Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Ñaaprende Mboʼehára Guasúgui

 KAPÍTULO 31

¿Mávapa ñanepytyvõta jahasa asy jave?

¿Mávapa ñanepytyvõta jahasa asy jave?

¿REÑEÑANDÚPA sapyʼánte neaño ha nderevyʼái?... ¿Reñeporandúpa upéicha jave oĩpa nderayhúva?... Oĩ mitã oñeñandúva péicha, péro Ñandejára heʼi: “Che ndacheresaraichéne ndehegui” (Isaías 49:15). ¿Ndépa revyʼa reikuaávo Jehová oprometéva?... Haʼe ningo ñanderayhueterei enterovévape.

¿Mbaʼéichapa oñeñandúne ko ovecharaʼy okañýva?

Peteĩ kuimbaʼe oskrivi vaʼekue la Biblia heʼi: ‘Che ru ha che sy cherejáramo jepe, Jehová oñangareko porãta cherehe’ (Salmo 27:10, ÑÑB). Jaikuaávo upéva tuicha ñandepyʼaguapy, ¿ajépa?... Jehová heʼi avei ñandéve: ‘Ani rekyhyje, che aĩ nendive. Ha añangarekóta nderehe’ (Isaías 41:10, ÑÑB).

Upéicharõ jepe, sapyʼánte Jehová opermiti Satanáspe ojapo ñanderehe mbaʼe vai ha ñanembohasa asy. Por ehémplo, Satanás ombohasa asyetereírõ guare Jesúspe haʼe heʼi Itúvape: “Ñandejára, Ñandejára, ¿mbaʼére piko chereja rei?” (Mateo 27:46). Ohasa asýramo jepe, Jesús oikuaa Jehová ohayhuha chupe (Juan 10:17). Oikuaa avei Jehová ohejaha Satanáspe ñanembohasa asy. Ág̃a ótro kapítulope jahecháta mbaʼérepa Jehová opermiti upéva.

Mitãnguéra ningo pyʼỹinte oñemondýi ha okyhyje. Por ehémplo, ¿ndépa reñedesatinámava ha ndereikuaavéi moõpa reime?... Oimérõ upéicha, ¿reñemondýipa raʼe?... Heta mitã katuete oñemondýita. Peteĩ díape, pe Mboʼehára Guasu omombeʼu oĩ hague peteĩ oñedesatináva, péro ndahaʼéi peteĩ mitã síno peteĩ ovechami.

 Ikatu jaʼe nde rejoguaha peteĩ ovechápe. ¿Mbaʼérepa? Umi ovecha ningo ndahaʼéi la tuichaitereíva ni imbaretetereíva, ha upévare oikotevẽ oñangareko vaʼerã hesekuéra, ha ndéngo upéicha avei. Pe kuimbaʼe oñangarekóvape ovechakuérare oñehenói ovecharerekua.

Jesús oñepyrũ omombeʼu oĩ hague peteĩ ovecharerekua orekóva cien ovecha. Péro upéi okañy chugui peteĩ. Pe ovecha ikatu oime oho raʼe omaña upérupi, péro upéi oho mombyryve ha okañy. ¿Mbaʼéichapa oñeñandúne raʼe omañávo ijerére ha ohecha oĩha haʼeñoite?...

¿Mbaʼépa ojapóne pe karai ohecha vove ofaltaha peteĩ ijovecha? ¿Heʼínepa: “Tojecha haʼe oho haguére mombyry”? ¿Térãpa ohejáne umi noventa y nueve peteĩ lugár isegurohápe ha ohóne oheka pe okañy vaʼekue? ¿Okonvenítapa chupe ohóramo peteĩ ovecha rehehápente?... Ndérire pe ovecha okañýva, ¿reipotánepa oho ndereka?...

¿Mávapa ojogua ko ovecharerekuápe?

Pe karai ohayhueterei enterove ijovechakuérape ha pe okañy vaʼekuépe avei, upévare oho oheka chupe. ¡Mbaʼeichaitépa oiméne ovyʼa raʼe pe ovecha ohechárõ guare ijára og̃uahẽha ohóvo hendápe! Jesús heʼi pe ovecharerekua ovyʼaiterei  hague avei otopa haguére ijovecha. Haʼe ovyʼa umi noventa y nueve oĩ porã haguére, péro ovyʼavéntema otopa haguére pe peteĩmi okañy vaʼekue. Epensamína, ¿mávapa ojogua pe ovecharerekuápe? ¿Mávapa ojepyʼapy ñanderehe haʼe ojepyʼapyháicha ijovecháre?... Jesús heʼi Itúva Jehová ojepyʼapyha ñanderehe upéicha.

Jehová ningo pe Ovecharerekua Ijojahaʼỹva. Ohayhu umi iñeʼẽrendúvape ha ni mbaʼevéicharõ ndahesaráiri umi mitãgui. Haʼe ndoipotái oiko ñanderehe mbaʼeve ivaíva ni ñañehundi. Javyʼaiterei ningo jaikuaávo Jehová ojepyʼapyha ñanderehe (Mateo 18:12-14).

¿Rejeroviápa Jehováre rejeroviaháicha nde túvare?

¿Ndépa rejerovia Jehováre?... ¿Rejeroviápa hese rejeroviaháicha nde tuvakuérare térã ótro oñangarekóvare nderehe?... Jehová ningo peteĩ espíritu ha upévare ndaikatúi jahecha chupe, péro haʼe ñanderecha ha oikuaa ñaikotevẽ jave hese. Ñañeʼẽháicha ñande rapichakuéra ndive ikatu ñañeʼẽ Jehovápe ñemboʼe rupive. Ha haʼe ningo oipota ñañemboʼe chupe.

 Upévare, nderevyʼái ha reñeñandúramo neaño, ¿mbaʼépa rejapo vaʼerã?... Eñemboʼe Jehovápe ha eñemoag̃ui hese, ha haʼe katuete nepytyvõta. Ani nderesarái reñeñandúramo jepe neaño, Jehová nderayhuha. Jaleemína la Bíbliape Salmo 23-pe, versíkulo 1 guive, upépe heʼi: ‘Ñandejára oñangareko cherehe, haʼe omeʼẽmba chéve aikotevẽva guive. Chegueraha umi kapiʼi iporã asývare, oĩháme ysyry roʼysã asy apytuʼu hag̃ua’.

Pe versíkulo 4-pe heʼive: ‘Ahasáramo jepe kaʼaguy ypytũrupi ndakyhyjeichéne, nde reimégui chendive, nde yvyra puku chembopyʼaguapy’. Péicha oñeñandu umi ojeroviáva Jehová rehe, haʼe oipytyvõ rupi chupekuéra ohasa asy jave. ¿Ndépa reñeñandu avei péicha?...

Jehová oñangareko ñanderehe peteĩ ovecharerekua oñangarekoháicha ijovechakuérare. Haʼe ningo ohayhu káda únope ha ohechauka chupekuéra pe tape iporãvéva ha umi ovecha osegi chupe. Umi ovecha ndokyhyjéi mbaʼevégui oĩramo jepe ikatúva ojapo hesekuéra mbaʼe vai. Umi oñangarekóva ovecháre oiporu jepi peteĩ yvyra puku odefende hag̃ua ijovechakuérape mymba ñarõgui. Por ehémplo, la Biblia omombeʼu David imitãrusúrõ guare, odefende hague ijovechakuérape peteĩ león ha peteĩ ósogui (1 Samuel 17:34-36). Umi ojapóva Jehová heʼíva oikuaa haʼe  oñangarekotaha avei hesekuéra. Ndokyhyjéi mbaʼevégui Ñandejára oĩ rupi hendivekuéra.

Peteĩ ovecharerekua odefende ijovechakuérape, ha ñandéve ¿mávapa ikatu ñanepytyvõ?

Jehová ohayhueterei ijovechakuérape ha oñangareko porã hesekuéra. La Biblia heʼi: ‘Ovecharerekuáicha ogueraha ijovechakuérape. Ohupi umi ovecharaʼy ha ogueraha ijyva ári’ (Isaías 40:11).

¿Revyʼápa reikuaágui Jehová oñangarekoha nderehe?... ¿Reipotápa oiko ndehegui Jehová ovecharaʼy?... Umi ovecha ohendu herekua oñeʼẽ jave chupekuéra ha noñemomombyrýi chugui. ¿Ndépa rehendu Jehovápe?... ¿Reñemoag̃uípa hese?... Rehendúramo Jehovápe ha reñemoag̃uíramo hese natekotevẽi rekyhyje, Jehová oĩta rupi nendive.

Jaleemína koʼã téxto ohechaukáva Jehová oñangarekoha mborayhúpe ñanderehe: Salmo 37:25; 55:22 ha Lucas 12:29-31.