Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Ñaaprende Mboʼehára Guasúgui

 KAPÍTULO 11

Ñandejára anhelkuéra ñanepytyvõ

Ñandejára anhelkuéra ñanepytyvõ

OĨ HEʼÍVA ogueroviaha umi mbaʼe ohechávante, péro upéva naisentídoi. ¿Mbaʼérepa? Pórke oĩ heta mbaʼe ndaikatúiva jahecha, péro oexisti. ¿Mbaʼe mbaʼépa hína umíva?...

¿Ndépa rehecháva pe yvytu?... Péro, eipejumína koʼág̃a nde po. ¿Reñandúpa pe yvytu?... Péro ndaikatúi rehecha, ¿ajépa?...

Ñande ñaaprendéma oĩha tuichave ha imbaretevéva ñandehegui ha ndaikatúiva jahecha. Umíva apytépe oĩ ivuénova ha iñañáva. ¿Nemanduʼápa mávapa umi ivuénova?... Upeichaite, Jehová, Jesús ha umi ánhel ivuénova. ¿Péro oĩpa avei ánhel iñañáva?... La Biblia heʼi oĩha. ¿Mbaʼépa reikuaáma chuguikuéra?...

Enterove umi ánhel imbareteve ñandehegui. Pe Mboʼehára Guasu oikuaa vaʼekue heta mbaʼe chuguikuéra, pórke haʼe peteĩ ánhel vaʼekue onase mboyve ko yvy ape ári. Ha oiko yvágape hetaiterei ánhel apytépe. ¿Hérapa umi ánhel?...

Jahecháma kuri Ñandejára ombohéra hague umi estréllape. Upévare jaʼekuaa katuete ombohérane hague avei umi ánhelpe. Avei jaikuaa haʼekuéra oñeʼẽha oñondive, la Biblia heʼi voi umi ‘ánhel orekoha iñidióma’ (1 Corintios 13:1). ¿Mbaʼérehepa oñeʼẽne hikuái? ¿Oñeʼẽnepa umi mbaʼe jajapóvare? ¿Mbaʼépa nde ere?...

Umi ánhel iñañáva ndoipotái jajapo Jehová heʼíva. Upévare oiméne oñemongeta ohecha hag̃ua mbaʼéichapa ikatu ojapoka ñandéve mbaʼe vai. Umi demónio oipota jajogua chupekuéra pono  ñambovyʼa Ñandejárape. ¿Ha oñeʼẽnepa avei ñanderehe umi ánhel ivuénova?... Oñeʼẽ, péro ñanepytyvõségui. Tamombeʼumína ndéve mbaʼéichapa yma umi ánhel oipytyvõ umi tapicha ohayhúvape Jehovápe.

Babilóniape oiko vaʼekue peteĩ kuimbaʼe hérava Daniel. Upépe heta hénte ndohayhúi Jehovápe, ha upévare oñeguenohẽ peteĩ léi heʼíva ojekastiga vaʼerãha umi oñemboʼéva guive Ñandejárape. Péro Daniel osegi oñemboʼe. ¿Ndépa reikuaa mbaʼépa oiko hese?...

Umi kuimbaʼe iñañáva opoi chupe oĩháme heta león. Ha Daniel opyta haʼeño umi león ñembyahýi apytépe. ¿Reikuaápa mbaʼépa oiko upe rire?... Haʼe omombeʼu: ‘Ñandejára ombou peteĩ ánhel omboty hag̃ua umi león juru’. ¡Epensamína: mbaʼevete asy ndojapói hese umi  león! Jahechaháicha, umi ánhel ikatu oipytyvõ umi ojeroviávape Jehováre (Daniel 6:18-22, ÑÑB).

¿Mbaʼépa ojapo Ñandejára osalva hag̃ua Daniélpe?

Jahechami koʼág̃a ótro káso. Pedro ningo Jesús amígo vaʼekue. Ha oĩ ndochaʼeietéva hese omboʼe haguére Jesús haʼeha Ñandejára Raʼy. Upévare, peteĩ jey ojegueraha chupe kárselpe ha oñemoĩ mokõi soldádope oñatende hag̃ua hese pono okañy. ¿Máva piko ikatu oipytyvõmi chupe?...

Pedro oke mokõi soldádo mbytépe, ha oñeñapytĩ kadénape ipógui. Péro upéi oiko peteĩ mbaʼe ñaimoʼãʼỹva. La Biblia omombeʼu: “¡Péina!, Jehová ánhel oñemboʼy upépe, ha peteĩ mbaʼerendy  ohesapepa pe kalavóso. Pe ánhel oñatõi Pédrope ikostádope, omombáy chupe ha heʼi: ‘¡Pyaʼe epuʼã!’”.

¿Mbaʼéichapa peteĩ ánhel oipytyvõ Pédrope osẽ hag̃ua kárselgui?

Upe javete umi kadéna hoʼa ipógui, ha pe ánhel heʼi chupe: ‘Eñemonde, eñapytĩ ne sandália ha eju che rapykuéri’. Pedro osegi pe ánhelpe ha og̃uahẽ hikuái peteĩ okẽ de iérrope. Ha upeichahágui pe okẽ ojavri ijeheguínte. Peteĩ ánhel ningo la oipytyvõva chupe, upévare umi soldádo ndaikatúi ojapo mbaʼeve. Ko ánhel oguenohẽ Pédrope kárselgui osegi hag̃ua opredika (Hechos 12:3-11).

¿Ikatúpa Jehová anhelkuéra ñanepytyvõ avei?... Ikatu. Péro, ¿heʼisépa upéva ndohejamoʼãiha oiko ñanderehe mbaʼeve ivaíva?... Nahániri. Jaikóramo jajapeligra rei, umi ánhel nañandesalvamoʼãi. Ha ndajajapóiramo jepe mbaʼeve ipeligrósova, ikatúnte avei oiko ñanderehe peteĩ mbaʼe vai. ¿Mbaʼérepa? Pórke Jehová ningo nomandái voi umi ánhelpe oñangareko hag̃ua ñanderehe tódo el día. Upéva rangue omeʼẽ chupekuéra ótro traváho iporãitereíva avei. Jahechamína mbaʼépa.

La Biblia omombeʼu oĩha peteĩ ánhel heʼíva enterovépe omombaʼeguasu hag̃ua Ñandejárape (Apocalipsis 14:6, 7). ¿Mbaʼéichapa ojapo upéva? ¿Oñepyrũpa osapukái yvága guive opavave ohendu hag̃ua chupe?... Nahániri. Umi tapicha iñeʼẽrendúva Jesúspe la heʼíva umi héntepe omombaʼeguasu vaʼerãha Ñandejárape. Ha umi ánhel oipytyvõ chupekuéra otopa hag̃ua umi oikuaasévape Jehovápe. Ñande avei ikatu jajapo ko tembiapo, ha umi ánhel katuete ñanepytyvõta.

Péro, ¿mbaʼépa jajapóta umi ndohayhúiva Ñandejárape ñanemoprovlémarõ? ¿Ha ñandegueraháramo kárselpe? ¿Ñaneguenohẽnepa umi ánhel?... Ikatu, péro ndahaʼéi katuete ojapótava upéva.

¿Mbaʼépa heʼi ko ánhel Páblope?

Jahechamína peteĩ káso: Jesús disípulo hérava Pablo ojegueraha aja préso peteĩ várkope, ou peteĩ torménta ndevaíva. Upérõ umi  ánhel noguenohẽi chupe upégui. Síno peteĩ ánhel heʼi chupe: “Ani rekyhyje Pablo, nde ningo reñemboʼy vaʼerã César renondépe”. Ha upeichaite oiko, Páblope ojegueraha mburuvicha guasu Romagua rendápe opredika hag̃ua chupe. Umi ánhel oikuaa vaʼekue moõpa oĩ Pablo ha oipytyvõ chupe. Ñandéve avei ñanepytyvõta jajapóramo Ñandejára oipotáva (Hechos 27:23-25).

Péro koʼẽrõitéma umi ánhel ojapóta ótro tembiapo iñimportantetereíva: oipytyvõta Ñandejárape haʼe ohundi vove umi hénte añáme. Upérõ umi ndogueroviáiva oexistiha umi ánhel opilláta tuicha ojavyha (2 Tesalonicenses 1:6-8).

¿Mbaʼépa upéicharõ jajapo vaʼerã ñande?... Ñañemoĩ vaʼerã umi ánhel ládo, ha haʼekuéra katuete ñanepytyvõta. ¿Mbaʼéichapa ikatu jahechauka ñaimeha hendivekuéra?... Jajapo vaʼerã Jehová heʼíva, ha ñaipytyvõ ñande rapichápe ojapo hag̃ua avei upéicha.

Jaleemi koʼã téxtope mbaʼéichapa umi ánhel ikatu ñanepytyvõ: Salmo 34:7; Mateo 4:11; 18:10; Lucas 22:43 ha Hechos 8:26-31.