Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Ñaaprende Mboʼehára Guasúgui

 KAPÍTULO 16

¿Mbaʼépa pe iñimportantevéva?

¿Mbaʼépa pe iñimportantevéva?

¿Mbaʼépa tekotevẽ raʼe ontende ko kuimbaʼe?

PETEĨ díape, peteĩ kuimbaʼe oho Jesús rendápe oikuaágui ivaleha, ha heʼi chupe: “Mboʼehára, eremína che ermánope tombojaʼo chéve umi mbaʼe oheja vaʼekue oréve ore ru”. Haʼe opensa oñemeʼẽ vaʼerãha chupe umi mbaʼe itúva oheja vaʼekue.

Ndérire Jesús, ¿mbaʼépa eréta kuri?... Haʼe opilla ko kuimbaʼe noikotevẽiha umi mbaʼe itúva oheja vaʼekue. Síno ótra kósa hína la provléma: haʼe ndoikuaái mbaʼépa pe iñimportantevéva.

Eremína chéve: ¿mbaʼépa iñimportanteve vaʼerã ñandéve g̃uarã? ¿Jareko umi hugéte iporã porãva, ao pyahu ha umícha mbaʼe?... Nahániri. Oĩ peteĩ mbaʼe iñimportantevéva. Jesús omboʼe vaʼekue upéva, ha upearã omombeʼu mbaʼépa oiko peteĩ kuimbaʼére hesarái rupi Ñandejáragui. ¿Rehendusépa pe istória?...

Ko kuimbaʼe ipláta heta, ijyvy heta ha osẽ porã chupe ikosécha. Ha umi kóga omonoʼõ vaʼekue ndaijavéima umi galpónpe. Upémarõ haʼe opensa: “Aikuaáma mbaʼépa ajapóta, aitypáta koʼã che galponkuéra ha amopuʼãta tuichavéva, ha upépe ambyatypáta che trígo ha opa mbaʼe porã arekóva”.

 Haʼe opensa ivaletereiha ha heʼi: ‘Koʼág̃a añongatúma heta mbaʼe porã aiporu hag̃ua heta áñore. Ikatúma pyʼaguapýpe akaru, amboyʼu ha avyʼa’. ¡Péro tuicha ojavy! ¿Reikuaápa mbaʼérepa?... Hesarái rupi Ñandejáragui ha openságui ijehénte ha umi mbaʼe ogustávare chupe.

¿Mbaʼépa opensa hína ko kuimbaʼe ipláta hetáva?

Upévare Ñandejára heʼi chupe: ‘¡Aje piko ndevyroite! Ko pyharépe ningo remanóta, ¿ha mávape piko opytáta umi mbaʼe rembyaty vaʼekue?’. ¿Ikatúta piko omano rire oiporu umi mbaʼe ombyaty vaʼekue?... Nahániri, opytapaitéta ótrope g̃uarã. Upévare Jesús heʼi: ‘Péicha oiko umi ombyatývare heta mbaʼe ijupe g̃uarã, péro imboriahúva Ñandejára renondépe’ (Lucas 12:13-21).

¿Ndépa rejoguase pe kuimbaʼe ipláta hetávape?... Haʼe noñekontentái orekóvare. Chupe iñimportanteve ombyaty heta mbaʼe ha upévante oreko iñakãme. Upévare opyta vai Ñandejára renondépe.

 Oĩ heta hénte ojoguáva ko kuimbaʼépe ha noñekontentáiva orekóvare. Ha upéva ikatu omoprovléma chupekuéra. Eremína chéve, ¿ndépa ndehugéte?... ¿Mbaʼe mbaʼépa ereko?... Ñamoĩ chupe peteĩ ne amígo térã ne amíga orekoha peteĩ hugéte nde ndereguerekóiva, ikatu peteĩ pelóta, muñéka térã ótro hugéte. ¿Iporãtapa rejerure jey jeýrõ nde tuvakuérape ojogua hag̃ua ndéve upeichagua?...

Ikatu repensa peteĩ hugéte iñimportantetereiha. Péro, ¿mbaʼépa ojehu umi hugétepe tiémpo rire?... Ikatu oñembyaipa ha upéi ndereipotavéi. Péro nde reguereko peteĩ mbaʼe iñimportantevéva umi hugétegui. ¿Reikuaápa mbaʼépa?...

¿Mbaʼépa iñimportanteve nde hugetekuéragui?

Nde rekove, upéva la iñimportantevéva. Pórke remanóramo ndaikatumoʼãvéima rejapo mbaʼevete. Péro reikove hag̃ua rejapo vaʼerã Ñandejára heʼíva, ¿ajépa?... Upévare, aníkena ndevýro ha nderesarái Ñandejáragui, ojapo haguéicha pe kuimbaʼe ipláta hetáva.

 Ndahaʼéi mitãre añónte ikatúva oiko ko mbaʼe. Oĩ heta kakuaa oipotáva heta mbaʼe. Ikatu oime ndofaltái chupe tembiʼu, ao ha peteĩ óga. Péro lomímonte ombaʼapove iplatave hag̃ua. Ni ndopytuʼúi voi orekopa peve umi mbaʼe oipotáva: umi ao iporã porãva térã umi óga tuichaicháva. Ha amáske oreko, oipota potave.

Oĩ kakuaa ombaʼapoitereíva ogana hag̃ua pláta, upévare naitiempovéima Ñandejárape g̃uarã ni oĩ hag̃ua ifamília ndive. ¿Ikatúpa jaʼe nomanomoʼãiha ipláta heta haguére?... Nahániri. ¿Ha ikatúpa oiporu ipláta omano rire?... Ndaikatumoʼãi, pórke umi omanóva ndaikatuvéima ojapo mbaʼevete (Eclesiastés 9:5, 10).

¿Oĩ vai piko upéicharõ ñandepláta?... Nahániri, upéicharõmante jajoguáta tembiʼu ha ao. La Biblia heʼi voi pe pláta ikatuha ideprovécho ñandéve (Eclesiastés 7:12). Péro oĩ vai jahayhu pe pláta. Jajapóramo upéva ñaneprovléma hetáta ha jajoguáta pe kuimbaʼe ombyaty vaʼekuépe heta mbaʼe, péro hesaráiva Ñandejáragui.

¿Mbaʼéichapa ikatu jahechauka ñanemanduʼaha Ñandejárare káda día?... Ñamotenondévo chupe opa mbaʼépe. Heta hénte heʼi ojeroviaha Ñandejárare ha opensa upéva ovalemaha. Péro, ¿oĩ porãpa hikuái Ñandejára renondépe?... Nahániri, haʼekuéra ojogua pe kuimbaʼe hesarái vaʼekuépe Ñandejáragui.

Jesús ndahesaráiri vaʼekue Itúvagui, upévare noñehaʼãi ipláta heta ni ndoikói ombyaty heta mbaʼe ijupe g̃uarã. Jesús oikuaa vaʼekue mbaʼépa pe iñimportantevéva. ¿Ndépa reikuaa mbaʼépa upéva?... Upeichaite, ñaime porã Ñandejára renondépe.

¿Mbaʼe iñimportántevapa ojapo hína ko mitãkuñaʼi?

¿Mbaʼépa ikatu jajapo ñaime porã hag̃ua Ñandejára renondépe?... Jajapo vaʼerã haʼe oipotáva. Jesús heʼi vaʼekue: ‘Akóinte ajapo umi mbaʼe che Túva oipotáva’ (Juan 8:29). Ha upéva ombovyʼa  Ñandejárape. Ha nde, ¿mbaʼépa ikatu rejapo?... Ikatu relee la Biblia, reho meme rreunionhápe, reñemboʼe Ñandejárape ha reipytyvõ nde rapichakuérape oikuaave hag̃ua chupe. Koʼãva hína umi mbaʼe iñimportantevéva.

Jesús oĩ porã vaʼekue Ñandejára renondépe, upévare Jehová oñangareko hese ha omeʼẽ chupe jeikove opaʼỹva. Jajapórõ Jesús ojapo haguéicha, Jehová ñanderayhúta ha oñangarekóta ñanderehe. Upévare, ñañehaʼãkena jajogua Jesúspe ha ani pe kuimbaʼe hesarái vaʼekuépe Ñandejáragui.

Jaleemi koʼã téxto ohechaukáva ndovaleiha jaipotaiterei heta mbaʼe: Proverbios 23:4; 28:20; 1 Timoteo 6:6-10 ha Hebreos 13:5.