¿MBAʼÉREPA iñimportánte jaikuaa mávapepa jaadora?... Heta hénte oadora térã omombaʼeguasu rupi heta ñandejára guaʼúpe (1 Corintios 8:5). Peteĩ jey Jehová omeʼẽ vaʼekue podér apóstol Páblope omonguera hag̃ua peteĩ kuimbaʼe ndoguatáivape. Upérõ umi hénte oĩva upépe osapukái ha heʼi: “¡Umi ñandejarakuéra oñembohete yvypóraicha ha oguejy ñane rendápe!”. Haʼekuéra oreko peteĩ ñandejára guaʼu hérava Hermes ha ótro katu Zeus, ha oimoʼã hikuái Pablo haʼeha Hermes ha Bernabé katu Zeus, upévare oadorasemoʼã chupekuéra.

Péro Pablo ha Bernabé ojoko umi héntepe. Odipara ijapytepekuéra ha heʼi: ‘Pejedeha koʼã mbaʼe ovaleʼỹvagui ha pejevy Ñandejára oikovéva rendápe’ (Hechos 14:8-15). ¿Mávapa hína “Ñandejára oikovéva” ojapo vaʼekue opa mbaʼe?... Haʼe hína Jehová, ‘pe Jára tuichavéva’. Jesús heʼi Jehová haʼeha ‘Ñandejára teete ha peteĩetéva’. Upéicharõ, ¿mávape añoite jaadora vaʼerã?... Jehovápe añoite (Salmo 83:18, ÑÑB; Juan 17:3; Apocalipsis 4:11).

¿Mbaʼérepa Pablo ha Bernabé ndohejái umi hénte omombaʼeguasu chupekuéra?

Hetaiterei tapicha nomombaʼeguasúi “Ñandejára teete ha peteĩetévape”. Haʼekuéra oadora umi mbaʼe ojejapóva yvyra, ita térã metálgui (Éxodo 32:4-7; Levítico 26:1; Isaías 44:14-17). Umi ifamósovape katu la hénte ohenói voi “estrélla” térã “ídolo” ha omombaʼeguasu chupekuéra. Péro, ¿oĩ porãpa ojejapo upéva?...

Sáulogui oiko rire apóstol Pablo, ohai: “Ko múndo jára omohesatũ chupekuéra ani hag̃ua ontende” (2 Corintios 4:4). ¿Mávapa ko múndo jára?... Satanás. Ha ikáusare oĩ heta tapicha oadoráva peteĩ persónape térã oimeraẽ mbaʼe, péro ndoadorái Jehovápe.

 Satanás oipotárõ guare Jesús oadora chupe, ¿mbaʼépa ombohovái Jesús?... Haʼe heʼi: “Ñandejára Jehovápe readora vaʼerã ha chupe añoite reservi vaʼerã” (Mateo 4:10). Péicha Jesús ohechauka Jehovápe añoite jaadora vaʼerãha. Yma oĩ vaʼekue mbohapy mitãrusu oikuaa porãva upéva. Haʼekuéra héra Sadrac, Mesac ha Abednego. Jahechamína mbaʼépa oiko hesekuéra.

Koʼã mitãrusu onase vaʼekue Israélpe, ha umi isrraelíta oadora Jehovápe. Péro upéi, koʼã mitãrusúpe ojegueraha Babilóniape. Upépe oĩ vaʼekue peteĩ rréi hérava Nabucodonosor. Peteĩ díape ko rréi ojapoka órogui peteĩ taʼanga tuicháva, ha omanda umi héntepe oñesũ hag̃ua henondépe oñembopu vove pe músika. Heʼi avei: ‘Umi noñesũiva ha nomombaʼeguasúiva pe taʼanga ojeitýta tata rendýpe’. Oikórire nderehe upéva, ¿mbaʼépa rejapo vaʼerãmoʼã?...

¿Mbaʼérepa noñesũi pe taʼanga renondépe koʼã mbohapy mitãrusu?

 Sadrac, Mesac ha Abednego siémpre ojapo pe rréi heʼíva, péro upérõ ndojapói ha noñesũi pe taʼanga renondépe. ¿Reikuaápa mbaʼérepa?... Ñandejára léi heʼi rupi: ‘Ndereguerekói vaʼerã ambue jára. Nderejapói vaʼerã ndejupe g̃uarã taʼanga ha nereñesũi vaʼerã henondepekuéra’ (Éxodo 20:3-5, ÑÑB). Upévare Sadrac, Mesac ha Abednego iñeʼẽrendu Jehovápe ha ndojapói pe rréi heʼíva.

Pe rréi ipochyeterei ha heʼi ojegueru hag̃ua hendápe umi mitãrusúpe. Ha oporandu chupekuéra: ‘¿Añete piko napeñesũi pe taʼanga renondépe? Koʼág̃a peho jeýta ha pehendúvo pe músika peñesũ vaʼerã. Cháke ndapejapóirõ pejeitýta tata rendýpe. Ha ahechaséntema mávapa pe ñandejára ikatúva pendesalva chehegui’.

¿Mbaʼépa ojapóta koʼã mitãrusu? Ha nde, ¿mbaʼépa rejapo vaʼerãmoʼã?... Haʼekuéra heʼi pe rréipe: ‘Pe Ñandejára romombaʼeguasúva ikatu oreguenohẽ pe tata rendýgui. Péro ndojapóiramo jepe upéicha, ore noromombaʼeguasumoʼãi nde jarakuérape ha noroñesũmoʼãi pe taʼanga renondépe’.

Upérõ pe rréi “hova pytãmba pochýgui” ha omanda: ‘¡Pembyakuve pe tata siete vése!’. Upéi heʼi umi soldádo imbaretevévape  ojokua hag̃ua umi mitãrusúpe ha opoi hag̃ua pe tata akúpe. Pe tata ningo hakueterei, upévare umi soldádo ojamíre ijypýpe omanomba. Péro, ¿mbaʼépa ojehu umi mbohapy mitãrusúpe?

Sadrac, Mesac ha Abednégope ojeity pe tata rendýpe, péro upeichaháguinte opuʼã jey, ojeipa pe oñeñapytĩ hague ha mbaʼevete asy ndojehúi chupekuéra. ¡Tuichaite mbaʼe la oikóva!, ¿ajépa?... Pe rréi omaña pe tata rendýre ha tuichaiterei oñemondýi. Haʼe oporandu: ‘¿Ndajaitýi piko raʼe pe tatápe mbohapy kuimbaʼépe?’. Umi oĩva hendive heʼi chupe: ‘Upeichaite ore ruvicha’.

¿Mbaʼéichapa osalva Jehová umi mbohapy mitãrusúpe?

Péro pe rréi heʼi: ‘Ahecha ningo cuatro kuimbaʼe oguatáva pe tata rendýpe ha ndojehúi chupekuéra mbaʼeve’. ¿Reikuaápa mávapa oĩ hendivekuéra?... Peteĩ ánhel. Jehová ombou chupe oipytyvõ hag̃ua umi mitãrusúpe.

Upéi pe rréi osapukái chupekuéra: ‘¡Sadrac, Mesac ha Abednego, peẽ peadoráva Ñandejára tuichavévape, pesẽ upégui ha peju koʼápe!’. Osẽvo upégui enterovéva ohecha ndojehúi hague chupekuéra mbaʼevete, ni  tatatĩ ryakuã ndorekói hikuái. Upémarõ pe rréi heʼi: ‘Toñemombaʼeguasu Sadrac, Mesac ha Abednego Járape. Haʼe ombou peteĩ ánhel osalva hag̃ua chupekuéra, ndoadoraséi rupi ótrope ndahaʼéiva Ijarakuérape’ (Daniel, kapítulo 3).

¿Mbaʼe mbaʼépa oadora koʼág̃arupi umi hénte?

Ikatu ñaaprende peteĩ mbaʼe iñimportánteva ko oiko vaʼekuégui. Koʼág̃arupi oĩ avei ojapóva taʼanga yvyra, ita, metál térã télagui ha oadora hikuái. Por ehémplo, peteĩ enciclopedia heʼi: “Pe vandéra oñemombaʼeguasu avei pe kurusúicha” (The Encyclopedia Americana). Yma Jesús disipulokuéra nomombaʼeguasúi vaʼekue pe mburuvicha Romaguápe. Peteĩ karai ohaíva lívro, hérava Daniel P. Mannix heʼi: ‘Umi kristiáno koʼag̃agua nomombaʼeguasúiva pe vandéra, ha ndojapóiva pe huraménto heʼihápe omanotaha odefende hag̃ua pe vandéra, ojogua Jesús remimboʼekuéra yma guarépe’.

Upéicharõ, ¿mbaʼépa opensa Jehová umi taʼanga ojejapóva téla, yvyra, ita térã metálgui?... ¿Oĩ porãtapa peteĩ ohayhúva Ñandejárape oadoráramo umi taʼanga?... Sadrac, Mesac ha Abednego ndojapói vaʼekue upéicha, ha upéva ombovyʼa Jehovápe. ¿Mbaʼéichapa ikatu rejapo haʼekuéra ojapo haguéicha?...

Umi ohayhúva Jehovápe oadora vaʼerã chupe añoite. Jahechamína heʼíva: Josué 24:14, 15, 19-22; Isaías 42:8; 1 Juan 5:21 ha Apocalipsis 19:10.