Ehecha oĩva pype

Ehecha menú secundario

Ehecha oĩva pype

Testígo de Jehová

guarani

¡Ñandejára Rréino ogovernáma!

 KAPÍTULO 13

Ermanokuéra og̃uahẽ umi trivunálpe

Ermanokuéra og̃uahẽ umi trivunálpe

ÑAHESAʼỸIJÓTAVA

Jesús heʼi haguéicha umi goviérno ojokose predikasión

1, 2. a) ¿Mbaʼépa ojaposemoʼã umi rrelihión omoakãva, péro mbaʼépa ojapo umi apóstol? b) ¿Mbaʼérepa umi apóstol osegi opredika?

OHASA ramoite pe fiésta de Pentekostés áño 33-pe. Pe kongregasión Jerusalengua oñepyrũ ramo. Satanás ndoperdéi itiémpo ha oaprovechase ohundi hag̃ua pe kongregasión imbarete mboyve. Omomýi umi rrelihión omoakãvape ojoko hag̃ua pe predikasión. Péro umi apóstol ipyʼaguasu ha osegi opredika ha “hetaitereive ohóvo umi kuña ha kuimbaʼe ojeroviáva ñande Ruvicháre” (Hech. 4:18, 33; 5:14).

Umi apóstol ovyʼa “Ñandejára ohejágui ojeapoʼi chupekuéra Jesús réra rehehápe”

2 Iñenemigokuéra ipochyeterei ha upévare oguerahauka kárselpe umi apóstolpe. Péro upe pyharépe peteĩ ánhel oavri pe kársel rokẽ ha upéi pyhareve opredika jeýma hikuái. Umi soldádo ojagarra jey umi apóstolpe ha ogueraha umi governánte renondépe. Umi autorida heʼi hesekuéra naiñeʼẽrenduiha pórke ja omandáma kuri chupekuéra anivéma hag̃ua opredika. Umi apóstol pyʼaguasúpe heʼi: “Ore oreñeʼẽrendu vaʼerã Ñandejárape ore ruvicháramo, yvyporakuérape rangue”. Umi mburuvicha ipochyvéntema ha ojukapase chupekuéra. Upe javete peteĩ mboʼehára leipegua ikatupyrýva, hérava Gamaliel heʼi umi autoridápe: “Peñatende porãkena upe pejaposévare koʼã kuimbaʼére”. Oiméne umi apóstol ni noimoʼãi la oikóva: umi mburuvicha ojapo Gamaliel heʼíva ha opoi chuguikuéra. ¿Mbaʼépa ojapo upémarõ umi apóstol? Pyʼaguasúpe omboʼe ha “oikuaauka meme hikuái pe marandu porã oñeʼẽva Cristo Jesús rehe” (Hech. 5:17-21, 27-42; Prov. 21:1, 30).

3, 4. a) ¿Mbaʼépa ojapo Satanás ymaite guive Ñandejára puévlo kóntrape? b) ¿Mbaʼépa jahecháta ko kapítulope ha umi mokõi oúvape?

3 Áño 33-pe primera ves ojegueraha kristianokuérape trivunálpe, péro heta vése ohasáta gueteri hikuái ko situasión (Hech. 4:5-8; 16:20; 17:6, 7). Koʼág̃a peve Satanás omomýi umi ndaijaʼéivape ñanderehe ojoko hag̃ua predikasión. Upearã ojeʼe Ñandejára puévlo ndorrespetaiha pe léi. Por ehémplo heʼi hikuái jajapoha sarambi kállere térã ñamolestaha la héntepe. Avei oĩ heʼíva ñamboligaha ótrope opuʼã hag̃ua goviérnore ha ñambaʼevendeha. Péro opyta porã jave, ñane ermanokuéra og̃uahẽ trivunálpe ohechauka hag̃ua japuha umi  mbaʼe ojeʼéva. ¿Mbaʼépa ojehupyty umícha jave? ¿Mbaʼéichapa nepytyvõ ndéve koʼág̃a umi mbaʼe ojedesidi vaʼekue trivunalkuérape? Jahechamína unos kuánto káso ojegueraha vaʼekue trivunálpe ha ñanepytyvõva “ñadefende hag̃ua umi marandu porã jaiporúvo pe léi” (Filip. 1:7).

4 Ko kapítulope jahecháta mbaʼéichapa ñane ermanokuéra odefende ñande derécho japredika hag̃ua. Umi ótro kapítulope ojehechaukáta ñandéve umi káso oñemog̃uahẽ vaʼekue trivunálpe. Koʼãva oñegana rupi jaiko Ñandejára Rréino oipotaháicha ha ndajajeheʼái ko múndore.

¿Sarambi apoha térã oñemoĩ pe Rréino ládo?

5. Áño 1940 mboyve, ¿mbaʼérepa ojejagarra heta ermánope, ha mbaʼépa odesidi ojapo umi omoakãva Jehová organisasión?

5 Áño 1940 mboyve umi autorida oĩva Estados Unídospe oovligase testígo de Jehovápe onohẽ hag̃ua peteĩ permíso opredika hag̃ua. Péro umi ermáno ndojeruréi pórke oimeha óra umi autorida ikatu heʼi ndovaleveimaha pe permíso. Umi ermáno oikuaa ni peteĩ goviérno ndorekoiha derécho ojokóvo pe predikasión pórke Jesús voi omanda vaʼekue upéva (Mar. 13:10). Upéicha rupi hetaiterei ermáno ojegueraha kárselpe. Upémarõ umi ermáno omoakãva Jehová organisasión odesidi omog̃uahẽtaha umi káso trivunálpe. Pe léi heʼi enterove ikatuha oreko irrelihión. Upévare umi ermáno ohechaukase pe goviérno ndorrespetái hague iderécho. Upéi, 1938-pe ojegueraha peteĩ káso trivunálpe. ¿Mbaʼépa oiko raʼe?

6, 7. ¿Mbaʼépa oiko vaʼekue peteĩ famíliare?

6 Jahechami la oiko vaʼekue peteĩ famíliare oservíva de prekursór espesiál. Pe martes 26 de abril de 1938 pyharevete, Newton Cantwell orekóva 60 áño, hembireko Esther ha itaʼyrakuéra Henry, Russell ha Jesse osẽ opredika hag̃ua un día entéro peteĩ siúda héravape New Haven (Connecticut). Péro añetehápe ojeprepara hikuái hiʼareve hag̃uáicha. ¿Mbaʼérepa? Heta vésema ojejagarra ha ojegueraha chupekuéra préso, upévare opensa ikatuha oiko jey hesekuéra upéva. Upéicharamo jepe kyreʼỹme opredika hikuái. Haʼekuéra oho mokõi áutope, ermáno Newton oraha hiʼáutope puvlikasión ha fonógrafo ha itaʼýra Henry, orekóva 22 áño oraha ótro áuto orekóva parlánte. Ha okalkula hagueichaite oiko, upe riremínte ojokóma chupekuéra la polisía.

7 Ñepyrũrã ojagarra hikuái Rússellpe orekóva 18 áño, upéi ermáno Newton ha hembirekópe. Itaʼýra Jesse orekóva 16 áño, mombyry guive ohecha mbaʼéichapa umi polisía ogueraha itúva, isy ha iñermánope. Henry katu opredika kuri oikóvo ótro ládo ha upévare Jesse opyta haʼeño. Upéicharõ jepe ojagarra ifonógrafo ha osegi opredika. Mokõi karai katóliko heʼi Jéssepe ikatuha ohenduka chupekuéra ermáno Rutherford diskúrso hérava “Enemigos”. Ohendúvo  hikuái, orrenegaiterei ha oinupãse chupe. Péro trankílo porãnte Jesse osẽ oho upégui ha upe riremi ojagarráma avei chupe la polisía. Umi polisía ndeʼíri ermána Esther ojapo hague peteĩ mbaʼe oĩ vaíva, péro oakusa ermáno Newton ha itaʼyrakuérape. Upéicharõ jepe oñepermiti chupekuéra opaga fiánsa osẽ hag̃ua upe díape.

8. ¿Mbaʼérepa pe trivunál okondena Jesse Cántwellpe?

8 Tiémpo rire, septiembre de 1938-pe, umi ermáno Cantwell oñepresenta pe trivunál renondépe oĩva New Hávenpe. Pe trivunál okondena ermáno Newton, Russell ha Jéssepe. Heʼi hesekuéra ojerure hague kontrivusión permisoʼỹre. Hiʼarive pe trivunál heʼi Jesse oiko hague ojapo sarambi upe siudápe. ¿Mbaʼérepa ojeʼe hese upéva? Pórke umi mokõi karai katóliko heʼi rupi ombopochy hague chupekuéra pe diskúrso oñeʼẽ vaíva irrelihiónre. Ojejerurérõ jepe heta vése pe Tribunal Supremo oĩva Connécticutpe ohecha jey hag̃ua pe káso, lomímonte oñekondena Jéssepe. Upémarõ umi ermáno ohecháva pe káso odesidi og̃uahẽtaha Tribunal Supremo de los Estados Unídospe. Upéva pe trivunál iñimportantevéva upe tetãme.

9, 10. a) ¿Mbaʼépa odesidi pe Tribunal Supremo família Cantwell kásope? b) ¿Mbaʼéichapa koʼág̃a peve ñanepytyvõ upe ojedesidi vaʼekue?

9 Pe 29 de marzo de 1940 guive, pe trivunál ohecha umi testígo de Jehová káso. Pe omoakãva pe trivunál hérava  Charles Evans Hughes, ha ocho hués ohendu la heʼíva testígo de Jehová avogádo. Upéva ningo ermáno Hayden Covington. * Upéi pe fiskál upe siudapegua heʼi umi testígo de Jehová ojapo hague sarambi umi puevloháre. Upe javete peteĩ hués osẽ heʼi: “Péro Jesús omboʼéva ndogustái vaʼekue avei heta héntepe, ¿ajépa?”. Ha pe fiskál katu ombohovái: “Siérto ha chemanduʼa la Biblia omombeʼuha avei la oiko vaʼekue Jesús rehe opredika haguére”. ¡Mávaiko oimoʼãta koʼã mbaʼe ojeʼetaha! Opillaʼỹre pe fiskál okompara testigokuérape Jesús rehe ha pe goviérnope umi ojuka vaʼekuére Jesúspe. Pe 20 de mayo de 1940, enterove umi hués oĩva pe trivunálpe osẽ testigokuéra favórpe.

Hayden Covington (tenonde), Glen How (iskiérda), ha ótro ermáno osẽvo trivunálgui ogana rire peteĩ káso

10 ¿Mbaʼépa ojehupyty pe trivunál odesidíva rupive? Upe guive ojerrespetave pe derécho káda uno orekóva oiporavo hag̃ua irrelihión. Péicha ni peteĩ autorida oĩva estádo, siuda térã distrítope ndaikatumoʼãi oproivi avavégui oreko irrelihión. Pe trivunál heʼi avei Jesse ndojapói hague “sarambi pe puévlope ha ndoapeligrái hague avavépe”. Upe ojedesidíva ohechauka porã umi testígo de Jehová ndoikoiha ojapo sarambi. Tuichaiterei mbaʼe ningo Ñandejára puévlo ohupytýva. ¿Ñanepytyvõpa koʼág̃a peve upe ojedesidíva? Heʼi haguéicha peteĩ avogádo haʼéva testígo: “Koʼág̃a oñepermiti ñandéve jareko ñane rrelihión ha ndajakyhyjevéi jajeguerahárõ g̃uarã kárselpe. Upéicha rupi ikatu jaikuaauka umi notísia porã ñande rapichakuérape”.

¿Opuʼãpa goviérnore térãpa oikuaaukase la Biblia heʼíva?

Pe tratádo “El odio ardiente de Quebec a Dios y Cristo y la libertad es la vergüenza de todo Canadá”

11. ¿Mbaʼépa ojapo umi ermáno oĩva Canadápe, ha mbaʼérepa?

11 Áño 1940 rire, ojepersegi vai umi testígo de Jehová oĩvape Canadápe. Umi ermáno oikuaaukase enterovépe pe goviérno ndohejaiha umi héntepe oiporavo irrelihión. Upearã áño 1946-pe orreparti hikuái 16 día aja pe tratádo hérava “El odio ardiente de Quebec a Dios y Cristo y la libertad es la vergüenza de todo Canadá”. Ko tratádo orekóva cuatro páhina omombeʼu mbaʼépa ojejapo Quebécpe umi testígo de Jehováre: umi paʼi ojapouka hesekuéra heta mbaʼe vai, umi polisía ojahéi hesekuéra ha umi hénte otrata vaieterei chupekuéra. Pe tratádo heʼi: “Hetaiterei vésema ojejagarra rei umi testígope. Oĩ voi 800 káso ojehecha vaʼerã gueteri Gran Montreálpe”.

12. a) ¿Mbaʼépa ojapo umi ndaijaʼéiva testigokuérare ohecha rire pe tratádo? b) ¿Mbaʼérepa oñedemanda umi ermánope? (Ehecha avei pe nóta.)

12 Pe primer minístro Quebecpegua hérava Maurice Duplessis oñemoĩ peteĩ ñeʼẽme pe kardenál katóliko rrománo Villeneuve ndive. Mokõivévape ombopochy pe tratádo ha heʼi noponderamoʼãiha testigokuérare. Pyaʼe voi hetave umi káso, 800 oĩ kuri ha sapyʼaitépe ohupytýma 1.600. Peteĩ prekursóra omombeʼu: “Umi polisía hetaiterei vése orejagarra, ni naoremanduʼavéima mboy vésepa. Ojetopárõ peteĩ ermáno omeʼẽha  pe tratádo, ojeakusa chupe orrepartiha peteĩ informasión omboligáva la héntepe opuʼã hag̃ua goviérno kóntrape”. *

13. ¿Mávape raẽpa ojejagarra vaʼekue, ha mbaʼépa odesidi pe trivunál?

13 Áño 1947-pe ermáno Aimé Boucher, itajýra Gisele orekóva 18 áño ha Lucille orekóva 11 áño ojegueraha trivunálpe. Chupekuéra raẽvete ojehusga omeʼẽ haguére oikóvo hóga jerére pe tratádo. Ojeʼe hesekuéra omboliga hague la héntepe opuʼã hag̃ua goviérnore, péro hasy lénto ojeguerovia hag̃ua upéva. Pe ermáno ningo peteĩ karai ivuénova, oikóva kampáñape, oñangarekóva hymbakuérare, ha sapyʼánte oho pe siudápe peteĩ karrítope. Ko famíliare ojejapo umi mbaʼe vai oñemombeʼúva pe tratádope. Pe hués upe siudapegua ndaijaʼéi testigokuérare ha upévare heʼi ndovaleiha umi pruéva ohechaukáva pe família ndojapói hague mbaʼeve ivaíva. Pe fiskál katu heʼi pe tratádo omboligaha la héntepe oñorairõ hag̃ua ha oñekondena vaʼerãha pe famíliape, ha pe hués osẽ iládo. Péicha pe hués haʼete heʼíva avave ndaikatuiha omombeʼu umi inhustísia ojejapóva ikóntrape. Oñekondena Aimé ha Gisélepe, ha Lucille entéro opyta présa dos día. Upémarõ umi ermáno ojerure ohecha hag̃ua ikáso pe Tribunal Supremo Canadapegua, haʼéva pe trivunál iñimportantevéva oĩva upe tetãme. Ha upe trivunál heʼi oñenkargataha pe kásore.

14. ¿Mbaʼépa ojapo umi ermáno Quebecgua ojepersegírõ jepe chupekuéra?

14 Ojepersegi ha oñembohasa asýramo jepe umi ermáno Quebecguápe, haʼekuéra kyreʼỹme osegi opredika ha ohupyty heta mbaʼe porã. Por ehémplo áño 1946-pe umi ermáno oñepyrũrõ guare omeʼẽ pe tratádo oĩ vaʼekue Quebécpe 300 testígo ha cuatro áño haguépe oĩma 1.000 ermáno. *

15, 16. a) ¿Mbaʼépa odesidi pe Tribunal Supremo Canadagua família Boucher kásope? b) ¿Mbaʼépa ojehupyty pe trivunál odesidíva rupive?

15 Junio de 1950-pe umi nueve hués oĩva pe Tribunal Supremo Canadaguápe ohecha ermáno Aimé Boucher káso. Seis mése rire, 18 de diciembre de 1950-pe, upe trivunál osẽ ñande ládo. Ermáno Glen How ningo testigokuéra avogádo ha omombeʼu pe trivunál odesidíva. Haʼekuéra ohechakuaa umi ermáno nomboligái hague la héntepe oñorairõ térã opuʼã hag̃ua goviérnore. Pe tratádo omombeʼúnte umi inhustísia ojejapóva ha pe léi ndoproivíri upéva. Pe ermáno heʼi avei: “Chete ahecha mbaʼéichapa Jehová orepytyvõ rogana hag̃ua pe káso”. *

16 Pe Tribunal Supremo odesidíva, ohechauka Ñandejára Rréino ogana hague. Upérõ Quebécpe oĩ gueteri 122 káso testigokuéra kóntrape péro ndaikatuvéima ojeakusa chupekuéra. Upe guive umi hénte oikóva Canadápe ha umi tetã ombaʼapóvape Canadándi orekóma liverta heʼi hag̃ua opensáva pe goviérnore. Ha iporãveha, upe fécha guive umi rrelihión ha autorida oĩva Quebécpe ndopersegivéi testígo de Jehovápe. *

 ¿Ombaʼevendépa térãpa oikuaaukasénte Ñandejára Rréino?

17. ¿Mbaʼépa ojapo heta goviérno ojoko hag̃ua ñane rembiapo?

17 Umi kristiáno ypykuéicha, ñande jaservíva Jehovápe ‘ndajaikói jakovra ñande rapichápe Ñandejára Ñeʼẽre’ (elee 2 Corintios 2:17). Péro oĩ goviérno ojokoséva ñane rembiapo ha upearã oiporu umi léi okontroláva umi vénta ha negósio. Jahechami mokõi káso oñemog̃uahẽ vaʼekue trivunálpe, ojehecha hag̃ua testígo de Jehová opredikápa térãpa ombaʼevendesénte.

18, 19. ¿Mbaʼépa ojapo umi autorida oĩva Dinamárcape ojoko hag̃ua predikasión?

18 Dinamarca. Pe 1 de octubre de 1932, oñemoĩ peteĩ léi oproivíva oñevende kállere permisoʼỹre umi lívro, rrevísta ha umícha. Umi ermáno noguenohẽi upe permíso. Al ótro día, cinco ermáno osẽ opredika Roskíldepe, opytáva 30 kilómetro pe kapitálgui hérava Copenhague. Upéi kaʼaruete peteĩ ermáno ja ndouvéima hendivekuéra. Haʼe hína August Lehmann, umi polisía ojagarra ha oakusa chupe ombaʼevende haguére permisoʼỹre.

19 Pe 19 de diciembre de 1932 August Lehmann oñepresenta umi hués renondépe. Haʼe omombeʼu oikuaveʼẽ hague ogahárupi puvlikasión oñeʼẽva la Bíbliare, péro heʼi porã haʼe ndoikoiha ovende kállere. Pe trivunál upepegua osẽ iládo ha heʼi: “Ko karai ningo ikatu oñemantene haʼeño. Haʼe ndokovrái, noganái mbaʼeve ha nosẽi voi upearã. Ko tembiapo omboperde katu chupe”. Pe trivunál osẽ testigokuéra favórpe ha heʼi ermáno Lehmann “ndoikoiha ombaʼevende”. Péro umi ndaijaʼéiva Ñandejára puévlore ojedesidíma ojapotaha oimeraẽ mbaʼe ojoko hag̃ua predikasión (Sal. 94:20). Pe fiskál ojerure jey oñepresenta hag̃ua upe káso pe Tribunal Suprémope. ¿Mbaʼépa ojapo umi ermáno?

20. ¿Mbaʼépa odesidi pe Tribunal Supremo oĩva Dinamárcape, ha mbaʼépa ojapo upémarõ umi ermáno?

20 Pe semána oñepresentátarõ guare pe káso Tribunal Suprémope, enterove testígo oĩva Dinamárcape opredika hetave. Pe martes 3 de octubre de 1933, pe Tribunal Supremo oikuaauka mbaʼépa odesidi: Heʼi oĩ porã hague pe trivunál michĩvéva odesidi vaʼekue August Lehmann kásope. Ndaikatúi ojeʼe haʼe nokumplíri hague pe léi. Upévare umi testígo de Jehová ikatu osegi opredika avave ojokoʼỹre chupekuéra. Umi ermáno ovyʼaiterei ko mbaʼe ojehupytývare ha oagradese hag̃ua Jehovápe hetavéntema opredika hikuái. Upe guive ermanokuéra oikóva Dinamárcape opredika pyʼaguapýpe ha pe goviérno ndopersegivéi chupekuéra.

Testígo de Jehová ipyʼaguasúva. Dinamarca, 1930 rire

21, 22. ¿Mbaʼépa odesidi pe Tribunal Supremo Estados Unidosgua ermáno Murdock kásope?

21 Estados Unidos. Pe domingo 25 de febrero de 1940, peteĩ prekursór hérava Robert Murdock (hijo) ha siete testígo ojejagarra opredika aja pe siúda héravape Jeannette (Pensilvania). Ojeʼe hesekuéra oikoha ovende puvlikasión oguenohẽʼỹre  permíso. Ojejerure pe Tribunal Supremo Estados Unidosguápe ohecha hag̃ua pe káso ha upéicha ojapo.

22 Pe 3 de mayo de 1943, pe Tribunal Supremo osẽ testigokuéra ládo. Avei heʼi natekotevẽiha oñeguenohẽ peteĩ permíso pe “Constitución heʼi rupi enterove orekoha upe derécho”. Ha heʼi pe léi oñemoĩ vaʼekue pe siudápe ndovaleveimaha pórke “ndohejái la héntepe heʼi mbaʼépa oguerovia ni oiporavo irrelihión”. Pe hués William Douglas oñeʼẽ pe trivunál rérape ha heʼi umi testígo de Jehováre: “Haʼekuéra ndahaʼéi opredikánteva térã omeʼẽnteva puvlikasión oñeʼẽva la Bíbliare. Síno omboʼe la héntepe. Ha upe ojapóva ojerrespeta vaʼerã avei ojerrespetaháicha umi ohóvape oadora Ñandejárape tupaópe ha oporomboʼéva upépe”.

23. ¿Mbaʼéichapa ideprovécho ñandéve umi káso oñegana vaʼekue 1943-pe?

23 Ñandejára puévlo ohupyty heta mbaʼe pe Tribunal Supremo odesidíva rupive. Ojehechauka porã umi testígo kyreʼỹme oikuaaukaha Ñandejára Rréino ha ndoikoiha ombaʼevende. Testígo de Jehová oreko kuri 13 káso ha 12 voi ogana upe día iñimportantetévape áño 1943-pe. Umíva apytépe oĩ ermáno Murdock káso. Koʼãva ideprovécho ojehecháta jave ótro káso ipyahúva, oĩ jave hénte ojokoséva predikasión.

 “Ore oreñeʼẽrendu vaʼerã Ñandejárape ore ruvicháramo, yvyporakuérape rangue”

24. ¿Mbaʼépa jajapo peteĩ goviérno oproivi jave ñandehegui japredika?

24 Jaagradeseterei umi goviérno opermiti haguére ñandéve japredika. Péro oĩ jave oproivíva ñandehegui, ñakambiaʼimínte jajapo lája upe tembiapo ha jasegi ñamombeʼu pe notísia porã opa ikatuháicha. Umi apóstol heʼi haguéicha ñande jaʼe: “Ore oreñeʼẽrendu vaʼerã Ñandejárape ore ruvicháramo, yvyporakuérape rangue” (Hech. 5:29; Mat. 28:19, 20). Avei oĩ jave ojokoséva predikasión ñag̃uahẽ umi trivunálpe ikatu hag̃uáicha jasegi jajapo ñane rembiapo. Jahechami mokõi ehémplo.

25, 26. ¿Mbaʼépa oiko raʼe Nicaráguape ajeve oñeg̃uahẽ pe Corte Suprema de Justíciape, ha mbaʼépa ojehupyty upéi?

25 Nicaragua. Pe 19 de noviembre de 1952, peteĩ misionéro oservíva sukursálpe hérava Donovan Munsterman, oho pe Departaménto de Inmigrasiónpe oĩva Manáguape. Ojeʼe kuri chupe oñepresenta hag̃ua pe héfe renondépe, haʼéva kapitán Arnoldo García. Haʼe heʼi ermáno Dónovanpe testígo de Jehová rrelihión ojeproiviha Nicaráguape, ha upévare ndaikatuiha opredika hikuái. ¿Mbaʼérepa? Pe kapitán heʼi pe Ministro de Gobierno y Religiones nomeʼẽi hague permíso umi testígope ha hiʼarive ojeʼe hague hesekuéra komunistaha. ¿Mávapa heʼi raʼe upéva? Umi paʼikuéra.

Ojeproivírõ guare predikasión ha rreunión Nicaráguape

26 Ermáno Donovan ojerure Ministerio de Gobierno y Religiones ha presidénte Anastasio Somoza Garcíape ohecha jey hag̃ua pe káso péro nokonsegíri mbaʼeve. Upémarõ umi ermáno odesidi noñembyatymoʼãveimaha Salón del Réinope síno ótro hendápe ha mbovymínte. Osegi opredika hikuái péro ndojapovéi upéva kállere. Avei opresenta peteĩ dokuménto  pe Corte Suprema de Justíciape ha ojerure anivéma hag̃ua ojeproivi chuguikuéra oñembyaty ha opredika. Heta diário oñeʼẽ la oikóvare ha oguenohẽ pe dokuménto testigokuéra opresentáva. Upémarõ pe Corte Suprema ohecha pe káso. ¿Mbaʼépa oiko upéi? Pe 19 de junio de 1953, umi hués oikuaauka osẽha hikuái testígo favórpe. Heʼi ndojerrespetái hague pe derécho entéro orekóva heʼi hag̃ua opensáva, odesidi hag̃ua ijehegui ha oikuaauka hag̃ua ogueroviáva. Omanda avei umi autoridápe ojapo vaʼerãha ikatúva guive ojogueraha porã hag̃ua testigokuéra ndive.

27. ¿Mbaʼérepa umi oikóva Nicaráguape ndogueroviaséi pe Corte Suprema odesidíva, ha mbaʼépa opensa ñane ermanokuéra?

27 Upe tiémpo peve Nicaráguape omanda guasu umi paʼikuéra, ha pe Corte Suprema naiprovlemaséi rupi hendivekuéra osẽ jepi iládo. Avei pyʼỹinte ojejapo umi poguasukuéra oipotávante, upéicha rupi umi oĩva pe Corte Suprémape odesidi jepi haʼekuéra heʼíva. Upévare umi hénte ndogueroviaséi oikuaávo pe Corte Suprema nosẽiha pe goviérno ni umi paʼi ládo. Péro umi ermáno ohechakuaa ogana hague pe káso, rréi Jesucristo oipytyvõ rupi chupekuéra ha osegi rupi opredika hikuái (Hech. 1:8).

28, 29. ¿Mbaʼépa oiko raʼe Záirepe áño 1985 rupi?

28 Zaire. Áño 1985 rupi oĩ 35.000 testígorupi Záirepe, koʼág̃a hérava República Democrática del Congo. Hetave haguére umi testígo de Jehová oñembotuichave pe sukursál. Diciembre de 1985-pe ojejapo peteĩ asambléa internasionál pe estádio oĩvape Kinshásape. Upe estádiope oñembyaty kuri 32.000 persóna oúva heta tetãgui. Péro upéi oñepyrũ okambia heta mbaʼe testigokuérape g̃uarã upe tetãme. ¿Mbaʼépa oiko raʼe?

29 Ermáno Marcel Filteau ningo peteĩ misionéro Canadagua, ojepersegi vaʼekue Duplessis omandárõ guare Quebécpe. Ko ermáno oĩ kuri Záirepe ha omombeʼu mbaʼépa la oiko vaʼekue: “Pe 12 de marzo de 1986, oñemondo peteĩ kárta umi ermáno omoakãvape pe sukursál ojeavisa hag̃ua chupekuéra ojeproiviha pe asosiasión de los Testigos de Jehová Zairepegua”. Upe dokuménto ofirma pe presidénte Mobutu Sese Seko.

30. ¿Mbaʼe iñimportántevapa odesidi vaʼerã pe komite de sukursál, ha mbaʼépa ojapo hikuái?

30 Al ótro día pe rrádio nasionál upe tetãmegua heʼi: “Koestedía guive nañahendumoʼãvéima mbaʼeve umi testígo de Jehovágui Záirepe”. Upe riremínte oñepyrũma ojepersegi vaipaite testigokuérape. Ohundipa hikuái umi Salón del Reino, omonda umi ermánogui ikosakuéra, ogueraha kárselpe ha ombyepoti chupekuéra. Umi mitãme jepe ojegueraha kárselpe. Pe 12 de octubre de 1988, pe goviérno oipeʼa Jehová organisasióngui umi mbaʼe orekóva hérape ha umi militár oho ojagarra pe sukursál. Umi ermáno omoakãva ojerure jey pe presidéntepe ohecha hag̃ua pe situasión péro nopenái  hesekuéra. Upémarõ pe Komite de Sukursál odesidi vaʼerã peteĩ mbaʼe iñimportánteva: omog̃uahẽtapa pe káso Tribunal Suprémope térãpa ohaʼarõtante. Pe misionéro Timothy Holmes, haʼéva upérõ koordinadór Komite de Sukursálpe omombeʼu: “Rojerure Jehovápe oremoarandu ha orepytyvõ hag̃ua”. Oñemboʼe ha heta oñemongeta rire, umi ermáno ohechakuaa ikuentaveha ohaʼarõnte ha upe aja oñatende porãve ermanokuérare ha ohecha hikuái mbaʼépa ikatu ojapo osegi hag̃ua opredika.

“Rohecha mbaʼéichapa Jehová ikatu okambia peteĩ situasión”

31, 32. ¿Mbaʼépa odesidi pe Tribunal Supremo, ha mbaʼéichapa upéva oipytyvõ ermanokuérape?

31 Unos kuánto áño rire ojetrata porãmiéma testigokuérape ha ojerrespetavéma enterove derécho Cóngope. Upérõ pe Komite de Sukursál ohechakuaa opyta porãtaha ojeruréramo pe Tribunal Suprémope ohecha hag̃ua umi testígo káso. Avave noimoʼãiramo jepe pe trivunál heʼi oñatendetaha hesekuéra. Ha 8 de enero de 1993, haimete 7 áño ojeproivi haguépe testigokuéra rrelihión, pe trivunál heʼi oĩ vai hague ojejapóva ikontrapekuéra ha ndovaleveimaha pe goviérno odesidi vaʼekue. Umi hués ningo ojapeligra kuri pórke okambia pe presidénte odesidíva. Ermáno Holmes heʼi: “Upérõ guare rohecha mbaʼéichapa Jehová ikatu okambia peteĩ situasión” (Dan. 2:21). Upe oiko vaʼekue omombarete ermanokuéra jerovia. Ohechakuaa hikuái Rréi Jesucristo oipytyvõ hague chupekuéra oikuaa hag̃ua arakaʼe ha mbaʼépa ojapo vaʼerã.

Umi testígo oĩva República Democrática del Cóngope ovyʼa oñepermitígui chupekuéra oadora Jehovápe

32 Upe rire oñepermiti oike misionéro upe tetãme, oñembotuicha pe sukursál, ha ojegueru puvlikasión ótro tetãgui. *  ¡Ajépa javyʼaite jahechávo mbaʼéichapa Jehová ñanepytyvõ jaservi hag̃ua chupe! (Is. 52:10.)

“Jehová chepytyvõ hína”

33. ¿Mbaʼépa ohechauka umi káso ñagana vaʼekue?

33 Koʼã káso ohechauka Jesús okumpli hague opromete vaʼekue: “Poipytyvõta peñeʼẽkuaa hag̃ua, ha pene enemigokuéra ndaikatumoʼãi heʼi mbaʼeve penembohovái hag̃ua” (elee Lucas 21:12-15). Oñangareko hag̃ua ipuévlore heta vése Jehová ojevale umi hués ha avogádo ikatupyrývare, yma ojevale haguéicha Gamaliel rehe. Péicha haʼe ohundi umi mbaʼe ñane enemigokuéra ojaposéva (elee Isaías 54:17). Oĩramo jepe oñemoĩ mbaretéva Jehováre ndaipóri ojoko vaʼerã hembipota.

34. ¿Mbaʼérepa ojehecharamoiterei testigokuéra oganáramo umi káso trivunalkuérape? (Ehecha pe rrekuádro “ Umi Tribunal Supremo oipytyvõ ojepredika hag̃ua”.)

34 ¿Mbaʼérepa ojehecharamoiterei umi testígo oganáramo umi káso trivunalkuérape? Ñapensamíntena: ñande testígo de Jehová ningo nañaiméi umi omandáva apytépe. Ndajavotái avavére, ndajaikéi polítikape ni ndajaikói japyta porãse umi polítiko ndive ñakonsegi hag̃ua jaipotáva. Hiʼarive umi ermánore ojeʼe “ilápi mbyky ha avave nomombaʼeiha chupekuéra” (Hech. 4:13). Upévare umi héntepe g̃uarã umi trivunál noganái mbaʼeve ñanepytyvõ jave, operde guei hikuái osẽvo ñane enemigokuéra kóntrape. Péro oĩrõ jepe heta rrelihióso ha polítiko omanda guasúva, umi trivunál heta vésema osẽ ñande favórpe. Koʼã mbaʼe ohechauka ‘ñande haʼeha Cristo disípulo ha jajapoha ñane rembiapo Ñandejára renondépe’ (2 Cor. 2:17). Upévare jaʼe apóstol Pablo heʼi haguéicha: “Jehová chepytyvõ hína, ndakyhyjemoʼãi” (Heb. 13:6).

^ párr. 9 Ermáno Hayden Covington odefende vaʼekue testigokuérape pe Tribunal Supremo Estados Unidospegua renondépe. Oñatende 43 káso ha pe primero haʼe kuri umi ermáno Cantwell káso estádo de Connecticut kóntrape. Ermáno Covington omano 1978-pe. Hembireko Dorothy oservi Jehovápe omano meve 2015-pe, orekópe 92 áño.

^ párr. 12 Peteĩ léi osẽ vaʼekue 1606-pe heʼi ikatuha oñekondena peteĩ persónape heʼíramo peteĩ mbaʼe ombopochýva hapichakuérape, siértoramo jepe la heʼíva.

^ párr. 14 Áño 1950-pe oĩ 164 prekursór, umíva apytépe 63 misionéro oho vaʼekue eskuéla de Galaádpe. Haʼekuéra kyreʼỹme oho oikuaárõ jepe oĩtaha opuʼãva hesekuéra.

^ párr. 15 Ermáno Glen How ningo peteĩ avogádo ikatupyrýva. Áño 1943 guive 2003 peve odefende heta testígo Canadagua ha ótro tetãyguápe.

^ párr. 16 Retopavéta informasión pe artíkulo héravape “La batalla no es de ustedes, sino de Dios”, osẽ vaʼekue rrevísta ¡Despertad! del 22 de abril de 2000-pe, páhina 18-24.

^ párr. 32 Tiémpo rire umi militár osẽ pe sukursálgui, upéicharõ jepe oñemopuʼã peteĩ sukursál pyahu ótro hendápe.