Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Ñaaprende Mboʼehára Guasúgui

 KAPÍTULO 35

Ñamanóramo ikatu jaikove jey

Ñamanóramo ikatu jaikove jey

ÑAMANÓRAMO, ¿oipotánepa Ñandejára jaikove jey? ¿Mbaʼépa nde repensa?... Peteĩ kuimbaʼe ivuénova hérava Job oguerovia vaʼekue upeichaha. Upéicha rupi oimoʼãrõ guare omanotamaha heʼi Jehovápe: “Nde cherenóita ha che rombohováita”. Péicha ohechauka Jehová omoingovetaha chupe ha ojaposeha voi upéva (Job 14:14, 15, ÑÑB).

Jesús ojogua Itúvape ha ñanepytyvõse avei. Peteĩ lepróso heʼírõ guare chupe: “Nde reipotáramo ningo ikatu chemonguera”, Jesús ombohovái chupe: “Si, romonguerase”, ha omonguera ko kuimbaʼépe (Marcos 1:40-42).

¿Mbaʼéichapa Jehová ohechauka vaʼekue ohayhuha mitãnguérape?

Jesús oaprende Itúvagui ohayhu vaʼerãha mitãnguérape. Yma Jehová omoingove jey vaʼekue mokõi mitãme iprofetakuéra rupive. Por ehémplo, Elías ojerure asy vaʼekue Jehovápe omoingove jeymi hag̃ua peteĩ kuñakarai membýpe, ha Jehová ojapo upéva.  Ko kuñakarai ningo imbaʼeporãiterei vaʼekue Elías ndive. Ñandejára ojevale vaʼekue avei proféta Eliséore omoingove jey hag̃ua ótro mitãme (1 Reyes 17:17-24; 2 Reyes 4:32-37).

Javyʼaite jaikuaágui Jehová ñanderayhuetereiha, ¿ajépa?... Ndahaʼéi jaikove ajánte imanduʼáva ñanderehe. Ñamano rire jepe ndahesaráiri ñandehegui. Upévare Jesús heʼi umi ivuéno ha iñeʼẽrendúva omanóramo jepe, Jehovápe g̃uarã haʼete ku oikovéva gueteri (Lucas 20:38). La Biblia ohechauka porã “ni ñemano, ni jeikove, [...] ni umi mbaʼe koʼág̃a oĩva koʼápe, ni umi mbaʼe oútava, [...] ndaikatumoʼãiha ñandepeʼa Ñandejára mborayhúgui” (Romanos 8:38, 39).

Oiméne nemanduʼa Jesús omboʼe hague mitãnguérape oikuaa hag̃ua Ñandejárape, péicha ohechauka Jehová ohayhuha umi mitãme. ¿Ha reikuaápa Jehová omeʼẽ hague podér Jesúspe omoingove jey hag̃ua umi mitãme?... Jahechamína Jesús omoingove jeýrõ guare Jairo rajýpe orekóva doce áño.

Jairo oiko vaʼekue hembireko ha itajýra peteĩmi ndive mar de Galilea ypýpe. Peteĩ díape Jairo rajy ou hasyete ha haʼe opilla ivaiha la isituasión. Jairo ohendúma kuri ojeʼeha Jesús ivaletereiha ha ikatuha omonguera umi hasývape. Upévare oho oheka chupe, ha otopa hese mar de Galilea kóstape haʼe omboʼe aja hína peteĩ hénte atýpe.

Jairo ohasa umi hénte mbytérupi, oñesũ Jesús renondépe ha heʼi chupe: ‘Che rajyʼi ningo oime hasyete, ¿ikatu piko reho remonguerami? Jahamíntena chendive’. Upepete Jesús osẽ oho hendive ha umi hénte osegi chupekuéra. Oho pukumívo hikuái ojotopa umi kuimbaʼéndi oúva Jairo rógagui, ha koʼãva heʼi Jáirope. “Nde rajy oime omanóma. ¿Maʼerã piko remolesta reíta Mboʼehárape?”.

 Jesús ohendu umi kuimbaʼe heʼíva ha oikuaágui mbaʼéichapa oñeñandúta Jairo, heʼi chupe: ‘Ani rekyhyje, ejerovia Ñandejárare ha nde rajyʼi oĩ porã jeýta’. Og̃uahẽvo Jairo rógape otopa umi hénte hasẽmbajoa. Haʼekuéra ombyasyeterei pe mitakuñaʼi omano haguére. Péro Jesús heʼi chupekuéra: “Anivéna penerasẽ, haʼe nomanói, okénte hína”.

Umi hénte ohendúvo upéva oñepyrũ opukapa ha oñembohory hese oikuaágui pe mitãkuñaʼi omanóma hague. ¿Mbaʼére Jesús heʼi Jairo rajy okenteha?... ¿Mbaʼépa oiméne omboʼese raʼe umi héntepe?... Oipota oikuaa hikuái ñamanóramo haʼete ku jake hatãva hína. Omboʼese chupekuéra Jehová podér rupive ikatuha omoingove peteĩ tapichápe ku omombayrõguáicha peteĩ okévape.

Jesús omoingove jey Jairo rajýpe, ¿mbaʼépa ñanemboʼe upéva?

Jesús heʼi umi héntepe osẽmba hag̃ua okápe, péro opyta hendive pe mitãkuñaʼi sy ha túva, avei apóstol Pedro, Santiago ha Juan. Upéi oike pe mitãkuñaʼi oĩháme, ojagarra ipógui ha heʼi chupe: “Mitãkuña, ¡epuʼã!”. Upepete pe mitãkuñaʼi opuʼã oguata. Isy ha itúva ovyʼaiterei ha ni ndogueroviaséi la ohecháva (Marcos 5:21-24, 35-43; Lucas 8:40-42, 49-56).

 Epensamína ko mbaʼére: Jesús ningo omoingove jey Jairo rajýpe, ¿ikatúnepa upéicharõ omoingove jey avei ótrope?... ¿Ndépa reguerovia ojapotaha?... Ojapóta. Jesús voi heʼi vaʼekue: ‘Og̃uahẽta pe óra opavave oĩva pe sepultúrape ohendutaha che ñeʼẽ ha osẽta’ (Juan 5:28, 29).

¿Ndépa ere Jesús omoingovese jeyha umi omano vaʼekuépe?... Jaikuaa hag̃ua ojaposépa upéva, jahechamíta mbaʼépa oiko ohórõ guare peteĩ siuda héravape Naín. La oiko vaʼekue upépe ohechaukáta ñandéve mbaʼépa haʼe oñandu ohechávo umi ihentemanóva hasẽ ha oñembyasyha.

Upérõ, peteĩ hénte aty osẽ ohóvo pe siudágui oñotỹ hag̃ua peteĩ mitãrusúpe. Pe mitãrusu sy oñeñandu vaieterei anga omano haguére imemby peteĩmi. Hiʼarive ndaʼareguasúi omano hague iména. Heta ivesíno oho hendive péro mbaʼeve nokonsolái chupe.

Kavalete ningo upe díape Jesús ha idisipulokuéra oho Naínpe. Ha og̃uahẽvo hikuái pe siudápe otopa pe hénte atýre. Jesús ombyasyeterei ohechávo mbaʼeichaitépa oĩ pe kuñakarai ha oipytyvõse chupe.

Upévare mborayhúpe heʼi chupe: “Anivéna nerasẽ”. Heʼívo upéva enterovéva omaña porã hese. Katuete ningo umi hénte oñeporandujoa hikuái mbaʼépa Jesús ojapóta oñembojávo pe omanóva oĩháme. Upéi Jesús heʼi: “Mitãrusu, che haʼe ndéve: ¡Epuʼã!”. Upepete pe mitãrusu opuʼã ha oñepyrũ oñeʼẽ (Lucas 7:11-17).

Oiméne ovyʼaite raʼe pe kuñakarai. ¿Mbaʼéichapa nde reñeñandúne peteĩ rehayhúva oikove jeýramo?... Ko mbaʼe ojapo vaʼekue Jesús ohechauka porã ñanderayhu ha ñanepytyvõseha, ¿ajépa?...  Epensamína mbaʼeichaitépa javyʼáta oikove jey vove umi omano vaʼekue ha jajotopa hendivekuéra Ñandejára múndo pyahúpe (2 Pedro 3:13; Apocalipsis 21:3, 4).

Ko kuñakarai memby oikove jey, ¿mbaʼépa ohechauka upéva?

Umi persóna oikove jeýva apytépe oĩta ñane konosído ha heta mitã avei. Ha ndahaʼéi ku ndajaikuaamoʼãvéimava chupekuéra, nemanduʼáne Jairo oikuaa hague itajýrape oikove jeýrõ guare. Oĩta avei umi ymaitereíma omano hague, péro ohasárõ jepe heta tiémpoma, Ñandejára ndahesaráiri chuguikuéra.

Javyʼaite jaikuaágui Jehová ha Jesús ñanderayhuetereiha, ¿ajépa?... Haʼekuéra ningo oipota jaikove opa ára g̃uarã ha ndahaʼéi sapyʼaiténte.

Jaleemína koʼã téxto ohechaukáva umi omano vaʼekue oikove jeytaha: Isaías 25:8; Hechos 24:15 ha 1 Corintios 15:20-22.