Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Ñaaprende Mboʼehára Guasúgui

 KAPÍTULO 8

Ndaipóri ótro tuichavéva Ñandejáragui

Ndaipóri ótro tuichavéva Ñandejáragui

KATUETE reikuaáne oĩha ótro tuichavéva, iñimportantevéva ha imbaretevéva ñandehegui. ¿Máva mávapa?... Jehová haʼe hína peteĩva. ¿Ha tuichavépa avei ñandehegui pe Mboʼehára Guasu?... Si, tuichave avei.

Jesús oiko vaʼekue Itúva ndive yvágape. Haʼe peteĩ ánhel vaʼekue. ¿Ojapópa rakaʼe Ñandejára ótro ánhel?... Si, ojapo hetaiterei ánhel. Haʼekuéra avei tuichave ha ipoderosove ñandehegui (Hebreos 1:13, 14; Daniel 7:10).

¿Nemanduʼápa mbaʼéichapa héra pe ánhel oñeʼẽ vaʼekue María ndive?... Gabriel. Haʼe heʼi vaʼekue Maríape hyeguasutaha ha pe mitã haʼetaha Ñandejára Raʼy. Jehová omoĩ Itaʼýra rekove María retepýpe onase hag̃ua ko yvy ape ári (Lucas 1:26, 27).

¿Mbaʼépa omombeʼúne raʼe Jesúspe, María ha José?

¿Regueroviápa nde upéva? ¿Regueroviápa haʼe oiko hague yvágape Ñandejára ndive?... Jesús voi heʼi vaʼekue upeichaha. ¿Mbaʼéichapa oikuaa raʼe? Katuete María omombeʼúne raʼe chupe umi mbaʼe heʼi vaʼekue ánhel Gabriel. Ha oiméne José avei heʼi raʼe Jesúspe Ñandejára haʼeha itúva tee.

Jesús ojevautisárõ guare, Ñandejára oñeʼẽ yvága guive ha heʼi: “Kóva hína che Raʼy” (Mateo 3:17). Ha pe pyhare omano mboyve, Jesús  oñemboʼe itúvape ha heʼi: “Che Ru, chegueraha jeýna yvágape aĩ hag̃ua nde ykére, aime haguéicha oĩ mboyve ko múndo” (Juan 17:5). Upéicharõ, Jesús voi heʼi vaʼekue oikose jeyha yvágape. ¿Mbaʼéichapa ikatúta oiko upéva?... Jehová ojapo jeýramo chugui peteĩ ánhel añoitémante ikatúta oho jey yvágape.

Koʼág̃a aporandusemi ndéve peteĩ mbaʼe iñimportánteva. ¿Ivuénopa enterovéva umi ánhel? ¿Mbaʼépa ere?... Peteĩ tiémpope enterovete ivuéno vaʼekue. Haʼekuéra ningo Jehová rembiapokue, ha jaikuaaháicha opa mbaʼe Ñandejára ojapóva oĩ porã. Péro upéi, peteĩ ánhel oñepyrũ iñaña. ¿Mbaʼéichapa oiko raʼe upéva?

Jaikuaa hag̃ua, ñanemanduʼami mbaʼépa oiko vaʼekue Ñandejára ojapo rire Adán ha Évape. Oĩ hénte heʼíva kuénto reinteha upéva, péro pe Mboʼehára Guasu oikuaa vaʼekue siertoha.

Ñandejára ojapo vaʼekue peteĩ hardín neporãmba jepéva hérava Edén, oiko hag̃ua upépe Adán ha Eva. Haʼekuéra ikatu kuri ifamília reta ha oiko opa ára g̃uarã upe hardínpe. Péro oaprende vaʼerã hikuái peteĩ mbaʼe iñimportánteva. Ñañeʼẽma kuri upévare, jahechami nemanduʼápa.

¿Mbaʼépa ojapo vaʼerã kuri Adán ha Eva oiko hag̃ua opa árare?

 Jehová heʼi vaʼekue Adán ha Évape ikatuha hoʼu opaichagua yva oĩva pe hardínpe, peteĩva añoite ndoipotái hoʼu hikuái. Ha heʼi chupekuéra omanotaha hoʼúramo (Génesis 2:17). ¿Mbaʼépa upéicharõ oaprende vaʼerã Adán ha Eva?...

Oaprende vaʼerã tekotevẽha ojapo hikuái Ñandejára heʼíva. Upéicharõ añoite ikatúta oikove opa ára g̃uarã. Haʼekuéra ndaikatúi heʼínte ojapotaha Ñandejára omandáva ha amo ipahápe ótra kosaite ojapo. Umi mbaʼe ojapóvare ohechauka vaʼerã iñeʼẽrenduha. Upéicha ohechaukáta hikuái ohayhuha Ñandejárape, ha oipotaha ogoverna chupekuéra. Adán ha Eva ojapórire upéva, ikatu vaʼerãmoʼã oiko opa ára g̃uarã. Péro hoʼúrõ pe yva ¿mbaʼépa ohechaukáta hikuái?...

Ohechaukáta ndoagradeseiha umi mbaʼe porã Ñandejára omeʼẽvare chupekuéra. Ha nde reimérire upépe, ¿rejapótapa raʼe Jehová heʼíva?... Ñepyrũrã Adán ha Eva ojapo upéicha. Péro upéi peteĩ ipoderosovéva ombotavy Évape, upéicha  rupi haʼe ndojapovéi Jehová heʼíva. ¿Mávapa rakaʼe upe ombotavýva chupe?...

¿Mávapa ojevale pe mbóire oñeʼẽ hag̃ua Évape?

La Biblia heʼi peteĩ mbói oñeʼẽ hague Évape. Péro nde reikuaa umi mbói noñeʼẽiha, ¿mbaʼéichapa upéicharõ oiko upéva?... Peteĩ ánhel oñeʼẽ pe mbói rupive, ndahaʼéi pe mbói oñeʼẽva ijehegui reínte. Pe ánhel oñepyrũ opensa mbaʼe vaíre. Oipota Adán ha Eva ojapo haʼe heʼíva. Haʼe oikyraʼose Jehovápe.

Upémarõ pe ánhel aña omoinge heta mbaʼe vai Eva akãme. Ojevale pe mbóire heʼi hag̃ua chupe: ‘Ñandejára ijapu peẽme. Napemanomoʼãi peʼúramo pe yva. Pendevaléta katu Ñandejáraicha’. ¿Ndépa reguerovia vaʼerãmoʼã upéva?...

Upe rire Eva otanteaséma pe yva Ñandejára oproivi vaʼekue. Upéi hoʼúma katu ha omeʼẽ Adánpe avei. Adán ndogueroviái pe mbói heʼi vaʼekue, péro ohayhuve hembirekópe Ñandejárape rangue. Upévare hoʼúnte avei pe yva (Génesis 3:1-6; 1 Timoteo 2:14).

¿Mbaʼépa oiko upe rire hesekuéra?... Ndahaʼevéima perfékto, Adán oñepyrũ ituja, Eva ig̃uaig̃ui ha  upéi omano hikuái. Ifamiliakuéra imperfékto avei, upéicha rupi ituja ha omano. Ñandejára ndaijapúi chupekuéra. Ha naiñeʼẽrendúigui omano hikuái (Romanos 5:12). La Biblia omombeʼu pe ánhel ombotavy vaʼekue Évape heraha Satanás el Diablo. Ha umi ánhel omoirũ vaʼekue chupe upe rire héra demónio (Santiago 2:19; Apocalipsis 12:9).

¿Mbaʼépa ojehu Adán ha Évape ndojapói haguére Ñandejára heʼíva?

¿Rentendépa koʼág̃a mbaʼéicha rupípa pe ánhel ou iñaña?... Haʼe opensa ijehénte ha oñepyrũ omoinge iñakãme mbaʼe vai. Haʼe oikuaa Ñandejára heʼi hague Adán ha Évape ifamília reta hag̃ua ha oipota umíva omombaʼeguasu chupe. Satanás ndoipotaiete avave ojapo Jehová heʼíva. Upévare omoingese ñane akãme mbaʼe vai (Santiago 1:13-15).

Satanás heʼi ndajahayhuiha Jehovápe ha ndajajaposeiha haʼe omandáva. Heʼi avei jajapoha Ñandejára ojeruréva okonveni ajánte ñandéve. ¿Siértopa upéva?

Pe Mboʼehára Guasu heʼi Satanás ijapuha. Jesús ohechauka ohayhuetereiha Jehovápe iñeʼẽrendúvo chupe opa mbaʼépe. Hiʼarive heta vése oĩ vaʼekue oñemoĩva ikóntrape, upévare ijetuʼu chupe iñeʼẽrendu. Péro lomímonte ojapo Itúva heʼíva omano meve. Upévare Ñandejára omoingove jey chupe ha nomanomoʼãvéima arakaʼeve.

¿Mávapa ndéverõ g̃uarã ñane enemígo ipeligrosovéva?... Si, Satanás el Diablo. ¿Ikatúpa jahecha chupe?... Nahániri. Péro jaikuaa oexistiha ha ipoderosoveha ñandehegui. Péro ¿mávapa ipoderosove jey chugui?... Jehová. Upévare jaʼekuaa haʼe ikatuha oñangareko ñanderehe.

Jaleemi mávapepa ñamombaʼeguasu vaʼerã: Deuteronomio 30:19, 20; Josué 24:14, 15; Proverbios 27:11 ha Mateo 4:10.