Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Ñaaprende Mboʼehára Guasúgui

 KAPÍTULO 17

¿Mbaʼéichapa ikatu javyʼa?

¿Mbaʼéichapa ikatu javyʼa?

¿Mbaʼérepa jaʼe Jehová haʼeha “Ñandejára ovyʼáva”?

ENTEROVÉVANTE javyʼase, ¿ajépa?... Péro ndahetái oĩ umi ovyʼa añetéva. ¿Ndépa reikuaa mbaʼérepa?... Haʼekuéra ningo ndoikuaái mbaʼépa ojapo vaʼerã ovyʼa hag̃ua. Oimoʼã upearã oreko vaʼerãha heta mbaʼe. Ha amo ipahápe oreko rire umi mbaʼe oipotáva, sapyʼamínte ovyʼa hikuái.

Pe Mboʼehára Guasu heʼi vaʼekue mbaʼépa jajapo vaʼerã javyʼa hag̃ua: “Javyʼaiteve ñameʼẽvo, ñandéve oñemeʼẽ rangue” (Hechos 20:35). Upéicharamo, ¿mbaʼépa jajapo vaʼerã javyʼa hag̃ua?... Tekotevẽ jajapo umi mbaʼe porã ñande rapichakuéra rehehápe. ¿Ndépa reikuaáva upéva?...

Jahechamína mbaʼépa Jesús oipota jaikuaa. ¿Heʼisépa raʼe ndajavyʼamoʼãiha oñemeʼẽramo ñandéve peteĩ rregálo?... Nahániri. ¿Ajépa javyʼa oñemeʼẽramo ñandéve peteĩ rregálo?... Enterovévape ñandegusta upéva.

 Péro Jesús heʼi vaʼekue javyʼaveha ñande ñameʼẽ jave peteĩ mbaʼe ñande rapichápe. ¿Mávapa ndéverõ g̃uarã pe hetave rregáloma omeʼẽva?... Upeichaite, Jehová hína upéva.

La Biblia heʼi Jehováre: “Haʼe rupínte opavave oikove, orrespira ha oreko opa mbaʼe”. Jehová omeʼẽ avei ama ha kuarahy, ha upéicha rupi umi plánta okakuaa, hiʼa ha jareko jaʼu vaʼerã (Hechos 14:17; 17:25). Hetaite mbaʼe porã omeʼẽ ñandéve Jehová. ¡Ajeve voíngo la Bíbliape ojeʼe haʼeha “Ñandejára ovyʼáva”! (1 Timoteo 1:11.) Ñandejára ovyʼa omeʼẽ jave, ha ñande avei javyʼáta jajapóramo upéicha.

¿Mbaʼépa ikatu rejapo revyʼave hag̃ua?

¿Mbaʼépa ikatu ñameʼẽ ñande rapichakuérape? ¿Ndépa mbaʼe ere?... Rejoguátaramo peteĩ rregálo reikotevẽta pláta, ha upearã reiko vaʼerã rembyaty rehupyty peve pe rregálo repyrã.

Péro natekotevẽi rejogua katuete peteĩ rregálo. Por ehémplo, haku jave ikatu remeʼẽ nde rapichápe y roʼysã asy. Upéva haʼe avei peteĩ rregálo ha nembovyʼáta remeʼẽramo.

Ikatu avei peteĩ díape nde sy ojapo algúna kósa ndegustaitereíva peʼumi hag̃ua. Reʼupa rangue neaño, ¿mbaʼépa ikatu rejapo nembovyʼavétava?... Ikatu rekonvida peteĩ ne amígo térã ne amígape. ¿Rejaposépa upéva?...

Jesús ha ijapostolkuéra ovyʼa vaʼekue ojapo rupi heta mbaʼe porã hapichakuéra rehehápe. ¿Ndépa reikuaa mbaʼépa ojapo vaʼekue hikuái?... Oipytyvõ hapichakuérape oikuaa hag̃ua  Ñandejárape. Umi apóstol oaprende vaʼekue Jesúsgui, ha upéi omboʼe ótrope ojepagaʼỹre chupekuéra mbaʼevete. ¡Ajépa iporãite upe ojapóva hikuái!

Peteĩ jey, apóstol Pablo ha iñamigoite Lucas otopa peteĩ kuñakarai imbaʼeporãvare. Haʼekuéra oho kuri peteĩ rrío rembeʼýpe opredika hag̃ua, ojeʼégui chupekuéra upépe oñembyatyha jepi heta hénte oñemboʼe hag̃ua Ñandejárape. Ha og̃uahẽvo upe lugárpe otopa hikuái heta kuña oñemboʼéva hína.

Pablo oñepyrũ oñeʼẽ chupekuéra Ñandejára Rréinore. Umi kuña apytépe oĩ peteĩ hérava Lidia, haʼe ojapysaka porã apóstol Páblore ha oagradeseterei omboʼe haguére chupe. Lidia oipotaiterei Pablo ha Lucas opyta hógape, upévare heʼi chupekuéra: “Pegueroviáramo che ajerovia añeteha Jehováre, pejúna pepyta che rógape”. Ojerure joʼa joʼa rupi chupekuéra, oho hikuái hendive (Hechos 16:13-15).

¿Mbaʼépa Lidia heʼi hína Pablo ha Lúcaspe?

Lidia ovyʼaiterei Pablo ha Lucas oho haguére hógape. Haʼe ohayhu ha oagradese chupekuéra oipytyvõgui chupe oikuaa hag̃ua Jehová ha Jesúspe, ha omombeʼu rupi chupe mbaʼépa ojapo vaʼerã oiko hag̃ua opa ára g̃uarã. Lidia ovyʼa omeʼẽ haguére chupekuéra tembiʼu ha peteĩ lugár opytuʼu hag̃ua, ha omeʼẽseterei voi koʼã mbaʼe. Upéicha jahecha ñameʼẽramo peteĩ mbaʼe, jajapo vaʼerã ñande pyʼaite guive, ndahaʼéi ojeʼe haguérente ñandéve térã tovapukúpe. Upéicharõ añoite javyʼáta.

¿Mbaʼérepa Lidia ovyʼa Pablo ha Lucas oho haguére hógape?

Ñamoĩ chupe reguerekoha únos kuánto karamélo ndegustaitereíva, ha upéi ojeʼe ndéve remeʼẽ hag̃ua michĩmi ótro mitãme, ¿revyʼánepa remeʼẽramo chupe?... Péro oiméramo pe mitã ne amigoite hína, ha nde voi remeʼẽ chupe avave heʼiʼỹre ndéve, ¿nembovyʼátapa upéva?...

 Jahayhuetereíramo peteĩ ñande rapichápe ñameʼẽse voi chupe jarekomíva guive. Upéicha avei, amáske jahayhu Ñandejárape, ñameʼẽsevéta chupe umi mbaʼe jarekóva.

¿Mbaʼérepa ovyʼa ko kuñakarai mboriahumi omeʼẽ rire orekomíva?

Pe Mboʼehára Guasu ohecha vaʼekue Jerusalén témplope peteĩ kuñakarai mboriahumi orekóva mokõi monedaʼínte. Ko kuñakarai ningo ohayhu Jehovápe ipyʼaite guive, upévare omeʼẽ upe orekomíva ojeporu hag̃ua témplope, opytátaramo jepe mbaʼeveʼỹre. Avave ndeʼíri chupe ojapo hag̃ua upéva ha oiméne saʼi umi ohecháva chupe. Péro omeʼẽ ikontrivusión ipyʼaite guive ohayhúgui Jehovápe, ha ovyʼa ojapóvo upéicha (Lucas 21:1-4).

Jahecha haguéicha, oĩ heta mbaʼe ikatúva jajapo ñande rapicha rehehápe. ¿Ikatúpa eremi chéve mbaʼe mbaʼépa?... Tahaʼe haʼéva umi mbaʼe ñameʼẽva, jajapo vaʼerã ñande pyʼaite guive, upéicharõ añoite javyʼáta. Pe Mboʼehára Guasu oipota ñanembaʼeporã opavavéndi (Lucas 6:38). Jajapóramo upéicha, ñambovyʼáta ñande rapichakuérape ha ñande katu javyʼavétantema.

Jaleemína koʼã téxto ohechaukáva javyʼaha ñameʼẽramo: Mateo 6:1-4; Lucas 14:12-14 ha 2 Corintios 9:7.