Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Biblia Internétpe | ÑANDEJÁRA ÑEʼẼ MATEO - APOCALIPSIS

Santiago 3:1-18

3  Che ermanokuéra, aníkena oĩ pende apytépe hetaiterei mboʼehára, jaikuaágui ñande jajehusga pohyivetaha.  Enterovéva ningo jajavy* heta vése; oĩramo ndojavýiva oñeʼẽ jave, upéva peteĩ kuimbaʼe perfékto ikatúva ipuʼaka avei hete kompletoitére.  Ñamoĩramo fréno umi kavaju jurúre oho hag̃ua hikuái ñande jaipotaha gotyo, ikatu ñaisãmbyhy hete kompletoite.  Ha pemañami avei umi várkore, jepe tuicha ha pe yvytu oipeju hatã, pe omaneháva ogueraha haʼe ohoseha gotyo ha oiporu peteĩ timón michĩmínteva upearã.  Upéicha avei, ñande juru* haʼe peteĩ párte michĩmínteva oĩva ñande retépe, ha upéicharamo jepe oñembotuichaiterei. Pepensamíntena, peteĩ tata pirirínte ikatu ohapypa peteĩ kaʼaguy guasu.  Ñande juru ningo ojogua tatápe. Ha ñande retépe, ñande juru henyhẽ mbaʼe vaígui, omongyʼa ñande rete kompletoite, ikatu voi ohundi ñande rekove jajepoiramoguáicha Gehénape*.  Yvyporakuéra ikatu odoma ha añetehápe odoma voi opaichagua mymba ñarõ, guyra, mymba otyryrýva ha mymba oĩva márpe.  Péro ijurúre ndaipóri ipuʼakáva. Ñande juru ndaikatúi jajoko, perhuísiomante ojapo ha henyhẽ venéno oporojukávagui.  Ñande juru rupive ñamombaʼeguasu ñande Ru Jehovápe*, ha upéicharamo jepe ñamaldesi avei kuimbaʼekuérape ojejapo vaʼekue “Ñandejára joguaháramo”. 10  Peteĩ jurúguinte osẽ ñeʼẽ porã ha ñeʼẽ vai. Che ermanokuéra, koʼã mbaʼe ningo ndoikói vaʼerã ñande apytépe. 11  Peteĩ yvúgui ndaikatúi osẽ y heʼẽva ha y iróva, ¿ajépa? 12  Che ermanokuéra, peteĩ ígo máta ndaikatúi hiʼa aseitúna, ni peteĩ parrálgui osẽ ígo, ¿ajépa? Péicha avei, ndaikatúi osẽ y heʼẽ, y heʼẽjukývagui. 13  ¿Mávapa iñarandu ha ontende heta mbaʼe pende apytépe? Péva hekoporã vaʼerã ikatu hag̃uáicha ohechauka ojapoha opa mbaʼe pyʼaporãme* iñarandu rupi. 14  Péro pene korasõ henyhẽramo envídia* ha joavýgui, ani peiko peñembotuicha penearandu haguére, pejapóramo upéva pendejapu hína. 15  Upeichagua arandu ndoúi yvágagui, síno ou ko múndogui*, umi oikóvagui hembipota vai rapykuéri, ha umi demoniokuéragui*. 16  Oĩháme envídia ha joavy, upépe oĩ avei sarambi ha opa mbaʼe vai. 17  Pe persóna orekóva arandu oúva yvágagui, tenondete hekopotĩ, upéi ipyʼaguapy, noñemohatãi haʼe heʼívapente, ikyreʼỹ iñeʼẽrendu hag̃ua, oiporiahuverekoiterei hapichápe, henyhẽ tembiapo porãgui, otrata enterovépe peteĩchante, ha ndahovamokõiri. 18  Avei umi hénte ojogueraha porãva ótrondi oñehaʼã hína oĩ hag̃ua pyʼaguapy, ha upéicha rupi haʼekuéra ojapo iporãva.

Nóta

Griégope heʼi: “ñañepysanga”.
Griégope heʼi: “ñane kũ”.
Ehecha “Gehena”, Informasión Oĩvéva 9-pe.
Ehecha Informasión Oĩvéva 1.
Térã: “ndaipochyreiriha”.
Térã: “sélogui”.
Ehecha “Múndo”, diksionário oĩva ko Bíbliape.
Ehecha “Demónio”, diksionário oĩva ko Bíbliape.