Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Biblia Internétpe | ÑANDEJÁRA ÑEʼẼ MATEO - APOCALIPSIS

Tito 1:1-16

1  Che, Pablo, Ñandejára rembiguái, aservíva Jesucristo apóstolramo*, ajerovia ojapoháicha umi tapicha Ñandejára oiporavo vaʼekue, ha aikuaa porã pe añetegua, upévare amombaʼeguasu Ñandejárape che pyʼaite guive.  Koʼã mbaʼe oñemopyenda ko esperánsape: jahupytytaha jeikove opaveʼỹva. Ha Ñandejára ikatuʼỹva ijapu oprometéma vaʼekue upéva ymaite guive.  Pe tiémpo omoĩ vaʼekuépe haʼe oikuaauka iñeʼẽ pe predikasión rupive; ha Ñandejára, haʼéva ñande Salvadór omoĩ che kárgope apredika hag̃ua upéva.  Amondo ko kárta Títope, che raʼy ahayhuetéva chemoirũva ñande Ruvicha servísiope: Aipotaite ñande Ru Ñandejára, ha ñande Salvadór Cristo* Jesús taimbaʼeporã* nendive ha tomeʼẽ ndéve pyʼaguapy.  Roheja kuri Crétape ikatu hag̃uáicha rekorrehi umi mbaʼe oĩ vaíva ha renombra hag̃ua ansiáno* káda siudápe, haʼéma haguéicha ndéve.  Pe ansiáno* ndorekói vaʼerã mbaʼeve ivaíva ojeʼe vaʼerã hese, peteĩnte hembireko vaʼerã, ifamiliakuéra ojerovia vaʼerã, ha ndojeʼéi vaʼerã hesekuéra ndahekoporãiha ni oikoha iñakãre.  Pe ansiáno ningo Ñandejára siérvo* ha ndorekói vaʼerã mbaʼeve ivaíva ojeʼe vaʼerã hese, noñemohatãi vaʼerã haʼe heʼívapente, ndaipochyreíri vaʼerã, ndovaléi ikaʼu, ni omaltrata ótrope, ndovaléi avei ojaprovechase ótrore ha ipokarẽ itaryrýigui.  Upéva rangue, orresivi porã vaʼerã enterovépe, ohayhu vaʼerã iporãva, iñakãguapy vaʼerã, hekojoja vaʼerã, ojepytaso vaʼerã Ñandejára ykére toiko la oikóva, ha ojejokokuaa vaʼerã.  Oñakarama hatã vaʼerã pe ñeʼẽ añeteguáre oporomboʼe jave, ikatu hag̃uáicha oiporu umi ñeʼẽ porã oñemoñeʼẽvo ótrope ha avei okorrehívo umi oñemoĩvape upe ñeʼẽre. 10  Oĩ heta kuimbaʼe oikóva iñakãre, oñeʼẽmba reíva, ha oporombotavýva, koʼýte umi kuimbaʼe oipotáva ojejapo sirkunsisión. 11  Koʼãva ogueraha vaíma heta família kompletoite, ha pokarẽme ojaprovechase rupi hesekuéra omboʼe umi mbaʼe ndovaléiva, upévare tekotevẽ rejurumboty chupekuéra. 12  Ijapytepekuéra voi peteĩ proféta* heʼi vaʼekue: “Umi Cretagua ningo katuete ijapu, ojogua umi mymba ñarõme, iñaragán ha okaruhárente voi oiko”. 13  Upéva ningo añete. Upéicha rupi, esegíkena emongavaju chupekuéra, ikatu hag̃uáicha ijerovia mbarete hikuái, 14  ha ani opena umi kuénto japúre omboʼéva umi hudío, ni umi mandamiéntore oúva umi kuimbaʼe omboykévagui pe añetegua. 15  Opa mbaʼe ipotĩ umi ipotĩvape g̃uarã, péro umi ikyʼáva ha ndojeroviáivape g̃uarã mbaʼeve naipotĩri. Añetehápe haʼekuéra opensa umi mbaʼe kyʼáre ha ikonsiénsia* ikyʼa avei. 16  Haʼekuéra heʼi opavave renondépe oikuaaha Ñandejárape, péro umi mbaʼe ojapóva ohechauka ndoikuaaseiha chugui mbaʼeve. Koʼãva ndovaléi ojapo hag̃ua mbaʼeve iporãva, naiñeʼẽrendúi ha ombojeguaru Ñandejárape.

Nóta

Ehecha “Apóstol”, diksionário oĩva ko Bíbliape.
Ehecha “Cristo”, diksionário oĩva ko Bíbliape.
Térã: “tohechauka ndéve mbaʼeporã ijojahaʼỹva”. Ehecha “Mbaʼeporã Ijojahaʼỹva”, diksionário oĩva ko Bíbliape.
Ehecha “Ansiáno”, diksionário oĩva ko Bíbliape.
Griégope heʼi: “Oĩramo peteĩ kuimbaʼe”.
Térã: “majordómo”, ehecha diksionário oĩva ko Bíbliape.
Ehecha “Profesía”, diksionário oĩva ko Bíbliape.
Ehecha “Konsiénsia”, diksionário oĩva ko Bíbliape.