Ehecha oĩva pype

Ehecha oĩva pype

Santiago 2:1-26

2  Che ermanokuéra, ¿peẽ piko pemombaʼeve peteĩme ha ótrope pemboyke, ha peje avei pejeroviaha ñande Ruvicha Jesucristo hekomimbipáva rehe?  Oúramo pende atyhápe peteĩ kuimbaʼe ikuãirũ de órova ha ijao porãva, ha ou avei peteĩ imboriahúva ha ijao kyʼáva,  peẽ pemombaʼeve pe oñemonde porãvape ha peje chupe: “Eguapýna koʼápe ko lugár iporãvévape”. Péro peje pe imboriahúvape: “Nde, eñemboʼy pépe”, térã: “Eguapy pe yvýpe”.  Péicha pembotuichave peteĩme ha peapoʼi ótrope, ha oiko pendehegui hués aña.  Pehendumi che ermanokuéra pohayhuetéva, ¿Ñandejára piko ndoiporavói umi imboriahúva ko múndope g̃uarã ikatu hag̃uáicha ijerovia mbarete hikuái, ha oike pe Rréino haʼe opromete vaʼekuépe umi ohayhúvape chupe?  Péro peẽ peapoʼi umi imboriahúvape; umi iplátava katu pendejopy ha tyryryhápe pendegueraha umi trivunálpe, ¿ajépa?  Haʼekuéra otaky* pe téra porãite peẽ peguerahávare, ¿ajépa?  Upévare peẽ pekumplíramo pe Léi ijojahaʼỹva: “Rehayhu vaʼerã nde rapichápe nde rejehayhuháicha”, iporãiterei la pejapóva.  Péro pesegíramo pemombaʼeve peteĩme ha ótrope pemboyke, upéicharõ pepeka hína, ha pe Léi ohechauka porã peẽ haʼeha mbaʼe vai apoha. 10  Oĩramo okumplíva pe Léi kompletoite, péro nokumplíri peteĩ mandamiénto, opyta omboykeramoguáicha pe Léi kompletoite. 11  Ñandejára heʼi: “Ndovaléi reporomoakãratĩ”, ha heʼi avei: “Ndovaléi reporojuka”. Upéicharõ ndereikóiramo reporomoakãratĩ péro reporojuka, nerekumplíri pe Léi ha nde haʼe peteĩ mbaʼe vai apoha. 12  Pesegíkena peñeʼẽ ha peiko oikoháicha umi ojehusgátava pe Léi omeʼẽva liverta heʼiháicha. 13  Pe ndoiporiahuverekóiva hapichápe, ojehusgáta ojeporiahuverekoʼỹre chupe. Upéicharõ, pe oiporiahuverekóva hapichápe osẽ porãta ojehusga* vove chupe. 14  Che ermanokuéra, oĩramo heʼíva ojeroviaha, péro ndojapói tembiapo iporãva, ¿mbaʼépepa ideprovécho chupe? Peichagua jerovia ndaikatumoʼãi osalva chupe, ¿ajépa? 15  Peteĩ ermáno térã ermána ndaijaóiramo ha ndorekóiramo pe tembiʼu oikotevẽva upe díape g̃uarã, 16  ha peteĩva pende apytépe heʼi chupe: “Tereho pyʼaguapýpe ha hiʼãite chéve rekonsegi nde aorã ha ne rembiʼurã”, péro napemeʼẽi chupe oikotevẽva oikove hag̃ua, ¿mbaʼépe piko ideprovécho upéva? 17  Upéicha avei ñande jerovia omano hína ndajajapóiramo tembiapo iporãva. 18  Upéicharõ jepe oĩta heʼíva: “Nde rejerovia ha che ajapo tembiapo iporãva, ¿mbaʼéicha piko rehechaukáta rejeroviaha nderejapóiramo tembiapo iporãva? Che ahechaukáta ndéve che jerovia che rembiapo porã rupive”. 19  Nde reguerovia oĩha peteĩ Ñandejára, ¿ajépa? Iporã upéva. Péro umi demónio* oguerovia avei ha oryryipa okyhyjégui. 20  Ajépa ndevýro, ¿reipota piko ojehechauka ndéve pe jerovia ndovaleiha mbaʼeverã ndajajapóiramo tembiapo iporãva? 21  Ñande ru Abrahán oikuaveʼẽ itaʼýra Isaácpe pe altár* ári, ha Ñandejára heʼi hese hekojojaha* ohecha rire hembiapokue. 22  Nde rehecha haʼe ohechauka hague ijerovia hembiapo rupive, ha hembiapo rupi ojerovia hekoitépe. 23  Péicha oñekumpli Ñandejára Ñeʼẽ heʼíva: “Abrahán ojerovia Jehováre* ha upévare ojeʼe hese hekojojaha”, ha upéicha rupi ojeʼe hese haʼeha “Jehová amígo”. 24  Koʼág̃a peẽ pehecha peteĩ kuimbaʼére ojeʼetaha hekojojaha hembiapo rupive, ha ndahaʼéi ojerovia haguérente. 25  Upéicha avei oiko pe kuña rekovai Rahab kásope. Hese ojeʼe vaʼekue hekojojaha orresivi porã rupi umi mensahérope ha omondo chupekuéra ótro tapérupi. 26  Añetehápe, ñande rete omano ndajarrespiráiramo*, upéicha avei ñande jerovia omano hína ndajajapóiramo tembiapo iporãva.

Nóta

Ehecha “Blasfemia”, diksionário oĩva ko Bíbliape.
Griégope heʼi: “pe poriahuvereko ipuʼakáta pe huísiore”.
Ehecha “Demónio”, diksionário oĩva ko Bíbliape.
Ehecha “Altár”, diksionário oĩva ko Bíbliape.
Ehecha “Hekojojáva Ñandejára Renondépe”, diksionário oĩva ko Bíbliape.
Ehecha Informasión Oĩvéva 1.
Griégope heʼi: “espirituʼỹre”.