Ehecha oĩva pype

Ehecha oĩva pype

Romanos 7:1-25

7  ¿Ndapeikuaái piko che ermanokuéra pe kuimbaʼe oĩha Léi poguýpe oikove aja? (Añeʼẽ hína umi oikuaávape pe léi).  Por ehémplo, pe Léi heʼi pe kuña omendáva ojoajuha iménare haʼe oikove aja. Péro iména omanóramo, haʼe ojeíma iména léi poguýgui.  Upéicharõ iména oikove aja, haʼe omendáramo ótrore ojeʼéta hese omoakãratĩha chupe. Péro iména omanóramo ojeíma iléi poguýgui, ha omendáramo ótrore ndaikatúi ojeʼe hese omoakãratĩ hague chupe.  Upéicha avei peẽ peime vaʼekue pe Léi poguýpe che ermanokuéra, péro Cristo* sakrifísio rupive pejeíma ipoguýgui. Peẽ koʼág̃a Cristo mbaʼéma, pe oñemopuʼã vaʼekue omanóva apytégui, ikatu hag̃uáicha akóinte ñanerembiapo porã Ñandejára renondépe.  Yma jaikórõ guare ñane akãre, pe Léi ñanemomýi jajapo hag̃ua ñande rete rembipota vai, ha umi mbaʼe jajapóva ñandegueraha ñemanóme.  Péro koʼág̃a jajeíma pe Léi poguýgui ha ndaiporivéima pe ñaneñapytĩ vaʼekue, ikatu hag̃uáicha oiko ñandehegui Ñandejára rembiguái pe espíritu rupive ha ndahaʼevéima pe Léi rupive.  Upéicharõ, ¿mbaʼépa jaʼéta? ¿Oĩ vaípa* pe Léi? ¡Ni mbaʼevéicharõ! Añetehápe che ndaikuaái vaʼerãmoʼã pe pekádo, pe Léi nachepytyvõirire. Por ehémplo, che ndaikuaái vaʼerãmoʼã mbaʼépa pe taryrýi ndojeʼéirire pe Léipe: “Ndovaléi ndetaryrýi”.  Pe pekádo katu ojevale pe mandamiéntore omoheñói hag̃ua che pype opaichagua taryrýi. Péro Leiʼỹre, pe pekádo omano.  Añetehápe, oĩ mboyve pe Léi che aikove vaʼekue, upéi og̃uahẽvo pe mandamiénto pe pekádo oikove jey, péro che amano. 10  Ha upéicha pe mandamiénto omeʼẽ rangue chéve jeikove, chejuka. 11  Pe pekádo ojevale pe mandamiéntore, chembotavy ha chejuka hag̃ua. 12  Pe Léi katu imarangatu ha pe mandamiénto imarangatu, ihústo ha oĩ porã. 13  ¿Upéicharõ piko amano ajapo rupi iporãva? ¡Ni mbaʼevéicharõ! Pe pekádo ningo la chejukáva. Peteĩ mbaʼe porã rupive pe pekádo chegueraha ñemanóme, péicha ojekuaa mbaʼépa hína pe pekádo. Ha pe Léi ohechauka pe pekádo ivaietereiha. 14  Ñande jaikuaa pe Léi Ñandejára mbaʼeha*, péro che yvypórante, añevende vaʼekue pekádo poguýpe. 15  Che nantendéi la ajapóva, ajaposéva ndajapói, upéva rangue ajapo umi mbaʼe chembojeguarúva. 16  Péro ajapóramo umi mbaʼe ndajaposéiva, upéva ohechauka apensaha Ñandejára Léi iporãitereiha. 17  Koʼág̃a katu ndahaʼevéima che la ajapóva upéva, síno pe pekádo oĩva che pype. 18  Aikuaa che pype, che rete imperféktope, ndaiporiha mbaʼeve iporãva, chéngo ajapose iporãva péro ndaikatúi ajapo. 19  Umi mbaʼe porã ajaposéva ndajapói, péro umi mbaʼe vai ndajaposéiva, umíva katu ajapo meme. 20  Koʼág̃a ajapóramo umi mbaʼe ndajaposéiva, ndahaʼevéima che la ajapóva, síno pe pekádo oĩva che pype. 21  Che ajuhu ko léi che kásope: ajapose jave iporãva, pe ivaíva oĩ chendive. 22  Añetehápe, che pyʼaite guive aguerohory Ñandejára Léi, 23  péro ahecha che retépe oĩha ótra léi, oñorairõva Ñandejára Léi ndive oĩva che akãme, ko léi haʼe hína pe pekádo oĩva che retépe ha cheguerekóva ipoguýpe. 24  ¡Aichejáranga che! ¿Máva piko chesalváta ko che retégui, chegueraháva hína ñemanóme? 25  ¡Aagradese Ñandejárape, ñande Ruvicha Jesucristo rupive! Upéicha umi mbaʼe apensáva oĩ Ñandejára Léi poguýpe, péro che rete oĩ pekádo léi poguýpe.

Nóta

Ehecha “Cristo”, diksionário oĩva ko Bíbliape.
Griégope heʼi: “haʼépa pekádo”.
Griégope heʼi: “pe Léi haʼeha espirituál”.