Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Biblia Internétpe | ÑANDEJÁRA ÑEʼẼ MATEO - APOCALIPSIS

Romanos 8:1-39

8  Upéicharõ, umi ojoajúva Cristo* Jesús rehe noñekondenái.  Pe espíritu sánto léi penemoingovéva pejoaju hag̃ua Cristo Jesús rehe, peneguenohẽ pekádo ha ñemano léi poguýgui.  Umi mbaʼe pe Léi* ndaikatúi vaʼekue ojapo yvyporakuéra iñimperfékto rupi, Ñandejára ojapo omboúvo Itaʼýrape yvypóraicha, ohundi hag̃ua pe pekádo, ha okondena yvyporakuéra pekádo.  Ñande ikatu ñakumpli umi mbaʼe hekopeguáva oĩva pe Léipe, ndajahejáivo ñande rete ipuʼaka ñanderehe, jaheja guei Ñandejára espíritu ñanesãmbyhy.  Umi ojaposéva hete rembipota, opensa meme hete rembipotáre; péro umi oikóva espíritu sánto* poguýpe, opensa meme umi mbaʼe espíritu sánto oguerohorývare.  Ñapensa meméramo ñande rete rembipotáre, ñamanóta. Péro ñapensa meméramo espíritu sánto oguerohorývare, jaikovéta ha ñaiméta pyʼaguapýpe Ñandejára ndive.  Ñande rete noĩri Ñandejára Léi poguýpe ha ndaikatúi voi ojapo upéva. Upévare, ñapensa meméramo ñande rete rembipotáre, oikóta ñandehegui Ñandejára enemígo.  Upéicha rupi, umi oikóva pekádo poguýpe ndaikatúi oĩ porã Ñandejára ndive.  Péro peẽ ndapeikói pekádo poguýpe, peiko guei pe espíritu oipotaháicha, oimérõ añete Ñandejára espíritu oĩ pende pype. Oĩrõ nopensáiva Cristo opensaháicha* katu, upéva ndahaʼéi Cristo mbaʼe. 10  Cristo oĩramo penendive, pende rete omanóramo jepe pekádo káusare, pe espíritu penemoingove, ojeʼe rupi penderekojojaha. 11  Ñandejára oiporu vaʼekue ijespíritu omoingove jey hag̃ua Cristo Jesúspe, ha upe espíritu oĩramo pende pype, haʼe oiporúta avei upéva pende rete* oikove hag̃ua. 12  Upéicharõ che ermanokuéra, ani jaheja ñande rete ipuʼaka ñanderehe ha ojapouka ñandéve haʼe oipotáva. 13  Peẽ peikóramo pende rete oipotaháicha, katuete pemanóta. Péro espíritu sánto rupive pejukáramo umi mbaʼe vai ojaposéva pende rete, peikovéta. 14  Enterove ohejáva Ñandejára espíritu oisãmbyhy chupe, haʼe hína Ñandejára raʼy. 15  Peẽme noñemeʼẽi peteĩ espíritu ojapóva pendehegui tembiguái ha penemongyhyje jeýva, oñemeʼẽ guei peteĩ espíritu ohechaukáva Ñandejára pendeadoptaha itaʼýraramo, ha upe espíritu rupive enterove jasapukái: ¡Abba*, che Ru! 16  Pe espíritu sánto ha umi mbaʼe ñañandúva, oikuaauka ñande haʼeha Ñandejára raʼy. 17  Ñande haʼéramo Ñandejára raʼy, jahupyty avei pe erénsia haʼe omeʼẽva. Ha omeʼẽta ñandéve pe erénsia omeʼẽva Crístope. Upéicharõ, koʼág̃a jahasa asýramo hendive, ñañembotuicháta avei hendive. 18  Upévare chéve g̃uarã umi jehasa asy ko tiempopegua ndahaʼeiete voi mbaʼeve, ñambojojáramo pe tiémpo oútavare. Upérõ Ñandejára ohechaukáta pe rregálo porãite jarresivítava. 19  Ñandejára rembiapokue ohaʼarõitereíma og̃uahẽ pe tiémpo Ñandejára raʼykuéra ojehechauka hag̃ua. 20  Hembiapokue ningo opyta vaʼekue ndovalevéi, ndahaʼéi haʼekuéra oipotágui, síno Ñandejára rupi. Péro haʼe omeʼẽ peteĩ esperánsa, 21  hembiapokue ojeitaha ñehundi poguýgui ha ohupytýta Ñandejára raʼykuéra liverta ijojahaʼỹva. 22  Ñande jaikuaa entéro hembiapokue koʼag̃aite peve ipyahẽ ha ohasa asyha oñondivepa. 23  Ha ndahaʼéi voi haʼekuérante, síno ñande avei ñanepyahẽ, jarekóramo jepe pe kosécha tenondegua haʼéva pe espíritu. Ha upe aja ñahaʼarõitereíma Ñandejára ñandeadopta itaʼýraramo jajei hag̃ua ñande retégui, Jesús opaga* rupi ñanderehe. 24  Ñande jajesalva jarekórõ guare esperánsa, péro oñemeʼẽ rire ñandéve pe ñahaʼarõva, ndaikatuvéima ñahenói chupe esperánsa. Añetehápe jarresivíramo pe ñahaʼarõva, ¿jasegíta piko ñahaʼarõ upéva? 25  Péro noñemeʼẽiramo ñandéve pe ñahaʼarõva, jasegi ñahaʼarõ meme ha ñaaguanta. 26  Upéicha avei ñanekangy jave pe espíritu ñanepytyvõ. Oĩ vése tekotevẽha ñañemboʼe, péro ndajaikuaái mbaʼépa jaʼéta ha ñanepyahẽ kirirĩháme. Upéicha jave pe espíritu ojerure ñanderehe. 27  Ha Ñandejára oipyguaráva ñande pyʼapy, oikuaa mbaʼépa ojerure pe espíritu sánto umi imarangatúva rehehápe, pe espíritu ojerurégui umi mbaʼe oĩ porãva Ñandejára rembipotándi. 28  Koʼág̃a jaikuaa Ñandejára omombaʼapoha entéro hembiapokue hekoitépe oñondivepa, ideprovécho hag̃ua umi ohayhúvape chupe. Enterove koʼãvape oñehenói haʼe oipota rupi. 29  Iñepyrũmby guive haʼe ohechakuaáma vaʼekue mávapepa oiporavóta ha odesidíma kuri umíva ojoguataha Itaʼýrape, haʼéva pe ijypykue iñermanokuéra apytépe. 30  Ha umi odesidi vaʼekuépe oiporavotaha, ohenói, umi ohenói vaʼekuépe heʼi hesekuéra hekojojaha*. Ipahápe haʼe ombotuicha umi haʼe heʼívape hekojojaha. 31  Upéicharõ, ¿mbaʼépa jaʼéta koʼã mbaʼére? Ñandejára oĩramo ñanendive, ¿máva piko oñemoĩta ñanderehe? 32  Haʼe, ni Itaʼýrare nahakateʼỹi vaʼekue, síno omeʼẽ enterove rehehápe, ¿ha piko mbaʼéicha pyʼaporãme nomeʼẽmoʼãi avei hendive entéro umi ótra kósa? 33  ¿Mávapa oñanimáta oakusa umi Ñandejára oiporavo vaʼekuépe? Ñandejára voi ningo heʼi hesekuéra hekojojaha. 34  ¿Mávapa okondenáta chupekuéra? Cristo Jesús haʼe hína pe omano vaʼekue, ha upéi oñemopuʼã jey omanóva apytégui. Haʼe oĩ Ñandejára deréchape ha ojerure avei ñanderehehápe. 35  ¿Mbaʼépa ñandepeʼáta Cristo mborayhúgui? ¿Jehasa asy, jepyʼapy, ñembyahýi, ñandeopívo, jajapeligra, oĩrõ ñandepersegíva térã ñandejukaséva? 36  Ojehaiháicha Ñandejára Ñeʼẽme: “Ore ningo nde puévlo ha upévare oĩ orejukaséva tódo el día. Oretrata hikuái haʼeramoguáicha ovecha oñekarneátava”. 37  Upéva rangue, opa koʼã mbaʼégui jajehekýi ha ndoikói ñanderehe mbaʼevete, pe ñanderayhúva rupive. 38  Che añetehápe aguerovia ni ñemano, ni jeikove, ni ánhel, ni goviérno, ni umi mbaʼe koʼág̃a oĩva koʼápe, ni umi mbaʼe oútava, ni umi podér, 39  ni umi mbaʼe oĩva yvate ni ipypukuhápe, ni mbaʼeveichagua kreasión, ndaikatumoʼãiha ñandepeʼa Ñandejára mborayhúgui, ojehechaukáva ñande Ruvicha Cristo Jesús rupive.

Nóta

Ehecha “Cristo”, diksionário oĩva ko Bíbliape.
Ehecha “Léi”, diksionário oĩva ko Bíbliape.
Ehecha “Espíritu Sánto”, diksionário oĩva ko Bíbliape.
Griégope heʼi: “ndorekóiva Cristo espíritu”.
Griégope heʼi: “pende rete omanóva”.
Péicha umi taʼýra heʼi vaʼekue itúvape ohechauka hag̃ua orrespeta ha ohayhuha chupe.
Térã: “ñanderreskata”. Ehecha “Rreskáte”, diksionário oĩva ko Bíbliape.
Ehecha “Hekojojáva Ñandejára Renondépe”, diksionário oĩva ko Bíbliape.