Ehecha oĩva pype

Ehecha oĩva pype

Santiago 4:1-17

4  ¿Moõgui piko ou pe ñorairõ ha joavy oĩva pende apytépe? ¿Ndahaʼéi piko pende rete rembipota vaígui, oñorairõva hína pendepype?  Peẽ peipota péro ndapeguerekói. Pesegi pejojuka ha pendetaryrýi ha upéicharamo jepe ndaikatúi pehupyty mbaʼeve. Peẽ pesegi peiko vai ha peñorairõ. Ndapeguerekói, ndapejeruréi rupi Ñandejárape.  Pejerure jave noñemeʼẽi peẽme, pejerurégui mbaʼe vairã. Peẽ peiporuse umi mbaʼe pejeruréva pejapo hag̃ua pende rete rembipota vai.  Peẽ pemoakãratĩ hína Ñandejárape. ¿Ndapeikuaái piko jajogueraha porãramo ko múndondi* jaiko vaitaha Ñandejárandi? Upévare, entéro oikoséva ko múndo amígoramo, oiko hína Ñandejára enemígoramo.  ¿Térã piko peimoʼã Ñandejára Ñeʼẽ heʼi reinteha: “Pe envídia oĩva ñandepype, akóinte ñanemomýi jaipotave hag̃ua heta mbaʼe”?  Péro pe mbaʼeporã ijojahaʼỹva* oúva Ñandejáragui tuichave pe envídiagui. Upévare Ñandejára Ñeʼẽ heʼi: “Ñandejára oñemoĩ umi oñembotuichávare, péro imbaʼeporãiterei umi oñemomirĩva ndive”.  Upéicharõ, peñakarama hatãkena Ñandejárare; péro peñemoĩ mbaretéke pe Añáre* ha haʼe odiparáta pendehegui.  Peñemoag̃uíkena Ñandejárare, ha haʼe oñemoag̃uíta penderehe. Pemopotĩke pende po peẽ pekadór, ha pemopotĩke pene korasõ peẽ pendepyʼamokõiva.  Peẽ peñembyasy ha penerasẽ vaʼerã. Ndovaléi pepuka, síno pejaheʼo vaʼerã. Ndovaléi pevyʼa, síno peñeñandu vai vaʼerã. 10  Peñemomirĩkena Jehová* renondépe, ha haʼe penembotuicháta. 11  Che ermanokuéra, anive peñeʼẽ vai ojuehe. Pe oñeʼẽ vaíva iñermánore térã ohusgáva iñermánope, oñeʼẽ vai hína pe Léi* rehe ha ohusga pe Léipe. Upéicharõ, nde rehusgáramo pe Léipe, nerekumplivéima hína pe Léi, síno oiko ndehegui hués. 12  Oĩ peteĩ omeʼẽva Léi ha oporohusgáva, ikatúva oporosalva térã oporohundi. ¿Péro nde piko máva rehusga hag̃ua nde rapichápe? 13  Pende apytépe oĩ heʼíva: “Koestedía térã koʼẽrõ jaháta amo siudápe, japytáta upépe un áño, jajapóta negósio ha ñaganáta pláta”. 14  Péro ndapeikuaái mbaʼépa oikóta pendehegui koʼẽrõ. Peẽ ningo pejogua serrasónpe, oĩva sapyʼami ha upéi opáma. 15  Upéva rangue peje vaʼerã: “Jehová oipotáramo roikovéta ha rojapóta kóva térã amóva”. 16  Koʼág̃a katu peẽ peñemombaʼeguasu ha peñembotuicha umi mbaʼe pejaposévare. Péro ivaieterei péicha peñemombaʼeguasúramo. 17  Upéicharõ, oĩramo ojapokuaáva pe iporãva péro ndojapói, opeka hína.

Nóta

Ehecha “Múndo”, diksionário oĩva ko Bíbliape.
Ehecha “Mbaʼeporã Ijojahaʼỹva”, diksionário oĩva ko Bíbliape.
Térã: “Diablo”, ehecha diksionário oĩva ko Bíbliape.
Ehecha Informasión Oĩvéva 1.
Ehecha “Léi”, diksionário oĩva ko Bíbliape.