Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Ñaaprende Mboʼehára Guasúgui

 KAPÍTULO 2

Peteĩ kárta oúva Ñandejára ñanderayhúvagui

Peteĩ kárta oúva Ñandejára ñanderayhúvagui

EREMÍNA chéve, ¿mbaʼeichagua lívropa ndegustave?... Oĩ mitã oipotáva umi oñeʼẽva mymbakuérare; ótro katu umi orekóva heta divúho. Ha igústo voi jalee koʼãichagua lívro.

Péro umi lívro iporãvéva hína umi oñeʼẽva Ñandejárare. Umíva apytépe oĩ peteĩ iñimportantevéva. ¿Ndépa reikuaa mbaʼe lívropa upéva?... La Biblia.

¿Mbaʼérepa iñimportantete la Biblia?... Ou rupi Ñandejáragui. La Biblia oñeʼẽ hese ha omombeʼu umi mbaʼe porã ojapótava ñanderehehápe. Avei ohechauka mbaʼépa jajapo vaʼerã ñambovyʼa hag̃ua Ñandejárape. La Biblia haʼete peteĩ kárta haʼe oguerukáva ñandéve.

Ñandejára ikatu kuri oskrivi la Biblia yvágape ha upéi ogueruka ñandéve, péro ndojapói upéicha. Haʼe oiporavo ko yvy ape árigui heta kuimbaʼe iñeʼẽrendúvape chupe, ha ojevale hesekuéra oskrivi hag̃ua la Biblia. Koʼã kuimbaʼe oskrivi Ñandejára oipotáva.

¿Mbaʼéichapa ojapo upéva?... Rentende porã hag̃ua, epensami ko mbaʼére: umi oñeʼẽva rrádiope mombyry oĩ ñandehegui, péro lomímonte ñahendu chupekuéra. Télepe ojekuaa jepi umi oĩva ótro tetãme, ha ñande ñahendu ha jahecha chupekuéra.

Oĩma avei ohóva jasýpe, ha upe guive koʼã hénte oñekomunika umi oikóvandi ko yvy ape ári. ¿Ndépa reikuaámava upéva?...  Ha haʼekuéra ikatúramo ojapo upéicha, ¿ndaikatumoʼãi piko Ñandejára oñekomunika yvága guive?... Ikatu, ha haʼe ojapóma voi upéva oĩ mboyve rrádio ha téle.

¿Mbaʼérepa jaʼekuaa Ñandejára ikatuha oñeʼẽ ñandéve mombyry guive?

Peteĩ kuimbaʼe hérava Moisés ohendu vaʼekue Ñandejára oñeʼẽrõ guare. Ndaikatúiramo jepe ohecha chupe, ohendu upe heʼíva. Upérõ osunu, overa ha pe sérro katu oryryipa. Hetaiterei hénte oĩ vaʼekue upépe, ha tuichaiterei oñemondýi hikuái oikuaágui Ñandejára oñeʼẽha. Upévare ojerure hikuái Moiséspe: ‘Anínte Ñandejára oñeʼẽ orendive, ani ág̃a romanomba mbaʼe’. Upéi Moisés ohai la Bíbliape Ñandejára heʼi vaʼekue chupe (Éxodo 20:18-21, ÑÑB).

 Moisés ohai vaʼekue umi cinco lívro tenondegua oĩva la Bíbliape, péro ndahaʼéi haʼe añónte oskrivíva la Biblia. Ñandejára ojevale cuarenta kuimbaʼére oiko vaʼekue yma. La Biblia ojehai mil seiscientos áño pukukue aja, upévare heta umi oskrivi vaʼekue ni ndojokuaái. Upéicharõ jepe, umi mbaʼe oskrivíva hikuái ndojoavýi mbaʼevetépe. ¡Ajépa tuichaite mbaʼe upéva!

¿Mbaʼéichapa héra koʼã kuimbaʼe oskrivi vaʼekue la Biblia?

Umi oskrivi vaʼekue la Biblia apytépe oĩ ikonosidoitereíva. Peteĩva haʼe Moisés, haʼe ningo ñepyrũrã oñangareko vaʼekue ovecháre péro upéi omoakã tetã Israel. Salomón katu rréi vaʼekue, ha upe tiémpope ndaipóri ótro iplatavéva ni ivalevéva chugui. Péro oĩ avei umi naikonosidoguasúiva. Umíva apytépe oĩ Amós, peteĩ kuimbaʼe ombaʼapóva oñeñotỹhápe ígo.

Ótro katu doktór vaʼekue. ¿Reikuaápa mbaʼéichapa héra?... Lucas. Oĩ vaʼekue ótro hérava Mateo, haʼe impuésto kovraha. Peteĩ katu avogádo ha ivale umi hudío léipe. Haʼe oskrivi hetave párte oĩva la Bíbliape, ¿reikuaápa mbaʼéichapa héra?... Pablo. Avei oskrivi vaʼekue la Biblia Pedro ha Juan. Haʼekuéra ningo peskadór vaʼekue oñepyrũ mboyve omoirũ Jesúspe.

Heta umi ohai vaʼekue la Biblia omombeʼu mbaʼépa Ñandejára ojapóta tenonderã. ¿Mbaʼéicha haʼekuéra oikuaa umi mbaʼe oikótava?... Ñandejára omombeʼu rupi chupekuéra.

Jesús oikórõ guare ko yvy ape ári ojeskrivíma heta párte oĩva la Bíbliape. Nemanduʼákena pe Mboʼehára Guasu oiko hague yvágape ha oikuaa umi mbaʼe Ñandejára ojapo vaʼekue. ¿Ogueroviápa haʼe la Biblia ouha Ñandejáragui?... Oguerovia.

Jesús omboʼérõ guare umi mbaʼe Ñandejára ojapóva, oleémi la Bíbliagui ha sapyʼánte heʼi de memória. Haʼe omombeʼu heta mbaʼe oaprende vaʼekue Ñandejáragui, upévare heʼi: “Che amombeʼu  ko múndope umi mbaʼe haʼe heʼíva chéve” (Juan 8:26). Jesús oiko vaʼekue Ñandejára ndive, upévare oaprende heta mbaʼe chugui. ¿Moõpa ikatu jatopa Jesús heʼi vaʼekue?... La Bíbliape. Upépe oĩmbaite jalee hag̃ua.

Umi kuimbaʼe Ñandejára oiporavo vaʼekue ohai hag̃ua la Biblia oskrivi iñidiómape. Upévare heta párte ojeskrivi evréope, michĩmi araméope ha ótra párte griégope. Péro koʼág̃arupi saʼieterei umi hénte ontendéva koʼã idióma, upévare ojetradusíma heta idiómape. Heta párte de la Biblia oĩma dos mil quinientos idióma rasápe. Ojejapo upéicha haʼe rupi peteĩ kárta oúva Ñandejáragui enterovévape g̃uarã. Upéicharõ, tahaʼe haʼéva pe idióma oĩha, umi mbaʼe heʼíva pype ou Ñandejáragui.

 La Biblia heʼíva iñimportánte ñandéve g̃uarã. Añetehápe, ymaitereíma ojeskrivi hague, péro oñeʼẽ umi mbaʼe oikóvare koʼág̃arupi. Ha omombeʼu umi mbaʼe Ñandejára ojapótava koʼẽrõite. Koʼã mbaʼe iporãiterei ha omeʼẽ ñandéve esperánsa.

¿Mbaʼépa ikatu reaprende releéramo la Biblia?

La Biblia heʼi avei mbaʼéichapa Ñandejára oipota jaiko. Ñanemboʼe mbaʼépa oĩ porã ha mbaʼépa oĩ vai, ha upéva tekotevẽterei jaikuaa. Avei omombeʼu oĩ hague ojapóva mbaʼe vai ha mbaʼépa oiko hesekuéra, péicha ñande ñañatendéta pono jajapo ivaíva. Avei oñeʼẽ umi hénte ojapo vaʼekuére Ñandejára oipotáva ha umi mbaʼe porã ohupytýva hikuái. Opa koʼã mbaʼe ojeskrivi ñanepytyvõ hag̃ua.

Péro ideprovechove hag̃ua ñandéve la Biblia heʼíva, ñanemanduʼa raẽ vaʼerã ko mbaʼére: ¿mávaguipa ou la Biblia? ¿Ndépa mbaʼe ere?... Upeichaite, la Biblia ou Ñandejáragui. ¿Mbaʼépa jajapo vaʼerã jahechauka hag̃ua ñanearanduha?... Ñahendu Ñandejárape ha jajapo haʼe heʼíva.

Upévare, tekotevẽ ñañemotiémpo jalee hag̃ua la Biblia oñondivepa. Peteĩ jahayhúva oguerukáramo ñandéve peteĩ kárta, katuete jalee heta vése. Upéicha avei ñamombaʼe vaʼerã la Biblia, haʼégui peteĩ kárta oúva Ñandejára ñanderayhuetévagui.

Jaleemi koʼã téxto jahecha hag̃ua la Biblia haʼeha Ñandejára Ñeʼẽ ha ojeskrivi hague ñanepytyvõ hag̃ua: Romanos 15:4; 2 Timoteo 3:16, 17 ha 2 Pedro 1:20, 21.