Ehecha oĩva pype

Ehecha menú secundario

Ehecha oĩva pype

Testígo de Jehová

guarani

‘Jaikókena Ñandejára mborayhúpe’

 KAPÍTULO 1

Mbaʼépa Heʼise Jahayhu Ñandejárape

Mbaʼépa Heʼise Jahayhu Ñandejárape

‘Jahayhu Ñandejárape heʼise jajapo iléi, ha iléi ndahaʼéi mbaʼe pohýi.’ (1 JUAN 5:3.)

1, 2. Mbaʼérepa nde rehayhu Jehovápe?

NDÉPA rehayhu Ñandejárape? Oiméramo reñemeʼẽma chupe eréta katuete rehayhuha. Ha ikatu jaʼe voi enterove ohayhuvaʼerãha Jehovápe. Jahayhu ningo Ñandejárape jaikuaágui haʼe ñanderayhuha. La Biblia heʼi voi: ‘Ñande jahayhu Jehovápe, haʼe raẽ ñanderayhu haguére’ (1 Juan 4:19).

2 Jehová ojapo heta mbaʼe ohechaukáva ñanderayhuha. Pór ehémplo omeʼẽ ñandéve ko yvy iporãitéva ha ára koʼẽre omoĩ ñaikotevẽva jaikove hag̃ua (Mateo 5:43-48). Iñimportantevéva katu ñanepytyvõ ñañemoag̃ui hag̃ua hese. Upearã omeʼẽ ñandéve la Biblia. Avei Jehová oipota ñañemboʼe chupe. Ha ikatu jajerovia ñanerendutaha ha ñanepytyvõtaha ijespíritu sánto rupive (Salmo 65:2; Lucas 11:13). Péro oĩ peteĩ mbaʼe tuichaitevéva ohechaukáva Haʼe ñanderayhuha: omeʼẽ Itaʼýra ohayhuvéva omano hag̃ua ñanderehehápe. Péicha ñandepeʼa pekádo ha ñemano poguýgui. Mbaʼeichaitépa ñanderayhu Jehová! (Juan 3:16; Romanos 5:8.)

3. a) Mbaʼépa jajapovaʼerã Ñandejára akóinte ñanderayhu hag̃ua? b) Mbaʼépa tekotevẽ ñañeporandu, ha mbaʼéichapa apóstol Juan ombohovái?

 3 Jehová oipota jaiko imborayhúpe opa ára g̃uarã. Péro upearã ñañehaʼãvaʼerã. Ñandejára Ñeʼẽ heʼi: ‘Peikókena Ñandejára mborayhúpe, pehaʼarõvo pe jeikove opaʼỹva’ (Judas 21). Koʼápe heʼívo ‘peikókena’ ohechauka tekotevẽha jakuʼe, Jehová akóinte ñanderayhu hag̃ua. Péva heʼise ñane rembiapo rupive jahechaukavaʼerãha jahayhuha chupe. Upévare iporã ñañeporandu: “Mbaʼépa ajapovaʼerã ahechauka hag̃ua ahayhuha Ñandejárape?”. Apóstol Juan ombohovái  ko porandu heʼívo: ‘Jahayhu Ñandejárape heʼise jajapo iléi, ha iléi ndahaʼéi mbaʼe pohýi’ (1 Juan 5:3). Ñande ningo jahechaukase Ñandejárape mbaʼeichaitépa jahayhu chupe ha upévare iporã jahechami mbaʼéichapa ikatu jajapo upéva.

MBAʼÉICHAPA JAHECHAUKA ‘JAHAYHUHA ÑANDEJÁRAPE’

4, 5. Emombeʼumi mbaʼéichapa reñepyrũ rehayhu Jehovápe.

4 Apóstol Juan heʼi raẽ: ‘Jahayhu Ñandejárape’. Jahecháta mbaʼéichapa jahechauka ko mborayhu. Péro upéva mboyve ñañehaʼãna ñanemanduʼami mbaʼéichapa ñañeñanduvaʼekue oñepyrũrõ guare heñói ñane korasõme mborayhu Jehováre.

Ñañemeʼẽvo Jehovápe ha jajevautisa jahechauka jahayhu ha ñaneñeʼẽrenduseha chupe

5 Ñapensamína, jastudia ypýrõ guare la Biblia jaikuaa Jehovápe ha umi mbaʼe ojapótava ha upéi jaju jajerovia hese. Avei jaikuaa enteroite ñanaseha pekádo reheve, upéicharamo jepe Jehová omeʼẽ ñandéve peteĩ oportunida iporãitereíva Jesucristo rupive: ikatúta jaiko pekadoʼỹre Adán oiko haguéicha iñepyrũme, ha jahupyty jeikove opaʼỹva (Mateo 20:28; Romanos 5:12, 18). Avei ñantende porãve mbaʼeichagua sakrifísiopa ojapo Jehová omboúvo Itaʼýra ohayhuvéva omano hag̃ua ñanderehehápe. Upéva opoko ñane korasõre ha ñañepyrũ jahayhu Jehovápe (1 Juan 4:9, 10).

6. Mbaʼéichapa jahechauka jahayhu añeteha Ñandejárape, ha mbaʼépa jajapóma jahayhúgui chupe?

6 Péro ko mborayhu okakuaavaʼerã. Mborayhu ningo ndahaʼéi peteĩ mbaʼe ñañandúnteva térã jaʼénteva. Jahayhu añetéramo Ñandejárape ndajaʼemoʼãi: “Che ahayhu Jehovápe” ha upépe  opáma. Mborayhu ningo ojogua ñande jeroviápe: jahechaukavaʼerã umi mbaʼe jajapóvare (Santiago 2:26). Jahechauka jahayhuha ñande rapichápe jajapóramo umi mbaʼe chupe ogustáva. Upéicha avei ñañepyrũvo jahayhu Jehovápe jajaposeveseve umi mbaʼe Haʼe oguerohorýva. Ikatu voi jajevautisáma ha oikóma ñandehegui testigo de Jehová. Oiméramo upéicha jajapóneraʼe upéva jahayhu ha jaservise rupi chupe. Upéva hína pe desisión iñimportantevéva. Ñapromete Jehovápe jaikotaha jajapo hag̃ua hembipota ha upéi jahechauka ñañemeʼẽ hague chupe jajevautisávo (Romanos 14:7, 8). Apóstol Juan ohechauka mbaʼépa jajapovaʼerã ñakumpli hag̃ua ñaprometéva Jehovápe. Jahechamína.

‘JAJAPO ILÉI HEʼÍVA’

7. Mbaʼe mbaʼépa heʼi Ñandejára léi ha mbaʼéichapa ñakumplíta?

7 Apóstol Juan ohechauka jahayhu Ñandejárape heʼiseha ‘jajapo iléi’ heʼíva. Ha mbaʼépa heʼi Ñandejára léi? La Biblia omombeʼu ñandéve. Pór ehémplo Jehová léi heʼi ndovaleiha jakaʼu, ñanderekokyʼa, jaadora taʼanga, ñamonda ha ñandejapu (1 Corintios 5:11; 6:18; 10:14; Efesios 4:28; Colosenses 3:9). Ñakumpli hag̃ua Ñandejára léi jaikovaʼerã la Biblia heʼiháicha.

8, 9. Mbaʼéichapa jaikuaáta Jehová oipotáva jajapo la Bíbliape noĩriramo peteĩ léi oñeʼẽva upe mbaʼére? Emoĩ peteĩ ehémplo.

8 Péro ndopái upépe. Jaikuaa ningo Jehová nomoĩriha léi opa mbaʼe jajapóvape g̃uarã. Káda día jatopa heta mbaʼe la Biblia ndeʼirihápe mbaʼépa jajapovaʼerã. Upéicha jave, mbaʼéichapa ikatu jaikuaa oguerohorýpa Jehová jajapóva? La Biblia ningo ohechauka  porã mbaʼépa ogusta Ñandejárape. Upévare jastudiávo la Biblia jaikuaáta mbaʼépa Jehová oguerohory ha mbaʼépa ombopochy chupe (Salmo 97:10; Proverbios 6:16-19). Péicha jahechakuaáta avei mbaʼe mbaʼépa haʼe oipota jajapo. Jaikuaavévo Jehovápe jaikuaa porãvéta mbaʼéichapa jaikovaʼerã. Upéicharõ ‘jaikuaáta mbaʼépa Ñandejára oipota’, noĩriramo jepe la Bíbliape peteĩ léi oñeʼẽva upe mbaʼére (Efesios 5:17).

9 Pór ehémplo la Bíbliape ndaipóri peteĩ léi heʼíva ndovaleiha ñamaña umi pelíkula térã prográma itieʼỹvare térã ohechaukáva oñorairõ ha ojojukáva. Péro ñaikotevẽpa peteĩ léi heʼíva naiporãiha ñamaña koʼãvare? Nahániri. Ñandejára Ñeʼẽ ohechauka porã haʼe ‘mbaʼeve ndoikuaaseiha hekovaívagui’ térã oñorairõsévagui (Salmo 11:5). Avei heʼi ohusgataha ‘umi hekokyʼáva ha oporomoakãratĩvape’ (Hebreos 13:4). Jajepyʼamongetávo la Biblia heʼívare koʼã mbaʼére jahecha porã mbaʼépa Jehová oipota jajapo. Upévare ndajahechamoʼãi umi prográma ohechaukáva umi mbaʼe ndogustáiva Ñandejárape. Haʼe ovyʼáta ñamboykéramo umi vyʼarã ñanemokyreʼỹva jajapo hag̃ua ivaíva jepe ko múndo heʼi iporãha. *

10, 11. Mbaʼérepa ñaneñeʼẽrenduse Jehovápe ára ha ára, ha mbaʼéichapa jajapovaʼerã upéva?

10 Mbaʼérepa jajapovaʼerã Ñandejára léi heʼíva? Mbaʼérepa jaikose Ñandejára oipotaháicha ára ha ára? Ndahaʼéi ndajaipotáiguinte oiko ñanderehe ivaíva térã jakyhyjégui Ñandejára ñandekastigárõ  g̃uarã (Gálatas 6:7). Ñaneñeʼẽrendu Jehovápe péicha jahechaukágui jahayhuha chupe. Umi mitã ningo oipotaiterei jepi ituvakuéra oguerohory chupekuéra ha ñande avei jaipota Jehová ñandeguerohory (Salmo 5:12). Haʼe ningo ñande Ru ha jahayhu chupe. Javyʼaiterei ningo jaikuaágui Jehová ‘ñanepytyvõtaha’ jaiko rupi haʼe oipotaháicha (Proverbios 12:2).

11 Upéicharõ, kyreʼỹme ñaneñeʼẽrenduvaʼerã Ñandejárape, ndahaʼéi tova pukúpe térã ñandegusta javénte. * Ñande ndajadesidíri arakaʼépa ñaneñeʼẽrendúta térã arakaʼépa nahániri. Ndaikatúi ñaneñeʼẽrendu oho porãmba jave ñandéve térã ndaijetuʼúi javénte. Ñande ‘ñaneñeʼẽrenduvaʼerã ñande pyʼaite guive’ (Romanos 6:17). Ha pe salmísta heʼi haguéicha jaʼe: ‘Chepyʼarory nde léi reheve, ahayhúgui ne ñeʼẽ’ (Salmo 119:47, ÑÑB). Upéicharõ, ñande javyʼa jajapóvo Jehová oipotáva. Jaikuaa chupe añoite ñaneñeʼẽrenduvaʼerãha opa mbaʼépe (Deuteronomio 12:32). Jaikose ningo Noé oiko haguéicha. Haʼe ohayhúgui Ñandejárape iñeʼẽrenduvaʼekue chupe omano meve. Ha upéicha ñanderehe avei ojeʼéta Noére ojeʼevaʼekue: “Ha Noé ojapopa [Ñandejára] heʼi hagueichaite ichupe” (Génesis 6:22, ÑÑB).

12. Mbaʼe jajapóramopa ñambovyʼáta Jehovápe?

12 Mbaʼéichapa oñeñandu Jehová ohechávo kyreʼỹme ñaneñeʼẽrenduha chupe? La Biblia heʼi upéva ‘ombovyʼaha’ chupe (Proverbios 27:11). Péro, añetehápepa ikatúne ñambovyʼa yvága ha yvy  Apoharépe? Ikatu. Jahechamína mbaʼérepa. Jehová ningo ñandeapo ikatu hag̃uáicha jaiporavo ñandejehegui jajapótava. Upévare ikatu jadesidi ñaneñeʼẽrendútapa chupe térã nahániri (Deuteronomio 30:15, 16, 19, 20). Ha jajapo jave Jehová oipotáva jahayhúgui chupe, haʼe ovyʼaiterei (Proverbios 11:20). Péicha katuete oho porãta ñandéve.

‘ILÉI NDAHAʼÉI MBAʼE POHÝI’

13, 14. Mbaʼérepa ikatu jaʼe Ñandejára léi ‘ndahaʼeiha mbaʼe pohýi’, ha mbaʼérepa ikatu ñambojoja?

13 Apóstol Juan heʼíva upe rire ñanemokyreʼỹ: Ñandejára léi “ndahaʼéi mbaʼe pohýi”. * Upéicharõ Jehová ndojeruréi ñandehegui ikatuʼỹva jajapo térã hasyetereítava. Ñaneimperféktoramo jepe, enterove ikatu jajapo haʼe ojeruréva ñandehegui.

14 Ikatu ñambojoja ko mbaʼére. Peteĩ ne amigoite ováta ha heʼi ndéve reipytyvõ hag̃ua chupe. Peguerojavaʼerã heta mbaʼe. Oĩ ivevýiva ha avei umi ipohýiva mokõimante ikatútava ipuʼaka hese. Ne amígo oiporavóma umi oipotáva nde rehupi. Ha ndoipotáigui reñelastima, ndohejamoʼãi rehupi neaño umi ipohyietereíva. Upéicha avei Ñandejára, haʼe ñanderayhu ha ndojeruremoʼãi ñandéve peteĩ mbaʼe ikatuʼỹva jajapo (Deuteronomio 30:11-14). Haʼe ndoipotái jahupi peteĩ mbaʼe ipohyietereíva. Jehová oikuaa mbaʼépa ikatu jajapo, “oikuaa mbaʼéguipa  ñandeaporakaʼe, oikuaa porã yvynteha ñande” (Salmo 103:14).

15. Mbaʼérepa ikatu jaguerovia Jehová heʼíva iporãveha ñandéve g̃uarã?

15 Jehová ojeruréva ñandehegui ndahaʼeiete mbaʼe pohýi, ojapo porã guei ñanderehe (Isaías 48:17). Moisés heʼivaʼekue umi Israelguápe: ‘Ñandejára heʼi ñandéve jajapo hag̃ua hekoitépe iñeʼẽ ha jakyhyje hag̃ua chugui, opaite ára oho porãmba hag̃ua ñandéve, Haʼe oñangareko porã hag̃ua ñanderehe, ojapoháicha ko ára kóva peve’ (Deuteronomio 6:24, ÑÑB). Ñande avei jagueroviakuaa Jehová heʼíva iporãveha ñandéve g̃uarã. Mbaʼérepa? Haʼe ningo pe iñaranduvéva ha upévare oikuaa porã mbaʼéichapa javyʼavéta (Romanos 11:33). Avei Jehová hína pe oporohayhuvéva, ndaipóri ohupytýva chupe ko mbaʼépe (1 Juan 4:8). Opa mbaʼe Jehová heʼíva ha ojapóvare jahecha ñanderayhuha, umíva apytépe umi léi omeʼẽva ñandéve.

16. Mbaʼépa ñanepytyvõta ñaneñeʼẽrendu hag̃ua Ñandejárape, jepe ko múndo aña ñandejopy ha ñaneimperfékto?

16 Péro ijetuʼu jepi ñaneñeʼẽrendu Ñandejárape. Ko múndo aña, ‘oĩva Satanás poguýpe’ ñandejopy ha ñañemoĩvaʼerã hese (1 Juan 5:19, ÑÑB). Avei ñaneimperfékto rupi ñaneraʼãve umi mbaʼe vai, upévare ñañehaʼãmbaitevaʼerã jajapo Ñandejára oipotáva (Romanos 7:21-25). Jahayhúramo Ñandejárape ñasẽ porãta ko ñorairõme. Jehová ohovasa umi iñeʼẽrendúva ha ohayhúvape chupe. Haʼe omeʼẽ espíritu sánto “umi iñeʼẽrendúvape chupe” (Hechos 5:32). Ha ko espíritu ñanepytyvõ ñanderekoporã ha ñaneñeʼẽrenduse  hag̃ua Ñandejárape ára ha ára (Gálatas 5:22, 23).

17, 18. a) Mbaʼépa jahecháta ko lívrope, ha mbaʼe mbaʼépa ñanemanduʼavaʼerã? b) Mbaʼépa jahecháta kapítulo 2-pe?

17 Ko lívrope jahecháta mbaʼépa heʼi Jehová tekopotĩre ha umi mbaʼe oipotáva jajapo. Jastudiávo umíva ñanemanduʼákena koʼã mbohapy mbaʼe iñimportántevare. Primero Jehová nañandejopýi ñaneñeʼẽrendu hag̃ua chupe, haʼe oipota guei kyreʼỹme jajapo heʼíva. Segundo jajapóramo upéva oho porãta ñandéve koʼág̃a ha opa ára g̃uarã. Ha tercero ñaneñeʼẽrendúramo opa mbaʼépe jahechaukáta mbaʼeichaitépa jahayhu chupe.

18 Ñanepytyvõ hag̃ua jadesidíta jave iporãpa térã ivaípa peteĩ mbaʼe, Jehová omeʼẽ ñandéve peteĩ rregálo neporãmba jepéva. Upéva hína ñane konsiénsia. Péro ñane konsiénsia ohechauka hag̃ua ñandéve pe tape porã tekotevẽ japrepara, ha kapítulo 2-pe jahecháta upéva.

^ párr. 11 Umi demónio jepe iñeʼẽrendu tova pukúpe. Jesús heʼírõ guare chupekuéra osẽ hag̃ua umi héntegui, haʼekuéra ojapómante upéva ndojaposéiramo jepe (Marcos 1:27; 5:7-13).

^ párr. 13 Ko ñeʼẽ ojeporu avei Mateo 23:4-pe. Upépe ojeʼe umi léi atýra omoĩvaʼekue umi fariséo ha mboʼehára haʼeha “mbaʼe pohýi ikatuʼỹva jaropuʼaka”. Ojeporu avei Hechos 20:29, 30-pe ojehechauka hag̃ua mbaʼéichapa umi mboʼehára japu oreko vaíta ha ombotavýta hetápe.