Ehecha oĩva pype

Ehecha menú secundario

Ehecha oĩva pype

Testígo de Jehová

guarani

¡Ñandejára Rréino ogovernáma!

 KAPÍTULO 22

Pe Rréino ojapo Ñandejára rembipota ko yvy ape ári

Pe Rréino ojapo Ñandejára rembipota ko yvy ape ári

ÑAHESAʼỸIJÓTAVA

Pe Rréino okumplipaitéta Ñandejára opromete vaʼekue ñandéve g̃uarã

1, 2. a) ¿Mbaʼérepa hasy jepi ñapensa hag̃ua jaikotaha vyʼápe pe hardín neporãvape? b) ¿Mbaʼépa ñanepytyvõta jajerovia hag̃ua ko esperánsa oñekumplitaha?

PETEĨ ermáno kaneʼõnguére og̃uahẽ rreunionhápe. Ijetuʼu kuri chupe upe día. Ipatrón ojopyeterei hendive itravahohápe, ojepyʼapy pórke ndoikuaái ikatútapa omeʼẽ ifamíliape oikotevẽva, hiʼarive hembireko hasy oikóvo. Ohendúvo pe kántiko haʼete ipyʼaguapyvéva. Ovyʼa oĩ haguére salónpe iñermanokuérandi. Pe purahéi oñeʼẽ paraísore, opoko ikorasõre ha haʼete voi chupe oĩmava peteĩ hardín neporãvape. Pe ermánope ogustaiterei pe kántiko, ha opurahéi aja ifamília ykére oñandu pe esperánsa ombopiroʼyha chupe. Ivevyivéma pe kárga ojopy asy vaʼekue ikorasõ.

2 ¿Ojehúmavapa ndéve péicha? Opavave lénto ohasáma ko situasión rehe. Péro jaikuaa avei sapyʼánte ijetuʼuha ñandéve ñapensa koʼẽrõitéma jaikotaha vyʼápe pe hardín neporãvape. ‘Pe situasión ijetuʼu ha hasy jagueropuʼaka hag̃ua’ upévare haʼete voi mombyry oĩva ñandehegui pe paraíso (2 Tim. 3:1). ¿Mbaʼépa ñanepytyvõta jajerovia hag̃ua ko esperánsa oñekumplitaha? ¿Mbaʼéichapa jaikuaáta koʼẽrõite Ñandejára Rréino ogovernataha ko yvy tuichakuére? Ñambohovái hag̃ua koʼã porandu, jahecháta unos kuánto profesía oñekumpli vaʼekue Ñandejára puévlore yma. Upéi ñahesaʼỹijóta mbaʼéichapa umíva ha hetave profesía oñekumpli ñane tiémpope ha péicha omombarete ñande jerovia. Ipahápe jahecháta mbaʼéichapa umíva oñekumplíta amo gotyove.

¿Mbaʼéichapa Jehová okumpli ipromésa yma?

3. ¿Mbaʼe promésapa omombarete raʼe Ñandejára puévlope oĩrõ guare Babilóniape?

3 Epensami mbaʼéichapa oiko vaʼekue umi hudío ojegueraha vaʼekue Babilóniape yma. Oĩ heta okakuaa vaʼekue upépe, ha oiko asyeterei pórke umi vavilónio oñembohory hesekuéra ojerovia haguére Jehováre (Sal. 137:1-3). Upéicharamo jepe heta áñore oaguanta oreko rupi esperánsa. Jehová opromete chupekuéra oho jeytaha ivállepe Judápe. Avei heʼi oiko porãvetaha hikuái. Okompara voi pe yvy hardín de  Edén rehe. ¡Upéva ningo peteĩ paraíso vaʼekue! (Elee Isaías 51:3.) Koʼã promésa rupive Jehová omombarete ipuévlope ha oipytyvõ chupekuéra ani hag̃ua ipyʼamokõi ha oñekevranta. Jahechamína koʼã profesía.

4. ¿Mbaʼépa oasegura Jehová umi hudíope?

4 Ndaiporimoʼãi pelígro. Umi hudío ningo ndohomoʼãi kuri peteĩ hardín neporãvape. Upérõ ojapóma 70 áño haʼekuéra osẽ hague hetãgui ha avavéma ndoikovéi upépe. Oĩ umi núnka ndohechái vaʼekue pe lugár. Upe tiémpope umírupi oĩ vaʼekue heta león, jaguarete ha hetave mymba ñarõ. Oiméne umi túva oñeporandu: “¿Mbaʼéichaiko añangarekóta che rembireko ha che familiakuérare? ¿Mbaʼéiko oikopáta che rymba vaka ha che ovechakuéragui?”. Ndareíri ningo ojepyʼapy hikuái. Péro epensamíntena mbaʼeichaitépa oiméne oñeñandu porã hikuái ohendúvo Jehová promésa oĩva Isaías 11:6-9-pe (elee). Koʼã ñeʼẽ porãite oasegura umi hudíope ndojehumoʼãiha mbaʼeve chupekuéra ni hymbakuérape. Umi mymba ñarõ ndojukapamoʼãi umi vaka ni ovecha. Ndoapeligramoʼãi avavépe upévare ojeʼe pástonte hoʼutaha. Jehová oasegura ipuévlope ndoikomoʼãiha hesekuéra mbaʼeve ivaíva tahaʼe umi kaʼaguýre térã desiertoháre (Ezeq. 34:25).

5. ¿Mbaʼe profesíapa oasegura umi hudíope Jehová omeʼẽtaha chupekuéra hemikotevẽ?

5 Oĩta heta tembiʼu. Oime vaʼerã umi hudío oñekevranta avei ótra kósare. Por ehémplo umi túva ikatu oñeporandu: “¿Ikatúta piko upépe amantene che famíliape ha ameʼẽ chupekuéra oikotevẽva? ¿Moõiko roikóta? ¿Roiko porãvétapa, térãpa ikuentavénte ropyta Babilóniape?”. Jehová imbaʼeporã rupi omeʼẽ unos kuánto profesía ombopyʼaguapy hag̃ua chupekuéra. Opromete isiervokuérape oky porãtaha ikatu hag̃uáicha umi kokue oprodusi (Is. 30:23). ¿Orekótapa hikuái traváho ha hogarã? Jehová opromete: ‘Haʼekuéra omopuʼãta hogarã ha oikóta pype, oñotỹta parrál ha hoʼúta hiʼakue. Nomopuʼãmoʼãi óga ótro oiko hag̃uánte pype, ha noñemitỹmoʼãi ótro hoʼu hag̃uánte’ (Is. 65:21, 22, ÑÑB). Upéicharõ umi isrraelíta oiko porãitevéta hetãme, ndahaʼemoʼãi asy Babilóniape oiko haguéicha. Péro haʼekuéra oreko kuri heta provléma tuichavéva. Upévare voi ojegueraha chupekuéra Babilóniape. ¿Oñesolusionánepa umi provléma?

6. ¿Mbaʼérepa jaʼekuaa umi isrraelíta hasy hague? ¿Mbaʼépa opromete chupekuéra Jehová?

6 Ikatúta oĩ porã jey Jehovándi. Heta tiémpo ojegueraha mboyve Babilóniape Ñandejára puévlo oñepyrũ oñemomombyry Jehovágui, haʼete hasýva hikuái. Upévare proféta Isaías rupive Jehová heʼi ipuévlo hasyha, iñakã ha ikorasõ oĩ vaiha (Is. 1:5). Umi hudío haʼete sórdo ha siégo pórke nohenduséi Jehová oñemoñeʼẽrõ chupekuéra, ha ojesamboty ani hag̃ua haʼe ohesape chupekuéra haperã (Is. 6:10; Jer. 5:21; Ezeq. 12:2). Osegíramo upéicha oho jey rire hetãme, ¿mbaʼépa oikóta hesekuéra? Opyta vai jeýta ningo Ñandejárandi,  ¿ajépa? Péro ko promésa omeʼẽ chupekuéra esperánsa: ‘Upe árape umi nohendúiva ohendúta ko kuatiañeʼẽ; ha umi ndohecháiva ohecha porãta iñypytũha guive’ (Is. 29:18, ÑÑB). Upeichaite, Jehová heʼi omonguerataha ipuévlo oñarrepentívape. Péva heʼise oipytyvõtaha chupekuéra oñemoĩ porã jey hag̃ua hendive. Haʼekuéra iñeʼẽrendúramo, haʼe ohechaukáta chupekuéra moõrupipa oho vaʼerã ha ohesapéta haperã.

7. ¿Mbaʼéichapa Jehová okumpli opromete vaʼekue umi hudíope? ¿Mbaʼéichapa upéva omombarete ñande jerovia?

7 ¿Okumplípa Jehová ipromesakuéra? Si okumpli. Umi hudío oho jey hetãme ha oiko porã kyhyjeʼỹme. Haʼekuéra oreko heta hoʼu vaʼerã ha oiko porã jey Ñandejárandi. Jehová oñangareko hesekuéra ani hag̃ua umi tetã ipoderósova oĩva ijererekuéra oreko asy chupekuéra. Ndohejái avei umi mymba ñarõ ojukapa hymbakuéra. Umi hudío ohecha mbaʼéicha oñekumpli umi profesía oskrivi vaʼekue Isaías, Jeremías, Ezequiel ha hetave proféta. Péro oĩ peteĩ kumplimiénto tuichavéva haʼekuéra ndohechái vaʼekue. Upéicharõ jepe upe ohecháva omokyreʼỹ ha omombarete chupekuéra oikotevẽve jave. Ñande kásope iporã jajepyʼamongeta Jehová ojapo vaʼekuére pórke upéva omombaretéta ñande jerovia. Upe tiémpope tuichaiterei mbaʼe kuri umi profesía oñekumpli lája. Ñapensamíntena mbaʼeichaitépa ñañeñandúta ág̃a oñekumpli vove oparupiete ko yvy tuichakuére. Koʼág̃a jahechami Jehová ojapóva ñanderehehápe ko tiémpope.

¿Mbaʼéichapa Jehová oñepyrũma okumpli ipromesakuéra?

8. ¿Mbaʼérepa jaʼekuaa Ñandejára puévlo oikoha peteĩ tetãmente?

8 Ko tiémpope Ñandejára puévlo ndoikói peteĩ tetãmente. Péro umi unhído oúramo jepe diferénte tetãgui oiko chuguikuéra peteĩnte hérava “Israel Ñandejára mbaʼéva” (Gál. 6:16). Umi “ambue ovechakuéra” omoirũ umi unhídope. Koʼã mokõi grúpo oadora oñondivepa Jehovápe ha omotenonde haʼe omandáva. Upévare jaʼekuaa haʼeha ojovallegua, peteĩnte la hetãnguéra (Juan 10:16; Is. 66:8). Haʼekuéra ohecháma oñekumpliha hetaiterei promésa Jehová ojapo vaʼekue. Haʼete oĩmava hikuái pe paraísope. Jahechami koʼã promésa.

9, 10. a) ¿Mbaʼéichapa oñekumpli hína pe profesía oĩva Isaías 11:6-9-pe? b) ¿Mbaʼérepa jaʼekuaa Ñandejára puévlo oikoha pyʼaguapýpe?

9 Ndaipóri pelígro. Pe profesía oĩva Isaías 11:6-9-pe oñeʼẽ umi mymba ñarõ rehe ndoapeligráiva umi héntepe ni umi ótro animálpe. ¿Oñekumplípa ko profesía ko tiémpope? Si, péro ndahaʼéi umi animál rehe síno persónare. ¿Mbaʼéicha piko? Versíkulo 9 omombeʼu mbaʼérepa umi mymba ñarõ ndoapeligramoʼãvéima avavépe. Upépe heʼi: ‘Pe yvy henyhẽta Ñandejára arandúgui pe y omyenyhẽháicha pe mar’. ¿Ikatúpa jaʼe umi mymba ñarõ okambiataha oikuaa rire Ñandejárape? Nahániri, péro peteĩ persóna oikuaávo  Ñandejára Ijojahaʼỹvape, imánso pórke oñehaʼã ojogua Ñandejárape. Péicha ko profesía oñekumpli Jehová organisasiónpe. Pe Rréino poguýpe umi kristiáno oñehaʼã okambia ivuéno hag̃ua. Ojejokokuaave ha péicha oiko pyʼaguapýpe iñermanokuérandi.

10 Por ehémplo ko lívrope jahecháma kuri mbaʼérepa kristianokuéra ndohói vaʼerã gerrahápe ni noñentremetéi vaʼerã polítikare. Jahecha avei oĩha ñandepersegíva upévare. Ko múndope henyhẽ umi hénte oñorairõva, péro oĩ peteĩ puévlo tuicháva ndopartisipáiva mbaʼeveichagua ñorairõme. Ni oñeamenasa vaipáramo jepe chupekuéra ndojapomoʼãi upéva. ¡Ajépa jahecharamoite ko mbaʼe! Péva ohechauka porãiterei oñekumpliha pe profesía de Isaías oñeʼẽva pyʼaguapýre. Jesús heʼi avei enterove ohechakuaataha idisipulokuéra ojoayhuha (Juan 13:34, 35). Haʼe ojevale pe “tembiguái jeroviaha ha iñarandúva” rehe ñanemboʼe hag̃ua ikatu hag̃uáicha jajoayhu ha jajogueraha porã (Mat. 24:45-47).

11, 12. a) ¿Mbaʼérepa jaʼekuaa umi hénte ko mundopegua iñembyahyiha? b) ¿Mbaʼéichapa Jehová oñangareko ipuévlore ani hag̃ua iñembyahýi?

11 Oĩ heta tembiʼu. Umi hénte ko mundopegua ndoikuaái mbaʼeve la Bíbliagui, haʼete iñembyahýiva hikuái. Amós 8:11 (ÑÑB), heʼi voi: ‘Cháke oútama hína pe ára Ñandejára heʼíma hague: “Amboúta ñembyahýi yvy apére,  ndahaʼemoʼãi tembiʼúgui peneñembyahýi ha pendeyʼuhéitava, Ñandejára ñeʼẽgui guei peẽ peneñembyahýi ha pendeyʼuhéita”’. ¿Mbaʼépa ohaʼarõkuaa umi oñemoĩva pe Rréino poguýpe? ¿Haʼekuéra piko iñembyahýita avei? Nahániri. Jehová heʼi vaʼekue idiferentetaha ipuévlo situasión. Haʼe heʼi: ‘Che rembiguaikuéra okarujoáta ha peẽ peneñembyahýita; che rembiguaikuéra hoyʼujoáta, ha peẽ pendeyʼuhéita; che rembiguaikuéra ovyʼajoáta, peẽ katu peñemotĩta’ (Is. 65:13, ÑÑB). ¿Rehechápa mbaʼéicha oñekumpli ko profesía?

12 Koʼág̃a rupi jareko hetaiterei puvlikasión, gravasión, vidéo, rreunión, asambléa ha ñande sítio Internétpe henyhẽte informasión. Ko múndo iséko peteĩ desiértoicha, ñandéve katu osyry peteĩ rríoicha umi informasión oñeʼẽva la Bíbliare (Ezeq. 47:1-12; Joel 3:18). ¡Ajépa javyʼaite jahechávo káda día oñekumpliha Jehová promesakuéra! Haʼete voíngo opreparáva peteĩ karu guasu ñandéve g̃uarã. ¿Ñañehaʼãpa jaʼu meme umi tembiʼu omoĩva?

Kongregasiónpe oñemeʼẽ ñandéve ñaikotevẽva ñande jerovia imbareteve hag̃ua

13. ¿Mbaʼéichapa oñekumpli hína pe profesía oĩva Isaías 29:18-pe?

13 Ikatu ñaĩ porã jey Jehovándi. Ko tiémpope hetaiterei oĩ ndohechái ha nohenduséiva Jehová ñeʼẽ. Haʼete peteĩ péste ojagarráva opárupi (2 Cor. 4:4). Péro Cristo omonguera hína hetaitereípe ko yvy tuichakuére. ¿Ndépa rehecháma mbaʼéicha umi siégo ohecha ha umi sórdo ohendu? Umi hénte ndoikuaáiva la Biblia heʼíva ha ogueroviáva umi enseñánsa japu haʼete ndohechái ha nohendúiva. Péro oaprendévo Ñandejára Ñeʼẽ omboʼéva ha omboyke umi japu, jaʼekuaa hesekuéra okueraha. Péicha oñekumpli ko profesía: ‘Upe árape umi nohendúiva ohendu porãta ko kuatiañeʼẽ; ha umi ndohecháiva ohecha porãta iñypytũha guive’ (Is. 29:18, ÑÑB). Ko yvy tuichakuére káda áño oñemonguera hetaiterei héntepe. Káda persóna osẽva Babilonia Guasúgui ha oadoráva Jehovápe ohechauka Ñandejára promesakuéra katuete oñekumpliha.

14. ¿Mbaʼérehepa jajepyʼamongeta vaʼerã ñande jerovia imbarete hag̃ua?

14 Ko lívrope jahecha porãiterei kuri koʼã ára pahápe Cristo ombyatyha isegidorkuérape oadora hag̃ua Jehovápe oñondivepa. Péicha haʼete ñaiméva peteĩ paraísope. Jajepyʼamongetákena hetaite mbaʼe porã jarekóvare ñaime rupi ko grúpope. Jajapóramo upéva jajerovia mbaretevéta Jehová promesakuéra oñekumplipataha.

“Tou ne Rréino”

15. ¿Mbaʼérepa jajeroviakuaa ko yvýgui oikotaha peteĩ hardín neporãva?

15 Jehová ningo oipota vaʼekue ko yvýgui oiko peteĩ hardín neporãva. Ojapórõ guare Adán ha Évape omeʼẽ chupekuéra peteĩ lugár iporãitereíva oiko hag̃ua. Omanda avei chupekuéra taifamília heta, tomyenyhẽ ko yvy ha toñangareko animalkuérare (Gén. 1:28). Péro haʼekuéra omoirũ  Satanáspe oñemoĩ hag̃ua Jehová kóntrape. Upéicha rupi enterove ñaneimperfékto, japeka ha ñamano. Upéicharamo jepe Jehová nokambiái la oipotáva ha haʼe heʼíva katuete oñekumpli (elee Isaías 55:10, 11). Upévare jaikuaa porã Adán ha Eva familiare omyenyhẽtaha ko yvy, ojapóta chugui peteĩ hardín ha oñangareko porãta Jehová kreasión rehe. Upérõ oñekumplipaitéta umi profesía oñemeʼẽ vaʼekue umi hudío oĩvape Babilóniape. Jahechamína koʼã ehémplo.

16. ¿Mbaʼéichapa la Biblia ohechauka amo gotyove jaikotaha kyhyjeʼỹme?

16 Ndaiporimoʼãi pelígro. Pe promésa porãite ñanembopyʼarorýva oĩva Isaías 11:6-9-pe oñekumplíta oparupiete. Entéro kuimbaʼe, kuña ha mitã oikóta kyhyjeʼỹme opa hendápe. Ndoapeligramoʼãvéima chupekuéra mymba ñarõ ni hénte aña. Og̃uahẽta peteĩ día nde reñeñandutaha nde rogapeguáicha entéro lugárpe. Ikatúta reʼyta umi rrío, lágo ha márpe; ikatúta rejupi umi montáñare ha redipara ñúre. Ha pytũ vove ndaiporimoʼãi mbaʼeve nemongyhyjéva. Upérõ oñekumplíta pe profesía heʼíva Ñandejára siervokuéra ‘oiko porãta okyhyjeʼỹre opárupi ha kaʼaguy mbytépe jepe okéta pyʼaguapýpe’ (Ezeq. 34:25, ÑÑB).

17. ¿Mbaʼérepa jajeroviakuaa pe Rréino poguýpe jarekotaha heta tembiʼu?

17 Oĩta heta tembiʼu. Epensami reikoha peteĩ múndo ndaiporihápe imboriahúva, orekóva saʼi hoʼu vaʼerã térã iñembyahýiva. Ko tiémpope jarekoháicha hetaiterei puvlikasión ñanemombaretéva, upe tiémpope avei Rréi Jesucristo omeʼẽta ñandéve hetaiterei tembiʼu jakaru ha ñaneresãi hag̃ua. Jesús oúrõ guare ko yvy ári ohechauka ikatuha ojapo upéva. Haʼéngo omongaru vaʼekue hetaiterei persónape ha upearã omboheta unos kuánto piraʼi ha pan (Mat. 14:17, 18; 15:34-36; Mar. 8:19, 20). Ñandejára Rréino ogoverna vove ko yvy ape ári, oñekumplíta koichagua profesía: ‘Ñandejára omboúta ama peñemitỹ hag̃ua ha pende yvy oprodusíta peneryg̃uatã porã hag̃ua ha pene rymbakuéra okarujoáta umi pásto porã oĩháme’ (Is. 30:23).

18, 19. a) ¿Mbaʼéichapa oñekumplíta pe profesía oĩva Isaías 65:20-22-pe? b) ¿Mbaʼérepa ojeʼe yvyramátaicha jaikove pukutaha?

18 Koʼág̃a rupi hetaiterei hénte ndorekói esperánsa oikóvo peteĩ óga porãme ni orekóvo peteĩ traváho ombovyʼáva chupekuéra. Ko múndope oĩ hetaiterei hénte pokarẽ, upévare heta persóna ohechakuaa umi ipláta ha itaryrýiva káda día orekoveha. Umi imboriahúva katu ombaʼapo pohýi ha saʼi ogana omantene hag̃ua ifamíliape. Péro epensamíntena mbaʼéichapa jaikóta oñekumpli vove ko profesía: ‘Haʼekuéra omopuʼãta hogarã ha oikóta pype, oñotỹta parrál ha hoʼúta hiʼakue. Nomopuʼãmoʼãi óga ótro oiko hag̃ua pype, ha noñemitỹmoʼãi ótrope g̃uarã. Ku yvyramáta oikove pukuháicha, upeichaite avei che retãyguakuéra oikove pukúta, ha umi che rembiporavo ipyʼarorýta umi hembiapokue reheve’ (Is. 65:20-22, ÑÑB).

 19 ¿Mbaʼérepa heʼi jaiko pukutaha umi ‘yvyramáta oikove pukuháicha’? Oiméne katuete rehechámava peteĩ yvyramáta tuichaitereíva. Ñaimévo pe yvyramáta guýpe ñapensa mboy áñomapa oĩ upépe, ha ñanemopirĩmba voi. Ikatu itujave ñande avuelokuéra avuélogui jey hína. Ha katuete osegíta oĩ upépe ñande ñamano rire jepe. Jehová ningo imbaʼeporã rupi opromete pe paraísope jaikove pukutaha pyʼaguapýpe (Sal. 37:11, 29). Núnka nañamanomoʼãi ha ñane renondépe umi yvyramáta hetaite áñore oikovéva haʼetéta yvoty rei, koestedía iporã asýva ha koʼẽrõ ipirúva. ¡Jaikovéta ningo opa ára g̃uarã!

20. ¿Mbaʼéichapa ojepeʼaitéta opaichagua mbaʼasy?

20 Ñaneresãita. Ko tiémpope ñanderasypa rei, tahaʼe ñanemitã térã ñandeʼedave oimeha óra ikatu ñamano. Ha jaʼe porãsérõ g̃uarã enterove jareko peteĩ mbaʼasy oporojukáva hérava pekádo. Peteĩnte la pohã upévape g̃uarã: Jesús sakrifísio (Rom. 3:23; 6:23). Pe goviérno de Mil Áño aja, Jesús ha umi ogovernáva hendive oiporúta pe sakrifísio repykue ha oipeʼáta ñandehegui umi mbaʼe vai jarekóva pekádo káusare. Péicha enterove ñaneñeʼẽrendúva jahupytýta perfeksión. Upérõ oñekumplipaitéta avei pe profesía de Isaías heʼíva: “Avave ndeʼimoʼãi: ‘Cherasy hína’. Ha umi upépe oikóvape ojeheja reíta hembiapo vaikue” (Is. 33:24). Epensami upe tiémpope ndaiporimoʼãveimaha siégo, sórdo térã paralítiko (elee Isaías 35:5, 6). Ndaiporivéima oñedeprimíva, oĩ vaíva iñakãme ni orekóva mbaʼeveichagua mbaʼasy. Jesúspe g̃uarã ndahasyiete omonguera umíva. ¡Umi oñemoĩva pe Rréino poguýpe hesãi porãta!

21. ¿Mbaʼérepa jagueroviakuaa ndaiporimoʼãveimaha omanóva? ¿Mbaʼérepa ñanekonsola upe promésa?

21 Ñande jaikuaa oĩha hetaiterei mbaʼasy ñandejukáva. ¿Mbaʼéichapa oñesolusionáta upéva? Pe ñemano ningo “ñane enemígo” katuete ñanderupytýva enterovépe (1 Cor. 15:26). Péro, ¿ikatúpa jaʼe ko enemígo ipoderosoitereimaha Jehovápe g̃uarã? Jahechami Isaías heʼi vaʼekue: “Haʼe omokõta pe ñemano opa ára g̃uarã, ha ñande Ruvicha Ijojahaʼỹva Jehová omokãta enterove resay” (Is. 25:8, NM). Epensami mbaʼéichatapa upérõ. Ndaiporimoʼãvéima omanóva, sementério ni hénte ojaheʼóva oñembyasýgui. Upéva rangue katu ñanerasẽta vyʼágui jahecha vove mbaʼéichapa Jehová omoingove jey umi omano vaʼekuépe (elee Isaías 26:19). Péicha hasypeve oñeñandu porãta hetaite ñande rapicha oñembyasýva hína omanógui chugui peteĩ ihénte térã iñamígo.

22. ¿Mbaʼéichapa pe Rréino ojapóta Ñandejára rembipota opárupi ko yvy ape ári?

22 Opávo umi mil áño pe Rréino okumplítama Ñandejára rembipota kompletoite ko yvy ape ári. Upévo Cristo omeʼẽ jeýta ko yvy itúvape ogoverna hag̃ua (1 Cor. 15:25-28). Enterove yvypóra perféktota ha ombohováita peteĩ última pruéva. Upévo ojepoíta Satanásgui, ha osẽta pe yvykua  pypukúgui. Upéi Cristo ombochipéta pe mbói iñañaitévape ha entéro omoirũvape chupe (Gén. 3:15; Apoc. 20:3, 7-10). Péro umi ohayhúva Jehovápe ha iñeʼẽrendúva chupe oikovéta opa ára g̃uarã. La Bíbliape jatopa peteĩ promésa neporãmba jepéva ohechaukáva mbaʼépa jahupytýta upe tiémpope. Upéva hína “Ñandejára raʼykuéra liverta ijojahaʼỹva” (Rom. 8:21).

Pe Rréino okumplipaitéta opa mbaʼe Jehová opromete vaʼekue

23, 24. a) ¿Mbaʼérepa jaʼe Ñandejára promesakuéra oñekumplitaha katuete? b) ¿Mbaʼépa rejedesidi rejapo?

23 Koʼã promésa oñekumplíta katuete, ndahaʼéi kuénto reínte. ¿Mbaʼérepa jaʼe upéva? Kapítulo 1-pe jahecha kuri Jesús omboʼe hague idisipulokuérape ojerure hag̃ua Jehovápe: “Tou ne Rréino, tojejapo ne rembipota yvy ape ári yvagapeguáicha” (Mat. 6:9, 10). Ñandejára Rréino ndahaʼéi peteĩ mbaʼe oúvante ñandéve ñane akãme. Haʼe peteĩ goviérno teete. Koʼag̃aite ogoverna hína yvágape ha cien áñorema okumpli oikóvo Jehová oprometéva. Upéva jahecha porãiterei umi kongregasionkuérape. Ha opaite mbaʼe Ñandejára oprometéva oñekumplíta ág̃a Irréino ou vove omanda hag̃ua ko yvy tuichakuére. ¡Upéva katuete oikóta!

24 Jaikuaa Ñandejára Rréino outaha ha umi mbaʼe Jehová oprometéva oñekumplitaha katuete. ¿Mbaʼérepa jajeroviaite upeichataha? Pórke ¡ÑANDEJÁRA RRÉINO OGOVERNÁMA! Koʼág̃a iporã ñañeporandu: “¿Ahejápa hína ko Rréino chegoverna? Jajapókena ikatúva guive siémpre ñañemoĩ hag̃ua ko Rréino ládo. ¡Péicha ikatúta jaiko vyʼápe ipoguýpe opa ára g̃uarã!