ÑAHESAʼỸIJÓTAVA

Pe Rréi oreko peteĩ ehérsito opredikáva

1, 2. ¿Mbaʼe profesíapa Jesús heʼi vaʼekue, ha mbaʼe porandu iñimportántevapa tekotevẽ ñambohovái?

UMI polítiko opromete jepi heta mbaʼe ha upéi nokumplíri. Ni ojaposevéramo jepe ndaikatúi ojapo umi mbaʼe opromete vaʼekue. Rréi Jesucristo katu ndaupeichaiete hína. Haʼe katuete okumpli iñeʼẽ.

2 Oñepyrũ rire ogoverna 1914-pe Jesús ombaʼapóma oñekumpli hag̃ua pe profesía haʼe heʼi vaʼekue 1.900 áño upe mboyve. Omano mboyvemi haʼe heʼi: “Koʼã marandu porã oñeʼẽva Ñandejára Rréinore oñemombeʼúta oparupiete ko yvy ape ári” (Mat. 24:14). Ko profesía oñekumpli vove ojehechaukáta pe Rréino oñepyrũmaha ogoverna yvágape. Péro ikatu oĩ heʼíva umi ára pahápe umi hénte opensataha ijehénte, ndoporohayhumoʼãi ha ndoikuaasemoʼãiha mbaʼeve Ñandejáragui. ¿Mbaʼéicha piko upéicharõ pe Rréi ombyatýta peteĩ grúpo opredikáva umi notísia porã? (Mat. 24:12; 2 Tim. 3:1-5.) Tekotevẽ ñambohovái ko porandu iñimportánteva entéro kristiáno teépe g̃uarã.

3. ¿Mbaʼéichapa Jesús ohechauka ojeroviaha isegidorkuérare? ¿Mbaʼéicha rupípa ojeroviaite hesekuéra?

3 Jahechami jey Jesús heʼi vaʼekue. Haʼe ndeʼíri “ikatu mbaʼéko ojepredika”. Upéva rangue oasegura umi notísia porã ‘oñemombeʼutaha’. ¿Mbaʼépa ohechauka upéva? Jesús ojeroviaha isegidorkuéra kyreʼỹme opredikataha koʼã ára pahápe. ¿Mbaʼéicha rupípa ojeroviaite hesekuéra? Ohechágui Itúva ojapoha upéva (Juan 12:45; 14:9). Ou mboyve ko yvy ape ári, Jesús ohecha vaʼekue mbaʼéichapa Itúva ojerovia isiervokuérare. Koʼág̃a jahechamíta mbaʼéichapa Jehová ohechauka ojeroviaha ipuévlore.

‘Nde puévlo kyreʼỹme ombaʼaposéta ndéve g̃uarã’

4. ¿Mbaʼépa ojerure Jehová umi isrraelítape, ha mbaʼépa ojapo hikuái?

4 Ñanemanduʼami mbaʼépa oiko raʼe Jehová ojerurérõ guare Moiséspe ojapo hag̃ua pe tavernákulo. Upépe umi isrraelíta omombaʼeguasu vaʼerã kuri Ñandejárape. Jehová ojevale Moisés rehe heʼi hag̃ua umi héntepe oipytyvõ hag̃ua pe tembiapópe. Moisés heʼi chupekuéra: ‘Entéro ipyʼaporãva ogueru vaʼerã Jehovápe óro, pláta ha vrónse’. ¿Mbaʼépa  ojapo raʼe hikuái? ‘Umi Israelgua osegi ogueru ikontrivusión koʼẽ koʼẽre’. Haʼekuéra hetaitereíma ogueru ha upévare ojeʼe chupekuéra: ‘Anivéma pegueru pene kontrivusión’ (Éxo. 35:5, ÑÑB; 36:3, 6). Umi isrraelíta ohechauka Jehová ojapo porã hague ojeroviávo hesekuéra.

5, 6. Heʼiháicha Salmo 110:1-3, ¿mbaʼépa Jehová ha Jesús ohaʼarõ umi kristiáno teégui koʼã ára pahápe?

5 ¿Ohaʼarõpa Jehová ipuévlo ombaʼapo kyreʼỹ koʼã ára pahápe? Si, upéicha hína. Mil áñorupi Jesús onase mboyve ko yvy ape ári, Jehová ojevale David rehe ohai hag̃ua mbaʼépa oikóta pe Mesías oñepyrũ vove ogoverna (elee Salmo 110:1-3). Pe Rréi pyahu orekóta heta enemígo oñemoĩtava hese. Péro oĩta avei heta hénte oñemoĩva iládo peteĩ ehérsitoicha. Haʼekuéra ningo kyreʼỹme oñekuaveʼẽta oservi hag̃ua pe rréipe. Umíva apytépe oĩta avei mitãrusu ha mitãkuña ombaʼapótava vyʼapópe. Hetaitereígui hikuái ojeʼe ojoguaha ysapy koʼẽjúpe, ojajái asýva pyharevete osẽvo kuarahy. *

Umi oñemoĩva pe Rréino ládo ojogua ysapy koʼẽjúpe (Ehecha párrafo 5)

6 Jesús oikuaa vaʼekue pe profesía oĩva Salmo 110-pe oñeʼẽha hese (Mat. 22:42-45). Upévare haʼe ikatu ojerovia oĩtaha kyreʼỹme oipytyvõva chupe ojekuaauka hag̃ua umi notísia porã ko yvy tuichakuére. ¿Oikópa raʼe upéva? ¿Oĩpa heta hénte ombaʼapo jejopýva predikasiónpe koʼã ára pahápe?

“Apredika vaʼerã ha avyʼa ajapóvo upéva”

7. ¿Mbaʼéichapa Jesús oprepara isegidorkuérape opredika hag̃ua?

7 Ojupi riremi rréiramo, Jesús oñepyrũ oprepara isegidorkuérape ojapo hag̃ua pe tembiapo tuichaitéva. Jastudiáma kuri kapítulo 2-pe, mbaʼéichapa 1914 guive 1919 peve haʼe ohecha mbaʼépa ojapo ipuévlo ha omopotĩ oñekotevẽhápe (Mal. 3:1-4). Áño 1919-pe onombra pe tembiguái jeroviahápe omoakã hag̃ua isegidorkuérape (Mat. 24:45). Upe  tiémpo guive ko tembiguái omeʼẽ tembiʼu hiʼoraitépe umi asambléa ha puvlikasión rupive, ha heʼi jey jey entéro kristiáno opredika vaʼerãha katuete.

8-10. ¿Mbaʼéichapa umi diskúrso ojejapóva asambleahápe omokyreʼỹ hetápe opredika hag̃ua? Emoĩ peteĩ ehémplo. (Ehecha avei pe rrekuádro “ Umi asambléa oporomokyreʼỹva ojepredika hag̃ua”.)

8 Umi diskúrso ojejapóva asambleahápe. Umi Estudiánte de la Biblia oipotaiterei vaʼekue Ñandejára ohekomboʼe chupekuéra. Upévare oñembyaty Cedar Póintpe (Ohio, Estados Unidos). Upépe ojejapo pe asambléa tuichavéva primera gérra mundiál rire, ipuku del 1 al 8 de septiembre de 1919. Pe segundo día ermáno Rutherford ojapo peteĩ diskúrso ha derechoite heʼi umi ermánope: “Peteĩ kristiáno oĩ ko yvy ape ári oikuaauka hag̃ua Ñandejára Rréino”.

9 Tres día haguépe oiko peteĩ mbaʼe iñimportantetereíva. Ermáno Rutherford ojapo peteĩ diskúrso hérava: “Umi oipytyvõvape g̃uarã”. Tiémpo rire ko diskúrso osẽ Ñemañaháme peteĩ artíkulo héravape “Peikuaauka pe Rréino”. Ermáno Rutherford heʼi: “Ojepyʼamongeta jave, peteĩ kristiáno ikatu oñeporandu: ¿Maʼerãpa aime ko yvy ape ári? Ha katuete ombohovái vaʼerã: Che ruvicha imbaʼeporãitereígui ojevale cherehe aipytyvõ hag̃ua umi héntepe oñemoĩ porã jey hag̃ua Ñandejárandi. Upévare apredika vaʼerã ha avyʼa ajapóvo upéva”.

10 Ko diskúrsope ermáno Rutherford opresenta peteĩ rrevísta pyahu hérava La edad de oro (koʼág̃a oñehenóiva ¡Despertad!). Péva oipytyvõ umi héntepe ohecha hag̃ua pe Rréino añoite osolusionataha yvypóra provléma. Pe ermáno upéi oporandu mávapa oipytyvõse oñemeʼẽ hag̃ua la héntepe ko rrevísta. Peteĩ infórme osẽ vaʼekue heʼi: “Seis mil voi oĩva pe asambléape opuʼã ojojapaite. Péicha ojekuaa oĩha hetaiterei ojaposéva upe tembiapo”. * Ndaipóri jaʼe vaʼerã, oĩ hetaiterei oipytyvõséva kyreʼỹme ojekuaauka hag̃ua pe Rréino.

11, 12. ¿Mbaʼépa heʼi rrevísta Ñemañaha 1920-pe guare, Jesús omanda vaʼekuére?

11 Umi puvlikasión. Jesús ningo omanda vaʼekue isegidorkuérape opredika hag̃ua umi notísia porã oñeʼẽva Ñandejára Rréinore. Ha rrevísta Ñemañaha rupive oñemyesakã porãve Jesús heʼi vaʼekue. Jahechamína unos kuánto artíkulo osẽ vaʼekue 1920 guive.

12 ¿Mbaʼeichagua notísiapa oñemombeʼu vaʼerã oñekumpli hag̃ua Mateo 24:14? ¿Arakaʼépa ojejapóta upe tembiapo? Ñemañaha 1 de julio de 1920-pe osẽ peteĩ artíkulo hérava “Notísia porã oñeʼẽva pe Rréinore”. Upépe heʼi: “Koʼã notísia porã heʼi ko múndo aña opataha ha pe Mesías oñepyrũtaha ogoverna”. Pe artíkulo ohechauka avei arakaʼépa oñemombeʼu vaʼerã koʼã mbaʼe. Heʼi: “Koʼã notísia oñemombeʼu opa rire pe gérra guasu [primera gérra mundiál]  ha osegíta og̃uahẽ meve pe ‘jehasa asy guasu’”. Upévare pe artíkulo oporomokyreʼỹ: “Og̃uahẽma pe tiémpo ñamombeʼu hag̃ua entéro rrelihión kristiána guaʼúpe koʼã marandu”.

13. ¿Mbaʼéichapa Ñemañaha 1921-pe guare omokyreʼỹ umi unhídope opredika hag̃ua?

13 ¿Tekotevẽpa raʼe ojeovliga Ñandejára puévlope opredika hag̃ua? Nahániri. Ñemañaha 15 de marzo de 1921-pe osẽ peteĩ artíkulo hérava “Penekyreʼỹkena”. Pe artíkulo rupive umi unhído ohechakuaa osẽ vaʼerãha opredika omombaʼégui upe tembiapo. Enterovévape ojeʼe oñeporandumi hag̃ua: “¿Ahechakuaápa pe predikasión haʼeha peteĩ tembiapo ijojahaʼỹva ojeheja vaʼekue che kárgope?”. Pe artíkulo heʼi avei: “Peẽ pehecha vove mbaʼeichaitépa iñimportánte pe tembiapo ojeheja vaʼekue pende kárgope, katuete peñeñandúta Jeremías oñeñandu haguéicha. Haʼe heʼi vaʼekue Ñandejára Ñeʼẽ ojoguaha ‘tatarendy oĩvape ikanguekuápe’, ndaikatúiva oguerokirirĩ” (Jer. 20:9, ÑÑB). Pe artíkulo ohechauka porãiterei Jehová ha Jesús ojeroviaha ipuévlore, vyʼápe oikuaaukataha Irréino opárupi.

14, 15. ¿Mbaʼépa Ñemañaha 1922-pe guare omokyreʼỹ umi kristiánope ojapo hag̃ua?

14 ¿Mbaʼéichapa oñemog̃uahẽta umi notísia porã la héntepe? Ñemañaha 15 de agosto de 1922-pe osẽ peteĩ artíkulo hérava “Tekotevẽ japredika”. Mbykýramo jepe ko artíkulo oporomokyreʼỹeterei. Heʼi porã umi unhídope “tekotevẽha ogueraha meme umi puvlikasión ha oñeʼẽ umi héntendi hogapekuéra. Omombeʼu vaʼerã hikuái pe Rréino yvagapegua hiʼag̃uimbaitemaha”.

15 Jahecha porã 1919 guive Cristo omomanduʼa hague umi kristiánope ojeheja hague ikargopekuéra peteĩ tembiapo iñimportánteva. Upearã ojevale pe tembiguái jeroviaháre. Umi kristiáno oikuaauka vaʼerã umi marandu porã oñeʼẽva pe Rréinore. ¿Mbaʼépa ojapo raʼe ojeʼévo chupekuéra opredika vaʼerãha?

Umi iñeʼẽrendúva kyreʼỹme ombaʼapóta

16. ¿Mbaʼépa ojapo unos kuánto ansiáno ojeʼévo chupekuéra enterovetéva opredika vaʼerãha?

16 Áño 1920 ha 1930 rupi oĩ vaʼekue opensáva natekotevẽiha entéro unhído opredika. Ñemañaha 1 de noviembre de 1927-pe oñemombeʼu mbaʼépa la oikóva: “Koʼág̃a oĩ kongregasiónpe umi oservíva ansiánoramo nomokyreʼỹséiva iñermanokuérape osẽ hag̃ua opredika ha haʼekuéra voi nosẽséi ni mbaʼevéicharõ predikasiónpe. Ha oñembohory ojeʼéramo chupekuéra omombeʼu vaʼerãha ogahárupi umi notísia porã oñeʼẽva Ñandejárare, pe Rréi rehe ha Irréinore”. Pe artíkulo derechoite heʼi: “Og̃uahẽma pe tiémpo umi kristiáno iñeʼẽrendúva omarkaite hag̃ua koʼãichaguápe ha ndojeheʼavéi hesekuéra. Avei ojeʼe vaʼerã chupekuéra ndaikatumoʼãveimaha oservi ansiánoramo”. *

17, 18. ¿Mbaʼépa ojapo heta ermáno pe tembiguái jeroviaha heʼi rire chupekuéra opredika vaʼerãha? ¿Mbaʼépa ojapo ñane ermanokuéra umi cien áño ohasa vaʼekuépe?

 17 Haʼetépe hetaiterei ermáno kyreʼỹme ojapo pe tembiguái jeroviaha heʼíva. Haʼekuéra ovyʼaiterei ojeheja haguére chupekuéra oikuaauka pe Rréino. Ñemañaha 15 de marzo de 1926-pe guare heʼi: “Umi iñeʼẽrendúva kyreʼỹme ombaʼapóta. [...] Haʼekuéra ogueraháta umi notísia porã la héntepe”. Umi ermáno okumpli Salmo 110:3 heʼíva ha ohechauka oñemoĩha Ñandejára Rréino ládo.

18 Umi cien áño ohasa vaʼekuépe oĩ hetaiterei kyreʼỹme omombeʼúva umi notísia oñeʼẽva Ñandejára Rréinore. Umi kapítulo oúvape jahecháta mbaʼéichapa haʼekuéra opredika vaʼekue. Por ehémplo mbaʼépa umi ermáno oiporúmi oikuaauka hag̃ua umi notísia. Avei ñahesaʼỹijóta mbaʼe mbaʼépa ohupyty hikuái. Jaikuaa ko múndope umi hénte opensaha ijehénte, upéicharamo jepe oĩ hetaiterei ojesakrifikáva opredika hag̃ua. Jahecha aja mbaʼérepa ojapo hikuái upéva, iporã ñañeporandu: “¿Mbaʼérepa che amombeʼuse umi notísia porã che rapichakuérape?”.

“Pemotenonde meméke Ñandejára Rréino”

19. ¿Mbaʼérepa ñamotenonde meme vaʼerã Ñandejára Rréino Jesús heʼi haguéicha?

19 Jesucristo omanda vaʼekue isegidorkuérape: “Pemotenonde meméke Ñandejára Rréino” (Mat. 6:33). ¿Mbaʼérepa jajapo vaʼerã haʼe heʼívañandéve? Jahechakuaágui pe Rréino rupive oikotaha Jehová rembipota. Jahecha haguéicha pe kapítulo ohasa vaʼekuépe, pe espíritu sánto rupive oñemyesakã ohóvo heta mbaʼe Ñandejára Rréinogui. Upévare ñamotenonde meme hag̃ua Ñandejára Rréino ñamombaʼe vaʼerã ñande pyʼaite guive umi mbaʼe ñaaprendéva chugui.

Peteĩ kuimbaʼe otopáva pláta yvyguy ovyʼaiterei; péicha avei ñande javyʼa jaikuaávo mbaʼépa pe Rréino (Ehecha párrafo 20)

20. ¿Mbaʼéichapa pe ehémplo Jesús omombeʼu vaʼekue ohechauka ñamotenonde vaʼerãha pe Rréino?

20 Jesús oikuaáma vaʼekue idisipulokuéra omotenonde memetaha Ñandejára Rréino. Jahechami peteĩ ehémplo omombeʼu vaʼekue oñeʼẽva pláta yvyguýre (elee Mateo 13:44). Jesús heʼi peteĩ kuimbaʼe ombaʼapo aja kokuépe otopa hague pláta yvyguy ha omombaʼeterei upéva. ¿Mbaʼépa ojapo upémarõ? “Ovyʼaitereígui oho ovendepa ikosakuéra ha ojogua upe ñu.” ¿Mbaʼépa ñanemboʼe upéva? Ñaaprendévo mbaʼépa Ñandejára Rréino ha jahechakuaávo iñimportanteha, vyʼápe jajesakrifika ñamotenonde hag̃ua pe Rréino. *

21, 22. ¿Mbaʼéichapa ñane ermanokuéra ohechauka omotenondeha Ñandejára Rréino? Emoĩ peteĩ ehémplo.

21 Umi kristiáno tee ohechauka ojapóva rupive omotenondeha pe Rréino. Haʼekuéra oiporu itiémpo, imbaʼerepy ha opa mbaʼe oikuaáva opredika hag̃ua. Oĩ umi ojapóva heta sakrifísio oiporupaite hag̃ua itiémpo predikasiónpe. Koʼã ermáno ikyreʼỹetéva ohecha mbaʼéichapa Jehová ovendesi chupekuéra omotenonde haguére pe Rréino. Jahechami peteĩ ehémplo.

 22 Averi Bristow ha hembireko Lovenia oñepyrũ iprekursorádo áño 1929 rupi, ha oservi hikuái Estados Unídospe sur gotyo. Heta áño rire Lovenia imanduʼa: “Averi ha che rovyʼaiterei rojapóvo ore prekursorádo oñondive. Heta vése ndoroguerekói vaʼekue pláta rokarga hag̃ua kombustívle ni rojogua hag̃ua roʼumi vaʼerã. Péro tahaʼe haʼéicha Jehová siémpre orepytyvõ. Upévare ndorohejái ore prekursorádo ha katuete rohupyty ore remikotevẽ”. Lovenia imanduʼa peteĩ jey isogue hague hikuái oservírõ guare Florídape (siuda de Pensacola). Péro oho jeývo hógape otopa mokõi vosa renyhẽ provísta ha peteĩ kuatiaʼi heʼíva: “Pene ermáno penderayhuetéva. Kongregasión Pensacola.” Imanduʼávo upe tiémpore, ermána Lovenia heʼi: “Jehová arakaʼeve naoremotyreʼỹi. Haʼe ohechauka oréve káda día ikatuha rojerovia hese”.

23. ¿Mbaʼéichapa reñeñandu reaprendévo heta mbaʼe pe Rréinogui? ¿Ha mbaʼépa hiʼã ndéve rejapo?

23 Jaikuaa káda uno situasión idiferenteha. Upévare oĩ umi ikatúva opredika hetave ha ótro saʼive. Péro enterove jareko oportunida jaikuaaukávo umi notísia porã ñande pyʼaite guive ha opa ñane mbaretekue reheve (Col. 3:23). Ñande ningo ñamombaʼeterei umi mbaʼe ñaaprendéva pe Rréinogui. Upévare ñanekyreʼỹ ha ñaime jajapo hag̃uáicha oimeraẽ sakrifísio japredika hag̃ua. ¿Nahiʼãipa ndéve rejapo upéva?

24. ¿Mbaʼépa pe tembiapo iñimportantevéva ojapóva pe Rréino koʼã ára pahápe?

24 Umi cien áño ohasa vaʼekuépe, pe Rréi okumpli heʼi vaʼekue Mateo 24:14-pe. Ha ojapo upéva oovligaʼỹre avavépe. Ko múndope henyhẽ umi hénte opensáva ijehénte, péro Jesús segidorkuéra idiferénte ha kyreʼỹme opredika. Haʼekuéra oikuaauka umi notísia porã ko yvy tuichakuére ha upéva ohechauka Jesús ogovernamaha yvágape. Pe predikasión haʼe hína pe tembiapo iñimportantevéva ojapóva Ñandejára Rréino koʼã ára pahápe.

^ párr. 5 La Bíbliape pe ysapy orrepresenta umi vendisión oúva Jehovágui (Gén. 27:28; Miq. 5:7).

^ párr. 10 Pe folléto hérava A quiénes se les confía la obra heʼi: “Rrevísta La edad de oro ojejapo ojegueraha hag̃ua la héntepe hogaitépe umi notísia porã. Ojepredika káda ógape ha ojeheja chupekuéra peteĩ rrevísta ojerure térã ndojeruréiramo jepe hikuái peteĩ suscripción”. Heta áñore ojeʼe umi ermánope heʼi hag̃ua umi héntepe ikatuha orresivi káda mes rrevísta Ñemañaha ha La edad de oro. Áño 1940-pe 1 de febrero guive Jehová puévlope oñemokyreʼỹ oheja hag̃ua koʼã rrevísta umi héntepe ha toanota mboýpa la ohejáva.

^ párr. 16 Upe tiémpope umi kongregasiónpe ojevota vaʼekue ojeporavo hag̃ua umi ansiánope. Upévare haʼekuéra ikatu kuri ndovotavéi umi ermáno ndoipotáivare ojepredika. Kapítulo 12-pe jahecháta tiémpo rire ndojeporavovéi hague péicha umi ansiánope.

^ párr. 20 Jesús omombeʼu ótro ehémplo ojogua léntova kóvape. Heʼi oĩ hague peteĩ komersiánte oikóva oviaha oheka hag̃ua pérla iporãva. Ha ojuhúvo oho pyaʼe porã ovendepa ikosakuéra ha ojogua (Mat. 13:45, 46). Koʼã mokõi ehémplo ñanemboʼe ikatuha jaikuaa pe añetegua heta hendáicha. Oĩ ohekaʼỹre otopáva pe rrelihión tee, péro ótro oiko oheka otopa peve. Tahaʼe haʼeháicha, enterove jajapo heta sakrifísio ñamotenonde hag̃ua pe Rréino.