Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Ñaaprende Mboʼehára Guasúgui

 KAPÍTULO 15

Ñanembaʼeporã vaʼerã ñande rapichakuérandi

Ñanembaʼeporã vaʼerã ñande rapichakuérandi

¿OVALÉPA ñapensa vai ñande rapicháre jaikuaaʼỹre chupe?... Nahániri. Péro heta hénte ndochaʼéi hapicháre idiferénte haguérente chugui, térã oñeʼẽ rupi ótro idióma.

¿Ndépa ere oĩ porãha upéva?... Oĩ vaieterei. Umi ndochaʼéiva hapicháre ohechauka naimbaʼeporãiha. Ndovaléi ningo jatrata vai avavépe idiferénte haguérente ñandehegui.

Eremína chéve: ¿ndépa reikuaa peteĩ nde rapicha ipire kolór idiferénteva ndehegui, térã oñeʼẽva ótro idiómape?... Ikatu oime avei reikuaa peteĩ idiferénteva ndehegui mbaʼasy térã aksidénte káusare. ¿Nembaʼeporãpa avei umichaguándi ha rehayhu chupekuéra?...

¿Mbaʼéichapa jatrata vaʼerã umi idiferéntevape ñandehegui?

Jajapóramo pe Mboʼehára Guasu heʼíva ñanembaʼeporãta enterovévandi. Tahaʼe haʼéva hetã térã ipire kolór jatrata porãta chupe. Oĩ nopensáiva upéicha, péro Jesús omombeʼu peteĩ istória ohechaukáva iñimportanteha ñanembaʼeporã opavavéndi. Jahechamína mbaʼéicha rupípa Jesús omombeʼu upéva.

Peteĩ árape, peteĩ hudío ndochaʼéiva umi hénte ótro tetãyguáre oñemboja oporandu Jesúspe: “¿Mbaʼépa tekotevẽ ajapo ahupyty hag̃ua jeikove opaveʼỹva?”. Oiméne oipota heʼi chupe imbaʼeporã vaʼerãha umi hetãyguándi añónte, péro Jesús opilla pe kuimbaʼe opensáva ha upévare oporandu chupe: ‘¿Mbaʼe piko heʼi Ñandejára Léi jajapo vaʼerãha?’.

 Pe kuimbaʼe ombohovái Jesúspe: ‘Rehayhu vaʼerã nde Jára Jehovápe nde pyʼaite guive, ha nde rapichápe nde rejehayhuháicha’. Upémarõ Jesús heʼi chupe: ‘Oĩ porã, esegi ejapo péicha ha rehupytýta jeikove opaveʼỹva’.

Péro pe kuimbaʼe ndohayhúi umi idiferéntevape chugui ha naimbaʼeporãséi hendivekuéra. Upévare oporandu jey Jesúspe: “¿Máva piko añetehápe che rapicha?”. Ikatu oime oipota Jesús heʼi chupe: “Nde rapicha ningo ne amigokuéra, ndahaʼéi umi idiferénteva ndehegui”. Péro Jesús omombeʼu chupe peteĩ istória oñeʼẽva peteĩ hudío ha peteĩ samaritánore. Ñahendumína.

Peteĩ jey peteĩ hudío ovahea ohóvo Jerusaléngui Jericó gotyo. Upeichaháguinte osẽ chupe una partída mondaha, ha oipeʼapaite chugui ipláta ha ijao. Upéi ombyepoti vaipaite chupe ha oheja heʼõngue lénto pe tape ykére.

Upe riremínte, ohasa ohóvo upérupi peteĩ saserdóte ha ohecha pe kuimbaʼe oĩ vaietereiha. ¿Mbaʼépa nde rejapo vaʼerãmoʼã  rehechárire pe kuimbaʼépe?... Pe saserdóte nopenái hese ha ohasánte ohóvo. Ndojapói mbaʼevete oipytyvõ hag̃ua chupe.

Upéi katu ohasa ótro kuimbaʼe heʼíva ohayhuetereiha Ñandejárape. Haʼe ningo levíta ha ombaʼapo pe témplo oĩva Jerusalénpe. ¿Ndépa ere opytáne hague oipytyvõ pe kuimbaʼépe?... Nahániri. Haʼe ojapo pe saserdóte ojapo haguéichante avei.

Ipahaitépe, ou peteĩ samaritáno. ¿Rehechápa chupe ko divúhope oñemoag̃uiha oúvo?... Ko samaritáno ohecha pe hudío ojepyso pe yvýpe ha oliga vaipa hague. Péro oĩ peteĩ provléma, umi hudío ha umi samaritáno ndochaʼéi ojuehe (Juan 4:9). Upéicharõ,  ¿oipytyvõnepa pe hudíope? Térãpa opensáne: “¿Maʼerã piko che aipytyvõta chupe? Haʼe guaʼúko chepytyvõta che aime vaíramo”.

¿Mbaʼéichapa ohechauka pe samaritáno imbaʼeporãha hapichándi?

Pe samaritáno omaña pe hudíore ha ombyasyeterei chupe. Ni mbaʼevéicharõ ndohejaséi omano upépe. Upémarõ oguejy ivúrro árigui ha oipytyvõ chupe, omoĩ aséite ha víno ijerídare ha ojokua.

Upéi ohupi chupe ivúrro ári ha ogueraha mbeguekatu ohupyty peve peteĩ posáda. Upépe oalkila peteĩ koty ha oñatende pe hudíore.

Omombeʼupa rire ko istória, Jesús oporandu pe kuimbaʼe oñeʼẽvape hendive: ‘¿Mávapa koʼã mbohapy apytégui ohechauka imbaʼeporãha hapichándi?’. Ha nde, ¿mbaʼe ere: pe saserdóte, pe levíta térãpa pe samaritáno?...

Pe kuimbaʼe ombohovái: ‘Pe opyta vaʼekue oipytyvõ chupe’. Upémarõ Jesús heʼi: ‘Upeichaite. Tereho ejapo nde avei upéicha’ (Lucas 10:25-37).

¡Ajépa iporãite ko istória Jesús omombeʼu vaʼekue! Ohechauka ñandéve  ñande rapicha ndahaʼeiha ñane amigokuéra añónte, síno avei umi idiferénteva ñandehegui. Jesús ñanemboʼe ñanembaʼeporã vaʼerãha enterovévandi, tahaʼe haʼéva hetã, iñidióma térã ipire kolór.

Jehová ningo imbaʼeporã opavavéndi. Upévare Jesús heʼi: ‘Pende Ru yvagapegua oheja osẽ kuarahy iñaña ha hekoporãvape g̃uarã; ha omongy hekojoja ha hekojojaʼỹvape g̃uarã’. Ñande avei ñanembaʼeporã vaʼerã enterovévandi ojapoháicha Ñandejára (Mateo 5:44-48).

¿Mbaʼéichapa ikatu rehechauka nembaʼeporãha?

Upéicharõ, ¿mbaʼépa rejapóta oĩramo peteĩ oñelastimáva?... ¿Ha ndahaʼéiramo ne retãygua, térã ipire kolór idiferénterõ? Lomímonte reipytyvõ vaʼerã chupe. Péro rehechakuaáramo ndaikatumoʼãiha reipytyvõ chupe neaño, rehenoikuaa peteĩ kakuaápe. Ikatu peteĩ polisía térã peteĩ profesórpe. Péicha rejapóramo rehechaukáta nembaʼeporãha opavavéndi, ojapo haguéicha pe samaritáno.

Pe Mboʼehára Guasu oipota ñanembaʼeporã enterovévandi ha ñaipytyvõ tahaʼe haʼévape. Upévare omombeʼu ñandéve pe samaritáno ojapo vaʼekue.

Jaleemi la Bíbliape mbaʼéichapa jatrata vaʼerã enterovévape: Proverbios 19:22; Hechos 10:34, 35 ha 17:26.