Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Mbaʼépa añetehápe omboʼe la Biblia?

 INFORMASIÓN OĨVÉVA

Cena del Señor: Pe manduʼa omombaʼeguasúva Ñandejárape

Cena del Señor: Pe manduʼa omombaʼeguasúva Ñandejárape

KRISTIANOKUÉRAPE ojejerure ojapo hag̃ua pe Conmemoración Cristo ñemanógui. Kóvape oñehenói avei “cena del Señor” (1 Corintios 11:20). Mbaʼérepa iñimportantete ko mbaʼe? Arakaʼépa ha mbaʼéichapa ojejapovaʼerã?

Jesucristo omoñepyrũvaʼekue ko mbaʼe pe Pascua hudía pyharépe, áño 33-pe. Pe Pascua ojejapovaʼekue peteĩ javénte, pe catorce de Nisán, haʼéva peteĩ més hudío. Oikuaa hag̃ua hikuái arakaʼépa oñepyrũ pe més, umi hudío ohaʼarõvaʼerã primavérape, pe ára oguereko jave 12 óra kuarahy ha 12 óra pytũmby. Ha ko ára rire, oñepyrũvo pe jasy raʼy oñepyrũ avei pe més hérava Nisán. Ha catorce día haguépe hoʼa pe Pascua, pe kuarahy oike rire.

Upe pyhare, Jesús ofestehavaʼekue pe Pascua ijapostolkuéra ndive, ha osẽ rire Judas Iscariote, omoñepyrũ pe Cena del Señor. Ko séna opyta pe Pascua hudía rekovia, ha upévare ojejapovaʼerã káda áño peteĩ javénte.

Pe lívro hérava Mateo omombeʼu: ‘Jesús ojagarra peteĩ pán, ha oñemboʼe rire, ombojaʼo ha omeʼẽvo hembiguaikuérape heʼi: “Pejagarra, peʼu. Kóva heʼise che rete”. Avei ojagarra peteĩ kópa, ha oñemboʼe rire, omeʼẽ chupekuéra, heʼívo: “Peʼu chugui, opavave; pórke kóva heʼise ‘che ruguy pe pákto re hegua’, oñeñohẽtava heta rehehápe oñeperdona hag̃ua umi pekádo”’ (Mateo 26:26-28).

Oĩ oimoʼãva Jesús ojapohague pe pángui hoʼo, ha pe vínogui huguy. Péro Jesús retépe ndojehuivaʼekue mbaʼeve omeʼẽrõ guare pe pán. Upéicharõ, hoʼuparakaʼe umi apóstol Jesús roʼo ha huguy avei? Nahániri, upéva haʼevaʼerãmoʼã canibalismo (hoʼúva yvypóra roʼo), peteĩ mbaʼe Ñandejára léi okondenáva (Génesis 9:3,4; Levítico 17:10). Lucas 22:20-pe, Jesús heʼivaʼekue: ‘Ko kópa heʼise pe pákto pyahu ojejapóva che ruguy rupive, oñeñohẽtava pende rehehápe’. Oikópa añetehápe pe kópagui ‘pe pákto pyahu’? Upéva ndaikatúi, pe pákto haʼe peteĩ akuérdo, ndahaʼéi peteĩ mbaʼe ikatúva japoko.

Upévare pe pán ha pe víno ojeporúnte oñerrepresenta hag̃ua peteĩ mbaʼe. Pe pán orrepresenta Cristo rete iperféktova. Jesús oiporu peteĩ pán hembyvaʼekue pe Páscuagui, ha ojejapóva levaduraʼỹre (Éxodo 12:8). La Bíbliape pe levadúra ojeporu jepi orrepresenta hag̃ua pe pekádo. Upévare pe pán heʼise Jesús retekue iperféktova, omeʼẽvaʼekue ñanderehehápe. Pe hete ndoguerekoivaʼekue pekádo (Mateo 16:11, 12; 1 Corintios 5:6, 7; 1 Pedro 2:22; 1 Juan 2:1, 2).

Pe víno tínto orrepresenta Jesús ruguy, oñemeʼẽvaʼekue ojejapo hag̃ua pe pákto pyahu. Jesús heʼivaʼekue oñohẽtaha huguy ‘oñeperdona hag̃ua umi pekádo’. Upéicha rupi, oĩ yvyporakuéra ipotĩva Ñandejára renondépe ha oikéva hendive pe pákto pyahúpe (Hebreos 9:14; 10:16, 17). Ko pákto térã kontráto rupi umi 144.000 kristiáno ifiélva ikatu oho yvágape. Upépe chuguikuéra oikóta rréi ha saserdóte omeʼẽ hag̃ua opa mbaʼe porã yvyporakuérape (Génesis 22:18; Jeremías 31:31-33; 1 Pedro 2:9; Revelación 5:9, 10; 14:1-3).

Mávapa hoʼuvaʼerã pe pán ha pe víno ojeporúva pe Conmemoraciónpe? Umi oĩva pe pákto pyahúpe añoite, umi ohaʼarõva oho yvágape. Ñandejára espíritu sánto rupive oikuaa porã hikuái ojeporavohague oiko hag̃ua chuguikuéra rréi yvágape (Romanos 8:16). Haʼekuéra oĩ avei pe pákto Rréinope g̃uarã Jesús ndive (Lucas 22:29).

 Ha mbaʼépa ojapo umi ohaʼarõva oiko opa ára g̃uarã peteĩ paraísope ko Yvy ape ári? Jesús ojerurehaguéicha, oho hikuái pe Cena del Señor ojejapohápe ohendu hag̃uánte, ndahaʼéi hoʼu hag̃ua pe pán ha pe víno. Káda áño pe 14 de Nisán, kuarahy oike rire, testigos de Jehová ojapo pe Cena del Señor. Ndahetáiramo jepe ko múndope umi heʼíva ohotaha yvágape, ko mbaʼe iñimportanteterei enterove kristianokuérape g̃uarã. Upe jave iporã jajepyʼamongeta Ñandejára Jehová ha Jesucristo mborayhu tuichaitévare (Juan 3:16).