Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Ñaaprende Mboʼehára Guasúgui

 KAPÍTULO 39

Ñandejára omoingove jey Itaʼýrape

Ñandejára omoingove jey Itaʼýrape

JESÚS hasẽ vaʼekue omanórõ guare iñamígo Lázaro. Ha Jesús omanórõ guare ¿ombyasýnepa raʼe Ñandejára?... La Biblia ningo heʼi oĩha heta mbaʼe ikatúva “omoñeñandu vai” ha “ombohasa asy” Ñandejárape (Salmo 78:40, 41, NM; Juan 11:35).

Mbaʼeichaitépa oiméne Jehová ombyasy raʼe ohechárõ guare omano Itaʼýra ohayhuetéva, ¿ajépa?... Jesús oguerovia vaʼekue Ñandejára ndahesaraimoʼãiha chugui. Upévare omano mboyvemi heʼi: “Che Ru, nde pópe aheja che rekove” (Lucas 23:46).

Jesús oikuaa porã vaʼekue Ñandejára ndohejamoʼãiha hiʼare sepultúrape ha omoingove jeytaha chupe. Jesús oikove jey rire, apóstol Pedro omombeʼu mbaʼépa la Biblia heʼíma vaʼekue voi hese: ‘Ñandejára ndohejamoʼãi Crístope sepultúrape ha hete noñembyaimoʼãi’ (Hechos 2:31; Salmo  16:10). Jesús retekue sapyʼaiténte opyta sepultúrape ha upévare noñembyaíri ha nainejepéi.

Jesús oiko aja ko yvy ape ári, heʼi porã vaʼekue idisipulokuérape oikove jeytaha. Heʼi chupekuéra ‘ojejukataha ha tres día haguépe oñemopuʼã jeytaha’ (Lucas 9:22). Upévare idisipulokuéra ndohecharamói vaʼerã kuri Jesús oikove jeýrõ guare. Péro, ¿mbaʼépa ojapo rakaʼe hikuái?... Jahechamína upéva.

Pe Mboʼehára Guasu omano viernes las trésrupi. Peteĩ kuimbaʼe hérava José, ipláta hetáva ha ojeroviáva ñemiháme Jesúsre, oho Pilato rendápe ha heʼi chupe ikatúpa omboguejy Jesús retekue. Upéi haʼe ogueraha hetekue ha omoĩ peteĩ sepultúra oĩva itakuápe.

Omoĩ rire upépe, omboty peteĩ ita guasúpe. Upéi ohasáma tres día Jesús omano hague. Upérõ domingo, neʼĩra ni koʼẽ ha umi soldádo oñatende hína pe sepultúrare, umi saserdóte omondo rupi chupekuéra upearã. ¿Ndépa reikuaa mbaʼérepa?...

Umi saserdóte oikuaa avei Jesús heʼi hague oikove jeytaha. Upévare omoĩ soldádo oñatende hag̃ua pe sepultúrare, pono umi disípulo ogueraha Jesús retekue ha upéi heʼi oikove jey hague. Péro upeichaháguinte oiko peteĩ yvyryrýi ha omimbi peteĩ lus pe pytũmbýpe. ¡Peteĩ ánhel ningo raʼe! Umi soldádo tuichaiterei oñemondýi ha ndaikatúi ni okuʼe. Pe ánhel oho pe sepultúra oĩháme ha oipeʼa pe ita iñentrádagui. ¡Pe sepultúra nandiveráma!

¿Mbaʼérepa nandíma pe sepultúra? ¿Mbaʼépa oiko raʼe?

Tiémpo rire, apóstol Pedro omombeʼu mbaʼépa la oiko vaʼekue. Haʼe heʼi: “Ñandejára omoingove jey Jesúspe” (Hechos 2:32). Jehová omopuʼã jey chupe, péro Jesús ndahaʼevéima peteĩ persóna ñandeichagua, oiko jeýma chugui peteĩ ánhel (1 Pedro 3:18).  Péro ojechaukámante vaʼerã peteĩ persónaicha umi hénte ohecha hag̃ua chupe. ¿Ojapópa raʼe upéva?... Jahechamína.

Koʼẽma ohóvo ha umi soldádo ja ohopáma. María Magdalena ha umi kuña ojeroviáva avei Jesús rehe oho hína pe sepultúrape, ha heʼi ojupe: “¿Máva piko oipeʼáta ñandéve pe ita ombotýva sepultúra juru?” (Marcos 16:3). Péro og̃uahẽvo ohecha hikuái ojepeʼamaha pe ita, ha oñemondýi ndotopavéima rupi Jesús retekue. María Magdalena pyaʼe oho omombeʼu umi apóstolpe la oikóva.

Umi ótro kuña katu opytánte upépe ha oikuaasejoa moõpa ojegueraháne raʼe Jesús retekue. Upeichaháguinte oñemboʼy sapyʼa upépe mokõi ánhel ijao mimbipáva. Haʼekuéra heʼi koʼã kuñáme: ‘¿Mbaʼére piko peheka Jesúspe koʼápe? Haʼe ningo oikove jeýma. Pyaʼe tapeho pemombeʼu idisipulokuérape’. Katuete ningo vevépe ohóne raʼe hikuái. Ha tapére ojotopa hendivekuéra peteĩ kuimbaʼe. ¿Ndépa reikuaa mávapa?...

Ko kuimbaʼe ningo Jesús. Haʼe oñembohete yvypóraicha umi kuña ohecha hag̃ua chupe, ha heʼi chupekuéra: ‘Tapeho pemombeʼu che disipulokuérape’. Koʼã kuña ovyʼaiterei ha oho heʼi umi disípulope: ‘¡Jesús oikove jeýma! ¡Ore rohecha chupe!’. María Magdalena heʼíma kuri Pedro ha Juánpe nandimaha pe sepultúra ha haʼekuéra oho orrevisa. Rehechaháicha ko divúhope, Pedro ha Juan otopa pe téla Jesús ojelia hague, péro ndoikuaái mbaʼépa oiko hetekuégui. Haʼekuéra ogueroviase Jesús oikove jeyha, péro opensa avei ijetuʼuha oiko hag̃ua upéva.

¿Mbaʼépa oiméne opensa raʼe Pedro ha Juan?

Upe domíngope voi, Jesús ojechauka avei mokõi idisípulope ohokuévo hikuái puévlo Emaúspe. Jesús oñemongeta ohóvo hendivekuéra, péro haʼekuéra ndoikuaái chupe haʼe ndoiporuvéima rupi hete oreko vaʼekue omano mboyve. Upéi okaru hendivekuéra  ha Jesús oñemboʼévo umi mokõi disípulo oikuaa sapyʼa chupe. Haʼekuéra ovyʼaiterei ha pyaʼe oho jey Jerusalénpe, oĩva unos kuánto kilómetro upégui. Amalisia upe riremínte Jesús ojechauka avei Pédrope, oguerovia hag̃ua haʼe oikove jeýma hague.

Upe domingo pyharépe unos kuánto disípulo oĩmba oñondivepa peteĩ koty ñembotypýpe. Upeichaháguinte Jesús oĩ sapyʼa ijapytepekuéra, upépe ogueroviáma oikove jey hague. ¡Ovyʼaiténe raʼe hikuái! (Mateo 28:1-15; Lucas 24:1-49; Juan 19:38–20:21.)

Cuarenta día aja Jesús ojechauka idisipulokuérape heta vése. Upe rire oho jey yvágape (Hechos 1:9-11). Umi disípulo pyaʼe  oñepyrũ omombeʼu opavavépe Ñandejára omoingove jey hague Jesúspe. Umi saserdóte oinupã ha ojukaukáramo jepe algúnope, haʼekuéra lomímonte opredika. Ojapo upéva, oikuaágui Jehová omoingove jeytaha chupekuéra, omoingove haguéicha Jesúspe.

¿Mbaʼépa iñimportanteve hetápe g̃uarã og̃uahẽvo Jesús oikove jey hague ára? ¿Ha mbaʼépa iñimportanteve ndéve?

Ajépa idiferentete umi disípulo umi hénte oikóvagui koʼág̃a. Og̃uahẽvo pe tiémpo ojegueromanduʼaha Jesús omano ha oikove jey hague, heta hénte opensave ojapóvo chipa ha karu guasu. Ótro hendápe katu oñemombaʼeterei umi koného ha huevo de pascua. Chupekuéra g̃uarã iñimportanteve koʼã mbaʼe, péro la Biblia noñeʼẽi koʼãvare. Heʼi guei ñaneñeʼẽrendu vaʼerãha Ñandejárape.

Ñande ikatu avei jajapo umi disípulo ojapo haguéicha ha ñamombeʼu opavavépe Ñandejára omoingove hague Jesúspe. Ndajakyhyjéi vaʼerã oĩramo jepe heʼíva ñandejukataha. Ñamanóramo, Jehová ñanemoingove jeýta ojapo haguéicha Jesúsre.

Javyʼaite ningo jaikuaávo Jehová ndahesaraimoʼãiha ñandehegui ha ñanemoingove jeytaha, ¿ajépa?... Ñaaprende rire koʼã mbaʼe katuete jaikuaaséne mbaʼépa jajapo vaʼerã ñambovyʼa hag̃ua Ñandejárape. ¿Ndépa reikuaa ñande ikatuha ñambovyʼa Jehovápe?... Pe ótro kapítulope jahecháta mbaʼéichapa ikatu jajapo upéva.

Jagueroviáramo Jesús oikove jey hague, jajeroviavéta Jehováre. Jaleemína: Hechos 2:22-36; 4:18-20 ha 1 Corintios 15:3-8, 20-23.