Ehecha oĩva pype

Ehecha menú secundario

Ehecha oĩva pype

Testígo de Jehová

guarani

‘Jaikókena Ñandejára mborayhúpe’

 KAPÍTULO 8

Ñandejára ohayhu umi ipotĩvape

Ñandejára ohayhu umi ipotĩvape

‘Pe ipotĩvandi, Nde nepotĩta.’ (SALMO 18:26, S.)

1-3. a) Mbaʼérepa peteĩ sy oipota imemby ipotĩ? b) Mbaʼérepa Jehová oipota ñanepotĩ, ha mbaʼérepa ñañehaʼãvaʼerã ñanepotĩ?

PETEĨ kuñakarai oprepara imembýpe osẽ hag̃ua. Upearã ombojahu ha omonde porã. Haʼe oikuaa imemby ipotĩramo hesãivetaha. Avei oikuaa umi hénte orreparataha hese pe mitãʼi ikyʼáramo.

2 Jehová ñande Ru yvagapegua oipota avei ñanepotĩ. La Biblia heʼi Haʼe ipotĩtaha umi ipotĩva ndive (Salmo 18:26, S). * Mbaʼérepa Jehová ojerure upéva ñandehegui? Primero haʼe ñanderayhu ha oipota iporãvéva ñandéve g̃uarã. Segundo katu ñande itestígo  ha hentekuéra ñanderechávo opensáta mávapa ñanembou. Ñande ningo ndajaipotái oñeñeʼẽ vai Ñandejárare ha nañamongyʼaséi héra porãite. Jaipota guei toñembotuicha. Upévare, ñañatendevaʼerã ñañemonde lájare ha mbaʼéichapa jaiko (Ezequiel 36:22; 1 Pedro 2:12).

3 Mbaʼérepa ñañehaʼãvaʼerã ñanepotĩ? Ñandejára ningo ohayhu umi ipotĩvape ha upéva ñanemokyreʼỹ ñanepotĩ hag̃ua. Ha jahayhúgui chupe ñañehaʼã jaiko haʼe oipotaháicha. Avei jaipota haʼe ñanderayhu opa árare. Jahechamína mbaʼérepa ñanepotĩvaʼerã, mbaʼépa heʼise ñanepotĩ, ha mbaʼépa jajapovaʼerã ñanepotĩ meme hag̃ua. Péicha jaikuaáta tekotevẽpa ñanepotĩmie.

MBAʼÉREPA ÑANEPOTĨVAʼERÃ

4, 5. a) Mbaʼérepa iñimportánte ñanepotĩ? b) Mbaʼéichapa jahecha Jehová rembiapokuére haʼe ipotĩha?

4 Jehová ningo ohechauka ñandéve mbaʼéichapa jaikovaʼerã ha Iñeʼẽ heʼi ñañehaʼãvaʼerãha jajogua chupe (Efesios 5:1). Upévare iñimportanteterei ñanepotĩ, jaikuaágui Jehová ipotĩ ha imarangatuha opaite mbaʼépe (Levítico 11:44, 45).

5 Jahecha Jehová ipotĩha opa mbaʼe ojapovaʼekuére (Romanos 1:20). Pór ehémplo haʼe ojapo ko yvy ñandéve g̃uarã ha omoĩ ipype oñekotevẽva ipotĩ hag̃ua. Upéicha oñemopotĩ tapiaite yvytu ha y. Avei ojapo umi vichoʼi ombyaíva yty ha ojapóva chugui ambue mbaʼe ideprovéchova. Umi sientífiko jepe oiporu umi vichoʼi omopotĩ hag̃ua oñehẽ jave petróleo márpe, térã ambue mbaʼe omongyʼáva yvyporakuéra itaryrýiva. Upéicharõ Ñandejára, upe “ojapovaʼekue yvy”, oipota opa mbaʼe ipotĩ (Jeremías 10:12). Ha ñande avei upéicha vaʼerã.

6, 7. Mbaʼéichapa Moisés Léi ohechauka ñanepotĩvaʼerãha jaadora hag̃ua Jehovápe?

 6 Ñanepotĩvaʼerã avei Jehová ñande Ruvicha Guasu ojerurégui upéva hembiguaikuéragui. Pór ehémplo pe Léi omeʼẽvaʼekue yma Israélpe heʼi ipotĩvaʼerãha hikuái oadora hag̃ua chupe. Ñemoĩ Porã Jey Árape pe saserdóte guasu ojahuvaʼerã mokõi jey ojapo mboyve hembiapo (Levítico 16:4, 23, 24). Avei umi saserdóte oikuaveʼẽ mboyve sakrifísio Jehovápe ojepohéi ha ojepyheivaʼerã (Éxodo 30:17-21; 2 Crónicas 4:6). Pe Léi ohechauka 70 mbaʼe ikatúva omongyʼa umi Israelguápe. Ikyʼa jave hikuái ndovaléi ojapo mbaʼeve oadora hag̃ua Jehovápe, ha ikatu voi ojejuka chupekuéra upévare (Levítico 15:31). Pe Léi heʼi avei oñemopotĩ hag̃ua hikuái ojahu ha ojoheivaʼerãha ijao, umi ndojaposéivape upéva “ojejukavaʼerã” (Números 19:17-20).

7 Moisés Léi ningo yma guaréma, péro ñanepytyvõ jaikuaa hag̃ua Jehová opensáva koʼã mbaʼére. Pe Léi ohechauka ñanepotĩvaʼerãha ñamombaʼeguasu hag̃ua Ñandejárape ha haʼe nokambiái (Malaquías 3:6). Haʼe oipota adorasión “ipotĩ ha imaraʼỹva” (Santiago 1:27). Upéicharõ tekotevẽ jaikuaa mbaʼépa heʼise upéva.

MBAʼÉPA HEʼISE ÑANEPOTĨ ÑANDEJÁRA RENONDÉPE

8. Mbaʼépepa oipota Jehová ñanepotĩ?

8 La Biblia ndeʼíri ipotĩvaʼerãha ñande rete ha ñande aónte. Ñanepotĩ hag̃ua Ñandejára renondépe ñanepotĩvaʼerã opa mbaʼépe. Jehová oipota ipotĩ koʼã mbaʼe: ñane adorasión, jaiko lája, ñapensáva ha ñande  rete ha opa mbaʼe jarekóva. Jahechamína mbaʼéichapa ikatu jajapo upéva.

9, 10. Mbaʼépa heʼise ipotĩha ñane adorasión, ha mbaʼépa ñañatendevaʼerã ani hag̃ua jajapo?

9 Ipotĩvaʼerã ñane adorasión. Upéva heʼise ndaikatuiha ñambojeheʼa rrelihión tee rrelihión japúre. Ñapensamína umi Israelguáre oikovaʼekue Babilóniape. Oho jey mboyve Jerusalénpe, Ñandejára heʼi chupekuéra: ‘Néike, pesẽ katu Babilóniagui. Ani pepoko mbaʼeve ikyʼáva rehe. Penepotĩke’ (Isaías 52:11). Haʼekuéra oho jey hetãme oadora hag̃ua Jehovápe haʼe oipotaháicha. Opa mbaʼe ojapóva Ñandejárape g̃uarã ipotĩvaʼerã, omboykevaʼerã opaite mbaʼe oúva Babilonia rrelihióngui.

10 Ñande kristiáno tee ñañatendevaʼerã avei ani rrelihión japu ñanemongyʼa (1 Corintios 10:21). Heta mbaʼe ou rrelihión japúgui ha ikatu ñande ndajaikuaái. Heta tetã rupi hentekuéra oguerovia ha ojapo rrelihión japu omboʼéva, pór ehémplo haʼekuéra heʼi ñane ánga nomanoiha (Eclesiastés 9:5, 6, 10). Péro ñande ñañatende ani hag̃ua jajapo mbaʼeve oúva rrelihión japúgui. * Ha nañamboykéi la Biblia heʼíva umi hénte ñandejopy haguére (Hechos 5:29).

11. Mbaʼéichapa ipotĩta jaiko lája, ha mbaʼérepa tekotevẽ upéva?

11 Ipotĩvaʼerã jaiko lája. Upearã ñamboykevaʼerã opaichagua tekokyʼa, péicha añoite Ñandejára ñanderayhúta (Efesios 5:5). Kapítulo 9 ohechauka mbaʼérepa kristianokuéra ‘oñemomombyryvaʼerã  tekovaígui’. Umi hekovaíva ‘ndoikemoʼãi Ñandejára rréinope’ (1 Corintios 6:9, 10, BNP, 18). Umíva ‘ombojeguaru’ Ñandejárape ha noñemopotĩriramo haʼe ohundietéta chupekuéra (Apocalipsis [Revelación] 21:8).

12, 13. Mbaʼérepa jaipeʼavaʼerã ivaíva ñane akãgui, ha mbaʼéichapa ikatu ñapensa iporãvare?

12 Ipotĩvaʼerã ñapensáva. Ñamoingevaʼerã iporãva ñane korasõ ha ñane akãme, ha jaipeʼa ivaíva. Ñande ningo katuete jajapo umi mbaʼe ñapensáva, upévare ñapensáramo ivaívare jaʼáta tekovaípe (Mateo 5:28; 15:18-20). Péro ñapensáramo iporã ha ipotĩvare jajaposéta iporãva (Filipenses 4:8). Mbaʼéichapa ikatu ñapensa iporãvare? Primero, ñamboykevaʼerã opaichagua vyʼarã ikatúva omongyʼa ñapensáva. * Ha segundo katu jastudia meme vaʼerã Ñandejára Ñeʼẽ (Salmo 19:8, 9).

13 Ñandejára ñanderayhu hag̃ua ipotĩvaʼerã jajapóva chupe g̃uarã, jaiko lája ha umi mbaʼe ñapensáva. Ko lívrope heta hendápe oñeñeʼẽma koʼã mbaʼére. Koʼág̃a jahecháta peteĩ mbaʼe tekotevẽva gueteri: ipotĩvaʼerã ñande rete ha opa mbaʼe jarekóva.

MBAʼÉICHAPA IPOTĨTA ÑANDE RETE HA OPA MBAʼE JAREKÓVA

14. Mbaʼérepa naiporãi ñapensa ñandénte jadesidivaʼerãha mbaʼéichapa ñanepotĩta?

14 Iñimportánte ñanepotĩ ha ñamopotĩ avei opa mbaʼe jarekóva. Oĩ opensáva oikuaaha voi mbaʼéichapa  oñemopotĩvaʼerã ha avave nopenaivaʼerãha hese. Péro ñande nañapensái upéicha. Jahechámakuri Jehová oipotaha ñanepotĩ koʼã mokõi mbaʼére: iporã ñandéve g̃uarã ha avei ani hag̃ua oñeñeʼẽ vai hese. Ñapensami jeýna pe mitãʼíre. Ikyʼáramo ha ijao soropáramo, jaʼétapa ituvakuéra oñangarekoha hese? Nahániri. Upéicha avei ñañemonde lája térã umi mbaʼe jajapóvare ikatu oñeñeʼẽ vai ñande Ru yvagapeguáre térã pe marandu porã jaguerahávare. La Biblia heʼi: ‘Noromoĩri mbaʼeveichagua estórvo avavépe, ani hag̃ua oñeñeʼẽ vai ore rembiapo rehe. Upéva rangue, opa mbaʼépe rohechauka ore Ñandejára rembiguaiha’ (2 Corintios 6:3, 4, BNP). Mbaʼe mbaʼépepa ñanepotĩvaʼerã?

15, 16. Mbaʼépa jajapovaʼerã ñanepotĩ hag̃ua, ha mbaʼéichapa oĩvaʼerã ñande ao?

 15 Ipotĩvaʼerã ñande rete ha ñande ao. Jaiko jaikohápe iporã enterove jajahu káda día. Y ha havõ ningo ndofaltái jepi jajahu hag̃ua, ñande ha ñane família avei. Tekotevẽ jajepohéi porã jakaru mboyve térã ñakosináta jave, avei ñasẽ rire váñogui térã ñamopotĩ rire peteĩ mitã. Péicha umi vichoʼi noñembohetamoʼãi, ha ndovamoʼãi ñanderehe mbaʼasy, pór ehémplo tye ojukáva jepi hetápe. Ndajarekóiramo váño, jajatyvaʼerã pe tekaka, umi Israelgua ojapo haguéicha yma (Deuteronomio 23:12, 13).

16 Tekotevẽ avei pyʼỹi jajaojohéi. Natekotevẽi ningo ñande ao hepy térã ipyahu, péro ipotĩ ha oĩvaʼerã hekópe porã (1 Timoteo 2:9, 10). Ñaime ñaimeháme ‘ñambojeguavaʼerã Ñandejára ñeʼẽ porã’ (Tito 2:10, ÑÑB).

17. Mbaʼérepa ipotĩvaʼerã ñande róga ha ñande kosakuéra?

17 Ñande róga ha ñande kosakuéra. Ñamopotĩvaʼerã ñande róga jepe michĩ ha ndaiporiguasúi ipype mbaʼeve. Ha oiméramo ñande kóche ha jaiporu jaha hag̃ua rreunionhápe térã japredika hag̃ua ñamopotĩvaʼerã ijape ha hyepy avei. Ani ñanderesarái ñande róga ha ñande kosakuéra ipotĩramo oñeñeʼẽ porãtaha avei Ñandejárare. Ñande ningo ñamboʼe hentekuérape Jehová ipotĩha, ‘ohundipataha umi ombyaívape ko yvy’ ha igoviérno rupive oñemopotĩ ha oñemoporãtaha opárupi (Apocalipsis [Revelación] 11:18, BNP; Lucas 23:43). Upéicharõ ñañangarekóramo ñande róga ha ñande kosakuérare jahechaukáta jajepreparamaha jaiko hag̃ua pe múndo pyahúpe.

Iporã ñanepotĩ ha jajohéi porã ñande kosakuéra

18. Mbaʼéichapa jahechauka ñamombaʼeha ñane Salón del Reino?

 18 Umi lugár ñañembyatyha jaadora hag̃ua. Jahayhúgui Jehovápe ñamombaʼevaʼerã ñane Salón del Reino. Jaipota ningo umi oho ramóva Salónpe oguerohory pe lugár. Upévare pyʼỹi oñemopotĩ ha oñemyatyrõvaʼerã. Tuicha mbaʼe ningo ñaipytyvõ ñane Salón oñemopotĩ, ‘oñemyatyrõ ha oñemoĩ porã jey hag̃ua’ (2 Crónicas 34:10, ÑÑB). Ñaipytyvõramo umi tembiapópe jahechauka ñamombaʼeha koʼã lugár. Avei jajapovaʼerã upéva umi lugár ñañembyatyhápe asamblearã.

ANÍKE ÑAMONGYʼA ÑANDE RETE

19. Mbaʼépa ikatu avei ñanemongyʼa, ha mbaʼéichapa ñanepytyvõ la Biblia ko mbaʼépe?

19 Ñanepotĩ hag̃ua tekotevẽ avei jaheja umi mbaʼe ikatúva omongyʼa ñande rete. Pór ehémplo japita, jakaʼu térã ñañenvisia umi dróga ha pohã ñanembyetiaʼe guaʼúva rehe. Jepe la Biblia noñeʼẽi opaichagua vísio oĩvare koʼág̃a, ñanepytyvõ jaikuaa hag̃ua mbaʼérepa ivai Jehovápe g̃uarã. Ñande ningo jahayhu Chupe ha jaipota ñandeguerohory. Jahechamína cinco mbaʼe la Biblia heʼíva.

20, 21. Mbaʼépa Jehová ndoipotái jajapo, ha mbaʼérepa iporã ñahendu chupe?

20 ‘Jaguerekógui koichagua promésa ñañemopotĩ opaichagua mbaʼe vaígui omongyʼáva ñande rete ha ñande espíritu, ñañembohekopotĩve jahávo Ñandejára kyhyjepópe.’ (2 Corintios 7:1, ÑÑB.) Jehová ndoipotái ñamongyʼa ñande rete ha ñande espíritu (ñapensa lája). Upévare ñamboyke oimeraẽ mbaʼe ikatúva ñanenvisia ha ñanembohasy térã ñanembotavyrai.

21 La Biblia ohechauka porã mbaʼérepa tekotevẽ  ‘ñañemopotĩ opaichagua mbaʼe vaígui’. Oñepyrũvo 2 Corintios 7:1 heʼi: “Jaguerekógui koichagua promésa”. Mbaʼeichagua piko umi promésa? Upe mboyve Jehová heʼi: “Che poguerohorýta, che haʼéta pende ru” (2 Corintios 6:17, 18). Aje piko iporãite ko mbaʼe! Jehová opromete oñangarekotaha ñanderehe peteĩ túva oñangarekoháicha itaʼýra ha itajyrakuérare. Péro upearã ñande ñañemopotĩvaʼerã ‘opaichagua mbaʼe vaígui omongyʼáva ñande rete ha ñande espíritu’. Ajépa ñandevyroitéta jahejáramo Jehovápe koʼã mbaʼe vaíre.

22-25. Mbaʼéichapa la Biblia ñanepytyvõ ani hag̃ua ñandevísio?

22 ‘Ehayhu Ñandejárape nde pyʼaite guive, ne ánga rugua guive ha opa ne arandukue reheve.’ (Mateo 22:37.) Jesús heʼi kóva haʼeha pe mandamiénto tuichavéva (Mateo 22:38). Jahayhuvaʼerã Jehovápe ñande pyʼaite guive. Upévare ñanerakateʼỹta ñandejehe ha ndajajapomoʼãi mbaʼeve ikatúva ojapo vai ñanderehe térã ñanembotavyrai.

23 ‘Jehová omeʼẽ ñandéve jeikove, pytuhẽ ha opa mbaʼe.’ (Hechos 17:24, 25.) Ñande rekove ningo peteĩ rregálo omeʼẽva Ñandejára ha upévare ñamombaʼevaʼerã. Ndajajapomoʼãi mbaʼeve ikatúva ñanembohasy (Salmo 36:9).

24 ‘Ehayhu nde rapichápe nde rejehayhuháicha.’ (Mateo 22:39.) Umi vísio ndojapovaíri peteĩrente. Pór ehémplo, peteĩ tapicha opita jave pe tatatĩ ojapo vai avei umi oĩvare ijypýpe. Umi opitáva ndohayhúi hapichakuérape ha heʼi reínte ohayhuha Ñandejárape (1 Juan 4:20, 21).

25 ‘Peñemoĩke umi mburuvichakuéra ñeʼẽme ha  peneñeʼẽrendu.’ (Tito 3:1, BNP.) Heta tetãme pe léi heʼi ndaikatuiha jareko ha jaiporu dróga. Upévare ndajajapoivaʼerã upéva (Romanos 13:1).

26. a) Mbaʼépa jajapovaʼerã Ñandejára ñanderayhu hag̃ua? b) Mbaʼérepa jaiko porãvéta ñanepotĩramo Ñandejára oipotaháicha?

26 Ñandejára ñanderayhu hag̃ua ñanepotĩvaʼerã opa mbaʼépe. Ijetuʼu ningo japoi hag̃ua peteĩ vísiogui, péro ikatu jaheja. * Ñamopotĩramo ñande rekove jaiko porãvéta. Jehová ningo ñanemboʼe oho porã hag̃ua ñandéve (Isaías 48:17). Ha iporãveha katu ñanepotĩramo oñeñeʼẽ porãta Ñandejára jahayhuetévare, ha ñanderayhúva avei.

^ párr. 2 Evréo ñeʼẽme “ipotĩva” heʼise avei peteĩ hekopotĩva ha oĩ porãva Ñandejára renondépe.

^ párr. 67 Oñekambia héra.