Ehecha oĩva pype

Ehecha menú secundario

Ehecha oĩva pype

Testígo de Jehová

guarani

¡Ñandejára Rréino ogovernáma!

 KAPÍTULO 1

“Tou ne Rréino”

“Tou ne Rréino”

ÑAHESAʼỸIJÓTAVA

Mbaʼépa Jesús heʼi Ñandejára Rréinore

1, 2. ¿Mbaʼépa Jehová omanda umi mbohapy apóstolpe, ha mbaʼépa ojapo hikuái?

JEHOVÁ oñeʼẽramo nendive ha omanda ndéve rejapo hag̃ua peteĩ mbaʼe, ¿mbaʼépa rejapóne? Tahaʼe haʼéva upe ojeruréva, pyaʼeterei ningo rejapóta, ¿ajépa?

2 Koʼág̃a jahechami mbaʼépa oiko vaʼekue mbohapy apóstol rehe, ohasa riremi pe Páskua áño 32-pe guare (elee Mateo 17:1-5). Upérõ Pedro, Santiago ha Juan ojupi Jesús ndive peteĩ “sérro ijyvatévape”. Upépe ohecha hikuái peteĩ visión rupive mbaʼéichatapa Jesús ogoverna vove yvágape. Haʼekuéra ohecha avei Moisés ha Elías oñeʼẽha Jesús ndive. Umi apóstol opensa voi añetehápe oikoha upe ohecháva, upévare Pedro heʼi omopuʼãseha chupekuéra óga kárpa. Ha haʼe oñeʼẽ aja gueteri peteĩ arai ojahoʼi chupekuéra. Upévo oiko peteĩ mbaʼe ijojahaʼỹva. ¡Ohendu hikuái Jehová oñeʼẽvo yvágagui! Heʼi rire Jesús haʼeha itaʼýra, Jehová omanda umi apóstolpe: “Pehendúke chupe”. Haʼekuéra ojapo Ñandejára heʼíva, ohendu Jesús omboʼéva ha omokyreʼỹ hapichakuérape ojapo hag̃ua avei upéva (Hech. 3:19-23; 4:18-20).

Jesús oñeʼẽ meme vaʼekue Ñandejára Rréinore

3. ¿Mbaʼérepa Jehová oipotaite ñahendu Itaʼýrape, ha mbaʼépa iporã ñahesaʼỹijo?

3 Upe heʼi vaʼekue Jehová, ojeskrivi la Bíbliape ideprovécho hag̃ua ñandéve (Rom. 15:4). ¿Mbaʼérepa Jehová oipotaite ñahendu Itaʼýrape? Jesús oñeʼẽgui Itúva rérape. Haʼe oporomboʼe jave, katuete omombeʼu umi mbaʼe Itúva oipotáva jaikuaa (Juan 1:1, 14). ¿Mbaʼe témarepa oñeʼẽve rakaʼe Jesús? Haʼe oñeʼẽ meme Ñandejára Rréinore. Upéicha rupi iporãta ñande ñahesaʼỹijo ko mbaʼe iñimportantetéva. Ko Rréino oĩ yvágape, Jesús haʼe pe Rréi ha oĩta 144.000 ogovernátava hendive (Apoc. 5:9, 10; 14:1-3; 20:6). Péro primero jahechami mbaʼérepa Jesús oñeʼẽ meme vaʼekue Ñandejára goviérnore.

“Omyenyhẽva ñane korasõ ningo osẽ ñande jurúrupi”

4. ¿Mbaʼéichapa Jesús ohechauka vaʼekue omombaʼetereiha pe Rréino?

4 Jesús omombaʼeterei pe Rréino. ¿Mbaʼérepa jaʼekuaa upéva? Ñapensamíntena, oĩramo peteĩ mbaʼe iñimportánteva ñandéve g̃uarã, ñañeʼẽ meme hese, ¿ajépa? Jesús heʼi vaʼekue voi: “Umi mbaʼe omyenyhẽva ñane korasõ ningo osẽ  ñande jurúrupi” (Mat. 12:34). Haʼe oaprovecha entéro oportunida oñeʼẽ hag̃ua pe Rréinore. La Bíbliape oĩ umi lívro omombeʼúva Jesús rekovekue, ha umívape jatopa cien vése rasa oñeñeʼẽha pe Rréinore. Ha haimete enterove koʼã téxtope Jesús hína la oñeʼẽva. Haʼe opredika meme pe Rréino ha heʼi voi: “Aha vaʼerã ótro siudápe amombeʼu hag̃ua umi marandu porã oñeʼẽva Ñandejára Rréinore. Upearã ningo añembou vaʼekue” (Luc. 4:43). Oñemoingove jey rire chupe, Jesús osegi oñeʼẽ pe Rréinore hemimboʼekuérape (Hech. 1:3). Péicha jahecha haʼe omombaʼe hague ipyʼaite guive Ñandejára Rréino, upéicha rupi oñeʼẽ meme hese.

5-7. a) ¿Mbaʼérepa ikatu jaʼe Jehová omombaʼetereiha pe Rréino? Emoĩ peteĩ ehémplo. b) ¿Mbaʼéichapa jahechaukáta ñamombaʼeha Ñandejára Rréino?

5 Jehová omombaʼeterei avei pe Rréino. ¿Mbaʼérepa jaʼe upéva? Ñande ningo jaikuaa Jehová ombou hague Itaʼýra peteĩete ko yvy ape ári. Ha opa mbaʼe Jesús heʼi ha omboʼe vaʼekue ou Itúvagui (Juan 7:16; 12:49, 50). Avei Jehová hína pe ohaika vaʼekue Iñeʼẽme umi mbaʼe Jesús omboʼe ha ojapo vaʼekue oĩ aja ko yvy ape ári. ¿Mbaʼépa ohechauka ñandéve upéva?

Iporã káda uno ñañeporandu: “¿Amombaʼépa hína Ñandejára Rréino?”

6 Ñamoĩmi peteĩ ehémplo: epensami reviahataha ha rekargaha nde ao ne volsónpe. ¿Reguerahapaitétapa la erekóva? Nahániri. Reiporavóta guei umi reikotevẽkueténte ha ijátava ne volsónpe. Upéicha avei umi lívro oĩva la Bíbliape ha oñeʼẽva Jesús rekovekuére ojogua peteĩ volsónpe. Jehová nomoĩkái umívape opa mbaʼe Itaʼýra heʼi ha ojapo vaʼekue (Juan 20:30; 21:25). Upéva rangue, ijespíritu rupive ohaika umi mbaʼe ñanepytyvõtava ñantende hag̃ua maʼerãpa Jesús ou ko yvy ape ári ha mbaʼépa pe iñimportantevéva Jehovápe g̃uarã (2 Tim. 3:16, 17; 2 Ped. 1:21). Jaleévo Mateo, Marcos, Lucas ha Juan jahecha koʼã lívrope henyhẽha umi mbaʼe Jesús omboʼe vaʼekue pe Rréinogui. Upévare ikatu jaʼe Jehová omombaʼetereiha avei pe Rréino. Péva ohechauka ñandéve Jehová oipotaha jaikuaa porã mbaʼépa hína Igoviérno.

7 Upévare iporã káda uno ñañeporandu: “¿Amombaʼépa hína Ñandejára Rréino?”. Oimérõ upéicha, jaikuaaséta Jesús heʼíva ko goviérnore. Avei ñantendeséta mbaʼérepa iñimportánte pe Rréino, mbaʼépa ojapóta ha arakaʼépa oúta.

¿Mbaʼépa ojapóta pe Rréino ág̃a ou vove?

8. ¿Mbaʼéichapa pe padrenuéstro ohechauka iñimportanteha Ñandejára Rréino?

8 Koʼág̃a ñanemanduʼami pe padrenuéstrore. Ko ñemboʼépe Jesús oiporu mbovymi palávra ohechauka hag̃ua mbaʼérepa iñimportánte pe Rréino ha mbaʼépa ojehupytýta upéva rupive. Ko ñemboʼépe ojejerure siete kósa. Umi mbohapy oĩva tenondete oñeʼẽ Jehová rembipotáre. Heʼi toñemomarangatu héra, tou Irréino ha tojejapo hembipota yvy ape ári yvagapeguáicha (elee Mateo 6:9, 10). Koʼã mbaʼe oñekumplíta  hína oñondivepa. Jehová ojevaléta pe Rréinore ombotuicha hag̃ua héra ha ojejapo hag̃ua hembipota.

9, 10. a) ¿Mbaʼépa ojapóta pe Rréino ou vove? b) ¿Mbaʼe promésa oĩva la Bíbliapepa reipotave oñekumpli?

9 ¿Mbaʼépa ojapóta pe Rréino ou vove ko yvy ape ári? Ñañemboʼe jave: “Tou ne Rréino”, jajerure hína ko goviérno okambia hag̃ua heta mbaʼe. Pe Rréino ou vove omandapaitéta ko yvy tuichakuére. Upévo ohundíta opa mbaʼe vai oĩva ko múndope, ijapytépe yvyporakuéra goviérno, ha péicha oñepyrũta peteĩ múndo pyahu oĩháme hustísia (Dan. 2:44; 2 Ped. 3:13). Upéi ko yvýgui oikóta peteĩ hardín neporãva (Luc. 23:43). Upe tiémpope Ñandejára imanduʼáta umi omano vaʼekuére ha omopuʼã jeýta chupekuéra ojotopa hag̃ua ihentekuérandi (Juan 5:28, 29). Umi iñeʼẽrendúvagui oikóta yvypóra perfékto ha oikovéta vyʼápe opa ára g̃uarã (Apoc. 21:3-5). Ha Jehová oipota haguéicha iñepyrũ guive, ko yvýpe ojejapóta hembipota yvagapeguáicha. ¿Nahiʼãipa ndéve oñekumpli koʼã promésa oĩva la Bíbliape? Nemanduʼa vaʼerã reñemboʼe jave ou hag̃ua Ñandejára Rréino, rehechaukaha reipotaha oiko koʼã mbaʼe porãita.

10 Péro ko tiémpope jaiko gueteri umi yvypóra goviérno poguýpe ha ndaipóri hustísia ko múndope. Upéva ohechauka porãiterei neʼĩraha oñekumpli pe padrenuéstrope heʼíva ha ndouiha gueteri Ñandejára Rréino. Péro pe kapítulo oúvape jahecháta peteĩ notísia iporãitereíva. ¡Ñandejára Rréino oñepyrũma ogoverna yvágape! Koʼág̃a katu ñahesaʼỹijóta arakaʼépa pe Rréino oñepyrũ ogoverna yvágape ha arakaʼépa oúta. Upearã jahecha jeýta mbaʼépa Jesús heʼi rakaʼe koʼã mbaʼére.

¿Arakaʼépa oñepyrũ ogoverna Ñandejára Rréino?

11. ¿Mbaʼépa ontendeka vaʼekue Jesús idisipulokuérape?

11 Jesús disipulokuéra ningo ohaʼarõ vaʼekue pe Rréino oñepyrũ ogoverna upe tiémpope. Péro Jesús ontendeka chupekuéra upéva ndoikomoʼãiha upérõ (Hech. 1:6). Jahechamína mokõi ehémplo haʼe omombeʼu vaʼekue, peteĩva ikatu oime omombeʼu raʼe áño 31-pe ha pe ótro katu áño 33-pe.

12. ¿Mbaʼépa ohechauka pe ehémplo oñeʼẽva trígo ha ñanáre?

12 Pe ehémplo oñeʼẽva trígo ha ñanáre. (Elee Mateo 13:24-30.) Marzo térã abrílrupi áño 31-pe, Jesús omombeʼúne raʼe ko ehémplo ha upéi omyesakã idisipulokuérape (Mat. 13:36-43). Jahechami mbaʼépa heʼise ko ehémplo. Omano rire umi apóstol, pe Aña ou oñotỹ ñana pe trígo apytépe. Pe ñana orrepresenta hína umi kristiáno guaʼu, ha pe trígo katu “pe Rréino ñemoñare”, térã umi unhído. Upéi ojeheja pe trígo ha pe ñana okakuaa oñondive og̃uahẽ meve kosécha tiémpo. Upéva hína “pe múndo ára pahaite oñemoag̃uívo”. Oñepyrũvo pe kosécha tiémpo, oñembyaty pe ñana. Upéi oñembyaty pe trígo. Ko ehémplo ohechauka ñandéve pe  Rréino noñepyrũi hague ogoverna Jesús oĩrõ guare ko yvy ape ári, síno okakuaapa rire oñondive pe trígo ha ñana. Upéicharõ, pe kosécha tiémpo oñepyrũ áño 1914-pe.

13. ¿Mbaʼe ehémplopa oiporu Jesús ohechauka hag̃ua noñepyrũmoʼãiha ogoverna og̃uahẽmíre yvágape?

13 Pe ehémplo oñeʼẽva plátare. (Elee Lucas 19:11-13.) Jesús omombeʼu ko ehémplo áño 33-pe. Upérõ ningo última ves oho Jerusalénpe. Umi ohendu vaʼekue chupe oimoʼã haʼe oñepyrũtaha ogoverna og̃uahẽre Jerusalénpe. Péro ohechauka hag̃ua chupekuéra ofaltaha gueteri heta tiémpo pe Rréino ogoverna hag̃ua, Jesús oñekompara ‘peteĩ kuimbaʼére, osẽ vaʼekue “oho mombyry” ótro tetãme oiko hag̃ua chugui rréi’. * Jesús avei “oho mombyry”, haʼe oho yvágape. Upépe Itúva omeʼẽta chupe podér ogoverna hag̃ua. Péro Jesús oikuaa vaʼekue noñepyrũmoʼãiha ogoverna pe Rréinope og̃uahẽmíre yvágape. Upéva rangue, haʼe oguapy Ñandejára deréchape ha ohaʼarõ og̃uahẽ itiémpo. Jaikuaaháicha ohaʼarõ kuri heta áño oñepyrũ hag̃ua ogoverna (Sal. 110:1, 2; Mat. 22:43, 44; Heb. 10:12, 13).

¿Arakaʼépa oúta Ñandejára Rréino?

14. a) ¿Mbaʼéichapa Jesús ombohovái umi apóstol oporandu vaʼekue? b) ¿Mbaʼépa ohechauka pe profesía oñekumplíva 1914 guive?

14 Unos kuánto día Jesús omano mboyve, cuatro ijapóstol oporandu chupe: “¿Ha mbaʼépa oikóta ropilla hag̃ua nde reimemaha, ha ko múndo ára pahaite oñemoag̃uimaha?” (Mat. 24:3; Mar. 13:4). Upévo Jesús omombeʼu chupekuéra pe profesía jatopáva Mateo kapítulo 24 ha 25-pe. Haʼe omombeʼu  heta mbaʼe oikótava opárupi ko yvy ári ha oipytyvõtava ojepilla hag̃ua Jesús ‘oĩmaha’ térã oñepyrũmaha ipresénsia. Oñepyrũvo Jesús presénsia, oñepyrũ avei ogoverna pe Rréino yvágape. Ha ág̃a ou vove pe Rréino ko yvy ape ári og̃uahẽta huʼãme Jesús presénsia. Umi mbaʼe oiko vaʼekue 1914 guive, ohechauka upe áñope oñepyrũ hague oñekumpli pe profesía Jesús heʼi vaʼekue. * Upéicharõ upe áñope oñepyrũ Jesús presénsia ha pe Rréino oñepyrũ avei ogoverna yvágape.

15, 16. ¿Mávarepa oñeʼẽ Jesús heʼívo “umi hénte oikóva ko tiémpope”?

15 ¿Arakaʼépa oúta Ñandejára Rréino? Jesús nomombeʼúi arakaʼetépa (Mat. 24:36). Péro heʼi peteĩ mbaʼe ohechauka porãitereíva ñandéve hiʼag̃uimbaitemaha. Jesús heʼi pe Rréino ou mboyve “umi hénte oikóva ko tiémpope” ohecha vaʼerãha oñekumplívo pe profesía (elee Mateo 24:32-34). ¿Mávarepa oñeʼẽ heʼívo “umi hénte oikóva ko tiémpope”? Ñahesaʼỹijomína upe heʼi vaʼekue Jesús.

16 “Umi hénte oikóva ko tiémpope.” ¿Oñeʼẽpa raʼe Jesús umi ndojeroviáivare hese? Nahániri. Ñanemanduʼami mávapepa oñeʼẽ upérõ. Jesús omombeʼu pe profesía unos kuánto ijapóstolpe ‘oñemboja vaʼekue hendápe haʼeñoháme’ (Mat. 24:3). Upe tiémpope saʼíma ofalta kuri umi apóstolpe ojeporavo hag̃ua espíritu sánto rupive. Jahechami avei mbaʼépa heʼi Jesús oñeʼẽ mboyve ‘umi hénte oikóvare ko tiémpope’ (térã generación). Haʼe heʼi: “Pemañamínte pe ígo máta rehe: umi hakã pyahu ikyrỹi ha hoky jave, peẽ peikuaa hiʼag̃uimaha arahaku. Upéicha avei pehecha vove oikoha opa koʼã mbaʼe, peikuaáke pe Yvypóra Raʼy og̃uahẽmbaitemaha, oĩmaha pe okẽme”. Upéicharõ umi kristiáno unhído la ohechátava oñekumplívo pe profesía ha avei ohechakuaáta Jesús “og̃uahẽmbaitemaha, oĩmaha pe okẽme”. Péro umi ndojeroviáiva Jesús rehe ndohechakuaamoʼãi upéva. Péicha jahecha Jesús oñeʼẽvo ‘umi hénte oikóvare ko tiémpope’ oñeʼẽ hague umi unhídore.

17. ¿Mbaʼépa heʼise “generación” ha “opa koʼã mbaʼe”?

17 “Ni mbaʼevéicharõ ndohasamoʼãi oiko mboyve opa koʼã mbaʼe.” ¿Mbaʼéichapa oñekumplíta koʼápe heʼíva? Jaikuaa hag̃ua jahecha raẽ vaʼerã mbaʼéichapa ojeporu la Bíbliape pe ñeʼẽ “umi hénte oikóva ko tiémpope” (generación). Péva ojeporu jepi oñeñeʼẽ hag̃ua umi hénte oikóvare peteĩ tiémpope ha hekovekuéra ojupyty ndahaʼéirõ jepe ojoavegua. Ndaikatúi jaʼe arakaʼe pevépa oikovéta peteĩ generación, péro jaʼekuaa upe tiémpo ndaipukuiha ha og̃uahẽtaha huʼãme (Éxo. 1:6). Tekotevẽ avei jahecha mbaʼépa heʼise “opa koʼã mbaʼe”. Pévape oike opa mbaʼe ojeprofetisa vaʼekue oikotaha Jesús oĩ aja térã ipresénsiape. Upéva oñepyrũ 1914-pe ha opáta og̃uahẽ vove huʼãme pe “jehasa asy guasu” (Mat. 24:21).

18, 19. ¿Mávapa hína “umi hénte oikóva ko tiémpope”? ¿Mbaʼépa jahechakuaa ñantendévo upéva?

 18 Upéicharõ, ¿mávapa hína “umi hénte oikóva ko tiémpope” térã generación? Pévape oike mokõi grúpo de unhído. Pe primer grúpope oĩ umi unhído ohecha vaʼekue oñepyrũvo oñekumpli Jesús profesía 1914-pe. Haʼekuéra oikove aja gueteri oĩma ótro grúpo de unhído. Ko segundo grúpo apytégui oĩta mbovymi ohechátava oñepyrũvo pe jehasa asy guasu. Koʼã mokõi grúpo haʼe hína “umi hénte oikóva ko tiémpope” térã generación. *

19 Koʼág̃a oparupiete ojehecha mbaʼéichapa oñekumpli hína pe profesía ohechaukáva Jesús oĩmaha Rréiramo yvágape. Jahecha avei umi unhído oĩva upe generaciónpe, ijedamaha ohóvo. Ha Jesús heʼi kuri ko grupopegua oĩtaha oikovéva gueteri oñepyrũvo pe jehasa asy guasu. Péicha jahechakuaa koʼẽrõitéma outaha Ñandejára Rréino ha ogovernataha ko yvy. ¡Mbaʼeichaitépa javyʼáta jahecha vove oñekumpliha pe padrenuéstrope jajeruréva: “Tou ne Rréino”!

20. ¿Mbaʼépa ñahesaʼỹijóta ko lívrope, ha mbaʼépa jahecháta pe kapítulo oúvape?

20 Aníkena núnka ñanderesarái Jehová voi heʼi hague yvága guive Itaʼýrare: “Pehendúke chupe”. Ñande kristiáno tee jajaposeterei haʼe omandáva. Jaikuaaseve umi mbaʼe Jesús heʼi ha omboʼe vaʼekue Ñandejára Rréinore. Ko lívrope ñahesaʼỹijóta mbaʼépa ojapóma upe Rréino ha mbaʼépa ojapóta koʼẽrõitéma. Pe kapítulo oúvape jahecháta mbaʼe mbaʼépa oiko raʼe ko goviérno oñepyrũ mboyve ogoverna yvágape.

^ párr. 13 Ko kuimbaʼe ningo rréi familiare. Upévare umi ohendúva Jesúspe imanduʼáne raʼe Arquelao rehe, Herodes el Grande raʼy. Omano mboyve Herodes heʼi itaʼýra Arquelao ogovernataha hendaguépe. Péro oñepyrũ mboyve ogoverna, Arquelao oviaha raẽ mombyry Rómape pe mburuvicha guasu Augusto rendápe. Ha upépe oñemeʼẽ chupe autorida.

^ párr. 18 Omano rire pe último unhído oĩva pe primer grúpope, ojeporavo jeýramo ótro unhído, umíva ndahaʼevéima “umi hénte oikóva ko tiémpope” térã generación (Mat. 24:8).