Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Biblia Internétpe | ÑANDEJÁRA ÑEʼẼ MATEO - APOCALIPSIS

Romanos 6:1-23

6  Upévare, ¿mbaʼépa jaʼéta? ¿Jasegíta piko japeka jaikuaágui Ñandejára imbaʼeporãitereiha* ñanendive ha ñaneperdonataha?  ¡Ni mbaʼevéicharõ! Ñande ningo jajeíma pekádogui, ¿mbaʼéicha piko upéicharõ jasegíta jaiko pekádo poguýpe?  ¿Térã piko ndapeikuaái enterove ñande jajevautisáva* Cristo* Jesúspe, jajevautisaha* avei ñamano hag̃ua haʼéicha?  Upéicharõ, jajevautisa rupi iñemanóme Ñandejára ñaneñotỹ hendive, ikatu hag̃uáicha ñande avei jaiko pe tekove pyahúpe, Cristo oikove jey haguéicha omanóva apytégui pe Túva podér rupive.  Ñande jajoaju hendive ñamanóvo haʼe omano haguéicha, ha katuete upéicha avei jajoajúta hendive jaikove jeývo, haʼe oikove jey haguéicha.  Jaikuaa ñande reko tuja opa hague oñemosaingóvo yvyráre Crístope, upévare ñande rete rembipota vai ndaipuʼakavéima ñanderehe, ha ndajaikovéima pekádo rembiguáiramo.  Pe omanóva ningo opagapáma ipekádore.  Ha ñamanóramo Cristo ndive, jaguerovia avei jaikotaha hendive.  Ñande jaikuaa koʼág̃a Cristo opuʼã rire omanóva apytégui, nomanomoʼãveimaha, ha pe ñemano ndaipuʼakavéima hese. 10  Haʼe omano peteĩ jey opa ára g̃uarã, oipeʼa hag̃ua yvyporakuéra pekádo, ha oikove ojapo hag̃ua Ñandejára rembipota. 11  Peẽ avei pepensa vaʼerã pemanomaha ha ndaikatuveimaha pepeka. Pepensa vaʼerã avei pende rekove ojeporutaha ojejapo hag̃ua Ñandejára oipotáva, peẽ haʼégui Cristo Jesús disípulo*. 12  Upéicharõ, ani peheja pe pekádo osegi ogoverna pende rete*, ani hag̃ua pejapo meme pende rete oipotáva. 13  Anive pemeʼẽ pende rete pekádope ojapo hag̃ua ivaíva. Upéva rangue peñemoĩ Ñandejára pópe, peikove jeyramoguáicha omanóva apytégui. Pemoĩ pende rete Ñandejára pópe ojapo hag̃ua iporãva. 14  Ani peheja pe pekádo ipuʼaka penderehe, peẽ napeiméigui Léi* poguýpe, síno mbaʼeporã ijojahaʼỹva poguýpe. 15  ¿Mbaʼépa jaʼevéta upéicharõ? ¿Japekátapa nañaiméi rupi Léi poguýpe, síno mbaʼeporã ijojahaʼỹva poguýpe? ¡Ni mbaʼevéicharõ! 16  Peẽ peikuaa akóinte peneñeʼẽrendúramo peteĩ tapichápe, peẽ haʼeha hembiguái. Upéicharõ, peẽ peikórõ pekádo rembiguáiramo pemanóta. Péro peikórõ Ñandejára rembiguáiramo ha peneñeʼẽrendu chupe, penderekojojáta. 17  Peẽ haʼe vaʼekue pekádo rembiguái, péro koʼág̃a peneñeʼẽrendu pende pyʼaite guive Ñandejárape ha pejapo meme haʼe penemboʼe vaʼekue. Upévare aagradese Ñandejárape. 18  Añetehápe, peẽ pejei rire pekádogui, oiko pendehegui hustísia rembiguái. 19  Pende rete ikangy rupi aiporu umi ñeʼẽ enterove ontendéva: koʼág̃a pemeʼẽ vaʼerã pende rete hustísia rembiguairã ikatu hag̃uáicha penderekopotĩ, yma pemeʼẽ haguéicha pende rete tekokyʼa* ha tembiapo vai rembiguairã ha pejapo ivaíva. 20  Peẽ haʼérõ guare pekádo rembiguái, napeiméi vaʼekue hustísia poguýpe. 21  ¿Mbaʼépa pehupyty rakaʼe pene rembiapokuére upe tiémpope? Umi mbaʼe koʼág̃a peguerotĩva, umíva oporogueraha rupi ñemanóme. 22  Péro koʼág̃a pejei pekádogui ha peiko Ñandejára rembiguáirõ, upévare pehupyty tekomarangatu ha ipahápe jeikove opaveʼỹva. 23  ¿Mbaʼéicha opaga ñandéve pe pekádo? Pekádo káusare ñamano. Péro Ñandejára orregala jeikove opaveʼỹva ñande Ruvicha Cristo Jesús rupive.

Nóta

Térã: “ohechaukaha ñandéve mbaʼeporã ijojahaʼỹva”. Ehecha “Mbaʼeporã Ijojahaʼỹva”, diksionário oĩva ko Bíbliape.
Ehecha “Vautísmo”, diksionário oĩva ko Bíbliape.
Ehecha “Cristo”, diksionário oĩva ko Bíbliape.
Griégope heʼi: “jajevautisaha iñemanóme”.
Térã: “temimboʼe, alúmno”. Péicha oñehenói umi oaprendévape térã oñembokatupyrývape ojapo hag̃ua peteĩ mbaʼe.
Griégope heʼi: “pende rete omanóva”.
Ehecha “Léi”, diksionário oĩva ko Bíbliape.
Ehecha “Tekokyʼa”, diksionário oĩva ko Bíbliape.