Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Ñaaprende Mboʼehára Guasúgui

 KAPÍTULO 42

¿Mbaʼérepa ñambaʼapo vaʼerã?

¿Mbaʼérepa ñambaʼapo vaʼerã?

¿MBAʼÉPA ndegustave: rembaʼapo térã rehuga?... Ndaivaíri ningo rehuga. La Biblia heʼi vaʼekue Jerusalénpe henyhẽta hague mitãʼi ha mitãkuñaʼi ohugáva upe siudápe (Zacarías 8:5).

Pe Mboʼehára Guasu ovyʼa vaʼekue ohechávo umi mitãme ohuga. Péro ohechauka vaʼekue avei iporãha ñambaʼapo. Ou mboyve ko yvy ape ári heʼi: ‘Ñandejárandi aime vaʼekue aipytyvõ hag̃ua chupe, henondépe vyʼápe aiko vaʼekue’. Péicha jahecha Jesús ombaʼapo hague Jehová ndive yvágape. Oĩrõ guare upépe heʼi avei ‘ohayhuha yvyporakuérape’. Ñaaprende haguéicha umi ótro kapítulope, pe Mboʼehára Guasu  ohayhueterei vaʼekue enterovépe ha umi mitãme avei (Proverbios 8:30, 31, NM).

Ou mboyve ko yvy ape ári, ¿mbaʼépa ombovyʼámi pe Mboʼehára Guasúpe?

¿Ndépa ere Jesús ohugáne hague imitãrõ guare?... Oiméne upéicha. Péro jahecháma haguéicha, oĩrõ guare yvágape haʼe ombaʼapo vaʼekue. Upéicharõ ¿nombaʼapóinepa rakaʼe avei oĩrõ guare ko yvy ape ári?... Jesúspe oñehenói vaʼekue “pe karpintéro raʼy”, péro avei ojeʼe vaʼekue hese haʼeha “karpintéro”. ¿Mbaʼépa ohechauka upéva?... José, haʼéva ituvanga omboʼe hague chupe pe profesión. Upéicha rupi Jesúsgui oiko karpintéro (Mateo 13:55; Marcos 6:3).

 ¿Mbaʼeichagua karpintéropa rakaʼe Jesús?... Ombaʼapórõ guare Itúvandi yvágape haʼe iguápo ha ivale vaʼekue. Upéicharõ oiméne ivale rakaʼe avei ombaʼapórõ guare karpinteríape, ¿ajépa?... Upe tiémpope umi karpintéro heta ombaʼapo vaʼerã. Oiméne Jesús heta vése oho rakaʼe oity umi yvyramáta, otrosa, ogueraha hógape ha upéi ojapo chugui mesa, sílla ha umícha.

¿Ndépa ere Jesús ojapóne hague vyʼápe hembiapo?... ¿Revyʼánepa rejapórõ mesa, sílla ha ambue mbaʼe iporãva umi hénte oiporu hag̃ua?... La Biblia ningo heʼi ikatuha ‘javyʼa ñambaʼapo jave’. Upéicharõ, ndahaʼéi jahugárõ añónte javyʼáva, ñambaʼapóramo javyʼaiterei avei (Eclesiastés 3:22, ÑÑB).

Ñambaʼapóramo, ojapo porã ñande retére ha ñanembyetiaʼe. Oĩ mitã oguapýva tódo el día ohecha téle térã ohuga videohuégo, upévare ou ikyra ha ipilaʼi. Koʼã mitã ndovyʼái ni nombovyʼái hapichakuérape. ¿Mbaʼépa jajapo vaʼerã javyʼa hag̃ua?...

Kapítulo 17-pe ñaaprende kuri javyʼaha jajapóvo mbaʼe porã ñande rapichakuéra rehehápe (Hechos 20:35). La Biblia ohenói Jehovápe “Ñandejára ovyʼáva” (1 Timoteo 1:11). Ha jalee haguéicha Provérbiospe, ‘Jesús ovyʼa vaʼekue Ñandejára ndive’. ¿Mbaʼérepa?... Haʼe voi heʼi: “Che Ru ombaʼapo koʼág̃a peve ha che avei ambaʼapo gueteri hína” (Juan 5:17).

Jesús nombaʼapói vaʼekue karpinteríape añónte oikove aja ko yvy ape ári. Jehová oipota vaʼekue ojapo ótro tembiapo iñimportánteva. ¿Ndépa reikuaa mbaʼépa?... Jesús heʼi: “Aha vaʼerã ótro siudápe amombeʼu hag̃ua umi marandu porã oñeʼẽva Ñandejára Rréinore. Upearã ningo añembou vaʼekue” (Lucas 4:43). Omboʼe jave oĩ vaʼekue ojeroviáva hese ha upéi omombeʼúva ótrope umi mbaʼe oaprendéva. Por ehémplo, upéicha ojapo vaʼekue ko kuña rehecháva ko divúhope (Juan 4:7-15, 27-30).

¿Mbaʼeichagua traváhopa ojapo vaʼekue Jesús ko yvy ápe ári?

 ¿Mbaʼépa Jesús opensa rakaʼe ko tembiapóre? ¿Ndépa ere ogustáne hague chupe?... Haʼe heʼi: “Che rembiʼu hína kóva: Ajapo upe chembou vaʼekue rembipota, ha amog̃uahẽ huʼãme pe tembiapo omeʼẽ vaʼekue chéve ajapo hag̃ua” (Juan 4:34). Eremína chéve, ¿ndépa revyʼa reʼu jave pe tembiʼu ndegustavéva?... Upéicharõ Jesús heʼise kuri ovyʼaitereiha ojapóvo pe tembiapo Ñandejára omandáva chupe.

Ñandejára ñandeapo vaʼekue javyʼa hag̃ua ñambaʼapóramo. Upévare haʼe heʼi ‘ñanembovyʼataha ñande traváho’. Upéicharõ, nemitã guive rembaʼapórõ katuete revyʼavéta (Eclesiastés 5:19, NM).

Upéva ndeʼiséi peteĩ mitã ojapo vaʼerãha peteĩ kakuaa rembiapo. Péro katuete oĩ traváho enterovépe g̃uarã. Por ehémplo, nde tuvakuéra oiméne ombaʼapo jejopy ojogua hag̃ua oñekotevẽva nde rógape. Avei oĩ heta tembiapo ojejapóva ogapýpe ipotĩ porã hag̃ua.

¿Mbaʼe traváhopa ikatu rejapo nde rógape?... Ikatu reprepara mesa pekaru hag̃ua, rejohéi tembiporu, remombo yty, remopotĩ nde koty ha rembyaty nde hugéte rehugapa rire. Ikatu oime rejapóma voi koʼã tembiapo. Oimérõ upéicha, tuichaiterei reipytyvõ hína nde rogayguakuérape.

¿Mbaʼérepa rembyaty vaʼerã nde hugetekuéra rehugapa rire?

Jahechamína mbaʼérepa iñimportánte rejapo koʼã mbaʼe. Rehugapa rire ningo rembyaty vaʼerã nde hugetekuéra. ¿Mbaʼérepa iporã rejapo upéva?... Péicha nde róga iporãvéta oĩgui ilugárpe opa mbaʼe, avei ndoikomoʼãi aksidénte. Rehejapáramo nde hugetekuéra yvýre, peteĩ díape nde sy ikatu ogueru heta mbaʼe ipópe ha oikévo nde rógape opyrũ hese ha hoʼa. Ikatu ojegolpea vai ha ojegueraha chupe ospitálpe. ¿Ajépa ivaietéta oikóramo upéva?... Péro ndoikomoʼãi koʼã mbaʼe rembyatýramo nde hugetekuéra.

 Oĩ avei ótra kósa mitãnguéra ojapo vaʼerã, por ehémplo, itaréa eskuelapegua. Mboʼehaópe ñaaprende jaleekuaa hag̃ua, oĩ mitã pyaʼe oaprendéva olee, ótrope katu ijetuʼuve. Ñepyrũrã ikatu ijetuʼu ndéve, péro reñehaʼãramo releekuaa ikatúta reaprende hetave mbaʼe ha upéva nembovyʼáta. Ha avei ndete releéta la Biblia. Upéicharõ, ideprovechoitereíta ndéve rejapo porãramo nde tareakuéra, ¿ajépa?...

Oĩ tapicha nombaʼaposéiva ha ikatu oime reikuaa umichaguápe. Péro Ñandejára ñandeapo vaʼekue ñambaʼapo hag̃ua, upévare javyʼa vaʼerã ñambaʼapo jave. ¿Mbaʼépa Jesús opensa vaʼekue hembiapóre?... Ogustaiterei chupe peteĩ tembiʼu hetereívaicha. ¿Mbaʼe tembiapópa ojapo vaʼekue haʼe?... Omboʼe umi héntepe oikuaa hag̃ua Jehovápe ha avei mbaʼépa ojapo vaʼerã hikuái oiko hag̃ua opa ára g̃uarã.

Revyʼave hag̃ua rembaʼapo jave, reñeporandu vaʼerã: “¿Mbaʼérepa tekotevẽ ajapo ko traváho?”. Igustovéta ndéve rembaʼapo reikuaáramo mbaʼérepa iñimportánte rejapo upe traváho. Tahaʼe haʼéva pe tembiapo oñemandáva ndéve, eñehaʼãkena ejapo porã. Péicha revyʼáta pe Mboʼehára Guasu ovyʼa haguéicha.

Jaleemína koʼã téxto ñanemokyreʼỹva ñambaʼapo hag̃ua: Proverbios 10:4; 22:29; Eclesiastés 3:12, 13 ha Colosenses 3:23.