Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Mbaʼépa añetehápe omboʼe la Biblia?

 KAPÍTULO 17

Ñañemoag̃ui Ñandejárare ñemboʼépe

Ñañemoag̃ui Ñandejárare ñemboʼépe
  • Mbaʼérepa ñañemboʼevaʼerã?

  • Mbaʼépa jajapovaʼerã Ñandejára ñanerendu hag̃ua?

  • Mbaʼéichapa ombohovái Ñandejára ñane ñemboʼe?

‘Pe Ojapovaʼekue yvága ha yvy’ ohenduse ñane ñemboʼe

1, 2. Mbaʼérepa tuichaite mbaʼe pe ñemboʼe, ha mbaʼérepa tekotevẽ jaikuaa la Biblia omboʼéva chugui?

ÑAMBOJOJÁRAMO pe univérso tuichaitévare, ko Yvy michĩeterei. Ha Jehovápe g̃uarã ‘pe yvága ha yvy Apohare’, umi tetãnguéra haʼete peteĩ y resa otykýva peteĩ váldepe (Salmo 115:15; Isaías 40:15). Upéicharõ jepe, la Biblia heʼi: ‘Jehová oĩ opa umi chupe ohenóiva ypýpe, umi ohenóiva chupe añetegua reheve. Umi okyhyjéva chugui rembipota ojapóta, ha ohendúta chupekuéra osapukái asy jave’ (Salmo 145:18, 19). Epensami mbaʼépa heʼise koʼã mbaʼe. Ñande Apohare ipuʼakapáva oĩ ñande ypýpe ha ñanerendúta ‘ñahenóiramo chupe añetegua reheve’. Ajépa tuichaite mbaʼe ñañemboʼe Ñandejárape!

2 Péro, jaipotáramo Jehová ñanerendu, ñañemboʼevaʼerã chupe haʼe oipotaháicha. Ha mbaʼéichapa jajapóta ko mbaʼe ndajaikuaáiramo mbaʼépa heʼi la Biblia pe ñemboʼégui? Jaikuaavaʼerã upéva, pórke pe ñemboʼe ñanepytyvõ ñañemoag̃ui hag̃ua Jehováre.

MBAʼÉREPA ÑAÑEMBOʼEVAʼERÃ JEHOVÁPE?

3. Mbaʼérepa iñimportánte ñañemboʼe Jehovápe?

3 Iñimportánte ñañemboʼe Jehová voi ojerurégui ña ndéve jajapo hag̃ua upéva. Iñeʼẽme ñanemokyreʼỹ kóicha: ‘Ani pejepyʼapy mbaʼevére, upéva rangue, opa mbaʼépe, ñemboʼe ha jerure asy agradesimiénto reheve, peikuaauka Ñandejárape peikotevẽva; ha Ñandejára pyʼaguapy tuichavéva opa mbaʼe oñeimoʼãvagui oñangarekóta pene korasõ ha pene pensamiéntore Cristo Jesús rupive’ (Filipenses 4:6, 7). Katuete nañamboykesemoʼãi ko invitasión porãite ojapóva ñandéve pe Mburuvicha Tuichavéva ko univérsope.

4. Mbaʼéichapa pe amista jaguerekóva Jehová ndive imbaretevéta ñañemboʼe meméramo chupe?

4 Iñimportánte avei ñañemboʼe pórke jajapo meméramo upéva ñañemoag̃uivéta Jehováre. Umi oñoamigoitéva noñeʼẽi oñondive oikotevẽ javénte, upéva rangue oimeha árape oñeʼẽ hikuái oikuaaségui ojuehegui. Ha pe amista imbaretevéta omombeʼúramo ojupe umi mbaʼe opensáva, oipyʼapýva ha oñandúva hikuái. Upéicha avei pe amista jaguerekóva Ñandejára Jehová ndive. Ko lívro rupive reikuaáma heta mbaʼe la Biblia omboʼéva Jehovágui, mbaʼeichaguápa haʼe ha  mbaʼépa ojapóta. Avei reikuaáma chupe peteĩ persónaicha. Ha pe ñemboʼe rupive ikatu remombeʼu nde Ru yvagapeguápe repensáva ha reñandúva nde pyʼapýpe. Ha upéicha, reñemoag̃uivéta Jehováre (Santiago 4:8).

MBAʼÉPA OJEJERURE ÑANDEHEGUI?

5. Mbaʼérepa jaikuaa Jehová nohenduiha opa ñemboʼe ojejapóva?

5 Ohendúpa Jehová opa ñemboʼe ojejapóva? Jahechami mbaʼépa heʼivaʼekue umi Israelgua irrevéldevape pe proféta Isaías rupive: ‘Peñemboʼevéramo jepe nahendúi; pende po henyhẽ tuguy ñeñohẽgui’ (Isaías 1:15). Upéicharõ, jajapóramo pe Ñandejára ndoipotáiva, haʼe nohendumoʼãi ñane ñemboʼe. Péro ohendúta jajapóramo ojeruréva ñandehegui.

6. Ñandejára ohendu hag̃ua ñane ñemboʼe, mbaʼe raẽpa ojejerure ñandehegui, ha mbaʼéichapa ikatu jahechauka jaguerekoha?

6 Peteĩ mbaʼe ojejerure raẽva ñandehegui haʼe pe jerovia (Marcos 11:24). Pe apóstol Pablo ohaivaʼekue: ‘Jeroviaʼỹre ndaikatúi oñembovyʼa [Ñandejárape], pe oñemoag̃uíva Ñandejárare ogueroviavaʼerã haʼe oĩha ha omyengoviaha umi chupe oheka memévape’ (Hebreos 11:6). Péro jajerovia añete hag̃ua Ñandejárare ndahaʼeivaʼerã jaikuaánteva oĩha, ohendu ha okontestaha ñane ñemboʼe. Pe jerovia ojehechakuaavaʼerã umi mbaʼe ojejapóvare. Jahechauka porã vaʼerã ñande jerovia umi mbaʼe jajapóvare (Santiago 2:26).

7. a) Mbaʼérepa ñañemboʼevaʼerã Jehovápe rrespéto reheve? b) Mbaʼéichapa jahechauka ñaneumílde ha ñanesinseroha ñañemboʼévo?

7 Jehová ojerure avei ñandehegui ñaneumílde ha ñanesinséro hag̃ua ñañemboʼévo chupe. Ha heta mbaʼe jaguereko ñaneumílde hag̃ua ñañeʼẽ jave Jehovápe, ajépa? Oñeñeʼẽ jave peteĩ rréi térã presidénte ndive, ojejapo jepi tuicha rrespéto reheve, oñemombaʼégui pe posisión  oguerekóva. Upéicharõ, mbaʼeichaitépa ñamombaʼevevaʼerã ñañeʼẽ jave Jehová ndive (Salmo 138:6). Ha upéicha vaʼerã haʼégui pe ‘Ñandejára Ipuʼakapáva’ (Génesis 17:1). Ñane ñemboʼe ohechaukavaʼerã jaikuaaha mbaʼeichaitépa ñanemichĩ henondépe. Pe umilda ñanemomýita ñañemboʼe hag̃ua chupe ñande pyʼaite guive, jarrepeti meme rangue pe jaʼéva (Mateo 6:7, 8).

8. Mbaʼéichapa ikatu ñambaʼapo umi mbaʼe jajerurévare?

8 Ohendu hag̃ua ñane ñemboʼe Ñandejára ojerure avei ñambaʼapo mbarete hag̃ua umi mbaʼe jajerurévare. Pór ehémplo, jajeruréramo Jehovápe: ‘Emeʼẽ oréve ore rembiʼurã ko árape g̃uarã’, ñambaʼapo mbarete vaʼerã oimeraẽ tembiapo jatopávape (Mateo 6:11; 2 Tesalonicenses 3:10). Upéicha avei, jajeruréramo ñanepytyvõ hag̃ua peteĩ mbaʼe ñanekangyhápe, jajehekyivaʼerã umi mbaʼe ikatúvagui ñandereity (Colosenses 3:5). Jaikuaa rire koʼã mbaʼe oñekotevẽva ñañemboʼe hag̃ua, oĩ avei porandu ñemboʼe rehegua ñambohovaivaʼerã.

PORANDU OJEJAPÓVA PE ÑEMBOʼÉGUI

9. Mávapepa ñañemboʼevaʼerã, ha máva rupivépa?

9 Mávapepa ñañemboʼevaʼerã? Jesús omboʼevaʼekue idisipulokuérape oñemboʼe hag̃ua kóicha: “Ore Ru yvágape reiméva” (Mateo 6:9). Upéicharõ, ñañemboʼevaʼerã Ñandejára Jehovápe añoite. Péro Jehová oipota avei jahechakuaa pe posisión oguerekóva pe Itaʼýra peteĩ, Jesucristo. Jahechahaguéicha pe kapítulo 5-pe, Jehová ombouvaʼekue Jesúspe ko Yvy ape ári, ñandepeʼa hag̃ua pe pekádo ha ñemano poguýgui (Juan 3:16; Romanos 5:12). Avei, oiporavo chupe haʼe hag̃ua Saserdóte Guasu ha Hués (Juan 5:22; Hebreos 6:20). Upévare, la Biblia heʼi ñañemboʼevaʼerãha Jesús rupive. Haʼe voi heʼivaʼekue: ‘Che hína pe tape, pe añete ha pe tekove. Ndaipóri  og̃uahẽva che Ru rendápe ndahaʼéiramo che rupive’ (Juan 14:6). Ñane ñemboʼe oñehendu hag̃ua, ñañemboʼevaʼerã Jehovápe añoite ha Itaʼýra rupive.

10. Mbaʼérepa natekotevẽi ñañemoĩ peteĩ hendáicha ñañemboʼe hag̃ua?

10 Mbaʼéichapa ñañemoĩvaʼerã ñañemboʼe hag̃ua? Jehová ndeʼíri mbaʼéichapa ñamoĩvaʼerã ñande po térã ñande rete ñañemboʼe hag̃ua. La Biblia heʼi ikatuha ñañemoĩ heta hendáicha ñañemboʼe hag̃ua. Koʼãva apytépe ikatu: jaguapy, ñañakãity, ñañesũ térã ñañemboʼy (1 Crónicas 17:16; Nehemías 8:6; Daniel 6:10; Marcos 11:25). Pe mbaʼe iñimportantevéva, ndahaʼéi mbaʼéichapa ñañemoĩ ñanderecha hag̃ua ñande rapicha, síno pe jaguerekóva ñane korasõme. Upéicharõ, ikatu ñañemboʼe kirirĩhápe ha oimehápe, jajapo jave ñane rembiapo térã oiko jave peteĩ mbaʼe ñahaʼarõʼỹva. Ha avave ndohechakuaáiramo jepe ñañemboʼeha Jehová ñanerendu (Nehemías 2:1-6).

11. Mbaʼe mbaʼe ñandepyʼapýva rehépa ikatu ñañemboʼe?

11 Mbaʼe mbaʼérepa ikatu ñañemboʼe? La Biblia heʼi: ‘Tahaʼe haʼéva pe jajeruréva, oĩma guive oipotaháicha, [Jehová] ñanerendu’ (1 Juan 5:14). Upéicharõ, ikatu ñañemboʼe oimeraẽ mbaʼe iporãvare Ñandejárape. Ha oipotápa haʼe ñañemboʼe umi mbaʼe ñandepyʼapývare? Katuete oipota! Ñañemboʼe Jehovápe haʼete pe ñañeʼẽramoguáicha peteĩ ñane amigoite ndive. Ikatu ‘ñañohẽ ñane korasõ’ Ñandejárape, upéva heʼise ñamombeʼupaite chupe ñañandúva (Salmo 62:8). Avei iporã jajerure chupe espíritu sánto, ñanepytyvõtagui jajapo hag̃ua iporãva (Lucas 11:13). Ikatu jajerure avei ohechauka hag̃ua ñandéve mbaʼépa iporãve jajapo, ha ñanemombarete hag̃ua ñambohovái jave umi provléma (Santiago 1:5). Ha japekáramo, jajerurevaʼerã Ñandejára pe perdón Jesucristo sakrifísio rupive (Efesios 1:3, 7). Péro nañañemboʼeivaʼerã ñandejehénte. Ñañemboʼevaʼerã avei ñande rapicháre, umi ñande rogaygua ha ñane ermanokuérare (Hechos 12:5; Colosenses 4:12).

12. Mbaʼéichapa jahechaukáta ñamotenondeha Ñandejárape ñañemboʼe jave?

12 Ñañemboʼévo ñamotenondevaʼerã Jehovápe. Haʼe imbaʼeporãiterei ñanendive, upévare ñamombaʼeguasu ha jaagradese chupe ñandepyʼaite guive (1 Crónicas 29:10-13). Mateo 6:9-13-pe jatopa pe ñemboʼe Jesús ohejavaʼekue jaikuaa hag̃ua mbaʼéichapa ñañemboʼevaʼerã. Upépe haʼe omboʼe jajerure hag̃ua toñemomarangatu Ñandejára réra, térã tojeguereko tuicha mbaʼéramo. Upe rire ojejerure ou hag̃ua Ñandejára Rréino ha ojejapo hag̃ua hembipota yvy ape ári yvagapeguáicha. Ha Jesús oñeʼẽ rire koʼã mbaʼégui omotenondéva Jehovápe, imanduʼa umi mbaʼe ñandepyʼapývare. Ñande avei, ñamotenondéramo Ñandejárape ñane ñemboʼépe, jahechaukáta jajepyʼapyha ndahaʼéi ñandejehe añónte.

13. Ohechaukápa la Biblia mbaʼeichaitépa ipukuvaʼerã ñane ñemboʼe?

13 Ipukuvaʼerãpa ñane ñemboʼe? La Biblia ndeʼíri mbaʼeichaitépa ipukuvaʼerã ñane ñemboʼe, tahaʼe umi jajapóva ñaneaño térã atyhápe. Ikatu mbykyve ñañemboʼévo jakaru hag̃ua, ha ipukuve ñaneañohápe ñamombeʼu jave Jehovápe oĩva ñane korasõme (1 Samuel 1:12, 15). Péro Jesús okondenavaʼekue umi oñemombaʼeguasúvape ha oñemboʼe pukúva ojehechauka hag̃uánte (Lucas 20:46, 47). Koʼãichagua ñemboʼe Jehová nomombaʼéi. Upévare iñimportánte ñañemboʼe ñande pyʼaite guive. Upéicha jahecha tekotevẽramo ñane ñemboʼe ikatuha ipuku térã mbykyve.

Ñandejára ohendu ñane ñemboʼe oimeha árape

14. Mbaʼépa heʼise la Biblia ñanemokyreʼỹvo ‘peñemboʼe meméke’, ha mbaʼérepa iporãite ko mbaʼe?

 14 Mboy vésepa ñañemboʼevaʼerã? La Biblia heʼi: ‘peñemboʼe meméke’, ‘peñemboʼe mantéke’ ha ‘peñemboʼéke opa árape’ (Mateo 26:41; Romanos 12:12, 1 Tesalonicenses 5:17). Ko mbaʼe ndeʼiséi ñañemboʼetaha ára ha pyhare japytuʼuʼỹre. Heʼise uvei, ñañemboʼevaʼerãha opa árape jaagradese hag̃ua Jehovápe ipyʼaporã rehe ñanendive, ha jajerure chupe tohechauka ñandéve ñande raperã, tomeʼẽ ñandéve pyʼaguapy ha mbarete. Jehová oipota ñañemboʼe chupe ñaikotevẽ jave ha jaipotaháicha. Ajépa iporãite ko mbaʼe! Ha ñamombaʼéramo pe ñemboʼe, jatopáta heta oportunida ñañeʼẽ hag̃ua ñande Ru yvagapeguápe.

15. Mbaʼérepa jaʼevaʼerã “Amén” ñañemboʼepávo, tahaʼe ñaneaño térã atyhápe?

15 Mbaʼérepa jaʼevaʼerã “Amén” ñañemboʼepávo? Pe ñeʼẽ “Amén” heʼise “taupéicha”, “añete”. La Biblia ohechauka iporãha jaʼe “amén” ñañemboʼepávo, tahaʼe ñaneaño térã atyhápe (1 Crónicas 16:36; Salmo 41:13). Jaʼéramo “amén” ñañemboʼepávo ñaneañohápe, jahechauka ñañeʼẽhague ñande pyʼaite guive. Ha jaʼévo “amén” peteĩ atyhápe, tahaʼe ñande pyʼapýpe térã oñehendu hag̃uáicha, jahechauka jaguerohoryha pe ojeʼevaʼekue (1 Corintios 14:16).

MBAʼÉICHAPA OMBOHOVÁI ÑANDEJÁRA ÑANE ÑEMBOʼE?

16. Mbaʼépa ikatu ñahaʼarõ ñañemboʼévo Ñandejárape?

16 Añetehápepa Jehová ombohovái ñane ñemboʼe? Katuete ojapo upéva! Heta mbaʼére ikatu jajerovia pe ‘ñemboʼe Renduha’ ombohovaiha umi ñemboʼe ojapóva ipyʼaite guive millones yvyporakuéra (Salmo 65:2). Jehová ombohovái ñane ñemboʼe heta hendáicha.

17. Mbaʼérepa ikatu jaʼe Jehová oiporuha umi ánhel ha yvypórape ombohovái hag̃ua ñane ñemboʼe?

 17 Jehová oiporu umi ánhel ha umi yvypóra chupe oservíva ombohovái hag̃ua ñane ñemboʼe (Hebreos 1:13, 14). Oĩ heta oñemboʼevaʼekue Ñandejárape ontende hag̃ua la Biblia ha upe riremínte otopáma hesekuéra Ñandejára rembiguái. Koʼã mbaʼe ohechauka umi ánhel omoakãha pe predikasión (Revelación 14:6). Ha okontesta hag̃ua ñane ñemboʼe ñaikotevẽ jave, Jehová omomyikuaa peteĩ kristiánope ñanepytyvõ hag̃ua  (Proverbios 12:25; Santiago 2:16).

Ombohovái hag̃ua ñane ñemboʼe, Jehová ikatu omomýi peteĩ kristiánope ñanepytyvõ hag̃ua

18. Mbaʼéichapa oiporu Jehová ijespíritu sánto ha Iñeʼẽ ombohovái hag̃ua hembiguaikuéra ñemboʼe?

18 Jehová oiporu avei ijespíritu sánto ha Iñeʼẽ, la Biblia, ombohovái hag̃ua hembiguaikuéra ñemboʼe. Jajerurévo chupe ñanepytyvõ hag̃ua peteĩ provlémape, Haʼe ikatu ohechauka ñandéve pe tape ha ñanemombarete ijespíritu sánto rupive (2 Corintios 4:7). Ha jajerurévo chupe pytyvõ jaiporavokuaa hag̃ua, pyʼỹi okontesta ñandéve la Biblia rupive. Ikatu jatopa umi téysto ñanepytyvõtava jastudia jave la Biblia ñaneaño, térã jalee jave umi puvlikasión kristiána, umíva apytépe ko lívro. Avei umi konsého ñaikotevẽva ikatu ñahendu rreunionhápe, térã oñemoñeʼẽ jave ñandéve peteĩ ansiáno ojepyʼapýva ñanderehe (Gálatas 6:1).

19. Mbaʼérepa ñanemanduʼavaʼerã ñaimoʼãramo ñane ñemboʼe noñekontestaiha?

19 Sapyʼánte ikatu ñaimoʼã Jehová imbegueha okontesta hag̃ua ñane ñemboʼe, péro upéva ndeʼiséi haʼe ndaikatuiha okontesta. Ñanemanduʼavaʼerã Jehová ombohovaiha ñane ñemboʼe haʼe oipotaháicha ha iporãve jave. Haʼe oikuaa porãve ñandehegui mbaʼépa ñaikotevẽ ha mbaʼéichapa omeʼẽta ñandéve umíva. Haʼe oheja jepi ñande ‘jajerure’, ‘jaheka’ ha ‘ñambota’  meme (Lucas 11:5-10). Upéicha jajapóramo, jahechauka Ñandejárape mbaʼeichaitépa jaipota pe jajeruréva, ha ñande jerovia añeteha. Avei, Jehová ikatu okontesta ñandéve ha ndajahechakuaái upéva. Pór ehémplo, ñañemboʼévo chupe peteĩ provlémare, ikatu haʼe ndoipeʼái pe provléma, péro ñanemombarete ñaaguanta hag̃ua (Filipenses 4:13).

20. Mbaʼérepa jaiporu porã vaʼerã pe mbaʼe ijojahaʼỹva: pe ñemboʼe?

20 Mbaʼeichaitépa jaagradese ko univérso guasuete Apoharépe oĩhaguére ñande ypýpe, entéro ñande ñañemboʼéva chupe haʼe oipotaháicha (Salmo 145:18). Jaiporu porã vaʼerã ko mbaʼe ijojahaʼỹva: pe ñemboʼe. Upéva jajapóramo, javyʼáta ñañemoag̃uivévo Jehováre, pe ñemboʼe Renduha.