oipotaháicha?

1, 2. Máva mávapepa Jehová oiporavovaʼekue iñamigoitéramo?

MBAʼEICHAGUA tapichápa nde reiporavóne ne amigorã? Oiméne rehekáta peteĩ opensa, ohayhu ha omombaʼéva umi mbaʼe ndéve iporãva. Ha katuete reipotáta ne amigorã peteĩ heko porã, ipyʼapotĩ ha horýva.

2 Ymaite guive, oĩvaʼekue yvyporakuéra Ñandejára oiporavóva oiko hag̃ua chuguikuéra iñamigoite. Pór ehémplo, Jehová heʼivaʼekue ‘Abrahán haʼeha iñamígo’ (Isaías 41:8; Santiago 2:23). Ñandejára heʼivaʼekue David haʼeha ‘peteĩ kuimbaʼe oguerohorýva ikorasõ’, ohayhúgui umichaguápe (Hechos 13:22). Ha Jehovápe g̃uarã pe proféta Daniel haʼevaʼekue ‘peteĩ kuimbaʼe ojeguerohorýva’ (Daniel 9:23).

3. Mbaʼérepa Jehová oiporavovaʼekue yvyporakuéra apytégui iñamigorã?

3 Mbaʼérepa Jehová heʼivaʼekue Abrahán, David ha Daniel rehe iñamigoha? Jehová heʼi Abrahánpe: ‘Rehenduhaguére che ñeʼẽ’ (Génesis 22:18). Upéicharõ, Jehová oñemoag̃ui umi ojapóvare kyreʼỹme haʼe ojeruréva chuguikuéra. ‘Pehendúkena che ñeʼẽ —heʼivaʼekue umi isrraelítape—, ha che haʼéta Ñandejára peẽme g̃uarã, ha oikóta pendehegui che puévlo.’ (Jeremías 7:23.) Rejapóramo Jehová heʼíva ikatu avei oiko ndehegui iñamígo.

 JEHOVÁ OMOMBARETE IÑAMIGOKUÉRAPE

4, 5. Mbaʼéichapa Jehová ohechauka ipuʼaka ipuévlo rehehápe?

4 Epensami mbaʼépa heʼise jaguereko Ñandejára amista. La Biblia heʼi Jehová ohekahahína mbaʼéichapa ‘ohechaukáta ipuʼaka umi ipyʼaite guive oĩvape hendive’ (2 Crónicas 16:9). Mbaʼéichapa ikatu Jehová ohechauka ipuʼaka ñanderehehápe? Ojehecha upéva pe Salmo 32:8 heʼívare: ‘Che [Jehová] ameʼẽta ndéve techakuaa ha rohekomboʼéta pe tape reguata hag̃uáme. Añemoñeʼẽta ndéve ajesarekóvo nderehe’.

5 Mbaʼeichaitépa Jehová ojepyʼapy ñanderehe! Haʼe oñemoñeʼẽta ñandéve ñaikotevẽhápe, ha jajapóramo pe heʼíva, oñangarekóta ñanderehe. Ñandejára ñanepytyvõse ñambohovái porã hag̃ua umi pruéva ha jejopy vai (Salmo 55:22). Jaservíramo Ñandejárape ñandepyʼaite guive, ikatúta jaʼe pe salmísta heʼihaguéicha: ‘Che amoĩ meme Jehovápe che renondépe. Haʼe oĩ rupi che deréchape, mbaʼeve nachembovavamoʼãi’ (Salmo 16:8; 63:8). Upeichaite, Jehová ikatu ñanepytyvõ jaiko hag̃ua haʼe oipotaháicha. Péro jaikuaa avei oĩha peteĩ oñemoĩva Ñandejárare ha ndoipotáiva jajapo upéva.

PE DESAFÍO SATANÁS OJAPOVAʼEKUE

6. Mbaʼépa heʼi Satanás yvyporakuérare?

6 Pe kapítulo 11-pe, jahechákuri mbaʼéichapa Satanás oñemoĩvaʼekue Ñandejára sãmbyhýre. Satanás heʼivaʼekue Ñandejára ijapuhague ha iñinhustoha ndohejáigui Adán ha Eva odesidi ijehegui pe iporãva ha ivaíva. Adán ha Eva opeka rire ha henyhẽ rire ko Yvy itaʼyrakuéragui, Satanás oñeʼẽ vai yvyporakuérare. Haʼete ku heʼíva: ‘Yvyporakuéra ndoservíri Ñandejárape ohayhúgui chupe, ha ojehejáramo chéve, ikatúta oimeraẽvape amoĩ Ñandejára kóntrape’. Umi mbaʼe oikovaʼekue peteĩ kuimbaʼe hérava Job rehe, ohechauka Satanás ogueroviahague upéva. Péro, mávapa rakaʼe Job, ha  mbaʼérepa ohupyty chupe avei pe desafío ojapovaʼekue Satanás?

7, 8. a) Mbaʼérepa Job ndaijojahaivaʼekue yvyporakuéra apytépe? b) Mbaʼéichapa Satanás oñeʼẽ vai vaʼekue Job rehe?

7 Job oikohague ojapóma tres mil seiscientos áño rupi. Haʼe ipyʼaporãvaʼekue, ha Jehová heʼi hese: ‘Ndaipóri ni peteĩ haʼeichagua Yvy ape ári, peteĩ kuimbaʼe ipyʼapotĩ ha heko porãva, okyhyjéva Ñandejáragui ha ndojeheʼáiva mbaʼe vaíre’ (Job 1:8). Añetehápe, Job oikovaʼekue Ñandejára oipotaháicha.

8 Satanás heʼi Job ndoserviriha Ñandejárape ohayhúgui chupe. Heʼi Jehovápe: ‘Ndépa neremopuʼãi peteĩ múro ijerére, hóga ha opa mbaʼe oguerekóvare? Opa mbaʼe ojapóva revendesi ha hymbakuéra iñasãi opárupi. Péro epokomína opa mbaʼe oguerekóvare ha rehecháta mbaʼéichapa nemaldesi nde rovaitépe’ (Job 1:10, 11).

9. Mbaʼéichapa Jehová ombohovái pe desafío Satanás ojapovaʼekue, ha mbaʼérepa?

9 Satanás heʼivaʼekue Job oserviha Ñandejárape umi mbaʼe omeʼẽvare chupe. Heʼi avei ojejopy vaíramo Jóbpe oñemoĩtaha Ñandejárare. Mbaʼéichapa Jehová ombohovái Satanáspe odesafiahaguére chupe? Oñeʼẽ vai haguére Job rehe, Jehová oheja Satanás ojopy vai chupe. Upéicha ojekuaa porãta ohayhúpa Job Ñandejárape.

MBAʼÉICHAPA OJEPROVA JÓBPE?

10. Mbaʼeichagua jejopy vaírepa ohasa Job, ha mbaʼépa ojapo?

10 Satanás nohaʼarõi omoĩ hag̃ua Jóbpe heta jejopy vaípe. Primero, oñemonda chugui hymbakuéra, ha umi hembýva katu ojejuka. Avei, haimete ojejukapa hembiguaikuérape. Koʼã mbaʼe haimete oheja chupe mbaʼeveʼỹre. Upe rire, oiko peteĩ desgrásia, omano umi diez Job raʼykuéra peteĩ torméntape. Upéicharõ jepe, ‘Job ndopekái, ha ndeʼíri mbaʼeve ivaíva Ñandejárare’ (Job 1:22).

11. a) Mbaʼépa Satanás heʼive Job rehe, ha mbaʼépa Jehová oheja Satanáspe ojapo? b) Mbaʼéichapa Job ombohovaivaʼekue imbaʼasy vaiete?

 11 Satanás ndopytuʼúi. Oiméne haʼe oimoʼã Job ogueropuʼakáramo jepe ojepeʼahague chugui umi mbaʼe oguerekóva, umíva apytépe hembiguái ha itaʼyrakuéra, oñemoĩtaha Ñandejárare oúramo hasy. Upévare, Jehová oheja Satanás ombohasy Jóbpe peteĩ mbaʼasy ivai ha oporombojeguarúvape. Péro ni upéicharõ Job ndohejái ijerovia Ñandejárare. Upéva rangue, haʼe heʼi porã: ‘Amano meve ndahejamoʼãi che jerovia!’ (Job 27:5).

Jóbpe oñemeʼẽvaʼekue heta mbaʼe porã ojerovia meme haguére Ñandejárare

12. Mbaʼéichapa Job ombohovái pe desafío Satanás ojapovaʼekue?

12 Job ndoikuaaivaʼekue umi mbaʼe vai ouha Satanásgui. Ndoikuaáigui umi mbaʼe Satanás heʼivaʼekue odesafiárõ guare Jehovápe, Job okyhyje oúrõ g̃uarã Ñandejáragui umi mbaʼe vai ohasáva (Job 6:4; 16:11-14). Upéicharõ jepe, haʼe ndohejaivaʼekue Jehovápe, ojerovia meme vaʼekue hese. Upéicha, ojehecha Satanás ijapuha heʼírõ guare hese oserviha Ñandejárape omeʼẽgui chupe heta mbaʼe.

13. Mbaʼépa oiko Job ojeroviahaguére Jehováre?

13 Job jerovia rupive Jehová ikatuvaʼekue ombohovái porã pe desafío Satanás ojapovaʼekue. Job añetehápe haʼevaʼekue Jehová amígo ha upévare ovendesi chupe (Job 42:12-17).

MBAʼÉICHAPA ÑANDERUPYTY PE DESAFÍO SATANÁS OJAPOVAʼEKUE

14, 15. Mbaʼérepa ikatu jaʼe pe desafío ojapovaʼekue Satanás ohupytyha opa yvyporakuérape ndahaʼéi Jóbpe añónte?

14 Pe Satanás heʼivaʼekue Ñandejárape Job jeroviáre, ndahaʼéi hese añónte heʼíva. Ñandéve avei ñanderupyty. Ko mbaʼe ojehecha porã Proverbios 27:11-pe: ‘Nearandúkena, che raʼy, ha chembopyʼarory, ikatu hag̃ua ambohovái pe cherehe oñembohory vaívape’. Ko mbaʼe ojehai heta áño Job omano riréma, ha ohechauka Satanás oñembohoryha gueteri Ñandejárare ha oñeʼẽ vai isiervokuérare. Jaikóramo Jehová oipotaháicha, ñaipytyvõta oñembohovái hag̃ua umi  japu vai heʼíva Satanás, ha upéicha ñambopyʼarorýta Ñandejárape. Mbaʼépa nde ere ko mbaʼépe? Rekambiátaramo jepe nde rekove, ajépa iporãite vaʼerã ikatúramo reipytyvõ oñembohovái hag̃ua umi japu Satanás heʼivaʼekue?

15 Eñatendemi mbaʼépa heʼi Satanás: ‘Opa mbaʼe peteĩ kuimbaʼe oguerekóva omeʼẽta hekove rehehápe’ (Job 2:4). Heʼívo ‘peteĩ kuimbaʼe’, Satanás ohechauka oñeʼẽha opa yvyporakuérare, ndahaʼéi Job rehe añónte. Ko mbaʼe iñimportánte ñanemanduʼa. Satanás otaky pe jerovia nde reguerekóvare. Haʼe oipota ñamboyke Ñandejárape jahasa asy jave ha jaheja pe tape porã. Mbaʼéichapa ojapo ko mbaʼe?

16. a) Mbaʼépa oiporu Satanás omboyke hag̃ua hentekuérape Ñandejáragui? b) Mbaʼéichapa Satanás ikatu oiporu koʼã mbaʼe ñanderehe?

16 Jahechahaguéicha pe kapítulo 10-pe, Satanás oiporu heta mbaʼe omboyke hag̃ua yvyporakuérape Ñandejáragui. Haʼe ikatu oataka ‘peteĩ león pochýicha, ohekáva omokõ hag̃ua oimeraẽvape’ (1 Pedro 5:8). Upéva, jahecha oĩ vove peteĩ amígo, ñande rogaygua térã ótro ndoipotáiva jastudia la Biblia, ha jajapo pe ñaaprendéva (Juan 15:19, 20). * Avei, Satanás ‘oikohína peteĩ ánhel omimbipávaramo’ (2 Corintios 11:14). Upéicha, pe Diablo ikatu oiporu heta mbaʼe ñanembotavy hag̃ua ndoipotáigui jaiko Ñandejára oipotaháicha. Haʼe ikatu avei ñanemokangy, oimoʼãuka rupi ñandéve ndaikatumoʼãiha ñambovyʼa Ñandejárape (Proverbios 24:10). Oikóramo jepe chugui peteĩ ‘león pochy’ térã pe ‘ánhel omimbipáva’, Satanás desafío nokambiái: heʼi jahasa vove provléma térã tentasión rehe, jahejataha Ñandejárape. Mbaʼéichapa ikatu ñambohovái ko mbaʼe heʼíva ha jahechauka jajeroviaha Ñandejárare, Job ojapohaguéicha?

 JAJAPO ÑANDEJÁRA OJERURÉVA

17. Mbaʼépa ñanemomyivaʼerã jajapo hag̃ua Jehová ojeruréva ñandehegui?

17 Ikatu ñambohovái pe desafío Satanás ojapovaʼekue jaikóramo Ñandejára oipotaháicha. Mbaʼéichapa ikatu jajapo upéva? La Bíbliape heʼi: ‘Rehayhuvaʼerã Ñandejára Jehovápe nde pyʼaite guive, ha opa ne álma ha ne mbaretekue reheve’ (Deuteronomio 6:5). Jahayhuvévo Ñandejárape, jajaposevéta haʼe ojeruréva ñandehegui. Pe apóstol Juan ohaivaʼekue: ‘Kóva heʼise pe Ñandejárape jahayhu: jajapo umi mbaʼe ojeruréva’. Jahayhúramo Jehovápe ñande pyʼaite guive, jahecháta ‘umi mbaʼe ojeruréva ndaipohyiriha’ (1 Juan 5:3).

18, 19. a) Mbaʼe mbaʼépa Jehová ojerure ñandehegui? (Ehecha pe rrekuádro oĩva páhina 122-pe) b) Mbaʼéichapa jaikuaa Ñandejára ndojerureiha ñandehegui pe ikatuʼỹva jajapo?

18 Mbaʼépa Jehová ojerure ñandehegui? Umíva apytépe oĩ umi mbaʼe naiporãiva jajapo. Pór ehémplo, pe rrekuádro “ Ñamboyke umi mbaʼe Ñandejára ndaijaʼéiva”, oñeʼẽ koʼã mbaʼégui. Upépe jatopáta heta mbaʼe ojejapóva ha la Biblia heʼíva ivaiha. Ñepyrũrã ikatu ñaimoʼã naentéroi ivaiha. Péro jajepyʼamongeta rire umi téysto heʼívare, jahechakuaáta Jehová léi iporãveha. Ñakambia ñande rekove ikatu haʼe pe mbaʼe hasyvéva jajapo. Péro, jaiko Ñandejára oipotaháicha katuete ñanembovyʼáta (Isaías 48:17, 18). Ha upéva ñande ikatu jahupyty. Mbaʼérepa jaʼekuaa upéva?

19 Jehová arakaʼeve ndojeruréi ñandehegui umi mbaʼe ikatuʼỹva jajapo (Deuteronomio 30:11-14). Haʼe oikuaa porãve ñandehegui mbaʼépa ikatu jajapo ha moõite pevépa (Salmo 103: 14). Avei Jehová ikatu ñanemombarete jajapo hag̃ua pe haʼe ojeruréva. Pe apóstol Pablo ohaivaʼekue: ‘Ñandejára ifiél, ha ndohejamoʼãi peñetenta ikatuʼỹ hag̃uáicha pendepuʼaka, péro pe tentasión reheve omeʼẽta avei peẽme mbarete pendepuʼaka hag̃ua hese’ (1 Corintios 10:13). Ñaaguanta hag̃ua, Jehová ikatu omeʼẽ ñandéve ‘pe puʼaka  ndoúiva ñandehegui’ (2 Corintios 4:7). Ohasa rire heta pruévare, Pablo heʼivaʼekue: ‘Opa mbaʼerã aguereko puʼaka oĩgui pe chemombaretéva’ (Filipenses 4:13).

ÑAMOHEÑÓI ÑANDE REKOVÉPE UMI MBAʼE PORÃ ÑANDEJÁRA OHAYHÚVA

20. Mbaʼépa Ñandejára oipota ñamoheñói ñande rekovépe, ha mbaʼérepa ñaikotevẽ koʼã mbaʼe?

20 Katuete jajapo hag̃ua Jehová oipotáva ndahaʼeivaʼerã ñamboykénteva umi mbaʼe haʼe ndaijaʼéiva. Tekotevẽ avei  jahayhu umi mbaʼe haʼe ohayhúva (Romanos 12:9). Ajépa javyʼa umi opensa, ohayhu ha omombaʼéva ndive ñande ñamombaʼéva? Jehová avei. Upéicharõ, ñaaprendevaʼerã jahayhu umi mbaʼe Jehová ohayhúva. Koʼã mbaʼégui oñeñeʼẽ pe Salmo 15:1-5-pe, upépe heʼi mávapepa Ñandejára oguereko iñamígoramo. La Biblia heʼi Jehová amigokuéra omoheñói umi mbaʼe oñehenóiva “fruto del espíritu”. Umíva haʼe: ‘mborayhu, vyʼa, pyʼaguapy, ñehaʼarõkuaa, mbaʼeporã, pyʼaporã, jerovia, pyʼarory ha jejokokuaa’ (Gálatas 5:22, 23).

21. Mbaʼépa ñanepytyvõta ñamoheñói hag̃ua ñande rekovépe umi mbaʼe porã Ñandejára ohayhúva?

 21 Jalee ha jastudia meméramo la Biblia ñanepytyvõta ñamoheñói hag̃ua ñande rekovépe koʼã mbaʼe porã Ñandejára ohayhúva. Ha ñaaprendevévo Ñandejára ojeruréva ñanepytyvõta ñapensa hag̃ua Jehová opensaháicha (Isaías 30:20, 21). Jahayhuvévo Jehovápe jaikosevéta haʼe oipotaháicha.

22. Mbaʼépa jahupytýta jaikóramo Ñandejára oipotaháicha?

22 Jaiko hag̃ua Jehová oipotaháicha, ñañehaʼãvaʼerã. La Biblia heʼi jajapo jave umi kámbio ñande rekovépe haʼetévaicha jaipeʼáva ñande reko tuja ha ñamonde peteĩ ipyahúva (Colosenses 3:9, 10). Péro umi mbaʼe Jehová ojerurévagui, pe salmísta ohaivaʼekue: ‘umi ojapóva ohupytýta tuicha mbaʼe porã’ (Salmo 19:11). Ha ñande jaikóramo Ñandejára oipotaháicha jahupytýta avei heta mbaʼe porã. Avei ñambohováita pe desafío Satanás ojapovaʼekue ha ñambovyʼáta Jehovápe.

^ párr. 16 Ko mbaʼe ndeʼiséi umi oñemoĩva nderehe katuete oĩha Satanás poguýpe. Péro, Satanás haʼe ko sistéma jaikoha jára, ha ko múndo oĩ ipoguýpe (2 Corintios 4:4; 1 Juan 5:19). Upévare, jaikóramo Ñandejára oipotaháicha naentéroi ohecha porãta, ha oĩta umi oñemoĩva ñanderehe.