Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Biblia Internétpe | ÑANDEJÁRA ÑEʼẼ MATEO - APOCALIPSIS

Santiago 5:1-20

5  Koʼág̃a pehendumi peẽ pendepláta hetáva, peñembyasy ha pejaheʼóke umi mbaʼe vai oútavare pende ári.  Pene mbaʼerepy oñembyaipa ha pende ao katu hoʼupa vícho.  Pende pláta ha pende óro oñerrumbrapa, ha pe iñerrúmbre ohechaukáta peẽ pejavyha ha okarúta pende roʼóre. Umi mbaʼe pembyaty vaʼekue ojoguáta tatápe umi ára pahápe.  ¡Péina! Pe pláta ndapepagái vaʼekue umi chokokuépe, omonoʼõ vaʼekue pende kokuépe, osegi osapukái asy. Ha Jehová*, pe ehérsito yvagapegua ruvicha, ohendúma umi chokokuépe ojerure asýrõ chupe oipytyvõmi hag̃ua chupekuéra.  Peẽ peiko porã ha pemeʼẽ pendejupe gústo ko yvy ape ári. Pene korasõ ojogua umi mymba oñemongyrávape og̃uahẽ meve pe ára oñekarnea hag̃ua.  Peẽ pekondena ha pejuka voi pe hekojojávape. Ha haʼe oñemoĩ hína penderehe.  Upéicharõ che ermanokuéra, penepasiénsiakena og̃uahẽ meve pe tiémpo ñande Ruvicha oĩ* hag̃ua. ¡Péina! Pe oñemitỹva ohaʼarõ meme pe kóga porãite omoheñóiva pe yvy, haʼe ipasiénsia ohaʼarõ hag̃ua pe ama oúva voive ha avei pe ama oúva upe rireve.  Peẽ avei penepasiénsiakena; pemombarete pene korasõ, hiʼag̃uimbaitéma rupi pe tiémpo ñande Ruvicha oĩ hag̃ua.  Che ermanokuéra, ani pejeplagea pene ermáno kóntrape, ani hag̃ua pejehusga. ¡Péina! Pe Hués oñemboʼýma hína okẽ renondépe. 10  Che ermanokuéra, pesegíkena pe ehémplo iporãva omoĩ vaʼekue umi proféta* oñeʼẽva Jehová rérape. Haʼekuéra heta ohasa asy ha ipasiénsia. 11  ¡Péina! Ñande jaʼe ovyʼaitereiha umi oaguanta vaʼekue heta mbaʼe ijetuʼúva. Peẽ pehendu Job oaguanta hague heta mbaʼe, ha peikuaa avei umi mbaʼe porã Jehová omeʼẽ vaʼekue chupe. Upéva ohechauka Jehová ñanderayhuetereiha ha avei ñandeporiahuverekoha. 12  Péro koʼýte che ermanokuéra, anive pehura: tahaʼe yvágare, yvýre térã ótro huraméntore. Upéva rangue, pejéramo pejapotaha peteĩ mbaʼe, pejapo vaʼerã, ha pejéramo ndapejapomoʼãiha, anítei pejapo. Cháke upeichaʼỹrõ Ñandejára pendehusgáta. 13  ¿Oĩpa ohasa asýva pende apytépe? Toñemboʼe meme. ¿Oĩpa ovyʼáva? Topurahéi sálmo ombotuicha hag̃ua Ñandejárape. 14  ¿Oĩpa hasýva pende apytépe? Tohenói umi ansiáno* kongregasionpeguápe*, ha haʼekuéra oñemboʼéta hese ha omonáta hese aséite Jehová rérape. 15  Ha pe ñemboʼe ojejapóva jerovia reheve omongueráta pe hasývape, ha Jehová omopuʼãta chupe. Avei oiméramo opeka raʼe, oñeperdonáta chupe. 16  Upéicharõ, pemombeʼupaitéke ojupe pende pekadokuéra ha peñemboʼe ojuehe ikatu hag̃uáicha pekuera. Peteĩ kuimbaʼe hekojojáva oñemboʼéramo, upe ñemboʼe oreko podér ha añetehápe ikatu oipytyvõ umi héntepe. 17  Elías ningo haʼe vaʼekue peteĩ yvypóra ñandeichaguánte avei, upéicharõ jepe haʼe oñemboʼe ipyʼaite guive ani hag̃ua oky, ha ndokýi tres áño ha seis mésere. 18  Upéi haʼe oñemboʼe jey, upévo pe yvágagui ou ama ha pe yvy omoheñói umi kóga. 19  Che ermanokuéra, pende apytépe oĩramo peteĩ ohejáva oñeguenohẽ chupe pe añetegua rapégui, ha ótro oipytyvõ chupe ou jey hag̃ua, 20  peikuaáke pe oipytyvõva peteĩ pekadórpe ojevy hag̃ua hape vaígui, osalvaha chupe ani hag̃ua omano* ha Ñandejára operdonataha ipekadokuéra.

Nóta

Ehecha Informasión Oĩvéva 1.
Griégope heʼi: “presénsia”, ehecha Informasión Oĩvéva 5.
Ehecha “Profesía”, diksionário oĩva ko Bíbliape.
Ehecha “Ansiáno”, diksionário oĩva ko Bíbliape.
Ehecha “Kongregasión”, diksionário oĩva ko Bíbliape.
Griégope heʼi: “osalváta hiʼálma”. Ehecha “Álma”, Informasión Oĩvéva 7A-pe.