Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Ñaaprende Mboʼehára Guasúgui

 KAPÍTULO 20

¿Iporãpa reñemotenonde nde rapicháre?

¿Iporãpa reñemotenonde nde rapicháre?

¿REIKUAÁPA peteĩ nde rapicha siémpre oikóva oñemotenondese ótrore?... Ojejapo jave fíla ikatu omyaña umi ótrope opyta hag̃ua púntape. ¿Rehechámapa upéicha ojapóva?... Pe Mboʼehára Guasu ohecha vaʼekue umi kakuaa jepe ohekaha pe lugár iporãvéva térã iñimportantevéva, ha ndogustái chupe upéva. Jahechamína mbaʼépa oiko vaʼekue peteĩ jey.

¿Ndépa rehecháva umi oñemotenondeséva hapicháre?

La Biblia omombeʼu peteĩ fariséo omoakãva umi hudío rrelihión, oinvita hague Jesúspe oho hag̃ua okaru hógape. Oĩ aja upépe Jesús ohecha mbaʼéichapa umi ótro invitádo oiporavo umi lugár iporãvéva. Upévare haʼe omboʼese chupekuéra peteĩ mbaʼe  iñimportánteva ha upearã omoĩ peteĩ ehémplo. ¿Rehendusépa Jesús heʼi vaʼekue?...

Haʼe heʼi: ‘Reñeinvita jave peteĩ kasamientorã, ani reho reguapy pe asiénto iporãvévape’. ¿Reikuaápa mbaʼérepa heʼi upéva?... Jesús heʼi ikatuha oĩ peteĩ invitádo iñimportantevéva. Ha upévare, rehechaháicha ko divúhope, pe ogajára ikatu ou heʼi: ‘Epuʼã emeʼẽmi ne asiénto chupe, ha tereho nde eguapy amo’. ¿Mbaʼéichapa oñeñandúne upe invitádo oikóramo hese péicha?... Otĩetereíta enterovéva ohechágui ohoha oguapy amo huguaitépe.

Jesús ohechaukase chupekuéra ndovaleiha oheka pe lugár iporãvéva. Ha heʼi: “Reñeinvita jave, tereho eguapy pe asiénto oĩva huguaitépe. Péicha upe neinvita vaʼekue heʼíta ndéve: ‘Chamígo, ejúna eguapy koʼápe tenondeve’. Upéicharõ reñembotuicháta opavave umi ótro invitádo renondépe” (Lucas 14:1, 7-11).

¿Mbaʼépa omboʼe raʼe Jesús oñeʼẽrõ guare umi oguapývare umi lugár iporãvehápe?

¿Rentendépa la omboʼeséva Jesús?... Ñamoĩmi peteĩ ehémplo jahecha hag̃ua rentendépa. Epensami rejupitaha peteĩ kolektívope ha repilla saʼimaha la asiénto. ¿Oĩ porãtapa pyaʼe rejupíramo reguapy ha reheja peteĩ kakuaápe oñemboʼy?... ¿Ogustánepa Jesúspe upéva?...

Ikatu oĩ opensáva Jesús nopenaiha koʼã mbaʼére. ¿Péro ndépa mbaʼe ere?... Nemanduʼákena oĩrõ guare pe fariséo rógape, Jesús omaña hague umi héntere oiporavo jave umi asiénto. Upéicharõ, ¿ndépa ere ojesarekoha umi  mbaʼe jajapóvare ko tiémpope?... Koʼág̃a katu Jesús oĩma yvágape, ha katuete ohechapaite la jajapóva.

Peteĩ tapicha siémpre oñemotenondesérõ ikatu iprovléma. Pyʼỹinte umi ótro ikatu ipochy ha ojodiskuti hendive. Por ehémplo, upéva ikatu oiko mitãnguéra ojupíta jave kolektívope. Heta vése odiparapa ojupi hag̃ua púntape oguapységui ventanílla ykére. Péro ¿mbaʼépa ikatu oiko?... Ikatu oiko vaipa hikuái.

Jaipotáramo siémpre pe lugár iporãvéva katuete ñaneprovlémata. Upéicha oiko vaʼekue Jesús apostolkuérare jepe. Jahecha haguéicha kapítulo 6-pe, haʼekuéra ojodiskuti kuri ohecha hag̃ua mávapa iñimportanteve ijapytepekuéra. ¿Mbaʼépa ojapo raʼe Jesús?... Heʼi chupekuéra ivaietereiha opensa upéicha. Péro upéi ojodiskuti jey hikuái. Jahechamína mbaʼéicha rupípa.

 Umi apóstol ha ótro disipulokuéra ojapo peteĩ último viáhe Jesús ndive Jerusalénpe. Haʼe oñeʼẽma kuri chupekuéra Irréinore. Upévare, Santiago ha Juan opensáma voi ogovernataha Jesús ndive, ha omombeʼu hikuái upéva isýpe, hérava Salomé (Mateo 27:56; Marcos 15:40). Upévare, ohokuévo hikuái Jerusalénpe, Salomé oñemboja Jesús rendápe, oñesũ henondépe ha ojerure chupe peteĩ mbaʼe.

Jesús oporandu Salomépe: “¿Mbaʼépa reipota?”. Haʼe heʼi ohejami hag̃ua umi mokõi imemby oguapy ijykére Irréinope, peteĩva ideréchape ha ótro katu ijiskiérdape. Umi diez apóstol oikuaávo mbaʼépa Santiago ha Juan heʼi isýpe ojapo hag̃ua, ¿mbaʼéichapa oñeñandúne raʼe hikuái?...

¿Mbaʼépa ojerure Salomé Jesúspe, ha mbaʼépa oiko upe rire?

 Haʼekuéra ipochyeterei Santiago ha Juan rehe. Upévare, Jesús omboʼe ijapostolkuérape peteĩ mbaʼe iñimportánteva. Haʼe heʼi umi governánte omandaseterei ha iñimportanteseha, enterovéva ojapo hag̃ua haʼekuéra heʼíva. Péro Jesús heʼi ijapostolkuérape upéva noĩporãiha ha upe ‘oĩséva tenondete oiko vaʼerãha tembiguáiramo’. Epensamína upévare (Mateo 20:20-28).

¿Ndépa reikuaa mbaʼépa ojapo peteĩ tembiguái térã esklávo?... Oipytyvõ térã oservi hapichakuérape ha nohaʼarõi avave oservi chupe. Nopensái iñimportanteveha ótrogui ha upévare ndoikói oñembotuicha. Upéicharõ, aníke nderesarái Jesús heʼi hague upe oĩséva tenondete, oiko vaʼerãha tembiguáiramo.

¿Mbaʼépa ñanemboʼe Jesús heʼi vaʼekue?... ¿Odiskutínepa peteĩ tembiguái ipatrónpe haʼe oguapységui pe asiénto iporãvévape térã haʼe raẽ okaruségui? ¿Ndépa mbaʼe repensa?... Jesús heʼi pe tembiguái siémpre omotenondeha ipatrónpe ha oservi chupe (Lucas 17:7-10).

Upévare, jaiko rangue ñañemotenondese ótrore, ¿mbaʼépa jajapo vaʼerã?... Jaiko vaʼerã tembiguáiramo. Upéva heʼise ñamotenondetaha ñande rapichakuérape ha ñapensataha haʼekuéra iñimportanteveha ñandehegui. ¿Mbaʼéichapa ikatu remotenonde ótrope?... Emañami jeýna páhina 40 ha 41-re, upépe rehecháta mbaʼépa rejapokuaa reservi hag̃ua nde rapichápe.

Oiméne nemanduʼa Jesús oservi hague ótrope. Por ehémplo, pe pyhare omano mboyve, naiprovlemaiete ombojepyhéi hag̃ua ijapostolkuérape. Ñande avei ñamotenondéramo ñande rapichápe, ñambovyʼáta Mboʼehára Guasúpe ha avei Jehovápe.

Jaleemína koʼã téxto ohechaukáva iporãha ñamotenonde ñande rapichakuérape: Lucas 9:48; Romanos 12:3 ha Filipenses 2:3, 4.