Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Ñaaprende Mboʼehára Guasúgui

 KAPÍTULO 9

Ñañehaʼãkena ani jajapo mbaʼeve ivaíva

Ñañehaʼãkena ani jajapo mbaʼeve ivaíva

¿OĨMAPA heʼíva ndéve rejapo hag̃ua peteĩ mbaʼe vai?... ¿Heʼípa ndéve ndepyʼajúguinte nderejaposeiha? ¿Térã ndaivairiha upe ojeruréva ndéve ha revyʼataha rejapóramo?... Péicha heʼíva nemboliga hína rejapo hag̃ua umi mbaʼe noĩporãiva.

¿Mbaʼépa rejapóta oĩramo nemboligáva mbaʼe vairã? ¿Iporãtapa rejapóramo?... Jehovápe nombovyʼamoʼãi upéva. Péro, ¿reikuaápa mávapepa ombovyʼáta?... Satanáspe.

Satanás ningo Ñandejára enemígo hína, ha ñane enemígo avei. Ñande ndaikatúi jahecha chupe, péro haʼe ñanderecha. Peteĩ jey, Satanás omboliga Jesúspe ojapo hag̃ua ivaíva. Jahechamína mbaʼépa Jesús ojapo upérõ guare. Péicha jaikuaáta mbaʼépa jajapo vaʼerã oĩ jave ñanemboligáva mbaʼe vairã.

¿Mbaʼérehepa oiméne imanduʼa Jesús ojevautisárõ guare?

Jesús ojapose opa mbaʼe Itúva oipotáva ha upévare ojevautisa rrío Jordánpe. La Biblia heʼi upérõ “pe yvága ojavri” hague Jesúspe g̃uarã (Mateo 3:16). Amalisia upéva heʼise Jesús oñepyrũ hague imanduʼa umi mbaʼe ohasa vaʼekuére Itúva ndive yvágape.

Ojevautisa riremi, Jesús oho peteĩ desiértope opensa hag̃ua umi mbaʼe ojapo vaʼekuére yvágape.  Cuarenta día aja ndoʼúi mbaʼevete, upévare iñembyahyietereíma. Ha Satanás oaprovecha upéva omboliga hag̃ua chupe pono iñeʼẽrendu.

¿Mbaʼéichapa Satanás omboliga Jesúspe ojapo hag̃ua mbaʼe vai?

Satanás heʼi Jesúspe: “Ndéramo añete Ñandejára raʼy, ejapo koʼã itágui pan”. ¡Katuete Jesús hoʼusetereíne raʼe peteĩ pan pedasomi jepe! Péro, ¿ikatúnepa haʼe ojapo umi itágui pan?... Haʼe Ñandejára raʼy ha ipoderóso, upévare ikatu vaʼekue ojapo.

¿Mbaʼépa rejapo vaʼerãmoʼã Satanás heʼírire ndéve upéicha?... Jesús iñembyahýima kuri, ¿naiporãmoʼãi piko upéicharõ una vemi jepe ojapóramo upéva?... Jesús oikuaa porã ndoiporúi vaʼerãha ijupe g̃uarã pe podér Jehová omeʼẽva chupe, síno oiporu vaʼerãha oipytyvõ hag̃ua hapichakuérape oñemoag̃ui hag̃ua Itúvare.

Ojapo rangue Satanás heʼíva, Jesús heʼi chupe Ñandejára Ñeʼẽ heʼiha: “Yvypóra noikotevẽi pan rehe añónte oikove hag̃ua, oikotevẽ guei opaite mbaʼe Jehová heʼívare”. Jesúspe g̃uarã iñimportanteve ombovyʼa Jehovápe, oreko rangue hoʼu vaʼerã.

Upéi Satanás otantea jey. Ogueraha Jesúspe Jerusalénpe ha ohupi chupe pe témplo murálla ári. Upéi heʼi chupe: ‘Oiméramo nde Ñandejára raʼy, ejepoi koʼágui. Ñandejára Ñeʼẽme heʼi Haʼe omandataha  hiʼanhelkuérape oñangareko hag̃ua nderehe pono ojehu ndéve mbaʼeve’.

¿Mbaʼérepa heʼi upéva Satanás?... Haʼe oipota Jesús ojapo peteĩ mbaʼe ipeligrósova. Péro Jesús nopenái jey hese. Heʼi chupe: “Ñandejára Ñeʼẽme ojehai avei: ‘Ndovaléi rejapo mbaʼeve redesafia hag̃ua nde Jára Jehovápe’”. Jesús oikuaa ndovaleiha ojapeligra ohecha hag̃ua osalvátapa chupe Ñandejára.

Péro Satanás hovaʼatã ha ndohejái Jesúspe. Upéi ogueraha chupe peteĩ sérro ijyvatetereívape, ha ohechauka Jesúspe umi goviérno oĩva guive ko yvy ape ári, ha umi mbaʼe porãita oĩva pype. Ha heʼi chupe: “Koʼã mbaʼe ameʼẽmbaitéta ndéve reñesũramo che renondépe ha una vemi jepe chemombaʼeguasu”.

Epensamína Satanás heʼi vaʼekuére. ¿Añetépa imbaʼepaite umi goviérno oĩva ko múndope?... Jesús ndeʼíri vaʼekue ndahaʼeiha, ha Satanás ijapúrire katuete Jesús heʼíta oñeʼẽreiha. Upéicharõ, Satanás hína upe ogovernáva térã omandáva ko múndope. La Biblia heʼi voi Satanás haʼeha “ko múndo ruvicha” (Juan 12:31).

¿Mbaʼérepa Satanás ikatu kuri heʼi Jesúspe omeʼẽtaha chupe umi goviérno?

¿Mbaʼépa rejapóne Satanás heʼíramo omeʼẽtaha ndéve peteĩ mbaʼe remombaʼeguasúramo chupe?... Jesús oikuaa ndovaleiha oadora Satanáspe omeʼẽtaramo jepe chupe heta mbaʼe. Upévare heʼi chupe: ‘¡Tereho koʼágui Satanás! Ñandejára Ñeʼẽme heʼi voi: “Jehovápe añoite readora vaʼerã, ha chupe añoite reservi vaʼerã”’ (Mateo 4:1-10; Lucas 4:1-13).

¿Mbaʼépa rejapóta ijetuʼu jave neñeʼẽrendu?

Sapyʼánte ndéve avei ikatu ijetuʼu rejapo hag̃ua umi mbaʼe porã. ¿Mbaʼéicha javépa?... Ñamoĩ chupe nde sy ojapoha peteĩ tórta hetereíva, ha heʼi ndéve ani hag̃ua reʼu ni michĩmi rekaru mboyve. Péro nde ndevareʼaitereíma ha reʼuse michĩmi jepe ¿Rejapótapa nde sy heʼíva?... Satanás ndoipotái neñeʼẽrendu.

 Péicha jave iporãta nemanduʼa Jesúsre: haʼe iñembyahýi vaʼekue avei, upéicharamo jepe oikuaa iñimportanteveha ojapo Itúva heʼíva. Nde ikatu rehechauka rejoguaha Jesúspe, rejapóramo nde sy heʼíva.

Sapyʼánte ikatu avei nde rapichakuéra omeʼẽ ndéve peteĩ pastílla, ha heʼi guaʼu ndéve revyʼataha reʼúramo. Péro pe pastílla ikatu dróga hína, ha upéva nembohasykuaa ha  ikatu voi ndejuka. Ikatu avei oĩ omeʼẽséva ndéve sigarríllo ha heʼi ndéve: “¡Epitákatuna! Anichénengo rekyhyje”. Péro pe sigarríllo nembohasýta avei. Upévare, ¿mbaʼépa rejapóta?...

Péicha jave iporã avei nemanduʼa Jesús rehe. Satanás omboliga vaʼekue chupe ojepoi hag̃ua yvatégui, péro péicha ojapóramo ojapeligráta kuri. Ha nde, oĩramo nemboligáva rejapo hag̃ua peteĩ mbaʼe ndeperhudikátava, ¿rejapónepa?... Jesús nohendúi vaʼekue Satanáspe. Upéicha avei, oĩramo nemboligáva rejapo hag̃ua mbaʼe vai, aníkena rejapo.

¿Mbaʼérepa ivai jaiporu taʼanga jaadora hag̃ua Ñandejárape?

Ikatu oĩ heʼíva ndéve readora hag̃ua peteĩ taʼangápe, péro Ñandejára heʼi ndovaleiha (Éxodo 20:4, 5). Upéva ikatu oiko nderehe eskuélape ha ikatu ojeʼe voi ndéve reñemosẽtaha eskuélagui nderejapóiramo. ¿Mbaʼépa rejapóta péicha jave?...

Ndahasýi jajapo iporãva enterovéva ojapóramo. Péro oĩrõ ñanemboligáva mbaʼe vairã, ijetuʼu jajapo iporãva. Umi mbaʼe vai apoha ikatu heʼi ndéve: “Ndahaʼéiko la ivaietereíva la rojapóva”. Péro iñimportanteve hína Ñandejára opensáva haʼe oikuaágui hetave mbaʼe ñandehegui.

Upévare, oĩramo jepe ñanemboligáva mbaʼe vairã, ni mbaʼevéicharõ nañapenái vaʼerã hesekuéra. Jajapóramo Ñandejára heʼíva ñambovyʼáta chupe, ha ndahaʼéi Satanáspe.

Koʼã téxto nepytyvõta ani hag̃ua rejapo umi mbaʼe Jehová ndoipotáiva: Salmo 1:1, 2; Proverbios 1:10, 11; Mateo 26:41 ha 2 Timoteo 2:22.