Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Mbaʼépa añetehápe omboʼe la Biblia?

 KAPÍTULO 19

Jaiko Ñandejára mborayhúpe

Jaiko Ñandejára mborayhúpe
  • Mbaʼépa heʼise jahayhu Ñandejárape?

  • Mbaʼéichapa ikatu jaiko Ñandejára mborayhúpe?

  • Mbaʼépa omeʼẽta Jehová umi oikóvape imborayhúpe?

Ndépa rehekáta Jehovápe nemoʼã hag̃ua koʼã tiémpo ijetuʼúvape?

1, 2. Moõpa ikatu jatopa koʼág̃a peteĩ lugár ñañemoʼã hag̃ua?

EPENSAMI resẽha reguata neaño ha pe ára oñepyrũ sapyʼa iñypytũmba. Upeichaháguinte overa ha tuichaicha osunu, ha upéi oky tuichaiterei. Nde redispara ha reheka moõpa ikatu reñemoʼã pe amágui. Ha upépe rehecha pe tape yképe peteĩ ogaʼi. Ndotykýi ha haʼete imbarete porãva. Ajépa revyʼaite retopahaguére peteĩ lugár koichagua!

2 Koʼág̃a jaikoñaína umi tiémpo ijetuʼúvape. Umi mbaʼe oikóva ko múndope ivaive ohóvo. Péro oĩ peteĩ lugár ikatuhápe ñañemoʼã ani hag̃ua oiko ñanderehe mbaʼeve ivaietereíva. Moõpa oĩ upéva? Jahecha mbaʼépa omboʼe la Biblia: ‘Che haʼéta Jehovápe: “Nde hína pe chemoʼãva ha pe lugár ajeroviaha, che Jára, nderehe ajeroviáta”’ (Salmo 91:2).

3. Mbaʼépa ikatu jajapo Jehová ñanemoʼã hag̃ua?

3 Epensami upévare! Jehová, ñande Apohare ha ko univérso Mburuvicha, ikatu oñangareko ñanderehe. Haʼe tuicha ipuʼakave oimeraẽ ojaposévagui mbaʼe vai ñanderehe. Ojehúramo jepe ñandéve mbaʼe  vai, Jehová ikatu omyatyrõmbaite. Mbaʼépa ikatu jajapo Jehová ñanemoʼã hag̃ua? Tekotevẽ jajerovia hese. Avei Ñandejára Ñeʼẽ heʼi ñandéve: ‘Peikókena Ñandejára mborayhúpe’ (Judas 21). Añetehápe, jaikovaʼerã Ñandejára mborayhúpe; jaguerekovaʼerã peteĩ amista iporãva ñande Ru yvagapegua ndive. Upéicha jajapóramo katuete haʼe oñangarekóta ñanderehe. Péro, mbaʼéichapa ikatu jaguereko pe amista Ñandejára ndive?

JAHECHAKUAA ÑANDEJÁRA ÑANDERAYHUHA HA ÑAMOMBAʼE UPÉVA

4, 5. Mbaʼéichapa ohechauka Ñandejára ñanderayhuha?

4 Jaiko hag̃ua Ñandejára mborayhúpe, tekotevẽ jahechakuaa mbaʼéichapa haʼe ohechauka ñandéve imborayhu. Ñapensami umi mbaʼe la Biblia omboʼévare ha ñaaprendevaʼekue ko lívrope. Ñande Apohare Jehová omeʼẽ ñandéve ko Yvy jaiko hag̃ua vyʼápe. Omyenyhẽ ñandéve tembiʼúgui, y, hetaiterei mbaʼe jaiporukuaáva ko yvýgui, mymbakuéra jahecharamóva ha umi lugár iporãmba jepévagui. Ñandejára avei ojapouka la Biblia ha omombeʼu pype mbaʼéichapa héra ha mbaʼeichaguápa haʼe. Avei, la Biblia heʼi ombouhague Itaʼýra ohayhuetéva ko Yvy ári, ha ohejahague ohasa asy ha omano ñanderehehápe (Juan 3:16). Upéicha omeʼẽ ñandéve peteĩ rregálo tuichaitereíva, peteĩ esperánsa ijojahaʼỹva ñane renonderãme g̃uarã.

5 Ko esperánsa odepende avei peteĩ mbaʼe Ñandejára ojapovaʼekuégui. Jehová omoĩma yvágape peteĩ goviérno, pe Rréino mesiániko. Ko Rréino oipeʼapotaitéma opa jehasa asy ha ojapóta ko Yvýgui peteĩ paraíso. Ajépa iporãite ko mbaʼe! Ikatúta jaiko pyʼaguapy ha vyʼápe opa ára g̃uarã (Salmo 37:29). Upe aja, Ñandejára ñanehekomboʼe jaiko porãve hag̃ua koʼág̃ama voi. Haʼe omeʼẽ avei ñandéve ambue rregálo: pe ñemboʼe, ikatu hag̃ua ñañeʼẽ hendive opa árape ha oimehápe. Koʼã mbaʼe oĩ umi ohechaukáva apytépe Ñandejára ohayhuha yvyporakuérape ha ñandéve avei.

6. Mbaʼéichapa ikatu jahechauka ñamombaʼeha Jehová mborayhu?

 6 Koʼág̃a tekotevẽterei ñañeporandu: “Mbaʼéichapa ahechaukáta amombaʼeha Jehová mborayhu?”. Heta oĩ heʼítava: “Ha tekotevẽ ahayhu avei Jehovápe”. Ndépa repensa avei upéicha? Jesús heʼivaʼekue pe mandamiénto tuichavéva haʼeha kóva: ‘Rehayhuvaʼerã Jehová nde Járape nde pyʼaite guive, ne álma ruguaite guive ha ne apytuʼũ mbytete guive’ (Mateo 22:37). Añetehápe, heta mbaʼére jahayhu Ñandejára Jehovápe. Péro heʼisépa jahayhu Jehovápe ñande pyʼaite guive, ñane álma ha ñane apytuʼũ reheve ñañandunteha ko mborayhu hese?

7. Jaʼéramo jahayhuha Ñandejárape, haʼépa upéva peteĩ mbaʼe ñañandúvante? Emyesakãmi.

7 La Biblia heʼiháicha, jahayhu Ñandejárape ndahaʼéi peteĩ mbaʼe ñañandúnteva. Ha tekotevẽramo jepe ñañandu ko mborayhu Jehováre, upéva omoñepyrũnte pe mborayhu añetehápe ñañanduvaʼerã hese. Hesakãve hag̃ua ñandéve, ikatu ñambojoja ko mbaʼére: jaʼuséramo peteĩ mansána, javyʼánepa oñemeʼẽramo ñandéve haʼỹinguénte? Nahániri, ajépa? Ha oñekotevẽramo jepe pe haʼỹingue opuʼã hag̃ua peteĩ mansána máta, ñande jaipota pe hiʼakue. Upéicha avei, pe mborayhu ñañandúva Jehováre: pe yva raʼỹicha heñói, okakuaa ha hiʼavaʼerã. La Biblia heʼi: ‘Kóva heʼise pe Ñandejárape jahayhu: jajapo umi mbaʼe ojeruréva; ha umi mbaʼe ojeruréva ndaipohýiri’ (1 Juan 5:3). Upéicha pe mborayhu añetegua Ñandejárare hiʼa porã vaʼerã, ojekuaavaʼerã umi mbaʼe jajapóvare (Mateo 7:16-20).

8, 9. Mbaʼéichapa ikatu jahechauka jahayhu ha jaagradeseha Ñandejárape?

8 Jahechauka jahayhuha Ñandejárape jajapóramo heʼíva iléi ha umi konsého haʼe omeʼẽva. Koʼã mbaʼe ndahasýi jajapo hag̃ua. Ipohyirangue ñandéve, Jehová léi ñanepytyvõ  jaiko hag̃ua vyʼápe (Isaías 48:17, 18). Jaikóramo Jehová heʼiháicha, jahechauka añetehápe ñamombaʼeha opa mbaʼe ojapovaʼekue ñanderehe. Ha ñambyasýramo jepe, ko múndope ndahetái oĩ ojapóva upéva. Ñande jaagradese ojejapóva ñanderehe, ndahaʼéi umi oikovaʼekuéicha Jesús oĩrõ guare ko Yvy ape ári. Peteĩ jave haʼe omongueravaʼekue diez leprósope, péro peteĩnte ojevy oagradese chupe (Lucas 17: 12-17). Katuete jajoguase kóvape, ndahaʼéi umi nueve ndoagradeseivaʼekuépe!

9 Upéicharõ, mbaʼe mandamiénto Jehová omeʼẽvapa tekotevẽ jajapo? Jahechámakuri ko lívrope. Péro jahecha jeýta mbovymi ñanepytyvõtagui jajapo hag̃ua Ñandejára heʼíva, ha jaiko hag̃ua imborayhúpe.

ÑAÑEMOAG̃UIVE JEHOVÁRE

10. Mbaʼérepa tekotevẽ jaguerekove konosimiénto Ñandejára Jehovágui?

10 Jaikuaa porã Jehovápe iñimportanteterei ñañemoa g̃uive hag̃ua hese. Ko mbaʼe ndopamoʼãi arakaʼeve. Ñapensami ñaimeha kaʼaguýpe, peteĩ pyhare roʼyeterei jave, ha jajatapyha jajepeʼe hag̃ua. Jahejátapa ogue ohóvo pe tata opaite peve? Nahániri. Katuetei ñamoĩta jepi jepeʼa pe tatápe ani hag̃ua ogue. Ndajajapóiramo upéva ikatu ñaneratã! Oñekotevẽháicha pe jepeʼáre hendy porã hag̃ua pe tata, upéicha avei oñekotevẽ pe ‘konosimiénto Ñandejáragui’ imbarete hag̃ua ñane mborayhu Jehováre (Proverbios 2:1-5).

Pe tata oikotevẽháicha oñeñangareko ani hag̃ua ogue, upéicha avei ñane mborayhu Jehováre oikotevẽ ñañangareko ani hag̃ua ogue

11. Mbaʼéichapa oñeñanduvaʼekue Jesús remimboʼekuéra ohendúvo chupe?

11 Jesús oipotavaʼekue hemimboʼekuéra ohayhu meme Jehovápe ha Iñeʼẽme, la Biblia. Oñemoingove jey rire, Jesús omyesakãvaʼekue mokõi hemimboʼépe umi profesía oĩva Ñandejára Ñeʼẽme, ha oñekumplíva hese. Ha mbaʼéichapa oñeñandu hikuái? Upe rire, haʼekuéra heʼi: ‘Nañañandúi piko raʼe ñane korasõ hendytarõguáicha haʼe oñeʼẽrõ guare ñandéve pe tapére, omyesakãmbaitévo ñandéve Ñandejára Ñeʼẽ?’ (Lucas 24:32).

12, 13. a) Mbaʼépa oiko pe mborayhúgui ojeguerekóva Ñandejára ha la Bíbliare? b) Mbaʼépa ikatu jajapo ani hag̃ua ikangy ñane mborayhu?

12 Ñañepyrũrõ guare jaikuaa mbaʼépa añetehápe omboʼe la Biblia, ajépa ñañanduvaʼekue avei ñane korasõ hendytarõguáicha henyhẽ rupi vyʼa, kyreʼỹ ha mborayhúgui Ñandejárare? Katuete upéicha vaʼekue. Ha heta oñeñanduvaʼekue avei upéicha. Koʼág̃a pe ijetuʼuvéva haʼe jaguereko meme pe mborayhu ha ñamombareteve. Ñande ndajaikoséi ko múndope ojeikoháicha. Jesús heʼimavaʼekue: “Hetágui pe mborayhu ikangy vaʼerã” (Mateo 24:12, Marandu Porã). Mbaʼépa ikatu jajapo ani hag̃ua ikangy ñane mborayhu Jehováre ha pe añetegua la Bíbliape oĩvare?

13 Jaikuaavevaʼerã Ñandejára Jehová ha Jesucrístogui (Juan 17:3). Jajepyʼamongetavaʼerã umi mbaʼe jaleévare Ñandejára Ñeʼẽgui, ha ñañeporandu: “Mbaʼépa kóva chemboʼe Jeho vágui? Mbaʼérepa ahayhuvevaʼerã Ñandejárape che pyʼaite guive, che apytuʼũ ha che álma reheve?” (1 Timoteo 4:15). Péicha jajepyʼamongetáramo, ñane mborayhu Jehováre ndoguemoʼãi arakaʼeve.

14. Mbaʼéichapa pe ñemboʼe ñanepytyvõ imbareteve hag̃ua ñane mborayhu Jehováre?

14 Ñane mborayhu Jehováre imbareteve avei ñañemboʼe meméramo chupe (1 Tesalonicenses 5:17). Pe kapítulo 17-pe, jahechákuri pe ñemboʼe haʼeha peteĩ rregálo ijojahaʼỹva oúva Ñandejáragui. Jahayhuvéta ñande rapichápe ñañeʼẽ meméramo hendive opa mbaʼégui. Upéicha avei ñane mborayhu Jehováre imbaretevéta ñañemboʼe meméramo chupe. Ñañehaʼãvaʼerã ñañeʼẽ chupe ñande pyʼaite guive, ani jarrepetínte pe jaʼéva ñañanduʼỹre. Ñañeʼẽvaʼerã Jehová ndive, peteĩ mitã oñeʼẽháicha itúva ohayhuetéva ndive. Ha katuete ñañeʼẽséta chupe rrespéto reheve, péro ndajakyhyjemoʼãi ñañeʼẽ hag̃ua chupe ñande pyʼaite guive (Salmo 62:8). Upéicha, jaadora hag̃ua Ñandejárape tekotevẽ jastudia la Biblia ñaneaño ha ñañemboʼe chupe ñande pyʼaite guive. Koʼã mbaʼe ñanepytyvõta jaiko hag̃ua Ñandejára mborayhúpe.

JAADORA ÑANDEJÁRAPE ÑANEMBOVYʼA

15, 16. Mbaʼérepa ñamombaʼevaʼerã pe predikasión Rréino rehegua peteĩ tesóroicha?

15 Jaadora hag̃ua Ñandejárape jastudia la Biblia ha ñañemboʼevaʼerã, koʼã mbaʼe jajapo jepi ñaneañohápe. Péro, koʼág̃a jahecháta peteĩ mbaʼe jajapóva ñaime jave ñande rapichakuéra ndive: ñañeʼẽ umi mbaʼe jagueroviávagui. Ndépa reñeʼẽma la Biblia omboʼévagui nde rapichakuéra ndive? Upéicharõ, rejapóma peteĩ mbaʼe iporãitereíva (Lucas 1:74). Ñamombeʼúvo jaikuaáva Ñandejára Jehovágui, jajapoñaína peteĩ tembiapo iñimportantetereíva oñemeʼẽvaʼekue opa kristiáno añeteguápe: japredika pe marandu porã Ñandejára Rréino rehegua (Mateo 24:14; 28:19, 20).

16 Pe apóstol Pablo omombaʼetereígui ohenói ko  tembiapópe peteĩ tesóro (2 Corintios 4:7). Ñañeʼẽ ñande rapichápe Ñandejára Jehová ha ipropósitogui iporãve oimeraẽ tembiapógui. Upéicha, ñambaʼapo rupi pe Patrón ijojahaʼỹvape g̃uarã, ha omeʼẽ rupi ñandéve umi mbaʼe iporãvéva. Japredikávo ñaipytyvõ umi hénte ipyʼapotĩvape oñemoag̃ui  hag̃ua ñande Ru yvagapeguáre, ha oike hag̃ua pe tape oporoguerahávape jeikove opaʼỹvape. Oĩnepa peteĩ tembiapo ñanembovyʼavéva? Avei, ñañeʼẽvo Jehová ha Iñeʼẽgui, imbareteve ñande jerovia ha ñane mborayhu hese. Ha Jehová oguerohory umi mbaʼe ñañehaʼãva jajapo (Hebreos 6:10). Upéicharõ, ñambaʼapo meme ko tembiapópe ñanepytyvõ jaiko hag̃ua Ñandejára mborayhúpe (1 Corintios 15:58).

17. Mbaʼérepa ojepredikavaʼerã oñehaʼarõʼỹre?

17 Tekotevẽ ñanemanduʼa pe predikasión Rréino rehegua ojejapovaʼerãha oñehaʼarõʼỹre. La Biblia heʼi: ‘Epredika pe ñeʼẽ, aníke rehaʼarõ’ (2 Timoteo 4:2). Mbaʼérepa ojejapovaʼerã ko tembiapo oñehaʼarõʼỹre koʼág̃ama voi? Ñandejára Ñeʼẽ heʼígui ñandéve: ‘Hiʼag̃uíma Jehová ára guasu. Hiʼag̃uíma, ha pyaʼeterei ouhína’ (Sofonías 1:14). Upeichaite, hiʼag̃uimbaitéma pe ára Jehová ohundipa hag̃ua ko sistéma jaikoha. Yvyporakuéra oikotevẽ oikuaa ko mbaʼe! Ohechakuaavaʼerã koʼág̃ama voi oñemoĩvaʼerãha Jehová poguýpe. Pe fín ‘ndotardamoʼãi’ (Habacuc 2:3).

18. Mbaʼérepa ojehechavaʼerã jaadoraha Jehovápe umi kristiáno añetegua ndive?

18 Jehová oipota ojehecha jaadoraha chupe umi kristiáno añetegua ndive. Upévare Iñeʼẽme heʼi: “Ñañehaʼãkena ojuehe ñañomokyreʼỹ hag̃ua mborayhu ha tembiapo iporãvape, jahejaʼỹre ñane rreunión, oĩháicha umi péicha ojepokuaáva, ñañomokyreʼỹ uvei, koʼýte koʼág̃a pehechámarõ hiʼag̃uimaha upe ára” (Hebreos 10:24, 25). Ñañembyaty vove ñane irũnguéra ndive umi rreunionhápe, ikatu ñamombaʼeguasu ha jaadora Ñandejára jahayhuetévape. Avei ñañomombarete ha ñañomokyreʼỹ.

19. Mbaʼépa ikatu jajapo ñamombarete hag̃ua pe mborayhu oĩva kongregasiónpe?

19 Jajeheʼávo umi Jehovápe oadoráva ndive, ñamombarete pe mborayhu ha pe amista oĩva pe kongregasiónpe. Tekotevẽ jahecha pe iporãva ñande rapichakuérare, Jehová ojapoháicha ñanderehe. Ani ñaimoʼã ñane ermanokuéra  ndojavymoʼãiha. Ñanemanduʼavaʼerã jakakuaa joavyha espiritualménte, ha enterove jajavyha (Colosenses 3:13). Jahekavaʼerã ñane amigorã umi añetehápe ohayhúva Jehovápe, ha jahecháta mbaʼeichaitépa jakakuaa espiritualménte. Upéicha, jaadora Jehovápe ñane ermáno ha ermána espirituál ndive ñanepytyvõta jaiko hag̃ua Ñandejára mborayhúpe. Jahecháta koʼág̃a mbaʼépa Jehová omeʼẽ umi oadora memévape chupe ha oikóva imborayhúpe.

ÑAÑEHAʼÃ JAHUPYTY PE ‘TEKOVE AÑETETÉVA’

20, 21. Mbaʼépa ‘pe tekove añetetéva’, ha mbaʼérepa iporãite ko mbaʼe ñaneraʼarõva?

20 Jehová omeʼẽ tekove umi oservi memévape chupe, péro mbaʼeichaguápa upe tekove? Opavave nunga jaʼéta jaikoveha, ikatúgui jarrespira, jakaru ha jayʼu. Ha javyʼa jave ikatu voi jaʼe, “kóicha katu jaiko porã!”. Péro la Biblia ohechauka mbaʼérepa ikatu jaʼe koʼág̃a ndaiporiha ni peteĩ añetehápe oikovéva.

Jehová oipota rehupyty ‘pe tekove añetetéva’. Rehupytýnepa?

21 Ñandejára Ñeʼẽ heʼi porã ñandéve ‘ñañakarama hatã hag̃ua pe tekove añetetévare’ (1 Timoteo 6:19). Koʼápe ‘pe tekove añetetéva’ heʼise pe tekove ñahaʼarõva. Ñandeperfékto vove, jaikovéta añetehápe, jaikótagui Ñandejára oipotahaguéicha iñepyrũme. Jaiko vove pe paraísope tesãime, pyʼaguapy ha vyʼápe, jaguerekóta ‘pe tekove añetetéva’, pe jeikove opaʼỹva (1 Timoteo 6:12). Ajépa iporãite koʼã mbaʼe ñaneraʼarõva?

22. Mbaʼéichapa ikatu ‘ñañakarama hatã pe tekove añetetévare’?

22 Mbaʼéichapa ikatu ‘ñañakarama hatã pe tekove añetetévare’? Oñeʼẽ mboyve upévare, pe apóstol Pablo heʼivaʼekue umi kristiánope ‘tombaʼapo iporãvape’ ha ‘toguereko heta mbaʼe pe tembiapo porãme’ (1 Timoteo 6:18). Upéicharõ, jahecha tekotevẽha jajapo umi mbaʼe jaikuaáva la Bíbliagui. Péro, heʼíparaʼe Pablo ñaganaha ‘pe tekove añetetéva’ jajapohaguére iporãva? Nahániri, ko mbaʼe porã ojehupyty  Ñandejára ‘pyʼaporã oñemereseʼỹva’ rupive (Romanos 5:15). Upéicharamo jepe, Jehová omeʼẽseterei ko mbaʼe porã umi oservi memévape chupe. Haʼe oipota jaguereko ‘pe tekove añetetéva’, pe tekove opaʼỹva, vyʼa ha pyʼaguapýpe. Peichagua tekove ohupytýta opa oikóva Ñandejára mborayhúpe.

23. Mbaʼérepa tekotevẽterei jaiko Ñandejára mborayhúpe?

23 Iporã ñañeporandu: “Aadorápa Jehovápe la Biblia heʼiháicha?”. Jajapóramo upéva káda día, jaguata porã ñaína. Ha jajeroviakuaa Jehová oñangarekotaha ñanderehe. Haʼe oñangarekóta ipuévlore oservíva chupe koʼã ára paha ijetuʼúvape. Avei Jehová koʼẽrõite ñanemoingéta imúndo pyahu iporãitévape. Mbaʼeichaitépa javyʼáta jahecha vove oiko koʼã mbaʼe! Ha javyʼaitéta avei jaiporavo porã haguére koʼã ára pahápe! Nde avei reiporavo porãramo koʼág̃a, rehupytýta ‘pe tekove añetetéva’, pe jeikove opaʼỹva Jehová oipotavaʼekue jaguereko.