Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Ñaaprende Mboʼehára Guasúgui

 KAPÍTULO 24

Aníkena nemonda

Aníkena nemonda

¿OÑEMONDÁMAPA ndehegui peteĩ mbaʼe?... Oiméramo upéicha, ¿mbaʼéichapa reñeñandu raʼe?... Pe ojapo vaʼekue nderehe upéva ningo peteĩ mondaha, ha avave ndohayhúi umichaguápe. Péro, ¿mbaʼéicha rupi oiko chuguikuéra mondaha? ¿Onaséma voi piko upéicha? ¿Ndépa mbaʼe ere?...

Kapítulo 23-pe jahecha kuri enterovéva ñanaseha pekadór. Péro upéva ndeʼiséi oĩha onaséva mondaha. Pe persona omondáva ikatu oreko itúva, isy ha iñermanokuéra ivuéno ha naimondáiva. Péro haʼe oipota potave pláta ha ojoguase heta mbaʼe ha upévare oñepyrũ omonda.

¿Ndépa reikuaa mávapa pe primer mondaha?... Jakalkulamína. Pe Mboʼehára Guasu oikuaa vaʼekue chupe oĩrõ guare yvágape. Pe primer mondaha haʼe vaʼekue peteĩ ánhel. Péro nemanduʼáne Ñandejára ojapo hague perfékto umi ánhelpe. Upéicharõ, ¿mbaʼéicha rupi oiko chugui peteĩ mondaha?... Jahecha haguéicha kapítulo 8-pe, ko ánhel oipota vaʼekue peteĩ mbaʼe ahéno. ¿Mbaʼépa raʼe upéva?...

Ko ánhel oipota vaʼekue Adán ha Eva omombaʼeguasu chupe. Péro Ñandejárape añoite ñamombaʼeguasu vaʼerã. Upéicharõ, ko ánhel oipota peteĩ mbaʼe ndahaʼéiva imbaʼerã. Upéi ombotavy Adán ha Évape ha haʼekuéra oadora chupe, upévare haʼete ku omondáva Jehovápe. Péicha ko ánhelgui oiko peteĩ mondaha, ha oñehenói chupe Satanás ha Diablo.

 ¿Mbaʼéicha rupípa peteĩ tapicha ikatu oñepyrũ omonda?... Oipota rupi mbaʼe ahéno. Umi ivuénova jepe ikatu ojapo mbaʼe vai oipotaitereíramo hína mbaʼe ahéno. Sapyʼánte oĩ mondaha nokambiaséiva ha osegíva hembiapo vai. Upéicha vaʼekue peteĩ apóstol hérava Judas Iscariote.

Imitã guive haʼe oaprende Ñandejára Léi heʼiha ndovaleiha ñamonda. Oikuaa Jehová oñeʼẽ hague yvága guive ha heʼi ipuévlope: “Ani remonda” (Éxodo 20:15). Judas okakuaapa rire oiko chugui pe Mboʼehára Guasu disípulo. Hiʼarive, Jesús oiporavórõ guare umi doce apóstol, oiporavo avei Júdaspe.

Jesús ha ijapostolkuéra oviaha meme ha okarúmi oñondivepa. Haʼekuéra oreko ipláta peteĩ káhape, ha Jesús omeʼẽ Júdaspe pe káha oñangareko hag̃ua hese. Pe pláta ndahaʼéi kuri Judas mbaʼe, péro ¿reikuaápa mbaʼépa ojapo haʼe?...

¿Mbaʼérepa Judas omonda vaʼekue?

Judas oñepyrũ onohẽ ñemiháme pláta pe káhagui. Hiʼarive okalkula voi mbaʼéichapa ikatu oñemoĩve pláta pe káhape omonda hag̃ua. Amo ipahápe plátarentema oiko opensa. Upéicha rupi ojapo peteĩ mbaʼe ivaietereíva ojejuka mboyvemi pe Mboʼehára Guasúpe. Jahechamína mbaʼépa upéva.

Peteĩ jey, Lázaro ermána hérava María, ogueraha peteĩ aséite iporã ha hepýva ha omona Jesús pýre. Judas katu ipochy upévare, ¿ndépa reikuaa mbaʼérepa?... Haʼe heʼi ikuentaveha kuri oñevende pe aséite ha oñemeʼẽ hepykue umi mboriahúpe. Péro heʼínte upéva. Añetehápe haʼe oipota oñemoĩve pláta pe káhape upéi omonda hag̃ua (Juan 12:1-6).

Jesús heʼi Júdaspe María imbaʼeporãha ha ani hag̃ua omolesta chupe. Judas katu ipochy Jesús heʼívare ha oho umi saserdóte rendápe. Koʼãva ndochaʼeiete Jesús rehe ha ojagarrase  chupe. Péro ojapose upéva pyharekue pono avave ohecha chupekuéra.

Judas heʼi umi saserdótepe: ‘Pepagáramo chéve haʼéta peẽme moõpa ikatu petopa Jesúspe. ¿Mboýpa pemeʼẽta chéve?’.

Umi saserdóte heʼi chupe: ‘Romeʼẽta ndéve 30 monéda de pláta’ (Mateo 26:14-16).

Judas ojagarra pe pláta. Upévare haʼete ku ovendéva pe Mboʼehára Guasúpe. ¿Ajépa ivaiete la ojapóva?... Koʼãichagua mbaʼe vai ojapo umi omondáva, ohayhuve rupi pláta hapichakuéra ha Ñandejárape rangue.

Nde ikatu ere: “Che siémpre ahayhúta Jehovápe”. Iporã repensa upéicha. Péro Judas opensáne raʼe upéicha avei Jesús oiporavórõ guare chupe ijapostolrã. Ha oĩ vaʼekue avei hetave hénte ñepyrũrã ivuénova, péro upéinte ou ojapo mbaʼe vai. Jahechamína mbohapy káso.

¿Mbaʼépa opensa hína Acán ha David?

Heta tiémpo Jesús onase mboyve, oĩ vaʼekue peteĩ kuimbaʼe hérava Acán. Haʼe ojapo vaʼekue Ñandejára heʼíva. Péro peteĩ díape otopa óro, pláta ha peteĩ ao neporãva ha oipotaitereígui  oguerahapa imbaʼerã. Umíva ndahaʼéi vaʼekue imbaʼe. La Biblia heʼi Jehová mbaʼeha, umi isrraelíta oipeʼa rupi iñenemigokuéragui (Josué 6:19; 7:11, 20-22).

Koʼág̃a jahechami ótro káso. Jehová oiporavo vaʼekue Davídpe oiko hag̃ua chugui rréi Isrraélpe. Peteĩ árape, David oñepyrũ omaña peteĩ kuña iporãvare hérava Bat-seba. Haʼe osegi omaña hese ha ogueruse chupe hógape oreko hag̃ua rrelasión sexuál hendive. Péro Bat-seba ningo Urías rembireko. Upévare ¿mbaʼépa ojapo vaʼerãmoʼã David?...

Ni nopensavéi vaʼerã kuri Bat-sébare, péro ndojapói upéicha. Upéva rangue ogueraha chupe hógape ha ojukauka  Uríaspe. ¿Mbaʼérepa ojapo koʼã mbaʼe vai?... Oipotágui tembireko ahéno (2 Samuel 11:2-27).

¿Mbaʼérepa ikatu jaʼe Absalón omonda hague?

David ombyasy pe ojapo vaʼekue ha upévare Jehová operdona chupe. Péro upe rire heta iprovléma. Peteĩ itaʼýra hérava Absalón opuʼã hese ha ojupise rréiramo ivése. Upévare, umi hénte oho jave David rendápe, Absalón oañua ha ohetũmba chupekuéra. La Biblia heʼi: ‘Absalón omonda Israelgua korasõ’. Upéva heʼise ojehayhuka hague oipeʼa hag̃ua itúvagui igoviérno. Upéi umi hénte ja oipotáma Absalóngui oiko rréi David vése (2 Samuel 15:1-12, ÑÑB).

¿Ndépa reipotaitereímava peteĩ mbaʼe Acán, David ha Absalón oipota haguéicha?... Oimérõ mbaʼe ahéno la reipotáva ha regueraha permisoʼỹre, remondáma hína. ¿Nemanduʼápa mbaʼépa oipota vaʼekue Satanás?... Oipota ojeadora chupe Ñandejárape rangue. Upévare okonsegírõ guare Adán ha Eva oadora chupe, oiko chugui mondaha.

Káda uno odesidi vaʼerã mávapepa oiporukáta ikosakuéra. Por ehémplo, rehóramo rehuga ótro mitã rógape, ¿iporãtapa reguerahárõ nde rógape peteĩ mbaʼe?... Nahániri. Péro ikatu regueraha isy térã itúva omeʼẽrõ ndéve. Reguerahárõ rejerureʼỹre avavépe, remonda hína.

¿Mbaʼéicha rupípa ikatu remondase?... Reipotaitereíramo álgo ndahaʼéiva nembaʼe. Ikatu oime avave ndohechái reguerahaha mbaʼe ahéno, péro ¿mávapa ohechapaite hína la oikóva?... Jehová. Ha nemanduʼákena haʼe ndoipotaiha ñamonda. Upévare, rehayhúramo Ñandejárape ha nde rapichakuérape ni mbaʼevéicharõ neremondamoʼãi.

Koʼã téxto ohechauka porã ndovaleiha ñamonda: Marcos 10:17-19; Romanos 13:9 ha Efesios 4:28.