Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Ñaaprende Mboʼehára Guasúgui

 KAPÍTULO 5

“Kóva hína che raʼy”

“Kóva hína che raʼy”

UMI mitã ojeporta porã jave, ombovyʼa umi oñangarekóvape hese. Peteĩ mitãʼi térã peteĩ mitãkuñaʼi ojapóramo iporãva, itúva ovyʼa heseve ha heʼi: “Kóva hína che raʼy” térã “Amóva che rajy”.

Jesús siémpre ojapo Itúva heʼíva, upévare Jehová ovyʼa heseve. Ha peteĩ jey ohechauka upeichaha Itaʼýra oĩrõ guare mbohapy idisípulo ndive. ¿Nemanduʼápa mbaʼépa ojapo Ñandejára upérõ?... Oñeʼẽ yvága guive ha heʼi: “Kóva hína che Raʼy ahayhuetéva ha aguerohorýva” (Mateo 17:5).

Jesús ojaposeterei umi mbaʼe ombovyʼáva Itúvape. ¿Reikuaápa mbaʼérepa? Ohayhueterei rupi chupe. Jaikuaaháicha, ndaigústoi jajapo peteĩ mbaʼe oñemandáguinte ñandéve, péicha jave ijetuʼuve voi ñakumpli hag̃ua. Péro oiméramo jajapose voi upe ojeʼéva ñandéve, ndahasyive jajapo.

Yvágapema voi Jesús iñeʼẽrendu Itúvape opa mbaʼépe. Ha ojapo upéicha ohayhúgui chupe. Haʼe ndojapói mbaʼeve tovapukúpe. Ñandejára omeʼẽ vaʼekue Jesúspe peteĩ tembiapo tuicháva ojapo hag̃ua: ou vaʼerã kuri onase ko yvy ape ári, oĩ porãramo jepe yvágape Itúva ykére. Haʼe ojapose vaʼekue upe tembiapo, oikuaágui Jehová oipotaha upéva.

¿Mbaʼépa heʼi vaʼekue ánhel Gabriel Maríape?

Jesús onase hag̃ua ko yvy ape ári oikotevẽ vaʼekue peteĩ sy. ¿Reikuaa piko mávapa rakaʼe isy?... Héra María. Jehová ombou yvágagui ánhel Gabriélpe omombeʼu hag̃ua Maríape imembytaha peteĩ mitãkuimbaʼe, ha ombohéra vaʼerãha Jesús. ¿Ha mávapa  itúva?... Pe ánhel heʼi haʼeha Ñandejára Jehová. Upévare Jesúspe oñehenói Ñandejára Raʼy.

¿Mbaʼépa repensa heʼi hague María?... ¿Heʼípa raʼe ndojaposeiha upéva? Nahániri, haʼe ojapose vaʼekue Ñandejára oipotáva. Péro, ¿mbaʼéicha piko Jesús onaséta ko yvy ape ári, ko haʼe oikómava yvágape? ¿Mbaʼérepa Jesús idiferénte vaʼekue umi ótro mitãgui? ¿Reikuaápa nde?...

Ñandejára ojapo vaʼekue ñande ru ha ñande sy ypykuépe, Adán ha Eva, ikatu hag̃uáicha oĩ oñondive ha ifamília hikuái. Pe mitãraʼy okakuaáta isy retepýpe onase peve. Ojeʼe ko mbaʼe haʼeha peteĩ milágro, ha oiméne nde avei repensa upéicha.

Péro upéi Ñandejára ojapo peteĩ milágro tuichavévantema. Omoĩ Itaʼýra rekove María retepýpe. Ñandejára arakaʼeve ndojapóiva upéva ha koʼag̃aite peve ndojapovéiva. Ko milágro rupive Jesús okakuaa María retepýpe peteĩ mitãraʼýicha. Upe rire María ha José omenda.

Jesús onasétarõ guare, María ha José oho peteĩ siuda héravape Belén. Upépe oĩ hetaiterei hénte, ha ndotopavéima peteĩ óga opyta hag̃ua. Upévare opyta hikuái peteĩ lugár oñemoingehápe  pyharekue mymbakuérape. Upépe María imemby ha omoĩ Jesúspe peteĩ pesévrepe, rehechaháicha ko divúhope. Peteĩ pesévre ningo peteĩ mbaʼyru oñemoĩhápe hembiʼurã mymbakuérape..

¿Mbaʼérepa oñemoĩ vaʼekue Jesúspe peteĩ pesévrepe?

Pe pyhare Jesús onasérõ guare oiko heta mbaʼe ñanemopirĩmbáva. Belén ypýpe, peteĩ ánhel oñeʼẽ umi oñangarekóvape ovecháre ha heʼi chupekuéra onaseha peteĩ mitã iñimportantetereíva. Pe ánhel heʼive: ‘Che aju amombeʼu hag̃ua peẽme marandu porã ombovyʼaitereítava opavavépe. Koestedía onase upe pendesalvátava’ (Lucas 2:10, 11).

¿Mbaʼe notísia iporãvapa heʼi peteĩ ánhel umi oñangarekóvape ovecháre?

Pe ánhel heʼi umi ovecharerekuápe otopataha Jesús rehe Belénpe, peteĩ pesévrepe. Upeichaháguinte, hetave ánhel omoirũ  pe primer ánhelpe omombaʼeguasu hag̃ua Ñandejárape, ha opuraheijoa: ‘Toñembotuicha Ñandejárape, ha ko yvy ape ári taipyʼaguapy umi hénte Ñandejára oguerohorýva’ (Lucas 2:12-14).

Umi ánhel oho rire, umi ovecharerekua oho Belénpe ha otopa Jesús rehe. Upépe omombeʼu José ha Maríape umi notísia porã ohendu vaʼekue hikuái. ¡Ajépa ovyʼaiténe raʼe María naiprovlémai haguére ojapo hag̃ua Ñandejára heʼi vaʼekue chupe!

Upe rire, José ha María ova siuda de Nazarétpe, ha upépe omongakuaa Jesúspe. Tuicha rire, Jesús  oñepyrũ omboʼe umi héntepe. Upéva peteĩ tembiapo Jehová voi omeʼẽ vaʼekue chupe ojapo hag̃ua ko yvy ape ári. Jesús ojapose vaʼekue upe tembiapo ohayhueterei rupi Itúva yvagapeguápe.

Jesús oñepyrũ mboyve omboʼe umi héntepe, Juan el Bautista ovautisa chupe rrío Jordánpe. Upérõ oiko peteĩ mbaʼe ñaimoʼãʼỹva. Jesús osẽvo pe ýgui Jehová oñeʼẽ yvága guive, ha heʼi: “Kóva hína che Raʼy ahayhuetéva ha aguerohorýva” (Mateo 3:17). ¿Ndépa revyʼa nde túva ha nde sy heʼíramo ndéve nderayhuha?... Katuete Jesús ovyʼáne raʼe avei.

Jesús siémpre ojapo iporãva. Haʼe nombotavýi umi héntepe ha ndeʼíri haʼe haʼeha Ñandejára. Pe ánhel Gabriel heʼi Maríape Jesús haʼeha Ñandejára Raʼy. Ha Jesús voi heʼi vaʼekue ijehe upeichaha. Haʼe arakaʼeve ndeʼíri umi héntepe oikuaaveha Itúvagui, síno heʼi: ‘Pe Túva tuichave chehegui’ (Juan 14:28).

Oikórõ guare yvágape Jesús ojapo opa mbaʼe Itúva heʼíva chupe. Haʼe ohayhu Itúvape, upévare iñeʼẽrendu. Ha oúrõ guare ko yvy ape ári, Jesús ojapopaite Itúva yvagapegua omandáva chupe. ¡Ndareíri Jehová ovyʼaite Itaʼýra reheve!

Ñande avei ñambovyʼase Jehovápe, ¿ajépa?... Upévare jahechauka vaʼerã ñahenduha chupe, Jesús ojapo haguéicha. Ñandejára oñeʼẽ ñandéve la Biblia rupive. Naiporãmoʼãi ningo jaʼéramo ñahenduha chupe, péro upéi jaguerovia ha jajapo umi mbaʼe noĩriva la Bíbliape, ¿ajépa?... Nemanduʼákena, jahayhu añetéramo Jehovápe, vyʼápe jajapóta umi mbaʼe haʼe heʼíva.

Koʼág̃a jaleemíta koʼã téxto ohechaukáva tekotevẽha jaikuaa Jesúspe ha jajerovia hese: Mateo 7:21-23; Juan 4:25, 26 ha 1 Timoteo 2:5, 6.