Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Ñaaprende Mboʼehára Guasúgui

 KAPÍTULO 23

¿Mbaʼérepa ñanderasy?

¿Mbaʼérepa ñanderasy?

¿REIKUAÁPA peteĩ nde rapicha hasykatúva?... Nde voi sapyʼánte ikatu nderasy, oiméne reñengripa térã ndepyʼahasýmava. Péro oĩ umi tapicha hasy vaíva ha ndaikatúiva ni oñemboʼy haʼeño, ha ijetuʼuvéntema hendivekuéra oimérõ itujáma.

Enterovéva ñanderasy jepi. ¿Ndépa reikuaa mbaʼérepa ñanderasy, ñandetuja ha ñamano?... Pe Mboʼehára Guasu omombeʼu mbaʼérepa ojeguerahárõ guare hendápe peteĩ kuimbaʼe ndoguatáiva. Tamombeʼumína ndéve la oiko vaʼekue.

Upérõ guare, Jesús opyta peteĩ puévlo oĩva mar de Galilea ypýpe. Peteĩ díape hetaiterei hénte oñembyaty pe óga haʼe opytahápe ha ndaijavéima hikuái ni pe okẽme. Hiʼarive ou ouvénte umi hénte. Upéi, cuatro kuimbaʼe ogueru hupáreve peteĩ kuimbaʼe ndoguatáivape.

¿Ndépa reikuaa mbaʼérepa ogueru hikuái Jesús rendápe ko kuimbaʼe hasývape?... Haʼekuéra ojerovia Jesús rehe, ha opensa ikatutaha omonguera chupe. Péro pe óga ningo henyhẽtéma, ¿mbaʼéicha piko omog̃uahẽta hikuái Jesús rendápe upe kuimbaʼépe?...

Ko divúhope ikatu rehecha mbaʼéichapa ojapo hikuái upéva. Primero ohupi pe kuimbaʼe hasývape pe óga ári. Upéi ombokua pe técho, ha omboguejy pe kuimbaʼépe hupáreve Jesús rendápe. ¡Ajépa ojeroviaite hikuái pe Mboʼehára Guasu rehe!

 Umi hénte oñemondyijoa ohechávo pe kuimbaʼépe oñemboguejyha imbytepekuéra. ¿Mbaʼépa heʼi Jesús? ¿Ipochýpa raʼe umi kuimbaʼéndi?... Ni mbaʼevéicharõ. Ovyʼa katu ohechávo ojeroviaha hese. Upévare heʼi pe hasývape: “Che raʼy, nde pekádo oñeperdonáma”.

¿Mbaʼépa heʼi Jesús pe kuimbaʼe ndoguatáivape?

Oĩ opensáva noĩporãiha Jesús heʼi vaʼekue. Koʼã hénte ndogueroviái haʼe ikatuha operdona umi pekádo. Péro ohechauka hag̃ua ikatuha ojapo upéva, Jesús heʼi pe hasývape: “Epuʼã, ejagarra nde rupa ha tereho nde rógape”.

Jesús heʼipávo upéva, pe kuimbaʼe okuera, opuʼã haʼeñoite ha oho. Umi hénte ni  ndogueroviaséi la ohecháva ha opyta ijurujaipa hikuái. Upéi oñepyrũ omombaʼeguasu Jehovápe ha oagradese oĩ haguére hendivekuéra pe Mboʼehára Guasu omongueráva umi hénte hasývape jepe (Marcos 2:1-12).

¿Mbaʼépa ñanemboʼe Jesús ojapo vaʼekue?

¿Mbaʼépa ohechauka ñandéve pe oiko vaʼekue?... Jesús ikatuha operdona umi pekádo ha omonguera umi hasývape. Péro ko milágro Jesús ojapo vaʼekue ñanemboʼe avei ótra kósa iñimportánteva: ñanderasyha pekádo káusare.

Enterovénte ningo ñanderasy jepi, ¿heʼisépa upéva enterovéva pekadorha?... Upeichaite, la Biblia heʼi opavave ñanaseha pekadór. ¿Ndépa reikuaa mbaʼépa heʼise upéva?... Heʼise ñanasemaha voi imperfékto. Upévare sapyʼánte jajapo umi mbaʼe vai ndajajaposéiramo jepe. Péro, ¿mbaʼéicha rupípa oiko ñandehegui pekadór?...

Adán ndojapói vaʼekue Ñandejára ojeruréva chupe, ha upévare oiko chugui pekadór. Ha upéi haʼe ombohasa enterovévape pe pekádo. ¿Mbaʼéichapa ikatu oiko upéva? Amoĩta ndéve peteĩ ehémplo rentende porã hag̃ua.

¿Mbaʼéichapa oiko raʼe enterovévagui pekadór?

Sapyʼánte ojejapo jepi pan peteĩ mbaʼyrúpe térã móldepe. ¿Mbaʼépa oikóta pe mólde ipéramo peteĩ kostádope? ¿Mbaʼéichapa osẽne pe pan?... Ojejapóva guive pype osẽ vaíta ha ipéta  peteĩ ikostádope pe mbaʼyrúicha, ¿ajépa?...

Adán rehe jaʼekuaa haʼeha pe mólde ha ñande katu pe pan. Haʼe ndojapói rupi Ñandejára ojeruréva oiko chugui pekadór. Upe guive Adán ojogua peteĩ mólde ipévape. ¿Mbaʼéichapa onaséta upéicharõ ifamiliakuéra?... Enterovéva onaséta pekadór.

Koʼág̃arupi heta mitã onaséva hesãi jepi, ndahaʼéi katuete osẽ vaíva. Ndofaltái chupekuéra peteĩ ijyva ni hetyma. Upéicharõ jepe ogueronaséma pe pekádo, upévare ikatu hasy, ituja ha omano.

Péro sapyʼánte oĩ tapicha hasypa reíva. ¿Heʼisépa upéva ipekádo hetaveha ótrogui onasérõ guare?... Nahániri, enterovéva peteĩchante ñanase pekadór. Upéicha rupi oimeha óra ikatu ñanderasy. Umi ojapóva Ñandejára heʼíva ha naiñañáiva ikatúnte avei hasy.

¿Mbaʼéichapa jaikóta opa rire pe pekádo?

Upéicharõ, ¿mbaʼére piko oĩ hasypa reíva?... Heta mbaʼére. Ikatu oime saʼi okaru térã naiñaliméntoi la hoʼúva. Oĩ avei hoʼuetereíva karamélo ha chíkle. Ótro katu tárdema oñeno ha ndopytuʼuporãi. Térã nomondéi ijao aku roʼy jave. Ha oĩ umi tapicha ikangýva voi ha upéicha rupi ojagarra chupe oimehaichagua mbaʼasy.

Mbaʼépa nde ere, ¿opánepa umi mbaʼasy ha pekádo?... Rembohovái hag̃ua epensami ko mbaʼére: ¿Mbaʼépa Jesús ojapo  vaʼekue pe kuimbaʼe ndoguatáiva rehehápe?... Operdona ipekadokuéra ha omonguera chupe. Upéicha Jesús ohechauka mbaʼépa ojapóta koʼẽrõite umi iñeʼẽrendúva rehehápe.

Ñañehaʼãmbaitérõ ñamboyke umi mbaʼe vai jajaposéva jepi, Jesús ñanemongueráta ogoverna vove ko yvy ape ári. Haʼe ningo pe Rréi Ñandejára oiporavo vaʼekue ha koʼẽrõitéma oipeʼáta pe pekádo. Péro pe pekádo ndojeimoʼãi ñandehegui sapyʼaitépe, síno saʼi saʼípe opáta ohóvo. Ha opaite vove pe pekádo siémpre ñaneresãita. ¡Ajépa javyʼaiténe!

Jaleemína koʼã téxto ohechaukáva mbaʼépa oiko pekádo káusare: Job 14:4; Salmo 51:5; Romanos 3:23; 5:12, ha 6:23.