Ehecha oĩva pype

Ehecha oĩva pype

 KAPÍTULO 18

Mbaʼéichapa ojepaga umi gásto

Mbaʼéichapa ojepaga umi gásto

ÑAHESAʼỸIJÓTAVA

Mbaʼéichapa japaga umi gásto ha mbaʼérepa nañandejopýi jajapo hag̃ua upéva

1, 2. a) Ermáno Russell heʼi haguéicha, ¿mbaʼéichapa umi Estudiánte de la Biblia opaga umi gástore? b) ¿Mbaʼépa jahecháta ko kapítulope?

PETEĨ díape, peteĩ karai omoakãva Iglesia Reformada oporandu ermáno Charles Rússellpe mbaʼéichapa umi Estudiánte de la Biblia opaga umi gástore orekóva isalónpe ha onohẽ hag̃ua puvlikasión.

Ermáno Russell heʼi: “Ore núnka ndorojapói kolékta”.

Pe karai heʼi: “¿Ha mbaʼéichaiko pekonsegi la pláta?”.

Ermáno Russell upémarõ heʼi: “Ndachegueroviamoʼãi ningo haʼéramo ndéve. Ore rreunionhápe natekotevẽi rombohasa pe platíllo oñemoĩ hag̃ua kolékta. Umi hénte oúva ohechakuaa oĩha gásto. Upévare opensa hikuái: ‘Ojeguereko hag̃ua ko salón ningo igásto. ¿Mbaʼéichaiko che ikatu akontrivui?’”.

Pe karai omaña ermáno Russell rehe ha ndogueroviapái chupe.

Ermáno Russell heʼi jey: “Añetéko haʼe ndéve. Umi hénte oporandu jepi chéve: ‘¿Mbaʼéichaiko ikatu akolavora penendive?’. Oĩ umi ohupytýva heta mbaʼe porã ha iplátava, haʼekuéra oiporuse umi mbaʼe orekóva Ñandejára rehehápe. Péro oĩ umi imboriahúva, ¿ha maʼerãiko jaovligáta umívape?”. *

2 Ermáno Russell heʼi vaʼekue siertoite. Ñandejára puévlo siémpre oipytyvõ ojepredikave hag̃ua omeʼẽvo kontrivusión ipyʼaite guive. Ko kapítulope jahecháta yma ojejapo vaʼekue ha ojesegíva ojejapo koʼág̃a rupi. Upévare ñahesaʼỹijóta mbaʼéichapa ojepaga umi gásto ojeguerekóvare ojepredika hag̃ua. Upe aja iporãta ñañeporandu: “¿Mbaʼéichapa che ikatu aipytyvõ umi traváhope ojejapóva pe Rréino rehehápe?”.

“Entéro omeʼẽséva ikontrivusión, togueru Jehovápe g̃uarã”

3, 4. a) ¿Mbaʼépa Jehová oikuaa porã ojapotaha umi oadoráva chupe? b) ¿Mbaʼéichapa umi isrraelíta oipytyvõ ojejapo hag̃ua pe tavernákulo?

3 Jehová ojerovia umi oadorávare chupe. Haʼe oikuaa isiervokuéra orekóramo oportunida, omeʼẽtaha ikontrivusión  ipyʼaite guive. Koʼág̃a jahecháta mokõi ehémplo Israel tiémpope guare.

4 Jehová oguenohẽ rire umi isrraelítape Egíptogui, omanda chupekuéra ojapo hag̃ua peteĩ óga kárpa térã tavernákulo omombaʼeguasu hag̃ua chupe. Péro ojapo hag̃ua upéva oikotevẽta hikuái heta mbaʼe. Upémarõ Jehová heʼi Moiséspe omeʼẽ hag̃ua oportunida umi isrraelítape ikatu hag̃uáicha oipytyvõ pe tembiapope. Heʼi chupekuéra: “Entéro omeʼẽséva ikontrivusión, togueru Jehovápe g̃uarã” (Éx. 35:5, NM). Ha ¿mbaʼépa ojapo hikuái? Ñanemanduʼa vaʼerã upe mboyvemínte haʼekuéra ‘ombaʼapo pohýi hague tembiguáiramo’ (Éx. 1:14). Péro haʼekuéra ipojera ha omeʼẽ óro, pláta ha opaichagua mbaʼerepy. Koʼã mbaʼe oiméne omeʼẽ raʼe chupekuéra ipatronkuerakue Egiptogua (Éx. 12:35, 36). Umi isrraelíta omeʼẽ hetaitereíma rupi ikontrivusión, ojejerure chupekuéra anivéma hag̃ua ogueru mbaʼeve (Éx. 36:4-7).

5. ¿Mbaʼépa ojapo umi isrraelíta David omeʼẽrõ guare chupekuéra oportunida okontrivui hag̃ua?

5 Upéi, 475 áño rire, David omeʼẽ imbaʼerepýgui ojejapo hag̃ua pe témplo. Upéva hína pe primer témplo oñemopuʼã vaʼekue ojeadora hag̃ua Jehovápe ko yvy ape ári. Upéi heʼi umi isrraelítape: “¿Mávapa ipojera omeʼẽ hag̃ua avei imbaʼerepy Jehovápe?”. Péicha David heʼi ikatuha avei okolavora hikuái. ¿Mbaʼépa ojapo umi hénte? La Biblia heʼi: “Ipyʼaite guive omeʼẽ hikuái ikontrivusión Jehovápe” (1 Crón. 29:3-9, NM). David oikuaa mávaguipa ou umi mbaʼerepy. Upévare oñemboʼe Jehovápe ha heʼi: ‘Opa mbaʼe ningo ou ndehegui ha upévagui jeýnte romeʼẽ ndéve’ (1 Crón. 29:14).

6. ¿Mbaʼérepa oñekotevẽ pláta oñembaʼapo hag̃ua pe Rréino rehehápe? ¿Mbaʼépa iporã ñañeporandu?

6 Moisés ni David ndoovligái vaʼekue Ñandejára puévlope omeʼẽ hag̃ua kontrivusión. Haʼekuéra omeʼẽ ipyʼaite guive. Ha ¿mbaʼéichapa ojejapo koʼág̃a rupi? Jaikuaa ningo oñekotevẽha pláta oñembaʼapo hag̃ua pe Rréino rehehápe. Ojeguereko heta gásto oñeimprimi ha oñemog̃uahẽ hag̃ua enterovépe la Biblia ha umi puvlikasión. Upéichante avei igásto oñemopuʼã hag̃ua umi Salón del Reino, sukursalkuéra ha ojereko porã hag̃ua koʼã lugár. Oiko jave sarambi katu oñemeʼẽ vaʼerã ajúdo ermanokuérape. Upévare iporã ñañeporandu: ¿Mbaʼéichapa oñembyaty pe pláta oñekotevẽva? ¿Tekotevẽpa ojeovliga ermanokuérape omeʼẽ hag̃ua pláta?

“Núnka ndorojeruremoʼãi pláta yvypórape”

7, 8. ¿Mbaʼérepa Jehová puévlo núnka ndoikomoʼãi ojerure pláta?

7 Ermáno Russell ha iñirũnguérape ndogustaiete vaʼekue mbaʼéichapa umi tupão ombyaty pláta. Pe segunda rrevísta Ñemañaháme osẽ vaʼekue peteĩ artíkulo heʼíva “¿Ndépa  reipota ojegueraha ndéve pe ‘Ñemañaha’?”. Upépe Russell heʼi porã: “Ore roguerovia JEHOVÁ oñangarekoha ko rrevístare ha haʼe ojapo aja upéva núnka ndorojeruremoʼãi pláta yvypórape. Jehová heʼi: ‘Chembaʼe hína pe pláta ha óro oĩva montáñape’, ha haʼe nomeʼẽvéi vove oréve la pláta oñekotevẽva, roikuaáta ndojejapovéima vaʼerãha ko rrevísta” (Ageo 2:7-9). Ohasáma 130 áño, ha Jehová organisasión osegi ojepytaso mbarete hembiapópe, ha pe rrevísta Ñemañaha oñemosarambi gueteri koʼág̃a peve.

8 Jehová siervokuéra ndojeruréi pláta, nombohasái platíllo ojejapo hag̃ua kolékta irreunionhápe ni nomondói kárta ojerurehápe kolavorasión. Ndojapói avei hikuái víngo térã rrífa, ni nombaʼevendéi ombyaty hag̃ua fóndo. Rrevísta Ñemañaha heʼi haguéicha yma: “Ñandéve g̃uarã ndovaléi ojejerure pláta Ñandejára rérape ojapoháicha umi ótro iglésia. Ñapensa oĩ vaiha jaiko jajerure pláta ápe ha pépe Ñandejára rérape guaʼu. Haʼe ndoguerohorymoʼãi umi omeʼẽvape ni umi mbaʼe ojehupytýva upe pláta rupive”. *

“Káda uno tomeʼẽ ipyʼapýpe odesidiháicha”

9, 10. ¿Mbaʼérepa ñameʼẽ ñane kontrivusión?

9 Ñande ñaiméva pe Rréino poguýpe natekotevẽi avave ñandeovliga ñameʼẽ hag̃ua pláta. Upéva rangue vyʼápe jaiporu ñande pláta ha ñande kosakuéra oñembaʼapove hag̃ua pe Rréino rehehápe. ¿Mbaʼérepa jajaposete péicha? Jahechamíta mbohapy mbaʼe.

10 Primero, ñameʼẽ jahayhúgui Jehovápe ha jajaposégui “umi mbaʼe haʼe oguerohorýva” (1 Juan 3:22). Jehová ovyʼa umi oadoráva chupe omeʼẽramo ipyʼaite guive. Apóstol Pablo imanduʼa vaʼekue umi kristiáno ipojerávare (elee 2 Corintios 9:7). Upéicharõ peteĩ kristiáno tee omeʼẽ ‘ipyʼapýpe odesidiháicha’. * Ndahaʼéi oñembohovapukúva omeʼẽta haguére ikontrivusión ha natekotevẽi ojeovliga chupe upearã. Pe kristiáno ohechakuaa mbaʼépa oñekotevẽ, opensa mbaʼéichapa ikatu oipytyvõ ha ojapo upéicha. Jehová ohayhu peichagua persónape, la Biblia heʼi voi ‘Ñandejára ohayhu upe vyʼapópe omeʼẽvape’. Ha ótra traduksión heʼi: ‘Ñandejára ningo ohayhu pe omeʼẽvape ipyʼaporãgui’.

Umi mitã Mozambiquegua ovyʼa omeʼẽvo ikontrivusión

11. ¿Mbaʼépa ñanemomýi ñameʼẽ hag̃ua Jehovápe pe iporãvéva?

11 Segundo, ñameʼẽ ñane kontrivusión jaagradese hag̃ua Jehovápe hetaite mbaʼe porã ohupytykávare ñandéve. Ñandejára Ñeʼẽme oĩ peteĩ konsého ñanepytyvõva jahechauka hag̃ua mbaʼépa oĩ ñane korasõme (elee Deuteronomio 16:16, 17). Yma umi isrraelíta omboarete mbohapy fiésta al áño. Upépe káda kuimbaʼe opresenta vaʼerã peteĩ ofrénda, ha ojapo vaʼerã ‘Jehová ovendesi haguéicha chupe’. Upéicharõ,  oho mboyve upépe ojepyʼamongeta vaʼerã umi mbaʼe porã ohupyty vaʼekuére ha ohecha mbaʼépa oreko ikorasõme. Upe rire ae odesidi vaʼerã mbaʼe rregálopa opresentáta. Péicha avei ñande jajepyʼamongeta jave umi mbaʼe porãita Jehová omeʼẽvare ñandéve, ñameʼẽseterei voi chupe pe iporãvéva. Ha ñameʼẽramo ñane korasõite guive tahaʼe pláta térã ótra kósa, jaagradese hína Jehovápe omeʼẽ haguére ñandéve hetaite mbaʼe porã (2 Cor. 8:12-15).

12, 13. ¿Mbaʼéichapa jahechauka jahayhuha pe Rréipe? ¿Mbaʼéichapa jadesidi mboýpa ñameʼẽta?

12 Tercero, ñameʼẽvo ñane kontrivusión jahechauka jahayhuha pe Rréi Jesucrístope. ¿Mbaʼérepa jaʼe upéva? Ñanemanduʼami heʼi vaʼekuére idisipulokuérape pe pyhare omano mboyve (elee Juan 14:23). Jesús heʼi: “Pe cherayhúva ojapóta che haʼéva”. Ha peteĩ mbaʼe haʼe heʼi vaʼekue jajapo hag̃ua ningo japredika umi notísia porã ko yvy tuichakuére (Mat. 24:14; 28:19, 20). Upearã ñande jajapo ikatúva guive ojepredikave hag̃ua ha jaiporu ñane tiémpo, ñane  mbaretekue ha ñande pláta. Péicha jahechauka jahayhuha pe Rréi ogovernáva Ñandejára Rréinope.

13 Ñande ñañemoĩ pe Rréino ládo ha jahechauka upéva umi kontrivusión voluntária rupive, ñameʼẽva ñande pyʼaite guive. ¿Mbaʼéichapa jadesidi mboýpa ñameʼẽta? Upéva káda uno jadesidi vaʼerã ha odepende ñane situasiónre. Por ehémplo oĩ ningo heta ñane ermáno imboriahúva (Mat. 19:23, 24; Sant. 2:5). Enterove ñanemanduʼa vaʼerã Jehová ha Jesús omombaʼeha michĩramo jepe pe kontrivusión péro ñameʼẽrõ ñande pyʼaite guive (Mar. 12:41-44).

¿Moõgui oñeguenohẽ pe pláta?

14. ¿Mbaʼéichapa yma jahejámi vaʼekue umi puvlikasión?

14 Heta áñore ñande testígo de Jehová jaʼe umi héntepe mboýpa ikatu omeʼẽ oheja hag̃ua umi puvlikasión. Péro ndahetái upe jajeruréva ikatu hag̃uáicha umi hénte ndaiplátaiva jepe olee umi informasión. Upéicharõ jepe, sapyʼánte oĩ hénte ohejaséva umi puvlikasión péro ndorekóiva pláta omeʼẽ hag̃ua. Péicha jave lomímonte jahejámi chupekuéra pórke ñande jaipotaiterei umi hénte ipyʼaporãva olee umi informasión.

15, 16. a) ¿Mbaʼe kámbiopa ojapo Kuérpo Governánte áño 1990 guive? b) ¿Mbaʼéichapa ojejapo umi kontrivusión voluntária? (Ehecha avei pe rrekuádro “ Mbaʼépepa ojeporu ñane kontrivusionkuéra”.)

15 Áño 1990-pe, pe Kuérpo Governánte oñepyrũ okambia upe jajapo vaʼekue. Upe áño guive Estados Unídospe ojeofrese entéro puvlikasión kontrivusión voluntáriare. Oñemondo peteĩ kárta umi kongregasión upe tetãmeguápe heʼíva: “Umi rrevísta ha ótra puvlikasión oñemeʼẽta umi puvlikadórpe ha umi hénte oipotávape ojeʼeʼỹre chupekuéra mboýpa omeʼẽ vaʼerã umívare. Ha oĩramo omeʼẽséva kontrivusión oipytyvõ hag̃ua ko tembiapópe, ikatu omeʼẽ. Péro nomeʼẽiramo jepe, ikatúta ojeheja chupe la puvlikasión”. Ko kámbio ohechauka porãve ñande ndajakovraiha jajapo haguére ko tembiapo haʼéva Ñandejárape g̃uarã. Ojekuaa porã ‘ndajaikoiha jakovra ñande rapichápe Ñandejára Ñeʼẽre’ (2 Cor. 2:17). Tiémpo rire umi sukursál oĩva ko yvy tuichakuére ojapo avei upéicha.

16 ¿Mbaʼéichapa ojejapo umi kontrivusión voluntária? Káda Salón del Réinope oñemoĩ umi káha de kontrivusión ha omeʼẽséva ikontrivusión ikatu omoĩ umívape. Testígo de Jehová oreko umi Asosiasión térã entida legál ha umíva rérape ikatu oñemondo avei umi kontrivusión. Rrevísta Ñemañaha onohẽ káda áño peteĩ téma heʼíva mbaʼéichapa ikatu jajapo ñane kontrivusión.

¿Mbaʼépepa ojeporu pe pláta?

17-19. Emombeʼu mbaʼéichapa ojeporu pe pláta oñemoĩva a) obra mundiálpe g̃uarã, b) ojejapo hag̃ua Salón del Reino, ha c) gásto kongregasionpegua ojepaga hag̃ua.

17 Obra mundial. Koʼãvape oike umi gásto ojejapóva ojesegi hag̃ua ojepredika. Por ehémplo oñeimprimi puvlikasión  oñemondóva ko yvy tuichakuére, oñemopuʼã Betel ha oñeñatende koʼãvare. Ojeporu ojesegi hag̃ua ojejapo umi eskuéla oĩva Jehová organisasiónpe. Avei oñepytyvõ hag̃ua misionéro, superintendénte ha prekursór espesiálpe. Koʼã kontrivusión ojeporu avei oñepytyvõ hag̃ua umi ermánope oiko jave torménta vai, terremóto ha umícha. *

18 Ojejapo hag̃ua Salón del Reino. Koʼã kontrivusión ojeporu oñepytyvõ hag̃ua kongregasionkuérape ikatu hag̃uáicha omopuʼã isalonrã térã oarreglaka. Oñemeʼẽvévo kontrivusión hetave oĩta la pláta oñepytyvõ hag̃ua umi kongregasión oikotevẽvape isalonrã. *

19 Gásto kongregasionpegua. Umi kontrivusión ojeporu ojepaga hag̃ua umi gástore oĩva Salónpe. Umi ansiáno sapyʼánte heʼi avei oñemondo hag̃ua ko kontrivusióngui sukursálpe ikatu hag̃uáicha oñepytyvõ pe obra mundiálpe. Koʼã kásope oñeporandu raẽ kongregasiónpe ha haʼekuéra oĩmbárõ de akuérdo oñemondo upe kontrivusión. Káda mes pe ermáno oñenkargáva kuéntare ojapo peteĩ infórme finansiéro ojeleéva kongregasiónpe.

20. ¿Mbaʼéichapa ikatu ñamombaʼeguasu Jehovápe opa mbaʼe jarekóva reheve?

20 Jahechávo mbaʼéichapa ojepredika ha oñemboʼe umi héntepe oparupiete, ñanekyreʼỹ ‘ñamombaʼe hag̃ua Ñandejárape opa mbaʼe jarekóva reheve’ (Prov. 3:9, 10). Upearã ikatu jaiporu ñane mbaretekue, ñane arandu ha umi mbaʼe jajapokuaáva Jehová servísiope. Jaiporuse koʼã mbaʼe ojesegi hag̃ua ojepredika. Péro ñanemanduʼa vaʼerã ikatuha avei ñameʼẽ ñane kontrivusión. Upévare, jaaprovechákena opa oportunida ñameʼẽ hag̃ua Ñandejára Rréino rehehápe umi mbaʼe porã jarekóva. Umi kontrivusión ñameʼẽva ñande pyʼaite guive omombaʼeguasu Jehovápe ha ohechauka ñañemoĩha Irréino ládo.

^ párr. 1 Ñemañaha, 15 de julio de 1915, páhina 218-219.

^ párr. 8 Ñemañaha, 1 de agosto de 1899, páhina 201.

^ párr. 10 Peteĩ vivlísta heʼi pe ñeʼẽ ojetradusíva “odesidiháicha” heʼiseha peteĩ persóna “ojepyʼamongeta ha okalkulaha”. Heʼi avei “javyʼáramo jepe ñameʼẽvo jakalkula hetaʼỹre, lomímonte jasegi vaʼerã jajepyʼamongeta ñameʼẽ hag̃ua ñane kontrivusión” (1 Cor. 16:2).

^ párr. 17 Kapítulo 20-pe retopavéta informasión omombeʼúva mbaʼéichapa oñepytyvõ koʼã ermánope.

^ párr. 18 Kapítulo 19-pe retopavéta informasión omombeʼúva mbaʼéichapa oñemopuʼã umi Salón.