Ehecha oĩva pype

Ehecha oĩva pype

 KAPÍTULO 4

Mbaʼérepa ñamombaʼevaʼerã umi ñanemoakãvape?

Mbaʼérepa ñamombaʼevaʼerã umi ñanemoakãvape?

“Pemombaʼe hekópe maymávape.” (1 PEDRO 2:17.)

1, 2. a) Mbaʼépa ijetuʼu jepi jajapo hag̃ua? b) Mbaʼépa jahecháta koʼág̃a?

REHECHÁMAPA mbaʼéicha oñembohova vaipa peteĩ mitã ndojaposéi jave itúva ojeruréva chupe? Hováre jahecha mbaʼéichapa oñeñandu. Oikuaa iñeʼẽrenduvaʼerãha itúvape péro ndojaposéi upéva. Enterove sapyʼánte ñañeñandu avei péicha.

2 Ijetuʼu jepi jarrespeta hag̃ua umi ñanemoakãvape. Oikómapa nderehe upéva? Oiméramo péicha ndahaʼéi nderehénte oikóva. Koʼág̃a rupi ndojerrespetavéi voi avavépe. Péro la Biblia heʼi jarrespetavaʼerãha mburuvichakuérape (Proverbios 24:21). Ha jaipotáramo Ñandejára ñanderayhu jajapovaʼerã ko mbaʼe. Péro, mbaʼérepa ijetuʼuete? Mbaʼérepa Jehová ojerure ñandehegui upéva? Mbaʼépa ñanepytyvõta jajapose hag̃ua? Mbaʼéichapa jahechauka ñamombaʼeha umi autorida? Koʼág̃a jahecháta koʼã mbaʼe.

MBAʼÉREPA IJETUʼU

3, 4. Mbaʼéichapa oñepyrũvaʼekue pekádo, ha mbaʼéicha rupípa ijetuʼu jarrespeta umi autorida?

3 Mbaʼérepa ijetuʼu jarrespeta umi autorida? Mokõi mbaʼére: primero, ñande ñaneimperfékto, ha segundo katu umi ñanemoakãva iñimperfékto avei. Ko mbaʼe  oñepyrũ yma hardín de Edénpe, Adán ha Eva opuʼãrõ guare Ñandejárare. Péicha oñepyrũ pekádo ha upévare ñanemichĩ guive ñanderreveldese (Génesis 2:15-17; 3:1-7; Salmo 51:5; Romanos 5:12).

4 Ñaneimperfékto rupi, ñañemombaʼeguasuse ha ijetuʼu ñañemomichĩ hag̃ua ñande rapicha renondépe. Jepe aréma jaservi porã Ñandejárape, ikatu ñañembotuichase ha jajapose ñandéve ñandegustávante. Ñanemanduʼami Coré ojapovaʼekuére, haʼe ningo heta mbaʼe ohasa umi Israelguándi. Péro ou oñembotuichase ha upévare omboliga umi héntepe opuʼã hag̃ua Moisés rehe. Moisés ningo pe kuimbaʼe ipyʼaporãvéva oikóva upérõ (Números 12:3; 16:1-3). Ñapensamína avei rréi Uzías rehe, haʼe oike Jehová témplope ha ojapose peteĩ mbaʼe umi saserdótente ikatúva ojapo (2 Crónicas 26:16-21). Coré ha Uzías oñembotuichase rupi oiko ivaíva hesekuéra. Upéva ñanemboʼe ñañembotuichaséramo ijetuʼuveha jarrespeta umi ñanemoakãvape.

5. Mbaʼe ivaívapa ojapo heta mburuvicha?

5 Avei umi mburuvichakuéra ogoverna vai rupi ndojerrespetavéi chupekuéra. Yma guive heta mburuvicha ipyʼahatã, ombotavy ha ojopyeterei umi héntepe (Eclesiastés 8:9). Pór ehémplo, Saúl ipyʼaporã ha ndaijejapoivaʼekue Jehová omoĩrõ guare chupe ogoverna hag̃ua Israélpe. Péro ou oñembotuichase ha oipota chupénte ojeguerohory, upévare opersegi reiete Davídpe, peteĩ kuimbaʼe ojeroviáva Ñandejárare (1 Samuel 9:20, 21; 10:20-22; 18:7-11). Upéi David ojupi rréiramo Israélpe. Haʼe ogoverna porã vaʼekue, péro ou ojapo peteĩ mbaʼe ivaietereíva. Oipeʼa Uríasgui hembireko ha omondo chupe ñorairõ ijetuʼuvehápe omano hag̃ua (2 Samuel 11:1-17). Péicha jahecha umi mburuvicha  iñimperfékto rupi oreko asyha umi oĩvape ipoguypekuéra. Ha nomombaʼéiramo Jehovápe katu oreko vaivéntema umi héntepe. Omombeʼu rire mbaʼépa oiporu umi papa opersegi hag̃ua heta héntepe, peteĩ istoriadór Gran Bretañaygua heʼi: “Pe podér oporombyaise, ha peteĩnte omandáramo oñembyai katuete”. Jahechávo koʼã mbaʼe oiméne jaikuaase: mbaʼérepa jarrespetavaʼerã umi ñanemoakãvape?

MBAʼÉREPA JARRESPETAVAʼERÃ

6, 7. a) Emombeʼumi mbaʼérepa ñañemoĩ Jehová sãmbyhy ykére. b) Mbaʼépa jajapóta ijetuʼu jave ñandéve ñaneñeʼẽrendu Jehovápe, ha máva ehémplopa jasegivaʼerã?

6 Jarrespeta umi ñanemoakãvape mbohapy mbaʼére: jahayhúgui Jehovápe, jahayhúgui ñande rapichakuérape ha jajehayhúgui ñandejupe voi. Ñande ningo jahayhuve Jehovápe opa mbaʼégui ha upévare jaipota ovyʼa (Proverbios 27:11; Marcos 12:29, 30). Jaikuaa Edénpe oñepuʼã hague Jehová sãmbyhýre. Ha upe guive hetaiterei yvypóra oñemoĩ Satanás ykére ha opuʼã Jehová goviérnore. Ñande katu javyʼa jajepytaso haguére Jehová ykére ha upévare ñanekyreʼỹ jaleévo Apocalipsis [Revelación] 4:11 heʼíva. Jaikuaa porã Jehová haʼeha Mburuvicha Guasu yvága ha yvýpe, ha upévare haʼe añoite ogovernavaʼerã. Upéicha rupi ñañemoĩ Jehová sãmbyhy ykére ñaneñeʼẽrendúvo chupe ára ha ára.

7 Péro jahechauka hag̃ua jarrespetaha Jehovápe ndahaʼéi ñaneñeʼẽrenduntevaʼerã chupe. Ñande jajapo haʼe oipotáva jahayhúgui chupe. Péro sapyʼánte ijetuʼúta ñaneñeʼẽrendu hag̃ua Jehovápe. Péicha jave tekotevẽ jajapo ojapo haguéicha pe mitãʼi ñañeʼẽ hague. Haʼe ojapo itúva heʼíva jepe ndojaposéi. Ha ani ñanderesarái Jesús avei ojapo hague itúva oipotáva ijetuʼúramo jepe.  Haʼe heʼi itúvape: “Anítei oiko pe che aipotáva, pe nde reipotávante toiko” (Lucas 22:42).

8. a) Mbaʼéichapa jahechauka ñañemoĩha Jehová poguýpe, ha mbaʼe ehémplopa ohechauka haʼe opensáva? b) Mbaʼépa ñanepytyvõta jajapo hag̃ua ojeʼéva ñandéve? (Ehecha heʼihápe “ Ehendu ojeʼéva ndéve ha ejapo”.)

8 Koʼág̃a Jehová oiporu Iñeʼẽ ha avei yvyporakuéra haʼe oiporavóva omombeʼu hag̃ua mbaʼépa oipota jajapo. Upévare jahechauka ñañemoĩha ipoguýpe ñaneñeʼẽrendúvo umi haʼe omoĩvape ñanemoakã hag̃ua. Ñapuʼãramo hesekuéra ha nañahenduséiramo umi konsého omeʼẽva hikuái ñandekorrehi hag̃ua ñambopochýta Ñandejárape. Pór ehémplo yma umi Israelgua opuʼãrõ guare Moisés rehe, Jehová heʼi opuʼãha hese voi (Números 14:26, 27).

9. Mbaʼérepa jahayhúramo ñande rapichápe jarrespetavaʼerã umi ñanemoakãvape? Emombeʼu peteĩ ehémplo.

9 Avei jarrespeta umi ñanemoakãvape jahayhu rupi ñande rapichakuérape. Mbaʼérepa jaʼe upéva? Ñantende hag̃ua ikatu ñambojoja ko mbaʼére: ñamoĩ chupe ñande haʼeha peteĩ soldádo. Ani hag̃ua ñamano ñorairõháme, ñande ha ñane irũnguéra jarrespeta, ñaipytyvõ ha ñaneñeʼẽrenduvaʼerã ñande ruvichápe. Péro oĩramo peteĩ jepe oñemoĩva hese, ikatu oho vaipa enterovépe. Ñañeʼẽvo soldadokuérare ikatu ou ñane akãme umi jejuka vaiete oikóva jepi gerrahápe. Péro Jehová soldadokuéra ojapo iporãvante. La Biblia heʼi Jehová oguerekoha heta ehérsito ipoguýpe (1 Samuel 1:3). Jehová omoakã hetaiterei ánhel imbaretéva. Ha ko yvy ape ári oguereko avei isiervokuéra haʼetéva peteĩ ehérsito oñorairõvahína ojapo hag̃ua hembipota (Salmo 68:11; Ezequiel 37:1-10). Ñapuʼãramo umi Jehová omoĩvare ñanemoakã hag̃ua, ikatu oho vai ñane ermanokuérape. Peteĩ ermáno opuʼãramo umi ansiánore katuete oĩta  oñeñandu vaíva upévare (1 Corintios 12:14, 25, 26). Ogapýpe katu peteĩ mitã opuʼãramo ituvakuérare, enterove ohasa asy. Upéicharõ jahechauka jahayhuha ñande rapichápe ñamombaʼe ha ñaipytyvõramo umi ñanemoakãvape.

10, 11. Mbaʼérepa iporã ñaneñeʼẽrendu umi ñanemoakãvape?

10 Jarrespetáramo umi ñanemoakãvape oho porãta ñandéve. Jehová heʼi jave ñaneñeʼẽrenduvaʼerãha umi ñanemoakãvape, katuete ohechauka mbaʼérepa iporã. Pór ehémplo, heʼi mitãnguéra iñeʼẽrenduvaʼerãha ituvakuérape. Mbaʼérepa? Oho porã hag̃ua chupekuéra (Deuteronomio 5:16; Efesios 6:2, 3). Ha heʼi ñaneñeʼẽrenduvaʼerãha ansianokuérape ani hag̃ua ikangy ñande jerovia (Hebreos 13:7, 17). Avei Jehová heʼi ñamombaʼevaʼerãha mburuvichakuérape jaiko hag̃ua pyʼaguapýpe (Romanos 13:4).

 11 Jaikuaávo mbaʼérepa Jehová oipota ñaneñeʼẽrendu ñanekyreʼỹve jarrespeta hag̃ua umi ñanemoakãvape. Koʼág̃a jahecháta máva mávapepa jarrespetavaʼerã.

JAPORORRESPETA OGAPÝPE

12. Mbaʼépa ojapovaʼerã menakuéra, ha mbaʼéichapa ojapóta upéva?

12 Jehová ningo família Apohare. Haʼe oipota opa mbaʼe oĩ hendápe porã, upévare heʼi avei mbaʼéichapa ojeikovaʼerã ogapýpe (1 Corintios 14:33). Haʼe heʼi ména omoakãvaʼerãha hogapy. Ménape katu omoakã Jesucristo ha upévare oñehaʼãvaʼerã omoakã hogapy Jesús omoakãháicha kongregasión (Efesios 5:23). Pe kuimbaʼe ndohejaivaʼerã ótrope ko rresponsavilida ha oñehaʼãvaʼerã ojapo porã. Naiporãmoʼãi ipyʼahatã térã ojopyetereíramo hembireko ha ifamiliakuérandi. Omokunuʼũvaʼerã chupekuéra ha imbaʼeporã hendivekuéra. Haʼe imanduʼa meme vaʼerã oĩha Jehová poguýpe.

Túva omoakãvo hogapy oñehaʼã osegi Jesucristo ehémplo

13. Mbaʼépa Jehová oipota ojapo tembirekokuéra?

13 Pe tembireko oipytyvõvaʼerã iménape. Chupe avei oñemeʼẽ autorida ogapýpe. La Biblia heʼi ani hag̃ua jajei ‘ñande sy ñanemboʼévagui’ (Proverbios 1:8). Péro haʼe ohechakuaa oñemoĩvaʼerãha iména  poguýpe. Peteĩ tembireko ojeroviáva Jehováre omombaʼe iménape ha oipytyvõ chupe omoakã porã hag̃ua hogapy. Haʼe oipytyvõ iménape ha ni mbaʼeveichavérõ ndoapoʼíri chupe térã nopuʼãi hese. Jepe sapyʼánte ndogustái chupe iména odesidíva oipytyvõ osẽ porã hag̃ua. Ha mbaʼépa oiko iména ndojeroviáiramo Jehováre? Upéicharõ ijetuʼuvéta chupe, péro orrespetáramo iménape ikatu haʼe oservise avei Jehovápe (1 Pedro 3:1).

14. Mbaʼéichapa mitãnguéra ombovyʼáta ituvakuérape ha avei Jehovápe?

14 Mitãnguéra iñeʼẽrendúva itúva ha isýpe ombovyʼa Jehovápe. Ha ituvakuéra ovyʼa avei (Proverbios 10:1). Ha umi mitã okakuaáva isy térã itúvandi año koʼýte iñeʼẽrenduvaʼerã. Upéva tuicha oipytyvõta isy térã itúvape hogapýpe. Peteĩ família oiko porã ha ovyʼáta enterove ojapóramo Ñandejára heʼíva. Ha péicha omombaʼeguasúta  Jehovápe, pe família Apohare (Efesios 3:14, 15).

JAPORORRESPETA KONGREGASIÓNPE

15. a) Mbaʼéichapa kongregasiónpe jahechauka jarrespetaha Jehovápe? b) Mbaʼépa heʼi la Biblia ñanepytyvõva ñaneñeʼẽrendu hag̃ua umi omoakãvape kongregasión? (Ehecha heʼihápe “ Peneñeʼẽrendúke Pene Ansianokuérape”.)

15 Jehová omoĩ Itaʼýrape ogoverna hag̃ua kongregasión (Colosenses 1:13). Jesús katu omoĩ ‘pe tembiguái jeroviaha ha iñarandúva’ omeʼẽ hag̃ua Jehová siervokuérape oikotevẽva omombarete hag̃ua ijerovia (Mateo 24:45-47). Testigos de Jehová oreko peteĩ aty hérava Cuerpo Gobernante orrepresentáva ko tembiguáipe. Ha ojapo haguéicha primer síglope, Cuerpo Gobernante heʼi ansianokuérape mbaʼépa ojapovaʼerã. Ikatu heʼi chupekueraite voi térã umi superintendénte ovisitáva kongregasión rupive. Upéicharõ jarrespetáramo umi ansiánope, ñaneñeʼẽrendu Jehovápe (Hebreos 13:17).

16. Mbaʼérepa ikatu jaʼe espíritu sánto oipytyvõha ojeporavo hag̃ua ansianokuérape?

16 Umi ansiáno ha siérvo ministeriál iñimperfékto. Haʼekuéra ojavy ñande jajavyháicha. Upéicharamo jepe, umi ansiáno haʼehína peteĩ rregálo omeʼẽva ñandéve Jehová. Haʼekuéra ñanepytyvõ ñamombarete hag̃ua ñande jerovia (Efesios 4:8). La Biblia heʼi espíritu sánto rupive oñemoĩha umi ansiáno kongregasiónpe (Hechos 20:28). Mbaʼéichapa upéva? Primero umi ermáno ojapovaʼerã la Biblia ojeruréva chuguikuéra. Ha jaikuaa Ñandejára oiporu hague ijespíritu ojehai hag̃ua Iñeʼẽ (1 Timoteo 3:1-7, 12; Tito 1:5-9). Segundo katu, umi ansiáno oñembyatýva ohecha hag̃ua ikatúpa peteĩ ermáno oservi ansiánoramo, oñemboʼe raẽ Jehovápe ha ojerure ijespíritu sánto.

17. Mbaʼérepa kuñanguéra oñakãhoʼivaʼerã ojapo hag̃ua kuimbaʼe rembiapo kongregasiónpe?

 17 Sapyʼánte kongregasiónpe ndaipóri ansiáno térã siérvo ministeriál omoakã hag̃ua rreunión térã predikasión. Péicha jave peteĩ ermáno ojevautisáva ikatu ojapo upéva. Péro ndaipóriramo ni peteĩ ikatúva, peteĩ ermána ikatupyrýva ojapovaʼerã. Tekotevẽramo peteĩ ermána ojapo peteĩ ermáno rembiapo, tahaʼe hógape térã kongregasiónpe oñakãhoʼivaʼerã (1 Corintios 11:3-10). * Upéva ndahaʼéi ojeapoʼígui kuñáme. Péicha haʼe ohechauka omombaʼeha Jehová oipotáva ojejapo ogapýpe ha kongregasiónpe.

JARRESPETA MBURUVICHAKUÉRAPE

18, 19. a) Mbaʼépa ñanemboʼe Romanos 13:1-7? b) Mbaʼéichapa jahechauka jarrespetaha mburuvichakuérape?

18 Ñande jaservíva Jehovápe ñañehaʼãmbaite jajapo Romanos 13:1-7 heʼíva. Upépe ojeʼe “mburuvicha” umi ogovernávare peteĩ tetã. Jehová oheja chupekuéra ojapo heta mbaʼe ojeiko hag̃ua pyʼaguapýpe ha oñatende hag̃ua hentekuéra oikotevẽvare. Jahechauka jarrespetaha chupekuéra ñakumplívo umi léi haʼekuéra omoĩva. Upévare japaga umi impuésto, ñamoĩmba oñeporandúva umi dokuméntope ha ñakumplipaite umi léi jarekóramo negósio, óga térã ambue mbaʼe. Péro umi goviérno heʼíramo ani hag̃ua ñaneñeʼẽrendu Ñandejárape, mbaʼeveichavérõ ndajajapomoʼãi upéva. Umi apóstol heʼi haguéicha yma, ñande avei jaʼe: ‘Oreñeʼẽrenduvaʼerã Ñandejárape yvypórape rangue’ (Hechos 5:28, 29; ehecha heʼihápe “ Mávapepa ñaneñeʼẽrenduvaʼerã?”).

 19 Avei jahechauka ñamombaʼeha mburuvichakuérape jatrata porãvo umi ombaʼapóvape chupekuéra g̃uarã. Sapyʼánte tekotevẽ jaha ñañeʼẽ hendivekuéra. Pór ehémplo, apóstol Pablo oñeʼẽvaʼekue rréi Herodes ha mburuvicha Festo ndive. Oikuaáramo jepe haʼekuéra hekovaiha, Pablo orrespeta chupekuéra (Hechos 26:2, 25). Ñande avei jajapovaʼerã upéicha, ñañeʼẽ jave peteĩ mburuvichándi, tahaʼe omanda tuicháva térã peteĩ tahachi ndive. Mitãrusukuéra oservíva Jehovápe orrespetavaʼerã imboʼeharakuérape ha umi ombaʼapóva eskuélape. Jarrespetavaʼerã enterovépe, jepe ndochaʼéi testigos de Jehováre. Enterove ohechavaʼerã jarrespetaha ñande rapichakuérape jepe haʼekuéra ndogueroviái ñande jagueroviáva (Romanos 12:17, 18; 1 Pedro 3:15).

20, 21. Mbaʼe iporãvapa jahupyty ñamombaʼévo ñande rapichakuérape?

20 Ñañehaʼãmbaitevaʼerã jarrespeta opaichagua tapichápe. Apóstol Pedro heʼi: “Pemombaʼe hekópe maymávape” (1 Pedro 2:17). Heta hénte ñandeguerohorýta jarrespetáramo chupekuéra, saʼi rupi koʼág̃a umi opororrespetáva. Péicha jajapóta Jesús heʼivaʼekue: “Peñehaʼã peẽ pehesape opavave renondépe. Ha haʼekuéra ohechávo pene rembiapo porãngue, omombaʼeguasúta pende Ru, yvágape oĩvape” (Mateo 5:16).

21 Ko múndo ningo oĩ pytũmbýpe, ha umi hénte ipyʼaporãva ohose hesakãháme. Upévare jarrespetáramo ñande rogayguápe, ñane ermanokuéra ha mburuvichakuérape oĩta ohecháva upéva ha ikatu ñanemoirũse jaservi hag̃ua Jehovápe. Ajépa iporãitéta upéva! Ndaupéichairamo jepe, ñamombaʼéramo ñande rapichakuérape jahupytýta peteĩ mbaʼe ijojahaʼỹva: ñambovyʼáta Jehovápe ha haʼe ñanderayhúta.

^ párr. 17 Informasión oĩvévape heʼihápe “Mbaʼéicha javépa ha mbaʼérepa kuñanguéra oñakãhoʼivaʼerã?” ojehechauka mbaʼéichapa ojejapovaʼerã ko mbaʼe.