Ehecha oĩva pype

Ehecha menú secundario

Testígo de Jehová

guarani

Kárta omboúva Kuérpo Governánte 2017

Kárta omboúva Kuérpo Governánte 2017

Ore ermáno ha ermanakuéra rohayhuetéva:

Ojapóma 2.600 áñorupi proféta Ezequiel ohecha hague peteĩ visión osorprendetereíva chupe: Haʼe ohecha peteĩ kárro tuichaitereíva, ha la omaneháva Jehová, pe omandapáva ko univérsore. Ezequiel ohecharamoiterei mbaʼéichapa okuʼe ko kárro, pórke peteĩ rrájoicha ipyaʼe, ha ohoséramo ótro direksiónpe, natekotevẽi voi oho mbegueve ni ojere (Ezeq. 1:4, 9, 12, 14, 16-27).

¿Mbaʼépa ñanemboʼe ko visión? Jehová organisasión oĩva yvágape kontinuadoite okuʼeha. ¿Ha mbaʼépa ikatu jaʼe iñorganisasión oĩvare ko yvy ape ári? Umi mbaʼe ojehupyty vaʼekue pe áño de servísio ohasa vaʼekuépe ohechauka mbaʼeichaitépa ombaʼapo hína Jehová puévlo ko yvy ape ári.

Estados Unídospe, heta betelíta oĩva Broóklynpe ombaʼapo meme hína kuri ova hag̃ua pe Central Mundial pyahúpe, opytáva Wárwickpe, térã ótro edifísiope. Oĩ voi oñasignáva oservi hag̃ua de prekursór. Ha heta paíspe, umi betelíta ombaʼapo jejopy kuri omopuʼã, oarregla térã ouni hag̃ua peteĩ sukursál ótrondi. Oime vaʼerã peẽ napeikotevẽi raʼe peva ótro ládo, péro katuete oiméne pendeguápo raʼe Jehová servísiope.

Kuérpo Governánte ovyʼaiterei pendereheve ha omokyreʼỹeterei chupekuéra ohechávo mbaʼéichapa umi ermanokuéra oñehaʼãmbaite hína ojeadapta hag̃ua umi kámbio oikóvare Jehová organisasiónpe. Jaikuaaháicha, heta ermáno ova umi lugár oñekotevẽhápe puvlikadór. Oĩ katu opredikáva ótro idiómape térã oipuru umi método pyahu opredika hag̃ua. Ha heta ermáno oñehaʼã ombaʼapove Jehová servísiope. Avei entéro ermáno ifiélva, umíva apytépe umi ijedáva térã hasykatúva, odipara hína pe karréra ohupyty hag̃ua jeikove opaveʼỹva. Haʼekuéra ombaʼapo meme Jehová servísiope, ha péicha ohechauka hikuái Satanás ijapuetereiha (1 Cor. 9:24).

Ikatu peime segúro Jehová ohechapaiteha umi sakrifísio pejapóva peservi hag̃ua chupe (Heb. 6:10). Péicha pesegi hína Abrahán ha Sara ehémplo. Abrahán orekórõ guare mas de 70 áño, osẽ ihentekuérandi pe siuda de Úrgui ha oho mombyry upégui oiko hag̃ua Canaánpe. Upépe haʼe oiko óga kárpape 100 áñore, omano meve. ¡Ajépa ijaktitu porãite hikuái ojapo hag̃ua peichagua sakrifísio Jehová rehehápe! (Gén. 11:31; Hech. 7:2, 3).

¿Jarekópa avei ñande peichagua aktitu? Ore rohechakuaa peẽ pendefiél ha peñehaʼãmbaiteha pekumpli hag̃ua Jesús ojerure vaʼekue ñandéve. Haʼe heʼi vaʼekue: “Tapeho pemboʼe umi hénte opa tetãyguápe oiko hag̃ua chuguikuéra che disípulo; ha pevautisa Túva, Taʼýra ha espíritu sánto rérape” (Mat. 28:19).

Jesús heʼírõ guare “tapeho”, ohechauka jakuʼe ha ñambaʼapo meme vaʼerãha. Ha ajépa ñanembovyʼaite jahechávo hetaite mbaʼe porã ojehupyty hague pe áño de servísio ohasa vaʼekuépe. Ndaipóri oduda vaʼerã Jehová ovendesi ha oipytyvõ hague ojepredika hag̃ua opárupi pe notísia porã (Mar. 13:10).

Heta persóna oasepta hína pe mensáhe ñameʼẽva chupekuéra. Por ehémplo, pe áño pasádo jahupytýma 8.340.847 puvlikadór, ha káda mes ojejapo kómo promédio 10.115.264 estúdio bíblico. Péicha jahecha mbaʼéichapa pe kárro oĩva yvágape kontinuadoite okuʼeha, ¡ha peẽ upeichaite avei! Umi hénte oreko gueteri tiémpo ojesalva hag̃ua, upévare pesegíkena kyreʼỹme pejapo ko traváho porãite.

¡Upéicha rupi opyta porãiterei pe téxto ojelehíva áño 2017-pe g̃uarã! Ko téxto heʼi: “Ejerovia Jehováre ha ejapo iporãva” (Sal. 37:3). Jaservívo Jehovápe jajapo hína iporãva ha péicha jahechauka jajeroviaha hese. Nemanduʼákena nañaimeiha ñaneaño. Jesús opromete vaʼekue: “Ha ¡péina!, aiméta penendive opa ára, og̃uahẽ meve huʼãme ko múndo ára paha” (Mat. 28:20). ¡Haʼe katuete okumplíta ipromésa!

Aníkena penderesarái ko mbaʼégui: Jehová osegitaha ovendesi pe servísio porãite pejapóva hesehápe. Algúno ikatu ojapo heta mbaʼe Jehová servísiope, ótro katu saʼive, péro la iñimportánteva hína jajapopaite la ikatumíva ha ñandepyʼaite guive. Péicha jajapóramo, ñambovyʼaitereíta Jehovápe (2 Cor. 9:6, 7). Upévare, esegíkena eñemboʼe chupe, estudia Iñeʼẽ ha epredika meme. Rejapóramo koʼã mbaʼe, káda día rehayhuvéta chupe.

Satanás oikuaa porã “mbykypaitemaha itiémpo”, upévare ojapo ikatúva guive ani hag̃ua ñandefiél Jehovápe (Apoc. 12:12). Péro Satanás arakaʼeve ndaipuʼakamoʼãi ñanderehe japytáramo Jehová ykére (Sal. 16:8). Ore ningo pohayhueterei ha roagradeseterei peẽme orepytyvõ haguére koʼã ára pahápe rokumpli porã hag̃ua pe traváho oñenkarga vaʼekue oréve.

Pene ermanokuéra,

Cuerpo Gobernante de los Testigos de Jehová